Mako 9
9
1Wakati kwabali, “Chokomende ndinoti kwamuli, pana bamwe benu yopano, abatolushangana lufu, besanhu babona bushe bwaMwali buzha nesimba.”
Kungaimiswa kwaJesu
(Mateo 17:1-13; Luka 9:28-36)
2Mushule mwamazhuba mashanu ana limwempela, Jesu wakatola Pita naJemusi naJoni, akatanha nabo pezhulu pedunhu ilefu, pabakabeli boga; ndipo paakashandulwa chimo mbeli kwabo, 3zwimbalo zwizwe zwakangaima zwikaba zwichena kasa zwokuti akuna penyika angapopa zwimbalo zwikachena alo. 4Kwakaboneka Elija naMozesi belebeleka naJesu. 5Pita wakalebeleka akati kuna Jesu, “She, zwibuya zwatili yopano, ngatibakeni zwitumba zwitatu, chimwe chibe chenu, chimwe chaMozesi, nechimwe chaElija.” 6Ajakaziba zwakabeleba nokuti, bakabhatwa nolutyo.
7Kwakaba negole likabafukatila, iwhi likawhika liva mugole liti “Yoyu Mwananhulumyana wangu unodikana, unwhilileni!” 8Pakalepo pabakalinga yoku noku, apana unhu ubakabona kuzhe kwaJesu chete wakabeli nabo.
9Pabakabebhuluka idunhu, Jesu wakabalaya kuti, besibuje kana upizwe unhu nezwababona ejine Mwananhulumyana woNhu emuke kuna bakafa.
10Bakazwilondota mumyoyo yabo, bebhuzana pakati pabo kuti zwinolebani, “kumuka kubafi.” 11Bakombhuza bakati, “Banolebani bakwali kana beti Elija unokwelela kutanga kuswika?”
12Wakashandula akati, “Elija unotanga kuzha kobhisa zwinhu pachena; koga zwilokwalwa chini noMwanonhulumyana woNhu unooyangata kasa akale bondambe na?” 13“Koga ndinomubuja kuti Elija wakaswika, bakata madilo kwaali sobuzwilokwalwa nezwizwe.”
Jesu unochija umbisana unampepo umbi
(Mateo 17:14-21; Luka 9:37-43)
14Pabakati baswika pakabeli nabamwe balayijwa, bakabona idupwa igulwana lili pakalepo akale bamwe bakwali bakabe kakabajana nabo. 15Pakalepo idupwa palyakabona Jesu, lyakashama kasa likezha kwaali ikomusa. 16Wakababhuza eti, “Mumukakabajana nabo neni?”
17Umwe mukati mwebunga wakashandula eti, “Ndayiji, ndabuza mwananhulumyana wangu kwamuli unampepo wokusotubula kulebeleka. 18Kana ekabhatwa nompepo yoyu, unombwejela pasi; epupuma ifulu, eluma meno akale umbili unokakanyala; ndakakumbila balayijwa babo kuti bebhise umpepo yoyu pazhe, asi bakakonwa.”
19Iye wakabashandula eti, “Imwi chizekululu chisinodimbwa! Biya ndigale namwi kuswikila lini? Umbuzeni kwandili.” 20Bakombuza umbisana kwaali.
Umpepo puwakombona, wakonsuntula umbisana akawila pasi akapupa ekungulika, epupuma ifulu. 21Jesu wakabhuza tate bombisana akati. “Waaba nonshaji undefu chini eli ali? Bakati, kuva echintukutuku.” 22“Kanjinji unosomposela mumoto nomuvula, ukweja kumbulaya; asi kana mutubula tiwhileni ishe tibhancheni!”
23Jesu wakati kuna iye, “Ndingata zwaandinotubula! Zwose zwinotubulika kuna iye unodimbwa.”
24Pakalepo tate bomwana bakashomeja belila, bakati, “Ndinodimbwa, ndibhancheni pakusodimbwa kwangu!”
25Jesu paakabona banhu bezha belabuka bebungana, wakakalalila umpepo umbi eti kwauli, “Iwi mpepo wobumumu nobuchinzebe, ndinokulaya, bhuda mwaali, usibuye kabili!”
