खे़ब्याङ् यहवे दाङ्बे़ल्ले़ मोसान् मे़त्तु, “यो थासिङ्ङे़ॽ, थेआङ्भे़ल्ले़ खे़ने़ॽ मिस्रलाम् के़लःत्तु के़भे़त्तुसिबा खे़ने़ॽ के़मनाहाॽ खुन्छिॽ आबाङे लायो चोःक्मा मे़हेःक्तुआङ् साॽरिक् फे़त्मे़लाॽरे़ मे़स्ये़आङ् मे़याक्॥ आङ्गाॽ खे़ङ्हाॽ आत्तिन् लाम्मो लाङ्घेःक्मा इङ्जाङ् पिरुङ्सिङ्ङाङ् वये़, खे़ङ्हाॽरे़ खे़न् लाम्मिन् साॽरिक् हारा मे़ले़रुआङ् थिक्नाहाङ् मे़बेआङ् मे़वाॽ॥ खे़ङ्हाॽरे़ खुनिॽ लागि साम्म्याङ्ङिन् मे़योन्दुआङ् पित्सात्तिल्ले़ कुजइःत्तो नावाइत्ला मे़धगु हे़क्क्याङ् खे़न् माङ्से़वा मे़मे़त्तुआङ् मे़वा, खे़ब्याङ् खे़ल्ले़ए कुलागि सिदुङ्जभा मे़दोन्दुआङ् अक्खे मे़बाःत्तुआङ् मे़वाॽ, ‘इस्राइलिसे, मिस्रलाम् खिनिॽ के़लःप्पा के़भे़प्पा खिनिॽ माङ्ङिन् आम्भा कन्लो॥’”