Mako 14
14
Chilangano chokubulaya Jesu
(Mateo 26:1-5; Luka 22:1,2; Joni 11:45-53)
1Ngweno kwakabasala mazhuba mabili kuti kube milya yePasika namabhiko echinkwa chisina umfufumuso. Batebuji bakulwana nabakwali bakapota inzila yokumbhata zwilosisika, akale bombulaye; 2nokuti bakati, “Kusibe panshaji wamabhiko, nokuti banhu bangatimukila kukaba nezhoba.”
Jesu unogubwa kuBhetani
(Mateo 26:6-13; Joni 12:1-8)
3Wakati eli kuBhetani mungumba yaSimoni, wamapelembuji, Jesu eligele pakulya, kwakezha unhukaji eli nonkabo wamafuta enadi omene etengwa nemali inji. Wakapwanya unkabo akadila Jesu, namafuta enadi pansholo. 4Bamwe bakabelipo bakanyetela bakati, “Ini yezwi kulasha mafuta?” 5“Mafuta yaya alutengeswa namazana matatu amakobeli esiliva kukapiwa basheti.” Bakonyemela kasa unhukaji.
6Koga Jesu wakati, “Undekejeni; Mumunyajilani? Wata unshingo umbuya kwandili. 7Basheti munobeli nabo unshaji wose, akale pamunoda kubatila zwanana motubula kubatila; koga imi amutobeli nami unshaji wose. 8Wata zwaanotubula; Walonganyila umbili wangu usanu ukajikwa. 9Chokomende, ndinoti kwamuli, kwose kwaichabhaunulwa iNdebo iMbuya yeyi munyika jose, zwatiwa noyu nhukaji zwinoopupulwa sechikumbulujo naye.”
Judasi unovuma kucheta Jesu
(Mateo 26:14-16; Luka 22:3-6)
10Umwe wabaligumi nababili, Judasi Sikaliyoti wakenda kubatebuji bakulwana kunouncheta. 11Pabakazwiwha yezwi bakashanta, bakombimbisa kuumpa imali. Iye wakapota inzila yokumpilija kwabali.
Jesu unolya iPasika nabalayijwa
(Mateo 26:17-25; Luka 22:7-14,21-23; Joni 13:21-30)
12Nezhuba lyotanga lyechinkwa chisina umfufumuso, pabanobhayila imhwizana yePasika, balayijwa babe bakati kwaali, “Munoda kuti tinde kupi tinolonganyila, kwamuchanolyila iPasika?”
13Wakatuma balayijwa babe babili akati kwabali, “Indani muguta, moshangana nonhulume ekasenga ihali yevula, muntobele, 14yopo paachangwina, muti kumweni wengumba, uNdayiji wati.” “Ipoponi ingumba yabashanyi kwandichalyila iPasika nabalayijwa bangu?” 15“Unomutondeja ingumba ihulwana ipopezhulu ilolonganyilwa kale; mwakalemo mutilonganyile.”
16Balayijwa bakenda akale bakaswika muguta, bakawana zwose sezwaakabaleba; bakabambanyila iPasika.
17Madekwana, wakezha nabaligumi banababili. 18Pabakagala kuti belye, Jesu wakati, “Chokomende ndinoti kunamwi, umwe wenu wandikumulya naye unondicheta.”
19Bose bakaba neshungu, umwe noomwe akati kwaali, “Ndimi na?” 20Wakati kwabali, “Umwe wenu baligumi nababili, wandimuseba naye mundyilo. 21Nokuti Mwananhulumyana woNhu unonda sezwilokwalwa pezhulu pape, mayee kunoyo uchoncheta Mwananhulumyana woNhu! Zwaluba zwibuya ngana yoyo unhu esakazwalwa.”
Chilayilo chaShe
(Mateo 26:26-30; Luka 22:14-20; 1 BaKolinte 11:23-25)
22Belikumulya, wakatola chinkwa akaboka, akachimedula akabapa akati, “Tolani; yoyu umbili wangu.”
23Wakatola unkombe, paakaboka wakabapa bakanwa bose. 24Wakati kwabali, “Yeli ilopa lyangu, lyechivumilano, lichakutukila banji. 25Chokomende ndinoti kwamuli, anditoonwa akale unchelo wonzhambi kujine kuswike izhuba lyandichoonwa bupya kuBushe bwaMwali.”
26Pabakapeja kukwimba lwimbo, bakenda kudunhu lyeOlivi.
Jesu unolebambeli kulambwa naPita
(Mateo 26:31-35; Luka 22:31-34; Joni 13:36-38)
27Jesu wakati kwabali, “Banji mobwilileshule; nokuti zwilokwalwa kuti ndooloba uncheji, imhwizi jinootataukana, 28koga, mushule mwokumuka kwangu, ndinoonda mbeli kwenu kuGalili.”
29Pita wakati kwaali, “Koja bose bakabwilila shule, Imi anditoobwilileshule.”
30Jesu wakati kwaali, “Chokomende, ndinoti kwauli, busiku bwanasi, igukulume lisanu lyakokoleka kabili unobandilamba katatu.”
