Zlən ataa həji ta zlən aagi 18
18
Diw ladzam həji Kərist aagi a hayak Kuriŋtu
1Ndə Pul a nda tə a bəza a hayak ma dzamadzam Atena ya, tsaa kanda tə a hayak ma dzamadzam Kuriŋtu. 2A tsutsa, lima aa lima abə ndə Yahuda minja, zləm tə Akilas mambəwha a hayak Puntus, a ꞌwal gwarha a hayak Italiya, aagi abə wala tə Piriskila. Ara ndə a ɗa, cina hayak, Kaludiyus tazlap ka aska Yahuda aagi nda ta a bəza a hayak ma dzamadzam Ruma. Pul tsaw a nda ara Akilas abə Piriskila, 3ndə, zlən tə a ɗa maŋtaguleŋ abə ataa aŋta. Ba jak la həbar ana zlən ta, tsaw a ndaktana, azha dəba aagi aɗal zlən ata la ma ŋtaɗ a tsutsa. 4Kala vah ta nəp Yahuda aagi, Pul a kazlap a jak ta tarha Yahuda aagi, a gasə aska Yahuda aagi abə Gərek aagi ɗal awa. 5Ama, ndə tiw Silas abə Timuti aa ndaa ta a hayak Makeduniya, dəba Pul a avas a ŋcah a zlap ma Bizlaf. A kaghalatana a Yahuda aagi, Yesu ana Kərist. 6Ama, ndə aa kaŋkalzə ma Pul abə dahalay ndə aa karanə aagi, ŋtəw a ŋtəw rəkuts tə, azha dəba a azlapatana, iŋgaya: «Səkən ma kaandakhuni, a andaha dawna gəy ma kuni, ma naka səku! ꞌWa aka anawatsə, sa anda naka ara həji ma ŋkula ɗa Yahuda aagi,» iy. 7Tsaw Pul a ndaa tə a bəza a jak ta tarha Yahuda aagi, tsaa kanda tə a wata ala minja, Titus Yustus, ala ma katar Bizlaf ndə jak tə huk abəra jak ta tarha Yahuda aagi. 8Kirispus bay ma ndza aha jak ta tarha Yahuda aagi, dəba a aji ma Bay Madagal, sha abə həji ma ndza a wata tə aagi tiwtiw. Azha, vərəm ana həji Kuriŋtu ma bəw ta a həji ma ji ma Yesu aagi, ndə aa zlima ma ataa Pul, azha dəba aagi alamzə batem. 9Abə zaɗə minja aka, Bay Madagal zlap a zlapanə a Pul a shiŋshiŋ, iŋgaya: «Ŋzliŋ a ɗiw a dzahu səku, vas a zlap ma kwa, ara hwa mbasl ka. 10Ara ndə a ɗa, sa abə hwa, kwa ala ma katsaz ra tə ata hwa aska a sahu yaka akas, ara ndə a ɗa, a hayak ma dzamadzam watsə, həji aagi vərəm ana ma ɗa həji naka aagi,» iy. 11Pul tandza a tsutsa va abə ŋtəra ŋkwah, a kasərəkatana ma Bizlaf a həji aagi.
Pul atama ala ma ndza aha hayak Galiyuŋ
12Tiɗa ndə Galiyuŋ ana ala ma dagal ma ndza aha hayak Akaya, Yahuda aagi tiwtiw, aa kaji nja Pul səku. Riy aagi ma ta bəza aska a daazə ata la zla guma, 13dəba aagi azlap, aagi iŋgaya: «Ala watsə a kaghut həji aagi a həmən Bizlaf abə təf maparam, ma ɗa parpar abə ma ma garagar,» aagiy. 14Pul a kamay a zhin zlap, ama Galiyuŋ leŋ a ji zlap, aagi iŋgaya: «Tagwar a ɗa ala ma dza ala səku, tagwar a ɗa gəy ma ma dagal səku, aka səku ci həna sa ateh ma kuni, huni Yahuda aagi. 15Ama, huni, huni dza səbakw ata ma aagi, ata zlap ma ndza ata zləm aagi abə ma ma garagar kuni aagi, azha, watsa huni ma kaasənə. Sa ma zla guma shiŋ watsas,» iy. 16Dəba a agamata aara ata la zla guma. 17Aa tiwtiw, kaw aa mbəla Sustenes, bay ma ndza aha jak ta tarha Yahuda aagi, dəba aagi arəgaɗə atama ata la zla guma, ama, kwa ara Galiyuŋ a zlap.
