Саалтыр 61

1Хуор салайааччытыгар Идифуҥҥа. Давид псалома.

2Таҥараттан эрэ дууһам уоскулаҥы булар,

Кини миигин быыһаан ылар.

3Кини эрэ – мин туруук таас хайам, Быыһааччым,

халыҥ хаххам, суон дурдам; мин аны тулхадыйыам суоҕа.

4Хаһааҥҥа диэри эһиги киһиэхэ саба түһэҕит,

иҥнэйбит эркиннии, үрэллибит бүтэйдии,

кинини сууллара сатыыгыт?

5Турар үрдэлиттэн түһэрэргэ санаммыттар;

албыны-көлдьүнү кинилэр таптыыллар,

тастарыгар – алгыыллар, истэригэр – кырыыллар. Села

6Таҥараттан эрэ дууһам уоскулаҥы булар,

Кини миэхэ эрэл кыымын саҕар.

7Кини эрэ – мин туруук таас хайам, Быыһааччым,

халыҥ хаххам, суон дурдам; мин тулхадыйыам суоҕа.

8Таҥара миигин быыһаан ылар, үрдүк чиэскэ тиксэрэр;

Таҥара – мин бигэ таас хайам, мин халыҥ хаххам.

9Бар дьонум! Хайдахтаах да кэмҥэ Киниэхэ эһиги эрэниҥ;

сүрэххит иһирэх тылын Киниэхэ иһитиннэриҥ:

Таҥара – биһиги харысхаллаах хаххабыт. Села

10Киһи диэн сүпсүк эрэ,

кыралыын улуулуун бары туһата суохтар;

хайаларын да ыйааһыҥҥа уур –

бары салгыннааҕар чэпчэкилэр.

11Талыыргытыгар эһиги эрэнимэҥ,

халыыргытынан хайҕанымаҥ;

баайгыт-дуолгут хаҥаатаҕына,

онно сүрэххитин сүүйтэримэҥ.

12Биирдэ Таҥара эппитэ,

мин ону иккитэ истибитим:

күүс Таҥараҕа баар,

13бигэ таптал эмиэ Эйиэхэ баар диэн, Айыы Тойон;

Эн хас биирдии киһиэхэ

тугу оҥорбутунан көрөн биэрэҕин.

தற்சமயம் தேர்ந்தெடுக்கப்பட்டது:

Саалтыр 61: СБК

சிறப்புக்கூறு

பகிர்

நகல்

உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்

Сибэтиэй Биибилийэ кинигэлэрэ பற்றி மேலும் அறிக