Mateo 2
2
K'ãk'ãi k'awapataɨrãpa Jesú ak'ɨde chedada
1Jesú Belén p'uurude Judea tuade t'õside Herode chi Minachia K'awa bɨ apataɨ chi poro jũra jɨ̃parí jɨ̃ bɨ pasima.#2:1 Mãɨ Herode «chi Minachia K'awa bɨ» apachidama. Ichi abapuru nãma bɨma: Mateo 2:1-22; Luca 1:5. Waapẽarã poro jũra jɨ̃parí jɨ̃ p'anɨrã Herode apataɨ ichidepa unusidama. Mãɨ ewaride minachia k'awa berã ɨmata ochiaparidepa chesidama Jerusalén p'uurudea. Mãɨrãpa k'ãk'ãi ak'ɨ p'anɨnepa ne k'awapachidama. 2Mãɨne ãchia idisidama:
—Nãɨ tuade warra t'õsima judiorã poro jũra jɨ̃parí jɨ̃ bɨ pai k'orea. Ichi ¿sãma bɨma? Taipa ɨmata ochiaparieri ichi k'ãk'ãi unusidama.#Número 24:17. Nãmá che p'anɨma ichiá pia pedeadai k'orea.
3Mãɨ ũriside Herode k'ĩra piawẽa beesima, ichi k'aepẽra poro jũra jɨ̃parí jɨ̃ bɨ awara cheru pẽra. Ichiaba Herodepa k'ãre ooit'a k'awadawẽa p'anɨẽra Jerusalenepemarã sida ãarea k'ĩra piawẽa p'aneesidama. 4Mãɨne Herodepa ãarea p'aarerã chi mãɨrã chaarearã mãɨnepa Moisepa bɨda jarateapataɨrã t'ɨ̃ peek'oak'ari idisima:
—¿Sãma t'õi pasima Tachi Ak'õrepa Tachi K'aripaparí teai jara bada?#2:4 Tachi Ak'õrepa Tachi K'aripaparí teai jara bada. Mãɨ griego pedeade bɨ bɨma Cristo. Cristo t'ɨ̃wẽma. Jara bɨma «Tachi Ak'õrepa Tachi K'aripaparí teai jara bada» wa «Tachi Ak'õrepa Tachi Chipari teada». Arameo pedeade bɨ bɨma: Mesías.
5Ãchia p'anoosidama:
—Belén p'uurude nãɨ Judea tuade t'õi pasima. Mãɨ pedea k'orea Tachi Ak'õre pari pedeaparipa mãɨya jarasima:
6Belén p'uuru, pɨ ãpiipará bɨwẽma, chi waapẽarã Judadepema p'uuru k'aepẽra,
pɨdepa minachia k'awa bɨ aba chei pẽra.
Mãɨpa mɨ p'uuru Israel pia ak'ɨ baipɨ.#Mik'ea 5:2.
7Maapae Herodepa k'ãk'ãinepa k'awapataɨrã mẽra t'ɨ̃ peek'oasima. Ãchiá idisima chi k'ãk'ãi sãapae unusidaɨt'a, chi warra t'õna ewari k'awai k'orea. Mãɨne chi ewari jarasidama. 8Ãchi Belenea peerude Herodepa jarasima:
—Jãma wãnak'ari pia ididapade asima, mãɨ warra k'orea. Unusidara mɨá jarade chet'ɨ mɨ sida ichiá pia pedeade wãi k'orea.
9-10Herodepa mãɨya jarak'ari ãchi wãsidama. Maapae k'ãk'ãi ɨmata ochiaparieri unu p'anana mãicha unusidama. Mãɨ unusidaɨde minachia sõ arapá nɨp'aneesidama. Chi k'ãk'ãi ãchi naa wãpodok'ari aba chi warra chak'e bɨmá k'ĩrap'it'a bari k'obeesima. 11Tede eda wãutade warra chak'e chi nae María ome bɨ unusidama. Maapae bedabari k'op'aneenak'ari warra chak'ea pia pedeasidama. Maapae ãchicha ne yaapariidepema ewadak'ari ãchiichia warra chak'ea nee, ãp'o k'era mãɨnepa mirra k'era teasidama. 12Mãɨya bak'ari k'ãmok'araade Tachi Ak'õrepa jarasima waa wãpidaemaapa Herodemá. Mãɨneepuru o awaraɨde wãsidama ãchi tuadea.
