Matta 21
21
Yesu a təɗ əŋ Urusalima
(Markus 11:1-11; Luka 19:28-40; Yahwana 12:12-19)
1Əŋ Yesu abə gula ŋga iyi i kəkərəɗaha kwata əŋ Urusalima, i gwar mbehmbeh abə wuta tə Baytifaji, kəɗi bəra wuzum tə Jaytun iyi, Yesu a ləɓ gula iyi bək əŋ faŋw tə gula ŋga iyi, 2a zlapaŋta, a zla: «Hi nda əŋ wuta tə a ma təheni mba. Hi lim zaŋgwa tə wala za mə jewi abə mbu ŋgaŋ a kelek. Hi pəlahata, hi dahakta. 3Əŋgah hedi kəzlapaheni za, hi ziŋgeŋ zlap: “Bay Bayta mə mbata.” Mbehmbeh mba, a yakahenita za.» 4Məsəkəŋ ta, kəɗal za amba ley gwaɗ ma tə hedi mə giz ma abə miya tə Bizlaf zlezle, mə zlap, a zla:
5«Hi zlapaŋta əŋ hedi tə Siyawna iyi:
Ehe, Bay təheni a kəndaha əŋ kelek təheni,
abə dak wucum, mbə a talaŋ zaŋgwa tə wala,
abə a talaŋ mbu tə zaŋgwa, mbu tə zaŋgwa ta mə ɓət məsəkəŋ sə ndʉlʉk#21:5 Zakariya 9:9..»
6Gula ŋga iyi sey, i nda izey, i ɗal mənaŋ Yesu mə zlapaŋta. 7I dahaŋ zaŋgwa sey abə mbu ŋgaŋ ta. I ndəɗ rukut tata iyi a zaŋgwa iyi ta, ɓa, Yesu a nja a ɗek. 8Hedi iyi mbeh səku əŋ faŋw tə hedi makwas iyi i ndəɗ rukut tata iyi a kataf, hedi məzəwindi iyi bahayim i bəlaha vidiɗ tə ma ndəra tə mpay iyi, i ndəɗta a kataf. 9Hedi mə nda tə a ma tə Yesu iyi abə hedi mə ziberehew kəɗi dawaŋ iyi i kəja varay, i zla:
«Hwazana, həmən əŋ Mbu tə Dawuda!
Bizlaf mə ɗiy ndəra bay ŋga a hedi mə ndaha tə abə miya tə Bay Bayta.
Hwazana, həmən əŋ Bizlaf tə wuzlaf#21:9 Jabura 118:25-26.!»
10Əŋ Yesu mə təɗ əŋ Urusalima seh, hedi tə a namba iyi fuk i kəhuɓəl za. I ɗəp wucum əŋ faŋw tata, i zla: «Hedi wa, ar seh, viyey?» 11Hedi iyi i ziŋgeŋta zlap, i zla: «Ar Yesu, hedi mə giz ma abə miya tə Bizlaf tə Nasaratu əŋ hayak tə Galili.»
Yesu mbə əŋ biŋ tə Bizlaf
(Markus 11:15-19; Luka 19:45-48; Yahwana 2:13-22)
12Yesu a təɗ əŋ biŋ tə Bizlaf. A gam hedi mə ber məsəkəŋ iyi abə hedi mə səkəm məsəkəŋ tə a namba iyi fuk. A gaɗ tabəl tə hedi mə zlambaɗ dala iyi abə karawal tə hedi mə ber wanaɗ tə ge iyi. 13A zlapaŋta, a zla: «Ehe, ma mawuzlel tə əŋ Ɗerewel tə Bizlaf mə zlap, a zla:
“Biŋ na seh, i ɗafaŋ ma za, biŋ kə ɗal mbuh əŋ Bizlaf”,
ama heni seh, heni kəmbaɗza za əŋ mbudum tə hedi mə la məsəkəŋ tə hedi iyi#21:13 Esaya 56:7; Yeremiya 7:11..»
14Hedi wuluf iyi abə hedi gəlvaɗah iyi i kərəɗaha əŋ kelek Yesu əŋ biŋ tə Bizlaf, ɓa, a mbəlta. 15Hedi səndawl iyi tə a talaŋ hedi mə ɗal kukus əŋ Bizlaf iyi abə metir tə ma majaw iyi, nəf tata kədəm za, əŋ tata i mə gər mazla Yesu mə ɗal iyi wa liŋ abə wuziyi i mə ja varay əŋ biŋ tə Bizlaf, i zla: «Hwazana! həmən əŋ Mbu tə Dawuda!» 16I zlapaŋ əŋ Yesu, i zla: «Hwa kəzlim ma wuziyi i mə zlap wa vaw?» Yesu a ziŋgeŋta zlap, a zla: «Ayaw, heni kəter ley jenge ma mawuzlel tə əŋ Ɗerewel tə Bizlaf seh halla vaw? Mə zlap, a zla: “Abə ma tə wuziyi mekedek iyi, abə ma tə wuziyi mə sa wa iyi, hwa kəɗal za amba i həmənah mənaŋ hwa mə mba”, heni kəjeŋgu halla vaw#21:16 Jabura 8:3.?» 17Abə dawaŋ ta, a yakta, a təɗaha ŋga əŋ berne ta, a nda əŋ Baytaniya, a waŋ a namba.