Zhinha Pul a hayak ma dzamadzam Aŋtakiya
18Ka Pul a ndza ka zhana wan aka a hayak ma dzamadzam Kuriŋtu. A diwzha, mbasl a mbasl həji Kərist ndiɓi aagi ka, takaf a taf ata gəlmbə, tsaa kanda tə a hayak Siriya, sha abə tiw Piriskila abə Akilas. A diwzha ndə a ghal ma tə ka, fəɗ a fəɗ ha tə bəza a Keŋkeriya. 19Peteŋ aagi a hayak ma dzamadzam Efesus, a tsutsa abə tiw Pul aa ɓizh ta abə həji ma ndza abəra aagi, aŋtə, tsaa kanda a jak ta tarha Yahuda aagi, azha dəba a azlapatana a Yahuda aagi. 20Həji watsa aagi, aa ɗiwɓa mawanzə kusəm a tsutsa, ama taji ana aŋtə səku. 21Ama, tsaa kandaa tə a bəza abəra təmta, iŋgaya: «Sa azhinha ara huni ma vah minja, andza Bizlaf taji,» iy. Azha, tsaa kanda tə a bəza a hayak Efesus ata gəlmbə. 22Peteŋ Pul a hayak ma dzamadzam Kaysariya, tsaw a diw a nda a Wərusalima a zlapzatana bəza a həji Kərist aagi, azha, dəba a atadukha a hayak ma dzamadzam Aŋtakiya, 23ata la ndə a ndzazə kusəm, wan aka. A diwzha, pew a pew a hayak Galatiya, Firigiya, dəba a avəlatana ɓərɓər a magəli aska aagi a ŋcah abə awa.
Apulus a hayak ma dzamadzam Efesus abə hayak ma dzamadzam Kuriŋtu
24Yahuda minja zləm tə Apulus, ala hayak Aleksandiriya, peteŋ a hayak Efesus. A ɗa ala ma kazlap təwah, a kasən ma ndza a Ɗerewal ma ghwaɗeɗe a heɗe a heɗe. 25Aa taghalanə təf Bay Madagal bəza, kwa ŋzliŋ a kadzə akas. Dəlili ana sərək Ma wiyə ma təwah ataa Yesu a heɗe a heɗe, ama batem ataa Yahwana ana ndə a kasənɓa gagagha. 26Dəba a azlap a heɗe a heɗe a jak ta tarha Yahuda aagi. Ama, ndə Piriskila abə Akilas, aa zlima bəza, leŋ aa ji aara ara təmta, azha ghal aa ghalanə ŋter təf ataa Bizlaf. 27Apulus a may a nda a hayak Akaya. Dəba həji ma səbar Yesu aagi aŋtiratana ɗerewal a magəli ma ndza a tsutsa aagi aska aagi a zlapatana a lamzə Apulus katkadək. Ndə a ɗa gwar, a ɗalatana təwah dəy a həji ma ji ma Yesu aagi, ara ndə Bizlaf a ndza abə sha, a kalamzə. 28Ara ndə a ɗa, atama həji aagi tiwtiw, a kazlap, ama kwa Yahuda aagi talima ma ndə aa kazhinanə akas. A ŋcah ata ma ma ndza a Ɗerewal ma ghwaɗeɗe aska a ghalatana ci, Yesu ana Kərist.
