Atus 16
16
Timotiu hã, Paulu duré Silas norĩ siré imorĩzé
1Tawamhã Paulu hã ma tô wi Dérbi u duré Listra u. Listra ãma hã te 're sãmra, isazei'wa Timotiu na isisi hã. Ina hã isazei'wa. Ta hã Zudeu nhipi'õ. Tane nherẽ, imama hã Zudeu õ di. 2Uburé isazei'wa norĩ hã Listra ãma duré Iconiu ãmab zama 're isi'ubumroi mono hã te te siwi wasu'u wẽ di, Timotiu hã. 3Tawamhã Paulu hã ma tô sima wẽ, Timotiu te te siré saprõni da. Tahawa ma tô ti'ru, da te sihâiwata nhizâri da, Timotiu hã tame ti'ai wa'õtõ mono 'remhã, Zudeu norĩ 're ihâimana za'ra mono hã te te waihu'u pese za'ra wa, Timotiuhu mama gregu na hã. 4'Ri wa'õtõ na te te iro'rahâri zahuré mono zém na isazei'wa norĩ ma, ma tô te te awasu'u zahuré, Zezusihi zadawa wasu'u'wa norĩ hã duré isazei'wa norĩ 'madâ'â'wa norĩ hã Zeruzalẽ 're, te te iwaihu'u za'ra zé hã. Ma tô duré te te apawaptob zahuré, te te 're 'madâ'â pese za'ra mono da, te te iwaihu'u za'ra zé hã. 5Ãne zarina, isazei'wa norĩ ma, ma tô 'Re ihâimana u'âsi mono te te sina 're i'umnhasi za'ra mono zé hã tãma sa'ẽtẽ u'âsi za'ra. Duré bâtâ sidâpâ ma tô sina hâ'â u'âsi, isazei'wa norĩ hã.
Paulu hã Troadi ãma marĩ sõtõ 'rowim ne te te i'madâ'âzé
6Tawamhã Paulu duré tisiré norĩ me ma tô ai'aba'ré, Frizia na duré Galasia na ti'a nhisi wa'waibaba, 'Re ihâimana u'âsi mono Pẽ'ẽzani hã te te tiwi sawi za'ra wa, Azia na ti'a nhisi ãma iwasu'uwẽ na te te dama rowasu'u za'ra tõ da. 7Mizia te, ti'a nhizâri u sihutu wamhã, ma tô aré pibu za'ra, sisisi da, Bitinia na danhipti'a nho'õmo nhisi u. Tane nherẽ, Zezusihi Pẽ'ẽzani hã te tiwi sawi za'ra. 8Tahawa, Mizia na ma tô ro'rahâri waré za'ra. Troadi na 'ri nho'õmo nhisi u, ma tô aihutu. 9Taha mara na hã, Paulu ma tô marĩ hã sõtõ 'rowim ne 'madâ. Aibâ hâiwi isa, Masédonia na danhipti'a nho'õmo nhisi ãma 're isãmra mono hã te 'madâ. Ta hã te ãne 'mahâ: “Wei aimorĩ, Masédonia u. Wa'ãma aime za'ra na.” 10Tawamhã Paulu hã ãne hã sõtõ 'rowim ne marĩ te te 'madâ'â parimhã, wa tô wasima ro'ubumro za'ra ni, Masédonia u wasi'aba'ré da, Zezusihi wasu'uwẽ na tame wa te dama rowasu'u za'ra da, wa te ãma uwaimrami za'ra da, 'Re ihâimana u'âsi mono, wazô hârâ za'ra wa.
Filipu ãma Lidia te te isazezé
11Tawamhã Troadi hawi, wa tô wawairébé ni. Õne haré uba're na wa tô wasisa're, Samotrasia na rob'ré za'iti nhisi u. Ta hawimhã awẽm na wa tô aihutu ni, uba're nhimizahârizéb u Neapolis ãma. 12Ta hawimhã wa tô ai'aba'ré ni 'ri nho'u dama i'rãnho'u Filipu u hã Masédonia 'remhã. Tame te romanu norĩ hã 're si'ubumro. Tamemhã bâtâ ahâ na wa tô wahâimana za'ra ni. 13Sabadu na hã 'ri nho'õmo hawi wa tô wawairébé ni pa zaihâ u, wa te rosa'rata za'ra wa, tame Zudeu norĩ te rowaptẽrẽzé, wa te wasiwi 'manhopẽtẽ da. Wa tô asimro ni. Wa robzanhamri za'ra ni, tame pi'õ norĩ isi'ubumro norĩ ma. 14Pi'õ dasiré te te iwawapari za'ra hã Lidia na isisi hã, zazahâ ihâpré wede'wa, Tiatira na 'ri nho'õmo nhisi hawimhã. Ta hã 'Re ihâimana u'âsi mono ãma te 're wata. Uburé Danhib'apito hã ma tô ipẽ hã tãma 'ridawa, Paulu te te irowasu'uzé hã te te sadaihu'u da. 15Tahawa, â dawabzuri hã ma tô 'manha duré isõrõwa 're, 're isi'ubumroi mono norĩ zama. Taha parimhã ma tô wazô tihârâ za'ra:
— Wanhib'apito zazei'wa na asiwi ĩ'madâ'â aba wamhã, we ai'aba'réi wa'aba, ĩnhorõwa ãma asimroi wa'aba da.
