Atus 17
17
Paulu norĩ hã Silaha me, Tesalonica ãma isimasisi zahuré zé
1Paulu norĩ hã Silaha me ma tô ro'rahâri zahuré, Ãfipulis na 'ri nho'õmo nhisi na duré Apolonia na. Tawamhã ma tô oto aimasisi, Tesalonica na 'ri nho'õmo nhisi u. Tame te Zudeu norĩ te rowahutuzé hã 're sa. 2Te te nasi i'manharĩzéb zarina, Paulu hã ma tô ãzé, rowahutuzéb u. Tawamhã sabadu si'ubdatõ isi'utõrĩ na hã ma tô dama rowasu'u, Ibaihâ Iwazé pese na rob'ui'éré na, rowahutuzéb 're, ihâimana za'ra norĩ ma. 3Tô i'ru zahi zarina Danho'reptui'wa te te irobzépatazém na hã te ãma tãma rowasu'u za'ra, duré dâ'â pari apâ ihâiwa'utu na hã. Ãne te dama wasu'u:
— Ã hã Zezusi te aima iwasu'u za'ra wa'wa hã, ta hã Danho'reptui'wa.
4Tawamhã ni'wam norĩ Zudeu norĩ hã ma tô saze za'ra, Paulu mreme hã. Tahawa, ma tô isiré oto tihâimana za'ra, Paulu norĩ siré Silaha me. Ahâ na gregu norĩ zudeu'õ norĩ hã, 'Re ihâimana u'âsi mono ãma 're iwata za'ra mono norĩ hã duré ahâ na pi'õ norĩ dama mreme pire na 're ihâimana za'ra mono hã ma tô oto isiré tihâimana za'ra, ta norĩ zama te te saze za'ra wa.
5Tane nherẽ, Zudeu norĩ hã ma tô sõ'ru za'ra. Tahawa ma tô 'rã'õtõ za'ra aibâ iwasété norĩ hã, 'ri nhi'riti na 're ihâimana za'ra mono norĩ hã. Tawamhã ahâ wa oto, ma tô 'ri wa'õtõ 'remhã ro'wa'rutu za'ra. Zasãhã nhorõwa u ma tô asisi, Paulu norĩ zô Silaha me, te te siwi sõpẽtẽ wa, dawa'wa u te te siwi saprõni zahuré da. 6Tane nherẽ, te te siwi sõpẽtẽ zahuré õ wamhã, Zasã hã ma tô siwi saprõ, da'upana duré nima norĩ isazei'wa norĩ zama, dama ipire norĩ nho're u, ãne hârâ 'rãihâ na te te 'mahârâ za'ra mono sina:
— Ã hã aibâ norĩ hã daro mono bâ, te te dawi 're iro'wa'rutu za'ra mono norĩ hã ma tô oto we aihutu ãwa. 7Zasã hã tinhorõwa u ma tô 'mazasi zahuré. Roma te apito Cézaha nhimiroti zahi hã te te 'madâ'â za'ra õ di. Te dama rowasu'u za'ra, apito aimawi iré na hã, Zezusi na isisi hã.
8Tawamhã da'ahâ uptabi na idahâimana za'ra hã duré dama ipire norĩ hã ãne hã te te wapari za'ra wamhã, ma tô darési za'ra. 9Tawamhã dama ipire norĩ hã ma tô Zasãhã ma, duré isiré norĩ ma zama rob'ru za'ra, oto si'aba'ré da, isisani za'ra zé te te wa'âbâ za'ra pari.
Paulu norĩ Silaha me Béréia ãma ihâimana zahuré zé
10Ma'rã wi, isazei'wa norĩ hã ma tô siwi satõrĩ zahuré Paulu norĩ Silaha me, Béréia na 'ri nho'õmo nhisi u. Tamomo simasisi wamhã, ma tô tineb zahuré, Zudeu norĩ te rowahutuzéb u. 11Tawamhã Béréia ãma 're isi'ubumroi mono norĩ hã isimiwazé wẽ uptabi si hã, Tesalonica ãma nei õ di. Zezusihi wasu'uwẽ hã ma tô wapari pese za'ra, te te sima wẽ uptabi za'ra sina. Awẽ sidâpâ, ma tô Ibaihâ Iwazé pese na rob'ui'éré hã nasi sõré za'ra, Pauluhu nhimirowasu'u hã tô sena zô. 12Ãne wa, Zudeu norĩ hã ahâ na ma tô saze za'ra. Gregu si'aibâ norĩ, gregu sipi'õ norĩ isibro pese norĩ zama ma duré ahâ na saze za'ra. 13Tane nherẽ, Tesalonica ãma Zudeu norĩ hã, Paulu 'Re ihâimana u'âsi mono Béréia ãma te te isadawa wasu'u na rowasu'u te te wapari za'ra wamhã, ma tô itẽme ai'aba'ré. Tame ma tô dawada'uri wasété za'ra, Paulu norĩ zada dahâimana za'ra da hã. 14Tahawa isazei'wa norĩ hã awa'awi ma tô Paulu hã siwi satõ, âporé zaihâ u. Tane nherẽ, Silas norĩ hã Timotiuhu me ma tô aimasisi isa'u, Béréia ãma. 15Isazei'wa norĩ hã Pauluhu 'wawi isimapa za'ra hã ma tô siwi saprõ, Atena na 'ri wa'õtõ nhisi u. Taha pari ma tô apâ sina siri za'ra Béréia u. Pauluhu mreme hã ma tô siwi ti'â, Silas duré Timotiu norĩ hã itẽme neb da Atena u, waptu na uptabi.
Paulu hã Atena ãma te te iromhurizé
16Tawamhã Atena ãma Paulu hã, Silas norĩ zô simipari ré Timotiu me, ma tô ab'rui pese, romhâiba 'manharĩ hã ahâ uptabi na te te a'madâ'â wa, 'ri wa'õtõ 'remhã. 17Tahawa, Zudeu norĩ te rowahutuzéb ãma ma tô awẽ sidâpâ nasi da'azada'â, Zudeu norĩ hã duré zudeu'õ norĩ, 'Re ihâimana u'âsi mono ãma 're iwata za'ra mono norĩ hã duré da te 're i'ubumroi mono zéb u, te te 're i'ubumroi mono norĩ zama. 18Tawamhã nima norĩ dama romnhoré'wa norĩ epicureu duré nima norĩ estoicu norĩ hã ma tô nasi siwi sada'â. Ãne te nasi nharĩ za'ra:
— Ã hã aibâ isimiza'rese'õ hã, e marĩ te sima wẽ, te te wama wasu'u za'ra da.
Tawamhã nima norĩ hã te duré ãne nasi nharĩ za'ra:
— Ãté ihâiba'õ wama iwaihu'u za'ra õ, te te wama wasu'u za'ra da.
Ãne hã ma tô nasi nharĩ za'ra ni, Paulu Rowasu'u wẽ ité te te dama wasu'u wa, Zezusihi wasu'u duré ihâiwa'utuzéb zama.
19Tawamhã Paulu hã ma tô siwi saprõ, Areopagu na rosa'rata'wa norĩ si'rã'õtõzém nhisi u. Tame ma tô siwi sadanha, ãne:
— Wa wasima wẽ za'ra ni, wa te waihu'u za'ra da. E niha hã ã hã, rowahudu ité ãma irowasu'u hã. 20Te wama iwasu'u za'ra, marĩ wama isa'rese za'ra õ. Ta hã wa wasima wẽ za'ra ni, wa te waihu'u za'ra da, marĩ te te iwasu'u hã.
21Atena ãma 're isi'ubumroi u'âsi mono norĩ hã duré darob amoi hawi isiré 're isi'ubumroi mono norĩ zama, tãma wẽ za'ra di, rowasu'u ité hã te te sima 're iwasu'u u'âsi za'ra mono da hã duré te te 're iwapari za'ra mono da hã.
22Tawamhã Paulu hã hâiwi ma tô za danho're, dasi'rã'õtõzé Areopagu ãma. Ãne te tãma nharĩ za'ra:
— Atena ãma 're i'ai'ubumroi wa'aba mono norĩ, wa ai'madâ'â za'ra wa'wa, uburé marĩ na te 're asimizaze za'ra wa'aba mo. 23Tô 'ri wa'õtõ na 're ĩmorĩ wamhã, wa a'madâ, romhâiba norĩ hã ãma 're i'aiwata za'ra wa'aba mono zé hã. Wa tô duré sõpẽtẽ ihâiba'õ norĩ ma, danhoprubzéb za'ra zé hã, ãne ãma irob'ui'éré ré hã: “Ihâiba'õ iwaihu'u pe, dama isa'rese'õ ma.” Ã hã ihâiba'õ waihu'u õ nherẽ, ãma 're i'aiwata za'ra wa'aba mono hã, ta hã wa aima wasu'u za'ra wa'wa.
