Luka 4
4
Sɛɛɗan goo Yeesurɛ
Mat 4:1-11; Mar 1:12-13
1Yeesu, kəy Zurdɛŋŋe nɔ, fəəm dȩȩt hi̧ʼ o si̧i̧ ba, Fəəm dȩȩt ɛnɔ pan tana ho̧o̧t talle 2Sɛɛɗan goo Yeesu ho̧o̧te tuu, yo̧o̧ wɔɔk itto, vi̧i̧ wɔɔk itto. O lɛn lɛm yɛ, yo̧o̧ ɛnɔ ve tɛʼ vəə kəzəkkɔ gɔ̧l yaʼarɛ. 3Sɛɛɗan feeza: «Oò mɔ Go̧o̧ge tanni nɔ, mɔ fee pîn ɛnɔ do fi lɛmma». 4Yeesu hi̧i̧za: «Dɛptɛl fee: “Ha̧a̧ kan za̧a̧nin lɛmma zaʼ yɛ.”» 5Sɛɛɗan pan dɔna bɛlba aʼvin, kaʼso iza yɛɛ buu hɛkpa nɔ verɛ tɛʼ. 6Kə feeza: «Mii pomma gɔti vere nagate gbɛ̧ɛ̧ yɛɛ ɛnɔrɛ: Hɛn ɛn ve tɛʼ de ii naʼa ɛn mii pora ha̧a̧ mi hi̧i̧ nɔ yɔ. 7Oò mɔ ɗiksi ii timba, hɛn ɛn ve tɛʼ de fira mɔni». 8Yeesu hi̧i̧za: «Dɛptɛl fee: “Mɔ bɛʼzi Gbɛ̧ɛ̧ Go̧o̧ge mɔni zaʼ, mɔ kɔza kɔm oy o da̧a̧re.”» 9Sɛɛɗan tana zeruzalɛm, tak ɛʼɛ maak likkɔ o dakke kə feeza: «Oò mɔ Go̧o̧ge tan ani nɔ, mɔ wan zo̧o̧ kɔʼi. 10Dɛptɛl fee: Go̧o̧ge de pora zə̧ə̧ an vɛ ya̧a̧, doo ve yaa laamɛ. 11Zɔʼ ɓɛʼ: “doo ve kam o ve naʼa, dɔʼ mɔn ka bo yaa gbaa pinba ɓaʼ.”» 12Yeesu hi̧i̧za: «Dɛptɛl fee: “Gaa mɔ goo Gbɛ̧ɛ̧ Go̧o̧ge mɔn sɛ.”» 13Sɛɛɗan goo Yeesu vere kɛm an ve sɛw tɛʼ si̧ʼ nɔ luu ɛʼɛrɛ, de laa yo̧o̧ zɔʼ ze ɓɛʼ.
Yeesu bi̧i̧ kɔm an Galile
Mat 4:12-17; Mar 1:14-15
14Yeesu kə dɔk hɛk Galile, Fəəm dȩȩt gɔti an hiʼ o si̧i̧ ba. Ha̧a̧ ve bi̧i̧ moò an moò hɛkpa tuu sɛw tɛʼ. 15O òo moò, náa yuuda o ve lik faa yakke, náa ve vɔŋarɛ kpɛŋ.
