Yahwana 3
3
Yesu abə Nikudemus
1Ala minja aka, zləm tə, Nikudemus a taba Farisa aagi, a ɗa ŋtaguleŋ a taba madagal ataa Yahuda aagi. 2Tsaw a ndaha ara Yesu abə zaɗə minja aka, zlap a zlapanə, iŋgaya: «Masərək, ni kasənə hwa ala ndə Bizlaf a zlənazə a ndaha a ghalani ma aagi. Ara ndə a ɗa, ala kula a ɗal shiŋ tsaɓan ndə hwa ɗalə səku, andza Bizlaf abə sha akas.» 3Yesu zhin a zhinanə, iŋgaya: «Ayəw, sa zlapahu, a ɗa ŋter, ala a kaagəra la ndza bay Bizlaf andza tambəwha zhin gbak akas.» 4Nikudemus ɗiw a ɗiwzə, iŋgaya: «Ala taŋgəl tə tiw, a zhin a ɗal avaŋga abə a sən a zhin a mbəwha zhana? A kaɗa kula a zhin tə a dəməs mamən, zhana a mbəwha a magbak tə vəw?» 5Yesu zhin a zhinanə iŋgaya: «Ayəw, sa kazlapahu a ɗa ŋter, kwa vaye, a kaalima a nda a la ndza bay Bizlaf akas andza tambəwha abə yəm abə Miɗ akas. 6Ma ɗa mambəwha ara həji ma dəgnak, a ɗa həji ma dəgnak. Ma mbəwha ara Miɗ Bizlaf, a ɗa miɗ. 7Ŋkwaɓ kwa a ɗiw a ghərganay tə ara ndə sa zlapahus: “A ɗiw huni a mbəwha magbak tə.” 8Miɗ a kadza ata la ndə a kamayə, hwa kazlima rəv tə ndə a kapew, ama hwa sən la ndə a ndaha a heɗes, kwa aka səku la ndə a kanda a heɗe. Andza ikwa ana səkən ma kapew abə kwa vaye ma mbəwha abə Miɗ.»
9Mbara azha, Nikudemus zlap a zlapanə, iŋgaya: «A ɗal azha avaŋga, ana səkən watsa?» iy. 10Yesu zhin a zhinanə, iŋgaya: «Hwa ana masərək ma ndə həji aagi aa kasənahu tiwtiw a hayak Isərayila, hwa kasən səkən watsa aagi səku azha vəw? 11Ayəw, sa ghalahu ŋter ŋter: Ni zlap ata səkən ndə ni kasənə, zhana ni ɗa həji ma kaghal səkən ndə ni gərata aagi abə ndə ni zlima aagi, ama huni kaji səkən ndə ni kaghalahunis. 12Huni kaji a ɗal awa aska ma naka tiɗa ndə sa zlapahuni ata səkən ma ndza ata manahayak aka səku, huni asən a ɗal awa tiɗa ndə sa kazlapahuni ata səkən ma ndza a wəzlaf aagi avaŋga? 13Ara ndə a ɗa, ala ma va a tafzə kusəm a wəzəm wəzlaf akas, ama səy Mbə həji ma dəgnak ŋtaguleŋ tə, ana ma tadukha a wəzəm a wəzlaf. 14Azha andza ndə Musa a kaf sheshuk aka a wəzlaf a damə ata dərzləm, ikwa azha yəm, Mbə həji ma dəgnak makaf andza sha, 15aska kwa vaye ma ɗal awa aska ma tə, a lima miɗ ma təwah ma ŋkula kəɗaŋ. 16Ara ndə a ɗa, Bizlaf tamay manahayak a guɗaŋ, sha ana ndə a vəla malay Mbə tə, aska kwa vaye ma ji ma tə, a kafəcak akas, ama a lima miɗ ma təwah ma ŋkula kəɗaŋ. 17Ara ndə a ɗa, Bizlaf ci, tazlənha Mbə tə a manahayak a zla guma ata həji aagi səku, ama aska a həji aagi a reh ta gwar ara. 18Ala ma ɗalanə awa a Mbə ya, guma a heɗe akas. Ama ala ma ŋkula ɗalanə awa a Mbə, guma a heɗe, ara ndə a ŋkula ɗalanə awa a malay Mbə Bizlaf. 19Azha tsakwa ana guma ndə mpət a kaambəlahuni bəza a heɗe: Weɗ la taha a manahayak, ama həji aagi aa mayɓa ndza ma ndza a ləvaŋ aha la ma kaweɗ, ara ndə zlən ta a ɗa gamak. 20Ara ndə ala ma kaɗal səkən ma gamak, a kaji weɗ las, zhana a kərəɗ tə bəza abəra, ara ndə ŋzliŋ a kadzə ara gamak zlən tə aagi ndə aa kaghalata ata varvara. 21Ama, ala ma njin ma ŋter, a ndaha ata la ma kaweɗ, aska həji aagi a gəra zlən tə ndə a kaɗal aagi, ara ndə a ɗalə andza ndə Bizlaf a kamayə.»