Yesu a gay mədifsəkiɗ
(Markus 11:12-14, 20-24)
18Garaha kafa ta, Yesu a kəziŋgehe əŋ berne, mətis a kəju. 19A lim mədifsəkiɗ a meɗek kataf, a nda əŋ gədaŋ, ama a lim tə a ɗek seh, sey vidiɗ iyi dap. Ɓa, a zlapaŋ əŋ mədifsəkiɗ ta, a zla: «Hwa lim ley mbuw wuziyi halla ba səlak.» Mbehmbeh mba, mədifsəkiɗ sey, a hwal ŋga. 20Əŋ gula ŋga iyi i mə gər məsəkəŋ ta seh, i kəhar za. I ɗəp Yesu, i zla: «Mədifsəkiɗ wa a hwal viyu mənaŋ wa seh, viŋgeh?» 21Yesu a ziŋgeŋta zlap, a zla: «Sa kəzlapaheni məndiwiŋ: Əŋgah heni abə kuw ma, heni kəwulək bək bək halla, hi gula i ɗal məsəkəŋ mənaŋ sa mə ɗalaŋ əŋ mədifsəkiɗ wa, kwa məsəkəŋ mə day wa bahayim. Heni gula i zlapaŋ əŋ wuzum wa: “Dəɗ mar tə a nawa, nah təkwa əŋ talafay”, məsəkəŋ ta, a ɗal za. 22Əŋgah heni abə kuw ma seh, heni lim məsəkəŋ heni mə ɗəp iyi fuk abə ɗal mbuh təheni za.»
Fagay tə Yesu a ndaha seh a tikey?
(Markus 11:27-33; Luka 20:1-8)
23Yesu a təɗ əŋ biŋ tə Bizlaf, əŋ mbiŋ a kəsərək hedi iyi seh, hedi səndawl iyi tə a talaŋ hedi iyi i mə ɗal kukus əŋ Bizlaf abə hedi mə ɗal yawa tə Yahuda iyi i kəkərəɗaha əŋ kelek ŋga, i ɗəpu, i zla: «Hwa ɗal məsəkəŋ iyi ta wa seh, abə fagay vitey? Mə vəlah mazla ta ley ɗal məsəkəŋ iyi ta wa mənaŋ wa seh, viyey?» 24Yesu a ziŋgeŋta zlap, a zla: «Sa bahayim, sa mba i ɗəpaheni məsəkəŋ ntaɗ. Əŋgah heni kəziŋgeke ma ta za seh, sa gizeheni mazla sa mə ɗal məsəkəŋ iyi wa tə abə mbiŋ za. 25Mə ləɓaha Yahwana ley ɗalaŋ batem əŋ hedi iyi seh viyey? Bizlaf vaw, hedi iyi vaw?» I mar ley ɗal yawa əŋ faŋw tata, i zla: «Əŋgah nakwa iyi zlap Bizlaf seh, a nda i ziŋgenakwa zlap: “Kaa, heni kuw ma tə Yahwana ta səku seh, məŋgəvday a mey?” 26Ama əŋgah nakwa iyi zlap: “Hedi iyi seh”, nakwa iyi nda i ləndəŋ abə hedi iyi, məŋgəvday hedi iyi fuk i kəwulək Yahwana seh, ar hedi mə giz ma abə miya tə Bizlaf.» 27Abə dawaŋ ta izey, i ziŋgeŋ zlap əŋ Yesu, i zla: «Nini kəsəŋ səku.» Yesu a ziŋgeŋta zlap, a zla: «Sa bahayim, sa kənda i gizeheni abə fagay vitikey sa mə ɗal məsəkəŋ iyi ta wa halla.»
Ma marərək a talaŋ wuziyi bək
28Yesu a zlapaŋta baha, a zla: «Hi wulək seh, viŋgey? Hedi aka, abə wuziyi ŋga iyi bək. A nda əŋ kelek titʉz, a zlapaŋgu, a zla: “Mbu na, nda i ɗalaha kəzəɗ eci əŋ lay.” 29A ziŋgeŋ zlap, a zla: “Sa nda halla.” Ama abə dawaŋ ta, a buw wulək, taŋ a nda. 30Abə dawaŋ ta, baba a nda əŋ kelek mbu məzəwindi, a zlapaŋgu mənaŋ mbiŋ mə zlapaŋ əŋ mbu titʉz sey. Mbu ta, a ziŋgeŋ zlap bahayim, a zla: “Ayaw, baba na, sa nda za.” Ama kənda halla. 31Əŋ faŋw tə wuziyi sə bək iyi wa, mə ɗal məsəkəŋ mənaŋ baba tata mə mba seh viyey?» I ziŋgeŋ zlap, i zla: «Mbu titʉz.» Yesu a ziŋgeŋta zlap, a zla: «Sa kəzlapaheni məndiwiŋ: Hedi mə cakal budu iyi abə wala barlaw iyi i təɗ za əŋ Bay tə Bizlaf məpər a heni. 32Məŋgəvday Yahwana mə ɗal batem kəndaha za əŋ kelek təheni, kəgizeheni kataf sə delele za, heni kəkuwaŋ ma halla. Ama hedi mə cakal budu iyi abə wala barlaw iyi i kəkuwaŋ ma za. Kwa abə dawaŋ ta, heni mə gər məsəkəŋ lawlaw tə abə nje təheni, heni kəbuw wulək təheni ley kuwza halla.»
