San Mateo 5
5
Urcu lomamanda yachachishcan: Cushicunaraigu
(Lc 6.20-23)
1Jesús ricushpan achca runacunata, urcu lomapi sicarga tiyarinapa. Chaibi discipulungunaca caillayargacuna,
2chaimanda pai callarirga yachachinata rimashpa:
3«Cushicungami Yaya Diostami munani rimaccunaca, paigunaraigumi Yaya Diospa camachinan cieloca.
4»Cushicungami parisijushcangunamanda huacaccunaca, paigunatami Yaya Diosca cuyashpan cushichinga.
5»Cushicungami ali shungucunaca, paigunatami Yaya Diosca rimashcan mushu allpata cunga.
6»Cushicungami yarcajucshina Yaya Diospa munashcanda mascaccunaca, Yaya Diosmi munashcanda pactachinga paigunahua.
7»Cushicungami runamasinda llaquichiccunaca, paigunatapas Yaya Diosca llaquichingami.
8»Cushicungami shungumbi uchata mana yuyariccuna, paigunami ricungacuna Yaya Diosta.
9»Cushicungami ali causanaraigu tarahuaccunaca, paigunatami Yaya Diosca rimanga huahuainicuna.
10»Cushicungami alita rurajushcanmanda parisiccunaca, paigunapami Yaya Diospa camachinan cieloca.
11»Cushicunguichimi ñuca randi camitucuccunaca parisijushpaiguichipas, chaimanda llullashpa rimashpangunaca tucui sami mana alicunata.
12Cushicuichi, cangunaraigumi cielopi ña tiyan atun regaluiguichica. Chasnami parisichirgacuna cangunamanda pundiru causac profetacunatapas.
Cachishina caichi cai allpapi
(Mc 9.50; Lc 14.34-35)
13»Cangunami canguichi cachi cai allpapi; cachi chamuyashpanga, ¿imasnataya cuti cachiyanga? Mana valinnachu nima imaraigu, chaidaca huichunchimi pambama runacuna sarunangunapa.
Punchashina caichi mundupi
14»Canguna canguichi punchashina cai mundupi. Shuc llacta urcupi tiyarishca mana atipanchu pacanata.
15Chaimandapas mana atipanchichu apichinata shuc lamparinda cajon ucupi churanapa, astahua churanchimi lamparin tiyarinapi tucui huasipi cajucunata punchayachinamba.
16Chasnallatata, cangunapipas punchashina alita ruranaiguichica ricurichu runacuna pundapi. Chasna ali rurajushcaiguichita ricushpanguna paigunapas alabangacuna cielopi caju Papaiguichita.
Jesús yachachin leymanda
17»Mana yuyaringuichichu cangunaca ñucami shamushcani leyta quichunapa chaimanda profetacunapa rimashcangunaca; manami valinchu rimanapa. Mana chairaiguchu shamushcani astahua shamushcanimi rimashcangunata pactachinapa.
18Quiquimbata cangunata rimani, cielo allpa tiyajushpanra, nima shuc letra nima shuc tilde leymanda chingaringachu, tucui quillcarishcashinami pactaringa.
19Chairaigu, maigan cai shuc ichilla camachishcacunata mana casushpanga, chasna mana casunangunapa shuccunatapas yachachishpanga, Yaya Diosmi rimanga nima imaraigu valinguichu Yaya Diospa camachinan cielopica; maiganchari casun Yaya Diospa camachishcangunata chaimanda shuccunatapas yachachin casunangunapa, paida Yaya Diosca camachinan cielopi sumacta valichinga.
20Ñuca cangunata rimani, cangunapa ali ruranaiguichi mana astahua cusca cashpanga escribacunamanda chaimanda fariseocunamanda, cangunaca manami yaicunguichichu Yaya Diospa camachinan cielopi.
Jesús yachachin mana chicninacunapa
(Lc 12.57-59)
21»Yuyarichi ñaupa Moisespa rimashcanda: “Mana huanchinguichichu”, chasna maiganchari shucta huanchin, apanajuchu apucunama huanchishcanmanda uchachinangunapa.
22Ñuca randi cangunata rimani maiganchari piñarin huauquinda, apanajuchu apucunama piñarishcanmanda uchachinangunapa; chaimanda maigambas huauquinda rimashpanga “nima imata yachac,” apanajuchu apucunama chasna rimashcanmanda uchachinangunapa, chaimanda maiganchari paida riman “yuya illa” quiparinga infiernuma huichuitucunamba.
23Chairaigu, apamushpaiguica ofrendaiguita altarma, Chaibi yuyaringui runamasiqui canda piñachishcanda,
24saquira ofrendaiguita altar mayambi. Pundiru alichagri runamasiquihua, chai huasha atipangui churanata ofrendaiguita.
