Esaburi 17
17
Esala Liomunju Owuma Esikha
Esala lia Daudi.
1Wulira esava liange liowung'ali, Ewe OMWAMI, khalavanira okhulira khwange!
Chekeresa esala liange elichula mumunwa kuchasimo owuveyi!
2Lekha owukhalaki wang'ali wuchule khwiwe!
Lekha emoni chichio chiwone amalayi!
3Niva mbo onyala watema omwoyo kwange, niva mbo onyala wangenderera esiro,
niva mbo onyala wandema samwene, suli khunyola owumayanu mwise tawe,
omunwa kwange sikuwolanga akachenyekha ta.
4Okhulondana nende evikholwa viavanju, nga wawola
ese nalova engira chiavemiero.
5Nondanga engira chichio wuli lwosi,
ne sirikhwawukhakho ta.
6Ekhulanganga, sikira wunjipanga, Ewe Nyasaye;
njekerese, owulire amakhuwa kange.
7Yekesa owusimi wuwo wa wuli lwosi owokhuwukia.
Ewe omuwonia wavo averukhira mwiwe,
nivatakha okhwekisa khuvasiku vawe.
8Ninde ngolindanga endolero yemoni,
ngise musisiko siembaa chichio,
9nekise esikhupo siavasiku,
avasiku vechi vambotokhanire.
10Emioyo kiawe sikilikhomo esisa ta,
eminwa kiawe kilomaloma nesireka.
11Vanyongakho nundi vambotokhanire,
vanatakhanga oweyangu wokhungwisa.
12Vali ngetalang'i yekomba okhwosula,
vali ngetalang'i mbere eyekhinire okhusindusa.
13Yinyokha Ewe OMWAMI! Valengere, ovaminye!
Chumikhira olung'esi lulwo onanule owulamu wange okhuchula khumusiku.
14Njuse muvanju nomukhono kukwo, Ewe OMWAMI,
okhuchula muvanju ava omukavo kwawe muwulamu kwesialo.
Enda chiawe chikhoya chiechulamo akawavavikhira,
avana vawe navo vakhoya vanyola akavichiriye,
valekherekho ata navechukhulu vawe vosi.
15Nausa ese njiakhuwona oweni wuwo muwulungi,
ne nininyokha, njia okhuva ninichuye owusimi khulwokhukhuwona.
Iliyochaguliwa sasa
Esaburi 17: LNTPP
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
©The Bible Society of Kenya, 2024