Iliyochaguliwa sasa
Zlən ataa həji ta zlən aagi 18: GOU
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Zlən ataa həji ta zlən aagi 18
18
Diw ladzam həji Kərist aagi a hayak Kuriŋtu
1Ndə Pul a nda tə a bəza a hayak ma dzamadzam Atena ya, tsaa kanda tə a hayak ma dzamadzam Kuriŋtu. 2A tsutsa, lima aa lima abə ndə Yahuda minja, zləm tə Akilas mambəwha a hayak Puntus, a ꞌwal gwarha a hayak Italiya, aagi abə wala tə Piriskila. Ara ndə a ɗa, cina hayak, Kaludiyus tazlap ka aska Yahuda aagi nda ta a bəza a hayak ma dzamadzam Ruma. Pul tsaw a nda ara Akilas abə Piriskila, 3ndə, zlən tə a ɗa maŋtaguleŋ abə ataa aŋta. Ba jak la həbar ana zlən ta, tsaw a ndaktana, azha dəba aagi aɗal zlən ata la ma ŋtaɗ a tsutsa. 4Kala vah ta nəp Yahuda aagi, Pul a kazlap a jak ta tarha Yahuda aagi, a gasə aska Yahuda aagi abə Gərek aagi ɗal awa. 5Ama, ndə tiw Silas abə Timuti aa ndaa ta a hayak Makeduniya, dəba Pul a avas a ŋcah a zlap ma Bizlaf. A kaghalatana a Yahuda aagi, Yesu ana Kərist. 6Ama, ndə aa kaŋkalzə ma Pul abə dahalay ndə aa karanə aagi, ŋtəw a ŋtəw rəkuts tə, azha dəba a azlapatana, iŋgaya: «Səkən ma kaandakhuni, a andaha dawna gəy ma kuni, ma naka səku! ꞌWa aka anawatsə, sa anda naka ara həji ma ŋkula ɗa Yahuda aagi,» iy. 7Tsaw Pul a ndaa tə a bəza a jak ta tarha Yahuda aagi, tsaa kanda tə a wata ala minja, Titus Yustus, ala ma katar Bizlaf ndə jak tə huk abəra jak ta tarha Yahuda aagi. 8Kirispus bay ma ndza aha jak ta tarha Yahuda aagi, dəba a aji ma Bay Madagal, sha abə həji ma ndza a wata tə aagi tiwtiw. Azha, vərəm ana həji Kuriŋtu ma bəw ta a həji ma ji ma Yesu aagi, ndə aa zlima ma ataa Pul, azha dəba aagi alamzə batem. 9Abə zaɗə minja aka, Bay Madagal zlap a zlapanə a Pul a shiŋshiŋ, iŋgaya: «Ŋzliŋ a ɗiw a dzahu səku, vas a zlap ma kwa, ara hwa mbasl ka. 10Ara ndə a ɗa, sa abə hwa, kwa ala ma katsaz ra tə ata hwa aska a sahu yaka akas, ara ndə a ɗa, a hayak ma dzamadzam watsə, həji aagi vərəm ana ma ɗa həji naka aagi,» iy. 11Pul tandza a tsutsa va abə ŋtəra ŋkwah, a kasərəkatana ma Bizlaf a həji aagi.
Pul atama ala ma ndza aha hayak Galiyuŋ
12Tiɗa ndə Galiyuŋ ana ala ma dagal ma ndza aha hayak Akaya, Yahuda aagi tiwtiw, aa kaji nja Pul səku. Riy aagi ma ta bəza aska a daazə ata la zla guma, 13dəba aagi azlap, aagi iŋgaya: «Ala watsə a kaghut həji aagi a həmən Bizlaf abə təf maparam, ma ɗa parpar abə ma ma garagar,» aagiy. 14Pul a kamay a zhin zlap, ama Galiyuŋ leŋ a ji zlap, aagi iŋgaya: «Tagwar a ɗa ala ma dza ala səku, tagwar a ɗa gəy ma ma dagal səku, aka səku ci həna sa ateh ma kuni, huni Yahuda aagi. 15Ama, huni, huni dza səbakw ata ma aagi, ata zlap ma ndza ata zləm aagi abə ma ma garagar kuni aagi, azha, watsa huni ma kaasənə. Sa ma zla guma shiŋ watsas,» iy. 16Dəba a agamata aara ata la zla guma. 17Aa tiwtiw, kaw aa mbəla Sustenes, bay ma ndza aha jak ta tarha Yahuda aagi, dəba aagi arəgaɗə atama ata la zla guma, ama, kwa ara Galiyuŋ a zlap.