26Pawakashobelela nokumfundilija kasa, wakabhuda mwaali, umbisana wakaba sonhu wafa; banji bakatanga kulebeleka beti, “Wafa.” 27Koga Jesu wakombhata noluboko lulwe akonyamula, naiye akamilika.
28Wakati angwina mungumba, balayijwa babe bakombhuza pabakaba boga beti, “Isu takonwa chini kumbhisa?”
29Wakati kwabali, “Unshobo yoyu aungabhude asi nokunamata.”
Jesu unolebeleka akale nezwolufu lulwe
(Mateo 17:22,23; Luka 9:43-45)
30Bakabhuda yopo bakenda bakapinda nomuGalili. Aajakada kuti zwizibwe nonhu; 31nokuti wakabelayija balayijwa babe eti kwabali, “Mwananhulumyana woNhu unoopilwa mumaboko abanhu, ibo bachoombulaya; kana abulayiwa, mushule mwamazhuba matatu unoomuka.”
32Koga abajakawhisisisa kuti indayijo yiye ikumulebani, akale bakatya kuumbhuza. 33Bakaswika kuKapenaumi, pabakangwina mungumba wakababhuza eti, “Ani mwaba muzuwani mulimunzila?”
34Koga bakawhilijila, nokuti munzila beli boga bakaba benyenyejana kuti ndiyani unkulwana kasa kasa. 35Wakagala pasi, akashoba baligumi namabili, akati kwabali, “Kana unhu eda kuti ebe wokutanga, ngaabe wokujibija kwabali, ebe unshingi wabo bose.” 36Wakatola mwana, akomisa mbeli kwabo, akomfufuzhila, akati kwabali; 37“Aani nani unotambula umwe wabana batukutuku bakadai muzina lyangu, unonditambulabo; akale wose unonditambula, aatobetambula imi, koga unotambula iye wakandituma.”
Aani kana aani usinotilwisa ngowedu
(Luka 9:49,50)
38Joni wakati kwaali, “Ndayiji, tabona unhulume ebhisa madimoni muzina lyenu, asi toonjibisa, nokuti atoba umwe wedu.”
39Koga Jesu wakati, “Musuundambije, nokuti akuna unhu angata zwishamiso muzina lyangu, pakalepo etanga kulebeleka bubi nami. 40Nokuti yoyo usinolwisana nasu ngowedu. 41Chokomende ndinoti kwamuli, unhu unomupa unkombe wevula yokunwa muzina lyangu, nokuti mulibaKristo, chokomende aangalashikilwe nombhayilo uwe.”
Kukwejwa muluchinyo
(Mateo 18:6-9; Luka 17:1,2)
42“Yoyo unotisa umwempela waaba batukutuku banodimbwa kunami kuti bechinye, zwingaba zwibuya kuti yoyo unhu esungililwe igwiyo igulwana munchibha uwe kova iye eposelwa mugungwa. 43Akale kana luboko lulwo lutisa kuti uchinye, ludumule! zwibuya kuti iwi ungwine mubupenyu uligosha, kuna kuti ube namaboko mabili kova unda kuGehena, kumoto usinojima” 45Kana igumbo lilyo likungwinisa muluchinyo, lidumule; zwibuya kuti ungwine mubupenyu uligosha, kuna kuti ube namakumbo mabili kova uposelwa muGehena. 47“Kana izhisho lilyo litisa kuti uchinye, libhise! zwibuya kuti ungwine mubushe bwaMwali uli nezhisho limwempela, kuna kuti namesho mabili uposelwe muGehena.” 48“Imo munegonye lisinofa, akale nomoto usinojima.”
49Umwe noumwe unoolungwa nomoto.
50Munyu umbuyanana; koga kana munyu usichinolwela, biya mungomusilija chini?
“Ibani nomunyu mukati mwenu, mugale nolunyalalo umwe nomwe.”
Iliyochaguliwa sasa
Mako 9: LTP
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
The word for The World International