Ãne wa, ma wa'ãma ai'uté za'ra, isõrõwa 're, wasi'ubumro da hã.
Paulu norĩ Silaha me dazazéb 're, da te izazé
16Tawamhã nimahã bâtâ na, da te 're irowaptẽrẽ za'ra mono zéb u wasi'aba'réi ré, wa wasiwi sõpẽtẽ ni, azarudu pawa'âbâ ãna dama romhuri'wa hã, wa'uburé ré 're hâimana mono wa, marĩ hã romhâ ré te te 're i'awaihu'u siromo mono hã. Taha na rob'uiprazé hã ma tô sa'ẽtẽ na te te 're waibu, isib'apito norĩ hã. 17Tawamhã azarudu hã Pauluhu zarina ma tô mo duré wazarina zama. Mreme 'rãihâ na te nasi wa'mahârâ za'ra, ãne:
— Ã hã aibâ norĩ hã, 'Re ihâimana u'âsi mono Danhipai u 're ihâimana mono ma, romhuri'wa norĩ. Te aima wasu'u za'ra wa'wa, danho'reptuzé da te 're sõpẽtẽ za'ra mono da, 're idanomro mono zé hã.
18Ãne hã bâtâ ahâ na te nasi te te wa'ab'mahârâ. Tawamhã Paulu hã ma tô oto ãma tiwa'a. Ma tô sô aipi'ra. Wa'uburé ma, ma tô tinha, ãne:
— Zezu Cristuhu nhisi na, wa aima rob'ru. Mo oto aiwatobro, azarutu hawi!
Tawamhã awa'awi pesere, wa'uburé hã ma tô watobro, azarutu hawi. 19Azarutu nhib'apito norĩ hã marĩ te te 're i'awaihu'u siromo mono na, za oto rob'uiprazé te te ãma 're iwaibu za'ra mono õ na te te waihu'u za'ra wamhã, ma tô siwi timra, Paulu norĩ Silaha me hã. Ma tô siwi sari zahuré, da te dasina 're i'ubumroi mono zéb u, dama ipire norĩ nho're u. 20Tawamhã dama ipire norĩ nho're te te siwi simizusi wamhã, ma tô ãne wasu'u za'ra:
— Ã hã aibâ norĩ hã, Zudeu norĩ. Te ro'wa'rutu zahuré ãme, wate za'ra 'ri wa'õtõ 'remhã. 21Te te nasi rowasu'u zahuré, wate roti zahi upana. Wa norĩ romanu hã, ãne hã dahâimanazéb zô watob'uzu za'ra õ di za, ãma 're iwahâimana za'ra mono da hã.
22Tawamhã da'ahâ uptabi na ma tô sô atom ni, da te tãma rob'manharĩ wasété za'ra da, Pauluhu ma duré Silaha ma zama. Dama ipire norĩ hã ma tô dama 'ru za'ra, i'uza da te tiwi sani da, duré wede waré na da te 're pré'é zahuré mono da. 23Tawamhã sa'ẽtẽ na da te ahâri zahuré parimhã, dazazéb 're, ma tô za zahuré ni. Dazazé 'madâ'â'wai ma, ma tô roti pese za'ra, te te 'madâ'â pese zahuré da. 24Te te tãma roti pese za'ra parimhã, dazazé 'madâ'â'wa hã ma tô tiza dazazéb 're, 'ri're wa'wa da'rowi uptabi u. Ma tô duré para tété zahuré, wedepo'o zapu'u 're.