Zhinha Pul a hayak ma dzamadzam Aŋtakiya
18Ka Pul a ndza ka zhana wan aka a hayak ma dzamadzam Kuriŋtu. A diwzha, mbasl a mbasl həji Kərist ndiɓi aagi ka, takaf a taf ata gəlmbə, tsaa kanda tə a hayak Siriya, sha abə tiw Piriskila abə Akilas. A diwzha ndə a ghal ma tə ka, fəɗ a fəɗ ha tə bəza a Keŋkeriya. 19Peteŋ aagi a hayak ma dzamadzam Efesus, a tsutsa abə tiw Pul aa ɓizh ta abə həji ma ndza abəra aagi, aŋtə, tsaa kanda a jak ta tarha Yahuda aagi, azha dəba a azlapatana a Yahuda aagi. 20Həji watsa aagi, aa ɗiwɓa mawanzə kusəm a tsutsa, ama taji ana aŋtə səku. 21Ama, tsaa kandaa tə a bəza abəra təmta, iŋgaya: «Sa azhinha ara huni ma vah minja, andza Bizlaf taji,» iy. Azha, tsaa kanda tə a bəza a hayak Efesus ata gəlmbə. 22Peteŋ Pul a hayak ma dzamadzam Kaysariya, tsaw a diw a nda a Wərusalima a zlapzatana bəza a həji Kərist aagi, azha, dəba a atadukha a hayak ma dzamadzam Aŋtakiya, 23ata la ndə a ndzazə kusəm, wan aka. A diwzha, pew a pew a hayak Galatiya, Firigiya, dəba a avəlatana ɓərɓər a magəli aska aagi a ŋcah abə awa.
Apulus a hayak ma dzamadzam Efesus abə hayak ma dzamadzam Kuriŋtu
24Yahuda minja zləm tə Apulus, ala hayak Aleksandiriya, peteŋ a hayak Efesus. A ɗa ala ma kazlap təwah, a kasən ma ndza a Ɗerewal ma ghwaɗeɗe a heɗe a heɗe. 25Aa taghalanə təf Bay Madagal bəza, kwa ŋzliŋ a kadzə akas. Dəlili ana sərək Ma wiyə ma təwah ataa Yesu a heɗe a heɗe, ama batem ataa Yahwana ana ndə a kasənɓa gagagha. 26Dəba a azlap a heɗe a heɗe a jak ta tarha Yahuda aagi. Ama, ndə Piriskila abə Akilas, aa zlima bəza, leŋ aa ji aara ara təmta, azha ghal aa ghalanə ŋter təf ataa Bizlaf. 27Apulus a may a nda a hayak Akaya. Dəba həji ma səbar Yesu aagi aŋtiratana ɗerewal a magəli ma ndza a tsutsa aagi aska aagi a zlapatana a lamzə Apulus katkadək. Ndə a ɗa gwar, a ɗalatana təwah dəy a həji ma ji ma Yesu aagi, ara ndə Bizlaf a ndza abə sha, a kalamzə. 28Ara ndə a ɗa, atama həji aagi tiwtiw, a kazlap, ama kwa Yahuda aagi talima ma ndə aa kazhinanə akas. A ŋcah ata ma ma ndza a Ɗerewal ma ghwaɗeɗe aska a ghalatana ci, Yesu ana Kərist.
Iliyochaguliwa sasa
:
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia