Roma 13
13
Isazei'wa norĩ hã, ti'ai ãma dama ipire norĩ te te 're wapari pese za'ra mono
1Uburé a norĩ wa'wa hã, ti'ai ãma dama pire na 're ihâimana za'ra mono norĩ hã 're wapari pese za'ra wa'aba mono. E marĩ wa. Dama ipire norĩ hã 're 'maihâimana mono õ wa, 'Re ihâimana u'âsi mono te te 'maipisutu ãna. Ta norĩ hã, Õhõ si ma tô te te 're apisutu, daro mono bâ te te 're rob'madâ'â za'ra mono da. 2Ãne wa, ni'wa hã dama ipire norĩ zada 're hâimana mono wamhã, 'Re ihâimana u'âsi mono te te dama 're i'apisutu mono norĩ zada, te 're hâimana. Tahawa, ãne ni'wam norĩ te te 're i'manharĩ za'ra mono hã te za 'Re ihâimana u'âsi mono hã ropipa te te tãma 're pisutu za'ra. 3Marĩ te te 're i'manharĩ wasété za'ra mono norĩ hã, pahi na te za 're hâimana za'ra, dama ipire norĩ ma hã. Mare di, marĩ te te 're i'manharĩ wẽ za'ra mono norĩ hã. Dama ipire norĩ ma, aipahi ãna 're aihâimana za'ra wa'aba mono da wamhã, ma'ãpé marĩ iwẽ si 're 'manharĩ za'ra wa'aba mono. Tawamhã ta norĩ hã te za te te 're ai'uze za'ra wa'wa. 4E marĩ wa. Dama ipire norĩ hã 'Re ihâimana u'âsi mono ma, te te 're romhuri za'ra mono wa, ai'udâna za'ra wa'aba. Tazahã, marĩ iwasédé 're 'manharĩ za'ra wa'aba mono wamhã, te za tô 're aipahi za'ra wa'aba mono, dama ipire norĩ hã tô siptete wa, te te aima 're irob'manharĩ pipa za'ra wa'aba mono da hã. Ta norĩ hã 'Re ihâimana u'âsi mono ma, te te 're romhuri za'ra. Ta hawi te rob'manharĩ pipa hã 're hâimana, marĩ te te 're i'manharĩ wasété za'ra mono norĩ zada. 5Ãne wa, i'ru zahi tô, dama ipire norĩ nhimiroti 're i'madâ'â pese za'ra wa'aba mono da hã. Mare di, 'Re ihâimana u'âsi mono nhimirob'manharĩ pipa wap si hã. Tazahã, duré 'râwi asimirosa'rata za'ra wa'wa te te aima 're i'ru za'ra wa'aba mono zarina zama, ãne 're 'manharĩ za'ra wa'aba mono da.
6Ãne wa, te duré rob'uiprazé arĩ hã 're iwa'âbâ za'ra wa'aba mo, dama ipire norĩ ma. E marĩ wa. Ta norĩ hã tinhimiromhuri na te te ãma 're uwaimrami za'ra mono wamhã, 'Re ihâimana u'âsi mono ma, te te tô 're romhuri za'ra mono wa. 7Tahawa, ma'ãpé dama ipire norĩ ma, 're wa'âbâ wẽ za'ra wa'aba mono, isarina 're wa'âbâ za'ra wa'aba mono da, 're ihâimana mono hã. Ibâ na rob'uiprazé arĩ hã tãma 're wa'âbâ za'ra wa'aba mono. Duré uburé dama ipire norĩ hã 're wazéb za'ra wa'aba mono.
'Re asisawi pese za'ra wa'aba mono
8Marĩ dama 're iwa'âbâ za'ra wa'aba mono õ zé, aima 're hâimana za'ra wa'aba mono tõ. 'Re i'asisawi pese za'ra wa'aba mono zép si i'ru zahi. Ni'wa hã te te 're da'azawi pese mono wamhã, 'Re ihâimana u'âsi mono nhimiroti zahi na Mozési te te irob'ui'érézé, te za ãma uwaimra. 9Ãne 'Re ihâimana u'âsi mono nhimiroti zahi norĩ hã: “Damro na dawi asimisaihuri tõ. Da'maiwĩrĩ tõ. Asimisaihuri tõ. Duré marĩ na danho'ru tõ.” Ã norĩ hã duré ihâiba amo norĩ ahâ nherẽ, uburé ma misi isimiroti hã 'rã'õtõ sina, ã hã: “'Re da'azawi pese mono, 'râwi 're i'asisawi pese mono ne.” 10Ni'wa hã te te 're da'azawi pese mono wamhã, marĩ iwasédé te te dama 're a'manharĩ mono õ di za. Tahawa, dasisawi 'manharĩ hã, uburé 'Re ihâimana u'âsi mono nhimiroti zahi na Mozési te te irob'ui'éré hã te za sina 'rã'õtõ.
11Ãne hã tô uburé 're 'manharĩ za'ra wa'aba mono, aima waihu'u pese za'ra wa'aba wa, ã bâtâ mono na niha na oto 're iromhâimana mono zé hã. Bâdâ hã ma tô oto iwa waptãrã, i'atopo'o za'ra wa'aba zéb da hã. E marĩ wa. Bâdâ iwa iwaptã'ãzéb da hã 'râwi pesere wa oto, wanho'reptuzé wa te wasina i'uwaimrami za'ra zéb da hã. Wa te isaze na'rata za'ra zém hawi, romhâ na ihâimana nei õ di oto.
12Mara hã te za oto ai'utõ. Rowa'azé hã te za oto wi. Tahawa, wa te sahâri za'ra wa'aba, robra te marĩ, wa te 're i'manharĩ za'ra mono hã. Rowa'a te wanhimnhi'ã hã, wa te waibui wa'aba. 13Wawasété ãna 're wahâimana za'ra wa'aba mono, rowa'a na 're inomro mono norĩ ne. Dato iwasété u, dame 're wahâimana za'ra mono õ di za, duré âzé hâsi za'ẽtẽ na hã. Duré wa'reb za'ra hã dasina dahâimana hã duré siwa'ru marĩ 'manharĩ wasété uptabi hã 're hâimana za'ra mono tõ, duré dasi'ahâri hã, duré marĩ na danhiminho'ru zama. 14Tazahã, aima 're hâimana za'ra wa'aba mono, Wanhib'apito Zezu Cristu 're ihâimana mono zé hã. Duré 're 'manharĩ za'ra wa'aba mono tõ, 'râwi wasété nherẽ, asima 're iwẽ za'ra wa'aba mono zé hã.
Iliyochaguliwa sasa
Roma 13: xavBP
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2011, Wycliffe Bible Translators, Inc.
