Matta 2
2
Hedi mə səŋ məsəkəŋ sə mbeh səku iyi tə a talaŋ gəmzləɗ iyi i ndaha ley dar malakw a ma tə Yesu
1Yesu a mbuwaha əŋ Baytilama, əŋ hayak tə Yahudiya, a va ta mba Hirudus, ar bay#2:1 Hirudus: Hirudus bay səndawl. tə əŋ hayak ta. Abə dawaŋ ta, hedi mə səŋ məsəkəŋ sə mbeh səku iyi tə a talaŋ gəmzləɗ iyi i ndaha mar kəɗi kəv tə pis mə təɗaha, i gwaraha əŋ Urusalima. 2I ɗəp, i zla: «Bay tə Yahuda iyi mə mbuwaha seh, mbə a tikey? Nini kəlim gəmzləɗ ŋga za kəɗi pis mə təɗaha, nini ndaha ley dar malakw a ma ŋga.» 3Əŋ bay Hirudus mə zlim ma ta seh, kəwuzlaɗaŋ talaŋ za, hedi tə əŋ Urusalima iyi fuk bahayim talaŋ tata kəwuzlaɗ za. 4Ɓa, a ɗafaŋta ma əŋ hedi səndawl iyi tə a talaŋ hedi iyi i mə ɗal kukus əŋ Bizlaf abə metir tə ma majaw iyi tə əŋ faŋw tə hedi ŋga iyi, ɓa, a ɗəpta, a zla: «Almasihu a nda i mbuwaha seh, a tikey?» 5I ziŋgeŋ zlap, i zla: «A nda i mbuwaha əŋ Baytilama əŋ hayak tə Yahudiya, məŋgəvday ehe, hedi mə giz ma abə miya tə Bizlaf kəwuzlel za, a zla:
6“Hwa Baytilama əŋ hayak tə Yahudiya,
hwa pay mekedek əŋ faŋw tə berne tə Yahudiya iyi səku,
məŋgəvday bay a təɗaha za a ge təkwa,
mbiŋ mə nda i jəɗ Israyila iyi, hedi na iyi.”»
7Abə dawaŋ ta izey, Hirudus a ɗafaŋta ma əŋ hedi mə səŋ məsəkəŋ sə mbeh səku iyi tə a talaŋ gəmzləɗ iyi sey abə ɓah, a mba i səŋ a ndəra tata, gəmzləɗ ta a təɗaha seh abə pis vitikey. 8Ɓa, a ləɓta əŋ Baytilama, a zlapaŋta, a zla: «Hi nda i ɗəpaha labara tə mbu ta abə dak wucum, heni kəlimehe mbu ta za seh, hi ndaha hi gizeke yim, amba sa bahayim, sa nda i dar malakw a ma ŋga.»
9Abə dawaŋ tə i kəzlim ma tə bay mə zlapaŋta kwata seh, i nda tata. Ehe, gəmzləɗ tata i mə lim kəɗi pis mə təɗaha sey, a kənda a ma tata, a hwas kasl a lay tə mbu ta tə a namba, a gar. 10Əŋ tata i mə lim gəmzləɗ sey, i kəsəsəm mbeh səku. 11I təɗ əŋ biŋ, i lim mbu mekedek abə Mariyama, mama ŋga. I dar malakw a ma tə mbu ta, ɓa, i həmənu, abə dawaŋ ta, i rəz gabal tata iyi, i vəlaŋ sulay tə malaway mawaɗ, dam mə njif səntaŋ liŋ mir. 12Abə dawaŋ ta, Bizlaf a gizeŋta kəɗi səsiŋ, a zla: «Hi mba i ziŋ kəɗi kelek Hirudus səku ba.» Ɓa, i ziŋ əŋ hayak tata kəɗi kataf par.
Yusufa abə Mariyama i hiy tata abə Yesu əŋ Misra
13Əŋ hedi mə səŋ məsəkəŋ sə mbeh səku iyi tə a talaŋ gəmzləɗ iyi sey, i cu tata, ehe, mələɓ tə Bay Bayta Bizlaf a gizeŋ wucum əŋ Yusufa kəɗi sisiŋ, a zla: «Gar, ɓət mbu abə mama ŋga, hiy təkwa əŋ Misra, nja a namba, ha əŋ pis sa mə zlapah ley ziŋgehe, məŋgəvday Hirudus a nda i pələk mbu ta ley ja.» 14Yusufa a gar ŋga abə njaɗu, a ɓət mbu abə mama ŋga, i hiy tata əŋ Misra. 15I nja a namba ha əŋ pis Hirudus mə məc, amba məsəkəŋ ta mə ɗal mənaŋ Bay Bayta Bizlaf mə giz kəɗi hedi mə giz ma abə miya ŋga zlezle, a zla: «Sa kəɗafaŋ ma za əŋ mbu na ley təɗaha ŋga əŋ hayak tə Misra.»
Hirudus bay səndawl a zlap ley ja wuziyi muwul iyi əŋ Baytilama
16Əŋ Hirudus mə səŋ, hedi mə səŋ məsəkəŋ sə mbeh səku iyi tə a talaŋ gəmzləɗ iyi sey, i kəbimza za, nəf ŋga kədəm za mbeh səku. Ɓa, a ləɓ hedi iyi əŋ Baytilama abə əŋ wuta sə mbehmbeh iyi ley ja wuziyi muwul mekedek iyi tə abə va bək iyi abə kəhwas va bək halla iyi, mənaŋ əŋ hala hedi mə səŋ məsəkəŋ sə mbeh səku iyi tə a talaŋ gəmzləɗ iyi i mə zlapaŋgu sey. 17Mənaŋ wa, ma tə Yeremiya, hedi me giz ma abə miya tə Bizlaf, mə zlap sey kəɗal za, a zla:
18«Wula a kəja a Rama,
haŋ abə huhur mbeh səku.
Ar Rahilu mə haŋ wuziyi ŋga iyi,
a kəmba i dak nəf səku, məŋgəvday wuziyi ŋga iyi i kəməc cuza.»
Ziŋgehe tə Yusufa abə Mariyama tə əŋ Misra əŋ Nasaratu
19Abə dawaŋ tə məc tə Hirudus seh, mələɓ tə Bay Bayta Bizlaf a gizeŋ wucum əŋ Yusufa kəɗi sisiŋ, əŋ hayak tə Misra, 20a zlapaŋgu, a zla: «Gar, ɓət mbu abə mama ŋga, ziŋ təkwa əŋ hayak tə Israyila, məŋgəvday hedi iyi i mə pələk ley ja mbu sey, i kəməc cuza.»
21Yusufa a gar, a ɓət mbu abə mama ŋga, ɓa, a ziŋ ŋga əŋ hayak tə Israyila. 22Ama a zlim seh, Arkilawus a kəzəm bay a lay tə baba ŋga Hirudus əŋ hayak tə Yahudiya. Kələndəŋ za ley nda əŋ namba. Bizlaf a gizeŋgʉ kəɗi sisiŋ baha, ɓa, Yusufa a nda əŋ hayak tə Galili. 23A nda i nja əŋ berne i mə ɗafaŋ ma Nasaratu, amba məsəkəŋ ta mə ɗal mənaŋ Bay Bayta Bizlaf mə giz kəɗi hedi mə giz ma abə miya ŋga iyi zlezle, a zla: «I ɗafaŋ ma za lə Nasaratu.»
Iliyochaguliwa sasa
Matta 2: xmd
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
