MATIE 4
4
Omekama ba Yesu
(Hokea koko Mal 1, 12-13; Luk 4, 1-13)
1Mwembo alɔndɔ Yesu ta esobe bɛngɛ boo amekame na djabulu. 2Ngɔngɔ dja osabekea maswi tuku inei, Yesu aoka ndja. 3Momeki adoa odii yo ko abala na nde boo: «Okadaa Mwana ɔ Ndjambe, bala na ndeke djii boo dja imee mapa.» 4Yesu amosɔmbɛdja: «Ɛkomama boo: “Moto atahela etoko na ipa, endolo na bibaeli bisusu bikaimane ta monɔkɔ ma Ndjambe.”»
5Na bea, djabulu amotomba ta ibonga isɛnɔke, amoemea ta sɔngɔ ɛ tepelo 6ko abala na nde boo: «Okadaa Mwana ɔ Ndjambe, sadumba onase; tina ɛ Makomi mabalaka boo:
“Alomalea Babwɛndi ba nde
ko baotombalea ta mabɔ ma bobo
ta elone ɛ boo egbota ɛ wɛ esaka taa mondeke.”»
7Yesu amosɔmbɛdja boo: «Ɛkomama koko boo: “Pɛpɛ omeka Kumu, Ndjambe ɔ wɛ.”»
8Djabulu amotomba koko diko la ngomba ena eenɔi na oyai, amoinedja bikumu bisusu ba ngondo engbanga na ekumu ɛ mu, 9ko abala na nde boo: «Naopalea lua losusu ilaenɛkɛ wɛ, nga okakwa magunda boso ba mbai tina ɛ okumedjani.» 10Bea Yesu abala na nde boo: «Satana, donga ena! Tina ɛkomama boo: “Okwalea magunda oko odii Kumu Ndjambe ɔ wɛ ko oongɔɔnɔlea oko yo buki.”» 11Bea djabulu amokina. Babwɛndi badoa odii yo ko bamopa mia ma oyaka.
Yesu abangi mosala ma nde ta Galilai
(Hokea koko Mal 1, 14-15; Luk 4, 14-15)
12Ehole ɛoka Yesu boo baisi Yoani ta bɔlɔkɔ, akɛɛ ta Galilai. 13Adonga ta Nasaleta, endolo akɛɛ adaa ta Kapalanauma, ibonga la ekulu ɛ ibeke inɛnɛ la Galilai, ta tei ɛ bikenge ba mokpɔtɔ ba Djabulona ko Nefetali. 14Ekɔɔmɔ bea tina ɛ okokedja bibaeli ba motɛli Isaya:
15«Mokpɔtɔ ma Djabulona ko ma Nefetali,
ndjia ɛ ibeke inɛnɛ, mbuti na Yolodani,
Galilai ɛ bikomi ba bakɛndɛli!
16Bato ibahelamaka ta modidi,
baeni ohuu bonɛnɛ!
Bii ibadaka modidi ma bago,
ihuu lienɛmɛbi odii bo!»
17Donga ehole hee, Yesu abanga oleha boo: «Sɔmbɔtɔnɔni milema ma boono, tina ɛ boo Okumu ba diko boimei mbuti!»
Yesu abei balubi ba swi banei
(Hokea koko Mal 1, 16-20; Luk 5, 1-11)
18Yesu adaka adale ta ekulu ɛ ibeke inɛnɛ la Galilai, aenɛ balubi ba swi babae yɛngɛ na osuku, Simo, ona ɔbeaka bo Piɛlɛ, na mwanango Andele; ibadaka baluba na ehea ta ibeke inɛnɛ. 19Yesu abala na bu boo: «Kimananini ko naoimedjaleani balubi ba bato.» 20Ambuku, bakina bihea ba bobo ko bamokimana. 21Ehole ɛdonga Yesu ena, aenɛ koko bato bakina babae, yɛngɛ na osuku, Djake nɔbɔ Yoani, bana ba Zebedai. Badaka na sangwabu Zebedai ta bwato babɔngɛdja bihea. Yesu ababea; 22ambuku, baakina bwato na sangwabu ko bamokimana.
Yesu alehi ko aheledjai bato ba bipeko
23Yesu adala ta Galilai esusu, alehaka ta ndako dja miongɔɔnɔ dja Bayuda, alehaka Mwako Mopele ma Okumu ba busa ko aheledjaka bato na bipeko ba bobo na biɛmɛ ba bobo bisusu. 24Gala ɛ nde enangana ta Sulia esusu ko badaka bamolwɛ bato basusu ibanɔngɔmɔkɔ na bipeko mindumba na mindumba kaoko ibatungeamaka na miembo mibe, engbanga na bato ba mosinga na bitumbɛ. Yesu abaheledjaka. 25Bato bike bamokimanaka, ibadongaka ta Galilai, ta mabonga doomi, ta Yelusalɛmɛ, ta Yuda ko ta ekenge ɛ mokpɔtɔ ɛ dɔngɔ la dua la Yolodani.
Iliyochaguliwa sasa
MATIE 4: ngc
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
©2025 Communauté des Eglises Travaillistes (CET)