Yesu abə Yahwana
22A diwzha tə, tiw Yesu abə magəli tə aagi tsaa kanda ta a hayak Yahudiya. Aa tandza a tsutsa wan kajik ikwa abə təmta, azha a kaɗalatana batem a həji aagi. 23Yahwana yəm ya, a kaɗalatana batem a həji aagi, a Aynun ma huk abəra Salim, ara ndə a ɗa yəm dagala ata la watsa. Həji aagi aa kandaha ara, a kaɗalatana batem. 24Ara ndə Yahwana tanaka a tsak a jak yakas. 25Mbara azha, magəli ataa Yahwana ndiɓi aagi kadza səbakw abə ndə Yahuda minja ata ban dawər. 26Tsaw aa nda ara Yahwana, aagi kəsha iŋgaya: «Masərək, ala ndə huni va a ndza abə sha gwara a bəzaha ata guva mazləm yəm Urdun, ala ndə hwa ghal səkən ndə hwa gəra abə ndə hwa zlima a heɗe, tsakwa a kaɗal batem yəm, zhana həji aagi kandaha ara tiwtiw.» 27Yahwana zhin a zhinatana, iŋgaya: «Ala kula a lima səkən andza ndə a ɗiwis, səy ndə Bizlaf ma ndza a wəzəm a vəlanə. 28Huni abə ha kuni, huni kula a ghal səkən ndə huni gəra abə ndə huni zlima ndə sa zlap: “Sa, sa ana Kərist səku, ama sa ala ma zlənhaya atama tə.” 29Ala ndə həji ndanə a wata dəma, sha ana mawəl dəma, ama ŋgwanambə mawəl dəma ma kandza abəra, tsa kateh ma tə, azha ꞌunəf tə lehleh ndə a kazlima maŋgurləm tə. Ɓas watsə a ɗa ataa anaka, ɓas watsa mkpef. 30Azha, dagal Yesu magəl, anaka maghwafha abə ma a diwzha.»
Ala ma ndaha a wəzlaf
31Yahwana zhana iŋgaya: «Ala ma ndaha a wəzəm, sha ana madagal aha səkən aagi tiwtiw. Ala ma ndaha a hayak, a ɗa ala hayak, a zlap andza həji ma ndza ata hayak aagi. Mandaha a wəzəm a wəzlaf a ndza aha səkən aagi tiwtiw, 32a zlap ata səkən ndə a gəra abə ndə a zlima aagi, ama kwa ala a kajinə ma tə ndə a kaghal akas. 33Ala ma ji ma tə, a kaghal ma ndə Bizlaf a kazlap ŋter a heɗe a heɗe. 34Ara ndə a ɗa, ala ndə Bizlaf a zlənazə, a zlap ata ma Bizlaf, ara ndə Bizlaf tavəlanə Miɗ tə aka dagala. 35Bizlaf ma ɗa Vava, a kamay Mbə, tavəlanə səkən aagi ka tiwtiw ata ra tə. 36Ala ma ɗal awa a Mbə, a lima Miɗ ma ŋkula kəɗaŋ. Ala ma ŋkula ji ma Mbə watsa, a kaalima miɗ səku, ama ghuɗek Bizlaf a ndza a heɗe.»
Iliyochaguliwa sasa
Yahwana 3: GOU
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