Dazazé 'madâ'â'wa te te isazezé
25Niwamhã mara wa'wa, Paulu duré Silaha me hã ma tô rowaptẽrẽ zahuré. 'Re ihâimana u'âsi mono ãma te duré tiwata zahuré, tinho're na. Isiré dazazéb 're isimasam norĩ hã te wapari za'ra. 26Tawamhã rosa'rese õ ré waptu na, ti'a hã sa'ẽtẽ ma tô popo. Tahawa ma tô dazazé 'ri na'rata nhana'rada hã sãsã'ã. Awa'awi uburé 'ridawa norĩ hã ma tô si'ridawa za'ra. Duré isi'uwazi nhorõ rudu cohẽti dazazéb 're isimasam norĩ para wasisizé hã ma tô asisina. 27Tawamhã dazazé 'madâ'â'wa hã ma tô oto udu. Dazazéb 're 'ri're wa'wa nhitobzé 'ridawa haré isimasam na te te 'madâ'â wamhã, ma tô rosa'rata, dazazéb 're isimasa iwairébé na hã. Tahawa tinhi'wa sib'ézé 'wapa hã ma tô sisada waze, aré siwĩrĩ da. 28Tane nherẽ, Paulu hã ma tô 'mahâ hârâ 'rãihâ na, ãne:
— Tô'ã. Tane hã 'manharĩ tõ! Uburé wa ãme aimasam ni.
29Tawamhã dazazé 'madâ'â'wa hã rob'uiwẽzéb zô te hâ. Wara sina, ma tô ãzé. Hi'rãtitõ ma tô aime Paulu duré Silas norĩ papara, pahi te, rẽrẽ'ẽ sina. 30Taha pari, ma tô rob u sani zahuré. Tame te ãne sadanharĩ zahuré:
— E marĩ wa za 'manha, danho'reptuzé te ĩsina uwaimrami da hã.
31Tawamhã ma ãma sada'âbâ zahuré, ãne:
— Saze na, Wanhib'apito Zezusi hã. Tawamhã asõ'reptuzé hã te za asina i'uwaimra duré asõrõwa 're asiré 're isi'ubumroi mono norĩ zama.
32Tawamhã Wanhib'apito zadawa wasu'u na ma tô tãma rowasu'u zahuré, dazazé 'madâ'â'wai ma, duré isõrõwa 're, isiré 're isi'ubumroi mono norĩ ma zama. 33Tô taha bâtâ pibuzém na mara na, dazazé 'madâ'â'wa hã ma tô i'wa're hã tãma upsõ zahuré. Taha pari ma tô â dawabzuri hã 'manha duré uburé isiré isõrõwa 're ihâimana za'ra norĩ zama. 34Taha pari, tinhorõwa u ma tô saprõni zahuré. Isa hã ma tô tãma a zahuré. Tawamhã uburé isõrõwa 're isi'ubumro norĩ me, toi uptabi za'ra di, 'Re ihâimana u'âsi mono hã te te saze za'ra wa.
Paulu norĩ Silaha me dazazém hawi ipusizé
35Tawamhã awẽ wamhã oto, danhib'apito romanu norĩ, ma tô dasi'wapéi 'manharĩ'wa norĩ hã 'mazatõrĩ za'ra, dazazé 'madâ'â'wai u, ãne romreme ré: “Sani zahuré na, ã hã aibâ norĩ hã.” 36Tawamhã dazazé 'madâ'â'wa hã ma tô Pauluhu ma tinha, ãne:
— Danhib'apito norĩ hã te we ai'rui wa'wa, te asani wa'aba da. Mo oto ane wa'aba, rowẽ sina.
37Tane nherẽ, Paulu hã te dasi'wapéi 'manharĩ'wa norĩ ma tinha, ãne:
— Wa norĩ hã Roma 're iwapoto nherẽ, ma tô danho'a te te 're wapré'é za'ra, rowairébé hã wa'ãma hâimana õ nherẽ. Taha pari dazazéb 're, ma tô siwi waza. E niha te ãne nherẽ, ãhã na hã sima wẽ za'ra, pi'uriwi te te siwi wazani da. Mare di. Si'uihâ na we si'aba'ré, te te siwi wazani da hã.
38Tawamhã dasi'wapéi 'manharĩ'wa norĩ hã ma tô ãne hã rowasu'u za'ra, danhib'apito norĩ ma. Ta norĩ hã Paulu duré Silaha me romanu, 're ihâimana zahuré mono na te te waihu'u za'ra wamhã, ma tô tipahi pese za'ra. 39Tahawa, ma tô itẽme ai'aba'ré. Ma tô tiwi waptẽrẽ za'ra, te te 'ruiwapari za'ra tõ da. Tawamhã dazazé hawi ma tô siwi sani. Ma tô tãma nharĩ za'ra, 'ri wa'õtõ hawi neb da. 40Tawamhã dazazém hawi da te sani wamhã, ma tô tineb zahuré, Lidia nhorõwa u. Tame isazei'wa norĩ me ma tô sisõpẽtẽ za'ra. Tawamhã tinhimirowasu'u na ma tô siptete za'ra. Taha pari, ma tô oto tineb zahuré, Filipu hawi.
Iliyochaguliwa sasa
Atus 16: xavBP
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2011, Wycliffe Bible Translators, Inc.
