ROMA 11
11
Si bɑ e ka wa' pɑ Israɛl
1Gɑ̌ həŋtə gɑ́: Si bɑ é lě gwa' pɔ pyə́ a? Gɛ̌! Nə pa' kwa' myə gɑ̌ bɑ yə Israɛl, gwya Abraham, nə tuŋdyə Bɛnyamɛn. 2Si bɑ e ka wa' pɔ pyə́, wap pyə e lə ləŋdzə jyə́ wap a. Kɑ a bɑ po ka zhyə pa' ywə yə́ pu lə və a gɔm nə tsʉ' yə Elia dɔ bi Si nə pɑ Israɛl a gɑ: 3Cyəpɔ, wap zhwə mghɔ́m ghɔm tsu, sa'tə mtsʉ' to tsə pwɔ'; gɑ cʉ' da' myə dǒ m̀, wap piŋ bɑwə shəŋ nə zhwə a.
4Tə́ Si ba' bi e gɑ kɑ? Gɑ̌ lwɔ' pɑbɛ sha' sɔmbʉə, pɔ pyə wap ka kam mkwi'tə map dzə̌ Baal a. 5Ba m nə cwə dzʉ̌ yəŋ gɑ, bvʉ' pɔ pa' gho' nə shwɔ' wap a. 6A pɑ gɑ a shyə pɑ́ m nə́ gho' bɑ a tə bɑ nwə mfa' pɑ, a pɑ nwə mfa', bɑ gho' tə yɑ̌ gho' pɑ. 7A po'o bɑ gɔm gɑ́ kɑ? Ywə yə Israɛl shəŋ a, a bɑ e ka kəm nə́; tə pɔ pyə pu cwɔ' wap a bɑ wap kəm nə́. Tə́ sɔ' m nə pyə shɑ́ pɔ, a bɑ pu lě gə tʉm tsap sɔk. 8Dəŋdəŋ pa' a bɑ pu və gɑ: Si bɑ ě hɑ zhwenyə pwɔk bi pú, mnyə́ tə nə jɔ, mtəŋ tə nə ju', tə ŋkhəm tyɛ' ɔ. 9David biŋ gɔm yə́ gɑ: A tɑpe yap pɑ́ yo' nə pú, bɑ́ ŋkhəvʉm, ywə yə wap gɔ cyə m nə vʉ̀ si a, biŋ bɑ shɛ dəŋdəŋ yə pu nyəŋ thə pu a! 10Mnyə map sonyə sonyə tə bi; ghə̌ ŋkha'tə yap ŋwɔ' guŋ mcwə awɛ.
11Gɑ həŋtə gɑ: Jyə gɑ a bɑ́ wap vʉ̀si pɑ mama lə? Tə gɛ̌! Da' gɑ́ a bɑ a lě shyə m nə mhɔ map pɑ tə pɑ́ pɑ Yudea ko nə ywə vɔk, po'o gɑ Israɛl lǎ'. 12A bi a pɑ gɑ mhɔ map lě ji fʉ' bi dzʉ̌, yap nə kəŋnyə pɑ fʉ' bi pɑ tə pɑ́ pɑ Yudea, bɑ yap nə cəŋtə ŋkho nə ywə vɔk gɔ cyətə ghə kɑ?
13Gɑ gɔm bi po, wɔ pɑ tə pɑ́ pɑ Yudea gɑ: Pa' gɑ̌ bɑ gɛ nthəm bi pɑ tə pɑ Yudea a, gɑ da'tə dəŋ ghu'tə yə a bɑ nə fa' tsɑ̌ a, 14po'o tə nə thənyə mfɑ pɑ̌ ŋkhənthú nthʉm ghi'nyə gɑ a vɔk shɑ pɔ nə pú. 15A pɑ gɑ́ nə fʉ'tə wap hɑ jʉ̀m lě bɑ nə́ nə gwɔ' bvɑnyə dzʉ́, bɑ yap nə piŋ ŋkhó ŋkhɛ gɔ sɔ' pɑ kɑ́ tə pɑ̌ pɑ nə cyə nə vʉ̌ ŋkho nə vɔk?
