मत्ती 3
3
बप्तिस्मा देहुइया यूहन्नक प्रचार
मर्कूस १:१-८; लूका ३:१-१८; यूहन्ना १:१९-२८
1उह समयम बप्तिस्मा देहुइया यूहन्ना यहूदियक उजार ठाउँम अइल ओ असिक प्रचार करलग्ल, 2“आपन-आपन पापी मन परिवर्तन कैक परमेश्वरकठे घुमो, काकरकि स्वर्गक राज्य लग्घ आस्याकल।”#मत्ती ४:१७; मर्क १:१५ 3यशैया अगमवक्ता फे यिह यूहन्नक बारेम पैल्हहेँ असिक लिख्रख्ल:
“उजार ठाउँम चिल्ला-चिल्लाक
बोलुइयक आवाज सुन्जाइटा,
‘परमप्रभु आइक लाग उहाँक मार्ग तयार पारो,
उहाँक डगर स्वाझ बनाओ।’”#यशै ४०:३
4यूहन्ना ऊँटक भुट्लले बिनल लुगा लगाइँट्, ओ छालक पेटी बहन्ल रहँट्। हुँकहार खाना फटिङ्ना ओ सहत रलहन।#२ राज १:८ 5यरूशलेम सहर, सारा यहूदिया क्षेत्र ओ यर्दन लद्यक आञ्जरपाञ्जरसे मनै हुँकहार लग्घ आइलग्ल। 6ओ आपन-आपन पाप स्वीकार कर्टी यर्दन लद्यम यूहन्नसे बप्तिस्मा लेल।
7तर फरिसी ओ सदुकी समूहक बहुत मनैन बप्तिस्मा लिह आइट् देख्क यूहन्ना हुँकन कल, “टुह्र साँपन्हक सन्तान, परमेश्वरक दण्डसे उम्क टुँहन के कहल?#मत्ती १२:३४; २३:३३ 8यदि टुह्र आपन-आपन पापी मन परिवर्तन कैक परमेश्वरकठे घुमरलो कलसे, उह अनुसार चलो। 9‘हम्र अब्राहामक सन्तान हुइटी’ कटिम टुह्र उम्क पैबी कैक जिन सोँचो। मै टुँहन कहटुँ, परमेश्वर यी पत्थ्रमसे फे अब्राहामक लाग सन्तान उत्पन्न करसेक्ठ।#यूह ८:३३ 10रूख्वक जरीम कुह्रार परस्याकल। उहओर्से असल फारा नैफरैना सब रूख्वा काट्क आगीम फाँक्जउइया बा।#मत्ती ७:१९
11“टुह्र आपन-आपन पापी मन परिवर्तन कैक परमेश्वरकठे घुमरलो कना बात देखाइक लाग मै टुँहन पानीक बप्तिस्मा देहटुँ, तर म्वार पाछ अउइया टुँहन पवित्र आत्मा ओ आगीक बप्तिस्मा देह्हीँ। उहाँ महीसे शक्तिशाली बाट, मै त उहाँक जुत्तक टेनी छोर्ना योग्यक फे नैहुइटुँ। 12ओसैना सुपा उहाँक हाँठम बाटन। उहाँ अनाज ओसाक बखारीम ढरहीँ ओ भुसजुन कबु नैबुट्ना आगीम जरादेहीँ।”
येशूक बप्तिस्मा
मर्कूस १:९-११; लूका ३:२१-२२
13तब येशू गालीलमसे यूहन्नकठे बप्तिस्मा लिहक लाग यर्दन लद्यम अइल। 14तर यूहन्ना उहाँह र्वाक खोज्ल ओ असिक कल, “का अप्न म्वारठे अइली? बेनसे अप्न महीह पो बप्तिस्मा देहपर्ना।”
15येशू हुँकहीन कल, “आब असहेँक हुइदेओ, धार्मिकता पूरा करक लाग असहेँक करपर्ठा।” यी बात मान्क यूहन्ना येशूह बप्तिस्मा देल।
16बप्तिस्मा लेक सेक्ल त येशू झट्ट पानीमसे ढिक्वम अइल। उ ब्याला स्वर्ग उघ्रल ओ उहाँ परमेश्वरक आत्मह ढुकुरअस आक आपनम परट् देख्ल। 17तबहेँ स्वर्गसे असिन आवाज आइल, “यी म्वार प्रिय छावा हुइट, मै हिँकहीनसे धेर खुशी बाटुँ।”#उत २२:२; भज २:७; यशै ४२:१; मत्ती १२:१८; १७:५
தற்சமயம் தேர்ந்தெடுக்கப்பட்டது:
मत्ती 3: thl
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
© 2020, Wycliffe Bible Translators, Inc. All rights reserved.