Ma marərək a talaŋ hedi madawar iyi i mə ɗal kəzəɗ tə əŋ lay tə mpay mə mbuw wuziyi kə zəm
(Markus 12:1-12; Luka 20:9-19)
33«Hi teh zləm a ma marərək wa baha. Hedi tə lay məzəwindi aka, a kəɗal lay tə mpay mə mbuw wuziyi kə zəm za, a capu ha tulək, a ra lay kə ɗic yim tə wuziyi tə mpay iyi ta, a ləm biŋ jiŋ piŋgiliŋ əŋ hedi mə jəɗ lay ta#21:33 Esaya 5:1-2.. A yak lay ta əŋ ndəra hedi mə ɗal kəzəɗ iyi, ɓa, a nda ŋga i pikehe guduk. 34Əŋ hala kə mbal wuziyi tə mpay iyi ta kəhwasaha za seh, a ləɓ gula ŋga iyi əŋ kelek hedi mə jəɗ lay iyi sey ley kuwaŋ ɓiz ŋga tə wuziyi tə mpay iyi tə əŋ lay ŋga ta. 35Hedi mə ɗal kəzəɗ iyi ta i məl hedi mə ɗalaŋ kəzəɗ ŋga iyi ta, i kəlap hedi ntaɗ, i ja hedi məzəwindi, hedi məmaakaɗ ta bahayim, i ju abə nvəŋ. 36A ləɓ hedi ŋga mə ɗal kəzəɗ iyi mbeh səku day nakaha iyi baha, hedi mə jəɗ lay iyi ta i ɗalaŋta mənaŋ i mə ɗalaŋta məsəkəŋ əŋ hedi titʉz iyi. 37Əŋ cukwaɗ ta seh, a ləɓ mbu ŋgaŋ abə ley zlap, a zla: “I waŋgaŋ talaŋ za əŋ mbu na.” 38Ama əŋ hedi mə ɗal kəzəɗ iyi i mə lim mbu ŋgaŋ ta seh, i ɗal yawa əŋ faŋw tata, i zla: “Ehe, ar mbiŋ mə nda i zəm ge. Mazukwa i ju, amba lay ta, mə nja əŋ nakwa.” 39I məlu, i ŋgaslu əŋ dawaŋ tə lay ta, ɓa, i ju.»
40Yesu a ɗəpta, a zla: «Əŋ hedi tə lay tə mpay mə mbuw wuziyi kə zəm ta, mə nda i ndaha seh, a nda i ɗalaŋta əŋ hedi iyi wa seh mey?» 41I ziŋgeŋ zlap, i zla: «A nda i kuɗəp hedi madawar iyi ta kwa nje həhər a kənda i ɗalaŋ seh halla, abə dawaŋ ta, a nda i vəlaŋta lay ta əŋ hedi iyi par, hedi iyi ta i nda i vəlaŋ wuziyi tə mpay iyi ta tiɗe əŋ hala kə mbalta.» 42Yesu a zlapaŋta, a zla: «Heni kəjeŋge ma mawuzlel tə əŋ Ɗerewel tə Bizlaf seh halla vaw? Mə zlap, a zla:
“Nvəŋ hedi mə ləm ge iyi i mə kapu seh,
kəmbaɗ za əŋ nvəŋ tə təŋkumare.
Ar kəzəɗ tə Bay Bayta,
ar mazla a nje takwa#21:42 Jabura 118:22-23..”
43«Məŋgəvday a ɗek, sa kəzlapaheni: Bizlaf a ɓət Bay ŋga za a ndəra təheni, ley vəlaŋta əŋ hedi iyi par amba ley mbuwaha wuziyi. [44Hedi mə ndəv a talaŋ nvəŋ ta, hedi ta a ŋga za. Əŋgah nvəŋ ta, a nah a talaŋ hedi bahayim, a kərap hedi ta za kuɗkuɗ#21:44 Luka 20:18..]»
45Hedi səndawl iyi tə a talaŋ hedi iyi i mə ɗal kukus əŋ Bizlaf abə Farisa iyi i zlim ma marərək iyi tə ndəra Yesu mə zlap wa seh, i kəsəŋ za Yesu a zlap a talaŋ tata. 46Ɓa, i pələk wereh ley məlu, ama i kələndəŋ za a hedi iyi məŋgəvday hedi iyi ta i kəɗiy Yesu mənaŋ hedi mə giz ma abə miya tə Bizlaf.
Iliyochaguliwa sasa
Matta 21: xmd
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