16Nə pa' a pɑ gɑ́ zhwi'tə pɑ dɔlɔ̌, bɑ guŋ ywətsʉ awɛ gɔ pɑ dɔlɔ̌; biŋ bɑ gɑ́ gɛ thə́ pɑ dɔlɔ̌ bɑ bǔ thə gɔ pɑ yə́ pɑ́ po'o. 17Tə a bi a a pɑ gɑ pu le ŋkho' shɑ bu thə́, biŋ sɔ' m nə wə yə o bɑ pu ta' thə vó a pu la o cəcɑ̌ bvʉ' bu thə olivə myə a lɑ cʉ' a, po'o gɑ po a pu pəmtə gə fʉ́' yə a fɑ nə gɛ́ tsyə́ a, 18o kɑ ŋa'nɑ o cəcɑ bǔ thə́ olivə. Bi a pɑ́ o ŋa'nɑ́ o! Tə́ tə wə nə ŋkwa gɛ́ thə́ pɑ́, gɛ́ thə́ nə ŋkwa o. 19Bi a pɑ o ghɔm gɑ: Pu lě ŋkho' shɑ bu thə́ tə́ jap a. 20A puŋ. Tə́ pu lə ŋkho' wap nə yap nə cyətə pɑ̌ nyənyɔ. Tə sɔ' m nə o, a shyə m nə piŋnthʉm tə o tɔm. Kɑ́ ŋa'nɑ́ o, dzə nə pwɔk. 21Nə pa' a pɑ gɑ Si lě tə tak kwa' bu thə olivə nəŋ, bɑ ba wə e tə́ gɔ sɔ' tak o nəŋ pɑ. 22Yɔ tʉm pɑpúŋ pu tʉm shɔkcɔ̌k Si: Tʉm shɔkcɔ̌k nə pɔ pyə wap lě bvʉtə a, puŋnwə e nə o, a pɑ gɑ o cwə nə puŋnwə e bɔ; tak po'o bɑ pu gɔ té o ba wə. 23Tə sɔ' m nə wap, wap pɑ tə wuŋ nthʉm nə cyətə pɑ̌ nyənyɔ, bɑ pu gɔ la ba wap yap nə thə. Nə pa' Si bɑ e ghə tʉɔ nə piŋ da wap nə ta' thə́. 24A pɑ gɑ́ wə yə pu ja' o nə thə vo a, pu la o nə thə olivə, bɑ a gɔ pɑ m gɑ kɑ kwa' nə bǔ thə olivə myə́ pu gɔ la' la wap kwa' nə to thə́ yə wap bɑ bú myə a?
Ywə vɔk pɑ Israɛl
25Mfɑmfɑ̌, ŋ tə̌ wə shəŋ nə tʉ̀m wɔ yəŋ nwə cyə zhyənwə pɑ̀, bwɔk gɑ́ po kɑ kě nɑ tsɔ gɑ mzhyənwə. Mu' kam pɑ Israɛl gɔ ghə tʉm sɔksɔk ghə tə̌ gùŋ pɑ tə pɑ́ pɑ Yudea la' ŋkho dyə awɛ. 26A pɑ́ po'o guŋ Israɛl awɛ vɔk dəŋdəŋ pa' a bɑ pu və gɑ: Gɛvɔk pɔ gɔ sɔ' fɑ m Sion, e gɔ sɔ' té nə cyətə pǐŋ Si nə gwya Yakop. 27Yəŋ gɑ́ bɑ̀ pa' kɔ tsɑ̌ gɔ sɔ' pɑ nə pyə a pú nə cwə yə gɑ̌ té mhɔnwə map a. 28Pu yɔ wap m nə́ Cuŋ pɑpuŋ bɑ wap bɑ mghɛ bo, a pɑ́ pɑpuŋ bi po; tə́ jɔ wap m nə́ ghə̌ŋ Ci, bɑ a bɑ pu kuŋ wap, shyə́ m nə mtǎ. 29Nə pa' ywə hɑ hɑ̌ ba nə ké yə a fɑ m bi Si a tə ŋkwyəpnyə pɑ. 30A lə pɑ̌ cwə̀ dzə̀, po kəŋnyə nə yu'shwə bi Si, tə́ cwəlɔ a cyə m nə nə́ kəŋnyə nə yu'shwə yàp po ghə cɔmmtso Si. 31Ba wap yap cyətə yu'shwə cwəlɔ po'o tə a cyə m nə cɔ̌mmtso yə pu gə nə po a ba wap yap ghə cɔmmtso. 32Nə pa' Si bɑ e nyəŋ guŋ pɔ awɛ nə tʉɔthə́ po'o tə nə cɔmmtso guŋ pɔ awɛ.
33Fo' fʉ' Si tə̌ wə pɑ, fo' zhyə̌nwə e lə pɑwə, a bɑ ǎ zhi te'! Pɑ wɑ̌ zhyə́ yə nə fyɛ'! Pɑ́ sɔmmo lə cyə nə́ mjyə myə́! 34Kwa' wɑ lə zhyə mkwɛnyə Cyəpɔ? Kɑ kwa' wɑ̌ lə pɑ gɛ hɑ nthɔk bi e? 35Kɑ wɑ lə ləŋdzə hɑ kɑ bi é tə bɑwə byap gɑ é pa' bi é? 36Nə pa' guŋ ywə awɛ bɑ pɑ nə e, bɑ shyə́ pɑ m nə e, biŋ bɑ pɑ bi e. Ghu'tə pɑ bi e mama! Amɛn.
Iliyochaguliwa sasa
ROMA 11: NTGomala
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Nouveau Testament Ghomala © Bible Society of Cameroon, 2002.