Egito tuadea mĩruwãnana
13Ãchi wãnak'ari, Tachi Chiparipa ɨt'aripa peedapa k'ãmok'araade Josea chek'ari jarasima:
—Herodepa pɨ warra chak'e jɨrɨ bɨma peai k'orea. Mãɨ p'irabarik'ari pɨ warra chak'e mãɨnepa chi nae ateewãse Egito tuadea. Mãma beese aba mɨa jararumá.
14Ara mãɨne José p'irabarisima. María mãɨnepa chi warra jitak'ari, teamasi Egitodea wãsidama. 15Ãchi mãma p'aneesidama aba Herode piurudea. Mãɨya basima Tachi Chiparipa jarada jĩra. Ichi pari pedeaparipa nãɨya jarasima: «Mɨa mɨ warra t'ɨ̃sima Egitodepa chemẽrá».#Osea 11:1.
Herodepa Belenepema warrarã k'enapida
16Herodepa k'awasima k'ãk'ãinepa k'awapataɨrãpa ichi seasidaɨt'a. Mãɨpuru minachia k'ĩruuk'ari Belenepema warrarã waidi ãyo ume padawẽa be ãarea k'enapisima. Ara k'ait'apemarã sida k'enapisima. Mãɨya oosima k'ãk'ãinepa k'awapataɨrãpa k'ãk'ãi ununana ewari ichiá jaradada pẽra. 17Mãɨya jõmãɨrã sõp'ua p'aneesidama Tachi Ak'õre pari pedeaparí Jeremiapa jarada jĩra. Nãɨya jarasima:
18«Ramá p'uurude ũrisidama minachia sõp'ua jẽa bɨt'a mãɨnepa jɨ̃p'idabari jẽa bɨt'a.
Raquel ichi warrarã k'orea jẽa basima.
Ichi sõchupuriarãapade asima, ichi warrarã nea beda pẽra».#Jeremia 31:15.
José Egitodepa jĩruerã cheda
19Herode piuside José wapida Egitode basima. Mãɨne Tachi Chiparipa ɨt'aripa peeda k'ãmok'araade unupisima ichiá. 20Mãɨpa mãɨya jarasima:
—Pɨ warra pea k'ɨ̃ria p'anana piusidama. Mãɨpuru p'irabarik'ari pɨ warra chi nae ome mãicha ateewãse Israeldea.
21Ara mãɨne José p'irabarik'ari ichi warra chi nae ome Israeldea ateewãsima. 22Maamina Josepa k'awasima Arquelao ichi ak'õre Herode pari Judea tuadepema poro jũra jɨ̃parí jɨ̃ bɨ beesit'a. Mãɨ k'orea mãmá wãi wap'easima. Maamina Tachi Ak'õrepa ichiá k'ãmok'araade jarada pẽra Galilea tuadea wãsima. 23Mãma Nazaré p'uuru apataɨde beesima. Mãɨyasima Tachi Ak'õre pari pedeapataɨrãpa mãɨya jaradada jĩra: “Ichi Nazaredepemaane adaima”.#2:23 Ichi Nazaredepemaane adaima. Nazaré t'ɨ̃ hebreo pedeade nãɨya bɨ bɨma: Nezer. Mãɨ pedea jara k'ɨ̃ria bɨma «t'uk'uda». Isaía 4:2-6; 11:1-5; Jeremia 23:5-6; 33:14-18; Zak'aria 3:8-10; 6:9-13.
தற்சமயம் தேர்ந்தெடுக்கப்பட்டது:
Mateo 2: tdc
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
© (Active), Wycliffe Bible Translators, Inc. All rights reserved.