Sirak 41
41
Dae
1Fo tingim dae, hemi barava nogud tumas fo man hu hemi garem plande samting, hemi hapi long olketa samting wea hemi garem, hemi no garem wari an hemi gohed nomoa fo hapi long kaikai blong hem.
2Fo tingim dae, olketa man ya nao olketa hapi long hem: man hu hemi pua, barava sikman, oloman, man hu hemi wari tumas, blaen man, man hu hemi no garem eni tingting long laef.
3No fraetem dae. Yu mas tingim dat hemi kasem finis fo olketa pipol wea olketa bon fastaem long yu, an bae hemi kasem olketa hu i bon kam bihaen long yu. 4Lod nao hemi putum disfala samting fo evrisamting wea hemi laef. ?Hu nao bae hemi les long wanem Lod hu hemi hae tumas hemi putum finis? Long wol blong olketa man dae, no eniwan hemi wari sapos yu laef fo tenfala yia, o wan handred yia, o wan taosen yia.
Dae blong olketa nogud pipol
5Pikinini blong olketa nogud pipol hu i grouap kam long nogud wei, olketa ya nao pipol i les tumas long olketa. 6Bae olketa lusim wanem olketa onam an olketa hu bae i bon kam bihaen long olketa bae i sem fogud olowe nao. 7An olketa pikinini bae talem dat mami an dadi blong olketa nao i meksem long olketa.
8!Yufala hu i no tinghae long Lod hu hemi hae tumas an no falom Lo blong hem, bae yufala dae! 9Taem yufala garem olketa pikinini, bae bikfala trabol hemi kilim olketa dae an bae yufala garem bikfala sore nomoa. Evritaem yufala foldaon, pipol bae hapi fogud, an nomata taem yufala dae finis bae trabol hemi gohed fo kasem yufala. 10Evrisamting wea i kam long nating bae i gobaek long nating. Hem olsem tu long olketa nogud pipol, bae olketa dae an no enisamting hemi stapbaek long olketa.
11Bodi blong man hemi samting nating nomoa, bat gudfala wei blong hem bae hemi stap olowe. 12Yu mas lukaftarem gudfala wei blong yu, bae hemi stap longtaem winim plande gudfala samting wea olketa wakem long gol. 13Gudfala laef bae hemi save stap longtaem lelebet, bat gudfala wei bae hemi stap olowe.
Wei fo sem
14Olketa pikinini blong mi, falom wanem mi tisim yufala an bae yufala stap long piis. Waes, wea yufala no yusim, hemi olsem gudfala samting wea olketa haedem. Tufala ya i iusles nomoa. 15Man hu hemi haedem krangge wei blong hem, hemi gud winim man hu hemi no yusim waes blong hem.
16Olketa pikinini blong mi, yufala lisin kam. Samfala taem, hemi barava nating fitim nao fo yufala filsem long hem, bat distaem bae mi tisim yufala long olketa samting wea hemi fitim fo yufala filsem long hem. 17Yufala mas filsem long olketa samting olsem:
long olketa ravis wei blong yufala frant long mami an dadi blong yufala,
fo laea frant long lida an bikman,
18fo duim nogud wei
frant long jaj,
fo brekem lo frant long evri pipol,
fo laea frant long wanfala fren o kaban blong yufala,
19fo stil frant long olketa pipol
wea yufala stap kolsap long
olketa,
fo brekem promis blong yufala,
fo res long elbou blong yufala antap tebol long taem blong kaikai,
an fo gridi taem wanfala hemi askem yufala long enisamting.
20An yufala mas filsem tu
sapos yufala no ansa
taem wanfala hemi talem halo long yufala,
an taem yufala lukluk strong long wanfala juri woman,
21an taem yufala no givim enisamting
wea wanfala wantok hemi askem,
an taem yufala tekem samting blong narafala man,
an taem yufala lukluk strong long waef blong narafala man,
22an taem yufala plei nogud
wetem wanfala haosgele
(yufala mas no sidaon long
bed blong hem),
an fo tokspoelem olketa gud fren blong yufala,
an fo toktok bihaen olketa gif wea yufala givim finis,
23an fo storim olobaot
olketa haed stori.
Olketa taem olsem nao hemi fitim fo yufala filsem long hem, an long diswan nao bae pipol i tinghae long yufala.
Iliyochaguliwa sasa
Sirak 41: SIDC
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Pijin Catholic Bible © Bible Society of the South Pacific, 2008.