Náa Nazarɛt Ve bɔn Yeesurɛ
Mat 13:53-58; Mar 6:1-6
16Yeesu tak Nazarɛt kap bɔk o naa tin nɔ oppo. Too o nɛnin nɔm, náa Yuuda o ve yo̧o̧ wə̧ə̧riba, o dɔ tak náa Yuuda o ve lik faa yakke. O luu bɛlba ka waʼ Go̧o̧ge moò ani, 17Ve poʼo Porofɛt Ezay Dɛptɛl an nɛy. O kǔl zee yɛɛ zɔʼ ve dɛ̧ɛ̧ tin: 18«Gbɛ̧ɛ̧ kɛŋ fəəm an kan de iipo, o wəy dooy, ooza náa gim ak ve moò za̧ǎ̧. O yaʼi dooy feeza náa lik naʼre nɔ ve vukki voni, dooy kɛʼza yə̧ə̧ ve nɔt voni, dooy vuksi náa vey gaan voo gim ɓa nɔ ve o ve gim gaa yɛɛrerɛ, 19Dooy fee vɛll Gbɛ̧ɛ̧ kɛŋ si̧i̧ za̧a̧ an de hənna tin nɛy». 20Pig an Yeesu zuʼ kən Dɛptɛllɔ tin, po kə wa̧y kɔm ak ligi tuu nɔ naʼa, o zɔɔ kə hɛge. Náa ligi intuu nɔ ve tɛʼ ve hooza nɔt fɔn. 21Ɛn kəzəkkɔ o feet vo: «yak moot dɛ̧ɛ̧ de Dɛptɛlle ke voy kii nɛnɔ, kɔ ma, de munɛ voni. 22Náa ve tɛʼ ve toʼo zik, ve vɔŋ yak moot an za̧a̧ ɛnɔ verɛ, kɔ vo bit ve fee: «De ɛnɔ Zozɛf tan an oyɛrɛ?» 23Yeesu feet vo: «voy feezira moò bɛmm ɛnnɛ: “wa̧y yo̧o̧n ho̧o̧, mɔ yo̧o̧n wɔɔk mɔni mɔy!” Voy feezira ɓɛʼ: “Vi kii hɛn mɔ kɔ kapɛrnummɔ verɛ sɛw tɛʼ, mɔ kɔ um kappa tɛɛ, too ɛnɔm vin sɛw.”» 24Yeesu kə feet vo zɔʼ ɓɛʼ: «Mii feet vora, de moò za̧a̧ ginu: Go̧o̧ge yaʼyɛɛ an ɓimmɔ, ve ɓanaa wɔɔk o kap ɓɔɔrire za̧a̧za̧a̧ yɛ 25Mii feet vora de ginu: kep kuu bɔk ve duʼza̧a̧ Islayɛlle, Porofɛt Eli o vɛllba, maam bɔk naŋŋin yɛ vɛll ta̧a̧to vey sɛ̧ɛ̧ guu, gɔ̧l aʼ bɔk yaa hɛkpa tuu tɛʼ. 26Go̧o̧ge yaʼan Eli kep kuu Islayɛlle nɔ o ve po yɛ, ɛn o yaʼa waa kuu bɔk de kanna sarɛpta nɔ oppo zaʼ, hɛk sidɔŋŋɔ oppo. 27Guni ak bɔk ve ɓoo Islayɛlle yəəmza̧a̧ Porofɛt Elize o vɛllba; Ɛnɔ ha̧a̧ daŋga o ve tiŋza̧a̧re ho̧o̧ an poonɛ, poo Naʼaman wa̧y hɛk siriya nɔ oppo nɛy, o da̧a̧re zaʼ». 28Náa ke vey náa yuuda o ve lik faa yakke intuu nɔ ve kii, Yeesu yak moot an ɛnɔ ve kəzəkkɔ, nɔ vo zatta. 29Ve luu ve wɔɔ vuksa kare tuurɛ, ve dɔna gbɔk waa kap von Nazarɛtɔ zɔɔ de tin nɔ oppo, ka ve yaʼa zo̧o̧ yɛɛ paake kɔrɔt. 30Yeesu vuk o ve tiŋza̧a̧re tuu wɔrɔt, o luurɛ.
Yeesu poozi wa̧y zɔʼ o ɛ fəəm ɓɛɛ̌
Mar 1:21-28
31Yeesu sizo̧o̧ kapɛrnum, kap hɛk Galile nɔ oppo, o ooza náa ve moò, náa yuuda o ve yo̧o̧ wə̧ə̧riba. 32Náa ve kii Yeesu moò oora an ɛn ve nɔ, kɔ vo bit, ɛn ve hə̧, o oorin moò vere gɔti Go̧o̧ge poʼo nɛy. 33Wa̧y zɔʼ tin, bɔk o náa yuuda, o ve lik faa yakke intuu vin, fəəm ɓɛɛ bɔk dɔza fɔn. O gbat wɔɔk aʼvin fee: 34«Hɛ̧y, hɛ̧ɛ̧n mɔ hi̧i̧ ivi po nɛɛ? Yeesu wa̧y Nazarɛt ɛnɔ mɔ nɛy, mɔ yaay kam tut virɛrɛ? Mi gaamɛ za̧a̧za̧a̧: mɔ wa̧y dȩȩt Go̧o̧ge yaʼami nɛy!» 35Yeesu moò zɛt fəəm ɓɛɛ nɔrɛ, poʼo yana feeza: «Mɔ gət, mɔ vuk wa̧y nɔ o fɔn tuurɛ!» Fəəm ɓɛɛ nɔ gan gbəl wa̧y nɔ hɛge náa o ve timba tuu kə vukkɛ kɔna hɛn zɔʼ ɓɛ yɛ. 36Náa ve tɛʼ kɔ vo bit, ve visin o ve yɛɛ ba: «Hɛ̧ɛ̧n yak moorin too ɛnɔmmɔ nɛɛ? Wa̧y ɛnɔ mooza fəəm ɓɛɛ nɔ vɛ vere gɔtii, ve kiiza kɔʼrɛ ve vukkɛ!» 37Ve wɛksi Yeesu nii an hɛkpa tuu sɛw tɛʼ.
Yeesu poozi ho̧o̧ ve duʼza̧a̧
Mat 8:14-17; Mar 1:29-34
38Yeesu vuk náa Yuuda o ve lik faa yakke tuu nɔ, o tak Simɔŋ o kaa. Simɔŋ a̧ki̧i̧ bɔk oy yȩʼginna ho̧o̧ ka̧a̧k hɛge aʼvin kpɛŋ, náa ve haa Yeesu doo kɔza hɛn zɔʼrɛ. 39Yeesu boʼzo̧o̧ waa keppɔ o hɛge, o moò yak zɛkke feeza ho̧o̧ ka̧a̧k ɛnɔ doo vukkɛ, ho̧o̧ ka̧a̧kɔ vuk waa keppɔ o fɔn tuurɛ, kaʼaso Simɔŋ a̧ki̧i̧ luu bɛlba, kə yoon vo lɛm tin. 40Yo̧o̧ òo tun nɔ, náa ve ɛ ho̧o̧ ve kətkət o ve kaa nɔ vɛ, ve pan voy Yeesu oppo. O goʼot vo naak wɔɔkpa, ve sɛw tɛʼ, o poozi vo ho̧o̧ von verɛ. 41Fəəm ɓɛɛ ve vuk náa ho̧o̧ ve duʼza̧a̧ o ve fɔn, ve wa̧a̧zi yak ɛŋgɔʼ: «Mɔy, mɔ Go̧o̧ge tan ani!» Ɛn Yeesu zɛt vorɛ ɓɛɛza̧a̧, o yaŋ vo yak moorɛ vin, fəəm ɓɛɛ nɔ bɔk ve gaa, Yeesu bo o kiris yɔ.
Yeesu tak òo moò za̧a̧ hɛk Yuuda
Mar 1:35-39
42Dȩȩ yɔŋgal an nɔ, Yeesu vuk kappa tuurɛ, o luu tak yɛɛ tɔŋgba o da̧a̧re. Náa ve duʼza̧a̧ ve bi̧i̧ teee; Ve zeee nɔ, ve hi̧i̧ ka ve yaŋŋa, doo luu ɛ vo ɓɛ sɛ. 43Yeesu feet vo: «Sȩȩ kaay tak fee moò za̧a̧ Go̧o̧ge Gbɛ̧ɛ̧ an nɔ kap zɔʼba dɔm, Go̧o̧ge yaʼiy moò an oy». 44Ɛn kəzəkkɔ o tak òo Go̧o̧ge moò an náa yuuda o ve lik faa yakke hɛk yuuda.
Iliyochaguliwa sasa
Luka 4: Luk
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