24— 'Re ihâimana u'âsi mono, uburé marĩ te te i'apodo duré uburé marĩ iwa 're ihâimana za'ra mono hã, ta hã hâiwa ãma Uburé Danhib'apito duré ti'ai ãma zama. Ta hã 're sãmra mono õ di, 'ri ti'ai ãma a'uwẽ norĩ hã tinhib'rata na te te 're i'ri za'ra mono wa. 25Duré marĩ hã da te tãma 're i'manharĩ za'ra mono da hã, sadai õ di. E marĩ wa. Tô õhõ si dapẽ'ẽzani hã te te dama 're anhomri mono wa, dapẽ'ẽzanizé hã duré uburé marĩ norĩ hã. 26Aibâ misi nherẽ, taha hâiba hawimhã ma tô uburé dapoto mono bâ da'apoto, ti'ai ãma 're dahâimana za'ra mono da hã. Te te da'apoto õ ré hã, 'Re ihâimana u'âsi mono hã ma tô ro apisutu siro, dapoto mono bâ iwa 're idahâimana za'ra mono zéb da hã duré niha wahum na iwa 're idahâimana za'ra mono zéb da hã. 27Ãne hã ma tô 'manha, uburé sô 're darĩtĩ za'ra mono da, duré ãté da te 're sõpẽtẽ za'ra mono da, romhâ na wanhiti za'ra 're hâimana mono õ nherẽ. 28Ni'wa hã ma tô ãne tinha: “Õhõ ãma si wa 're wahâimana za'ra, wa 're wasirési za'ra, duré wa 're wanomro.” Ni'wam norĩ ate za'ra wa'wa rowaihu'u pese 'wa norĩ hã ma tô ãne duré rob'ui'éré za'ra: “Wa norĩ zama wa i'ra 're wanomro.” 29Tahawa, wa norĩ hã 'Re ihâimana u'âsi mono 'ra wamhã, wa te ãma 're rosa'rata za'ra mono õ di za, ta hã romhâiba 'manharĩ ẽtẽ waipo pré oru na i'manharĩ na hã, ẽtẽ waipo prã prata na duré ẽtẽ na i'manharĩ na hã. Danhipese na da te 're irob'manharĩ za'ra mono ne hãi õ di. 30Duréihã 'Re ihâimana u'âsi mono hã dama waihu'u ãna 're danomro mono nherẽ, te te 're da'ahâ za'ra mono õ di. Tane nherẽ, ãhã na hã uburé dapoto mono bâ te oto dama ti'ru, dawasété na dasisãmri za'ra wa, itẽme dasipizari za'ra da. 31E marĩ wa. Bâdâ hã ma tô sima pisutu siro, dapoto mono bâ i'uwaibaba na te te da'ãma i'arowairébé da hã. Aibâ hã ma tô sima pisutu, da'ãma rowairébé'wa da hã. Taha ãma ma tô hâi'ré, uburé dama hã, dâ'â nherẽ apâ te te ihâiwa'utu na hã.
32Tawamhã Paulu hã apâ dahâiwa'utuzém na te te irowasu'uzé hã da te wapari za'ra wamhã, ni'wam norĩ hã ma tô ãma tito za'ra. Tane nherẽ, ni'wam norĩ hã ma tô ãne nharĩ za'ra:
— Wa wasima wẽ za'ra ni, nimahã bâtâ na si duré wama rowasu'u za'ra da, ã hã rowasu'u na hã.
33Tahawa Paulu hã ma tô dahawi mo. 34Tane nherẽ, ni'wam norĩ hã ma tô saze za'ra. Tahawa ma tô Pauluhu ãma sasõmri za'ra. Aibâ hã Dioniziu na isisi hã ma tô dasiré saze, da'ãma rowairébé'wa norĩ siré Atena ãma, dama ipire uptabi hã. Pi'õ Damaris na isisi hã ma tô duré saze. Duré ni'wam norĩ hã ma tô isiré saze za'ra.
Iliyochaguliwa sasa
Atus 17: xavBP
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2011, Wycliffe Bible Translators, Inc.
