Yohane 3
3
Yesu na Nikodemu
1Lelo kukala na munu yumwe wa Mafarisayo, mkulu wa Wayahudi, iyakemighwe Nikodemu. 2Chilo chimwe, kamghendela Yesu, kamlongela, “Mlangulitsi, twomanya ka ghweghwe kwa mlangulitsi yulawile kwa Imulungu. Kwaapfila kuduhu munu wowose iyodaha kutenda pfinu pfa kukangawatsa pfautenda ka Imulungu ng'ali hamwe naye baye.”
3Yesu kamwidika, “Nokulongela ghendo, kuduhu munu iyodaha kuwona ufalume wa Imulungu ka ng'elekighwe keli baye.”
4Nikodemu kamghutsa, “Apfi imunu mbala yodahatse kwelekighwa keli? Pfihi munu kodaha kwingila munda mwa mai wake mala ya kabili na kwelekighwa?”
5Yesu kamwidika, “Nokulongela ghendo, imunu ka ng'elekighwe baye kwa ghamatsi na kwa Iloho Yelile ng'odaha baye kwingila mna ufalume wa Imulungu. 6Ichelekighwe kwa lukuli acho lukuli, na ichelekighwe kwa Iloho Yelile acho loho. 7Uleke kukangawala kwa apfila nokulongela kwobamighwa welekighwe keli. 8Libeho lyoduma kokose kwalibama. Kohulika litsi lyake, lekeni ng'umanya baye kwalilawa wala kwalighenda. Apfi pfipfo pfaili kwa chila munu yelekighwe na Iloho Yelile.”
9Nikodemu kamghutsa, “Angu aghano ghodahatse kulawila?”
10Yesu kamwidika, “Ghweghwe kwa mlangulitsi wa Isiraeli, aghano ng'ughamanya baye? 11Nokulongela ghendo, twolonga ipfinu pfatumanya na twowalongela ipfinu pfatwonile, lekeni mwolema ukuutoghola usenga wetu. 12Ka niwalongela tsimbuli tsa ipfinu pfili muisi, ng'amtoghola baye, apfi mtsotogholatse hanitsowalongela tsimbuli tsa ipfinu pfili kulanga?” 13Kuduhu munu iyaghendile kulanga ila Imwana wa Adamu, iyatsile kulawa kulanga.
14Ka Musa pfayachinule ichinyagho achila cha inzoka kwa lubiki kunyika, pfipfo Imwana wa Adamu pfayobamighwa yenulighwe, 15ili chila munu iyomtoghola yawe na ugima wa ghamatsuwa ghose. 16Kwaapfila Imulungu tsakaikunda isi yose mbaka kamlapfa Imwanaghe nyalimwe, ili chila munu iyomtoghola yaleke kwagha ila yawe na ugima wa ghamatsuwa ghose. 17Kwaapfila Imulungu tsang'amtumile baye Imwanaghe kuna iwanu yawahighe, ila yawakombole kubitila yeye.
18Munu wowose iyomtoghola ng'atsohighighwa baye, lekeni munu wowose iyolema kumtoghola ayo ma kahighighwa, kwaapfila ng'amtoghole baye Imwana nyalimwe wa Imulungu. 19Apfi pfipfo iwanu pfawatsohighighwa: Ghumwanga ghutsa muisi, lekeni iwanu wakunda ichisi kubita ghumwanga, kwaapfila ghawotenda tsagheha. 20Chila munu iyotenda ighehile koghwihila ghumwanga, ng'akutsa kuna ghumwanga baye, kwaapfila kopfuka aghala ighehile ghayotenda ghatsakoneka. 21Lekeni ayula iyotenda ighanoghile kakutsa kuna ghumwanga, ili aghala ghayotenda ghoneke mwatsi ka ghatendighwa kwa kumhulikitsa Imulungu.
Yohane Mbatitsa kolonga mbuli tsa Yesu
22Hambele Yesu na iwanafunzi wake waghenda kuna isi ya Yudeya, ako kakala hamwe nawo, na yang'ali yowabatitsa iwanu. 23Pfipfila Yohana yang'ali yobatitsa ako Ainoni habehi na Salemu, kwaapfila hanu aho tsahana matsi mengi. Iwanu wang'ali womghendela, naye yang'ali yowabatitsa. 24Ghamatsuwa agho Yohana tsakakala ng'ana yohighwe baye mchifungo.
25Kuya wanafunzi wamwe wa Yohana wang'ali weghutsaghutsa na Myahudi yumwe kwa mbuli ya ukwihopfugha na kutenda iwanu wele. 26Apfo wamghendela Yohana, wamlongela, “Mlangulitsi, imunu ayula iyakalile naghwe kumwambu kwa ghumtoyoridani, ayula yulongile ghoya tsimbuli tsake, sambi kobatitsa na iwanu wose womghendela yeye.”
27Yohana kawedika, “Kuduhu munu iyodaha kubokela chinu chochose ka ng'eng'ighwe baye na Imulungu iyali kulanga. 28Mwemwe muwenyegho mwa wakalangama haniwalongele, ‘Nene sili Kiristu baye, ila nene nitumighwa nimlongolele.’ 29Iyali na ipinga iyokwelighwa, ayo yuyo immale iyomkwela. Sale wake immale iyokwela kombeta na komtegheletsa, kodeng'elela hayohulika litsi lyake. Apfo sambi apfino indeng'elo yangu itimila. 30Yeye kobamighwa yawe mkulu ng'ani, na nene niwe mdodo ghendo.”
Ayula iyolawila kulanga mkulu kubita wose
31Yeye iyakutsa kulawa kuchanya kamkulu kubita wose. Ayula iyolawila muisi ayo wa muisi, na kolonga mbuli tsa muisi, ila yeye iyakutsa kulawa kulanga kamkulu kubita wose. 32Yeye kolonga chiyonile na chiyahulike, lekeni kuduhu munu iyotoghola tsimbuli tsayolonga. 33Lekeni munu wowose iyotoghola usenga wake, katsolonga Imulungu kolongesa. 34Iyatumighwe na Imulungu kolonga mbuli tsa Imulungu, kwaapfila Imulungu kommemetsa ghendo Iloho yake. 35Baba komkunda Imwanaghe, na kagheka ghose mmoko mwake. 36Munu wowose iyomtoghola Imwana kakuwa na ugima wa matsuwa ghose, lekeni munu wowose iyomlema Imwana ng'atsakuwa na ugima baye, ila katsokala mna imaya ya Imulungu.
Iliyochaguliwa sasa
Yohane 3: LBV
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
