Yohana 10
10
Olukaato lwa Omwayi Mulayi
1“Ng'aling'ali, vawolera, oyo ochengirira musitioli mumuliango nausa kengirira awunju wundi, omunju oyo mwivi nundi munuli; 2nausa oyo owingirira mumuliango, njomwayi wamakondi. 3Khuniye omulindi wamuliango amwikuliranga; amakondi kawulira omwoyo kukwe, ne alanganga amakondi kake ne kacha akachusa erwanyi. 4Ne nikakhachusa amakondi kake kosi, achangiranga emberi wako, ne amakondi kamulonda, sikira kamanyire omwoyo kukwe. 5Sikalondanga khumuchende tawe, nausa kamwirukhanga, sikira sikamanyire omwoyo kwomuchende tawe.” 6Yesu kachumikhira omufano kuno ninavo, nausa sivamanyirisa esikali navawolera tawe.
Yesu Omwayi Mulayi
7Kho Yesu nundi kavawolera, “Ng'aling'ali, vawolera, nise omuliango kwamakondi. 8Vosi avacha emberi wange vevi nundi vanuli, nausa amakondi sikavachekeresa ta. 9Nise omuliango; yesiyesi owingira okhuvichira mwise, alikhuwoniwa, ne alikhwingira nokhuchula nokhunyola olwayiro. 10Omwivi kachanga wusa okhwiva, okhwicha nende okhwonona, ese nichire mbo vave nowulamu, ne vave nawo muwungi. 11Nise omwayi mulayi, omwayi mulayi aananga owulamu wuwe khulwamakondi. 12Oyo omuandike ochali omwayi, oyumakondi sikake ta, nawona esiwulukhu nisicha kerukhanga alekha amakondi, esiwulukhu sienyakhirakho ne sisalania amakondi. 13Kerukhanga sikira muandike ne siaendera amakondi tawe. 14Nise omwayi mulayi, emanyire akange ne akange kamanyire, 15Nga Papa kamanyire nange emanyire Papa, ne embaana owulamu wange khulwamakondi. 16Nendi namakondi kandi, akachali ketuuli lino, okhwola ekalechemo kosi, ne kali khweyama omwoyo kwange. Kho khulikhuva nende etuuli elala, nomwayi mulala. 17Khulwesifune sino Papa kasima, sikira embaana owulamu wange, mbo nundi ewuwukule. 18Awumawo owuwukula okhuchula khwise, nausa ewuwana khulienya liange. Ndi nowunyali wokhuana, nendi nowunyali wokhuwuwukula nundi, owunyali wuno nanyola okhuchula khu Papa wange.”
19Khwaliwo okhwawukhana mu Avayahudi okhuvera amakhuwa kano. 20Avangi vawe vawola, “Ali nesisieno, ne mulalu, mumuchekeresa wasi?” 21Avandi nivawola, “Kano simakhuwa komunju oli nesisieno ta. Esisieno sinyala okhwikula emoni chiomuwofu?”
Avayahudi Valova Yesu
22Yali mulutalo lukali lwesao liokhwemekha Etemperi mu Yerusalemu; 23Viali evise viomunyichi, ne Yesu kali akenda mu Etemperi musikoro sia Solomoni. 24Kho Avayahudi vakhung'ana aakali ne vamuwolera, “Oli khulekha nikhukalikania okhwola lina? Niva ewe niwe Kristo, chuwolere wusa awulafu.” 25Yesu kavachipa, “Evawoleye ne simusuviye tawe. Emilimo ekikhola mulicha lia Papa, chichusa owuloli khwise. 26Nausa simusuvira, sikira simuli valala khumakondi kange tawe. 27Amakondi kange kawulira omwoyo kwange, ne ekamanyire, ne kanondanga. 28Nekaweresa owulamu wa wuli lwosi, sikalikocha tawe, nawumao onyala kanula okhuchula mumukhono kwange. 29Papa wange owakamberesa, mukali okhukhira vosi, nawumao onyala okhunula okhuchula mumukhono kwa Papa. 30Ese nende Papa khuli esinju silala.”
31Avayahudi vatola amakina vamulase nundi. 32Yesu kavachipa, “Evekesise evikholwa vilayi evingi okhuchula khu Papa, khanu khuvino, siriena simwenya okhukhupira amakina?” 33Avayahudi vamuchipa, “Sikali sikira yesilolesio silayi sikhukhupirakho amakina ta nausa esienyaenye, sikira ewe omunju wusa wekhola Nyasaye.” 34Yesu kavachipa, “Siriaandikwa mumalako kenywe, ‘Nawola, muli avanyasaye’? 35Niva kavalanga avanyasaye khu avekhuwa lia Nyasaye liacha (ne amaandiko sikanyala kakhalakwa tawe), 36Muwola muchi oyo oyu Papa atakasise ne kamuchuma musialo, ‘Onakholanga esienyaenye khu Nyasaye,’ sikira emboye, ‘Nise Omwana wa Nyasaye’? 37Niva sindakholanga evikholwa via Papa, mana muchasuvira tawe; 38Ne niva ekhola, ata niva simusuvira, suvire evikholwa, kho mumanye ne mumanyirise ne mumanye mbo Papa ali mwise nese mu Papa.” 39Nundi vatema okhumutira, nausa kamiukha okhuchula mumikhono kiawe.
40Kachulao kachia kambukha Yordani okhwola awunju aa Yohana kachangirira okhuvastisa, ne katong'ao. 41Ne avanju avangi vamwichakho; ne vawola, “Yohana sikakhola evimanyiro tawe, nausa wulisinju esi Yohana kawola khumusacha ono siang'ali.” 42Ne avangi ao vamusuvira.
Iliyochaguliwa sasa
Yohana 10: LNTPP
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
©The Bible Society of Kenya, 2024