25Piñanacushcaigui runa canda manara juezma apajushpan, ñambi rijushcaiguichipi pundiru alichai paihua, mana guardia canda carcelma churanamba.
26Quiquimbata rimajuni manami atipanguichu llucshinata chaimanda, asta paganaiguicama tucui lihuiquita.
Jesús yachachin casarashcamanda
27»Cangunaca uyashcanguichi Yaya Diospa rimashcanda: “Mana musayanapa”.
28Ñuca cangunata rimani maigambas shuc huarmita ricushpanga munarishpa, ña shungumbi chai huarmihua musayashca.
29Chasna, ñahuiqui cusca parti uchapi urmachishpanga, surcushpaigui huichui; astahua ali can chingachinaiguipa shuc parti aichaiguita, mana tucui aichaigui huichurinamba infiernuma.
30Chaimanda cusca maquiqui uchapi urmachishpanga, pitishpaigui huichui caruma; astahua ali can shuc parti aichaigui chingarinamba, mana tucui aichaigui huichurinamba infiernuma.
Jesús yachachin casarashca mana saquinacunamba
(Mt 19.9; Mc 10.11-12; Lc 16.18)
31»Chaimanda rimashca caju: “Maigambas huarminhua saquinacujushpanga, surcuchu shuc saquinacuna quillcata”.
32Ñuca randi rimani maiganchari saquin huarminda mana musayashpambas, huarminda musayashcatashina saquin. Maiganchari huarmiyan chai saquishca huarmita, paibas chai huarmihua musayan.
Jesús yachachin rimashcata pactachinapa
33»Canguna uyashcanguichi abueloiguichita ñaupa rimashcata: “Mana yanga rimanguichichu pactachishami, Amuiguihua chasna rimashca cashpanga pactachinaigui tiyan.”
34Ñuca cangunata rimani: Mana yanga rimanguichichu; shutiyachishpa cielota, cieloca Yaya Diospa tiyarinanmi can,
35nima allpata shutiyachinguichu pactachishami, allpaca Yaya Diospa chaquin churananmi; nima Jerusalenda shutiyachinguichu, chaiga atun Reypa llactanmi.
36Nima umaiguita shutiyachinguichichu, canga manami atipanguichu yurayachinata nima yanayachinata nima shuc chucchaiguita.
37Canguna rimashpaiguichica “ári, ári” pactachishami imatapas, pactachishca cachu, “mana, mana” rimashpaiguichica mana cachu; chaimanda chicanda rurashpaiguica chaiga shamunmi Satanasmanda.
Jesús yachachin cundratapas yuyanapa
(Lc 6.27-36)
38»Canguna uyashcanguichi rimashcata: “Maigambas ñahuita surcuctaca, paidapas ñahuinda surcunami. Quiruta surcuctaca, paidapas quirunda surcunami.”
39Ñuca randi cangunata rimani: Mana arcanguichu shuc runa huactashpanga cusca parti uyaiguita, cuti ricuchi huactanamba lluquiparti uyaiguitapas;
40maiganchari canda juezma apan munashpan quichunata camisaiguita cui, saqui capaiguitapas;
41maigambas camachishpanga apanaiguipa carganda shuc kilometrota, astahua canga apai ishcai kilometrota.
42Maiganchari tapun canda, cui, maiganchari canda prestan imatapas, mana mitsashpa cui.
43»Canguna uyashcanguichi rimashcata: “Yuyai runa masiquita, cundraiguitaca chicni”.
44Ñuca randi cangunata rimani: Yuyaichi cundraiguichita, alita yuyaichi maicangunachari millaipata rimanaju cangunata, cangunata chicniccunatapas llaquichichi, mañaichi cangunata parisichiccunaraigupas,
45canguna canaiguichipa Papaiguichipa huahuanguna maiganmi causan cielopi, paimi llucshichin indinda piña runacunaraigu chaimanda ali runacunaraigupas, chasnallatata tamiachin casuccunaraigu mana casuccuraigupas.
46Canguna yuyashpaiguichica cangunata yuyagllata, ¿ima regalota cangunapa tiyanga? ¿Mana chasnallatata ruranaju Romaraigu cullquita tandaccunapas?
47Canguna ricsishcaiguichillata saludashpaiguichica, ¿ima chicandataya rurajunguichi? ¿Manachu chasnallatata ruranaju mana quiriccunapas?
48Chairaigu cangunapas ali caichi imasnami cielopi causac Papaiguichica can ali.
Iliyochaguliwa sasa
San Mateo 5: QUPN
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2025 AIDIA
© 2025 Seed Company