31Koga wakalebeleka nesimba eti, “ Kojoba zwileba kuti ndife namwi, anditomulamba.”
Bose bakaleba alo.
Jesu unonamata muGesemani
(Mateo 26:36-46; Luka 22:39-46)
32Bakaswika pabugalo bunowhi Gesemani, wakati kubalayijwa babe, “Galani yopa, imi ndichinonamata.” 33Wakatola Pita, naJemusi, naJoni akenda nabo, wakatanga kujiijika nokuva moyo. 34Wakati kwabali, “UMpepo wangu unaneshungu ihulwana kasa kuswikila pakufa. Galani yopa mulinde.”
35Wakabasiya akakwenda kashizho, akawila pasi, akale akanamata eti, “Kana zwitubulika yoyu unshaji upinde kumbali.” 36Akale wakati, “Abha! Tate! Kunamwi zwose zwinotikana; nyendulusani unkombe yoyu kwandili; koga kusibe kuda kwangu, koga kube kuda kwenu.”
37Wakabwilila kubalayijwa babe, akawana belilele, akati kuna Pita, “Simoni, seni ulele? Autotubula kulindila kwe awa limwempela?” 38“Lindilani munamate, kuti musingwine mukukwejwa. Umpepo unoda koga inyama ilodemuka.”
39Wakabwilila kabili kunonamata, akapamha kuleba mawhi alotojana. 40Paakabwilila akale kubalayijwa babe, wakawana belilele, nokuti bakabakafa nehope, akale abajakaziba mawhi okunshandula.
41Wakabuya akale kwechitatu akati kwabali, “Muchilele zwenu munyetutukwa na? Zwakwana; unshaji waswika; Mwananhulumyana woNhu umupilwa mumaboko abachinyi. 42Mukani, andeni. Uncheti wangu waaba pelyo.”
Kusungwa kwaJesu
(Mateo 26:47-56; Luka 22:47-53; Joni 18:3-12)
43Pakalepo, echinolebeleka, Judas, umwe wabaligumi nababili, wakaswika eli noluvute lwabanhu bana makwabalaza nejiswimbo, beva kubatebuji bakulwana nabakwali namakolokota. 44Feno uncheti wakababapa chitondejelo eti, “Yoyu wandichamyonta ndiye; mumbhate muntole munde naye mumbhatise.”
45Paakaswika, wakenda kwaali nokukambija akati, “Ndayiji!” Akomyonta. 46Bakabiga maboko abo bakombhata. 47Umwe waabo bakabelimile pakalepo, wakabhisa igwalabaza lilye akacheka undanda wontebuji unkulwana akobhisa inzebe. 48Jesu wakati kwabali, “Mwezha sabanhu bamuzhila imbava, namakwabalaza neswimbo muzha kondisunga? 49Mazhuba wose ndaluba namwi ndilayija mutempeli, amujakandibhata. Koga makwalo alokwelela kuzhajikijwa.”
50Bakonsiya bakatizha.
51Umwe unzhuzha wakontobela, ekambala uncheka chete; bakombhata, 52koga wakabapujumuka akasiya uncheka akatizha elichinkuna.
Jesu unomiswa mbeli kweGota
(Mateo 26:57-68; Luka 22:54,55,63-71; Joni 18:13,14,19-24)
53Bakonsenga Jesu kuntebuji unkulwana; kuli iko kwakabakashangana bose batebuji bakulwana namakolokota nabakwali. 54Pita wakontobela, eli kashizho, kunoswika mulukaya lwontebuji unkulwana, wakabeligele nabalindi ekota moto. 55Feno batebuji bakulwana negota bakapyanga busumikiji bondandu wokuti Jesu ebulayiwe, koga abajakabuwana. 56Banji bakapa busumikiji bwamanyepwa, koga busumikiji bwabo bwakasiyana.
57Bamwe bakanyamuka bepa busumikiji bwamanyepwa beti, 58“Isu takonwha eti, Imi ndinokolomola itempeli yeli lyakabakwa namaboko, mumazhuba matatu kova ndibaka limwe lisilobakwa namaboko.” 59Kojoba zwakadalo busumikiji bwabo abujaka vumilana.
60Untebuji unkulwana wakanyamuka pakati pabo akabhuza Jesu eti, “Apana zwaunoshandula na? Ini yezwi banhu yaba zwibanosumikija pezhulu papo?”
61Koga iye wakanyalala, aajakashandula. Untebuji Unkulwana wakombhuza kabili akati kwaali, “Ndiwi Kristo na, Mwananhulumyana waiye Ulokombolelwa?”
62Jesu wakati, “Ndimi; Akale moombona Mwananhulumyana woNhu eligele kululyi lwaMasimba, akale ezha namakole okudenga.”
63Untebuji unkulwana wakajelula ingubo jije akale akati, “Tichinoshakilani busumikiji? 64Mwazwiwhila mose Mwali etukwa! Moyeya ni?”
Bose bakati unandandu, unokwelela kufa.
65Bamwe bakatanga kumfhila mate, akale bakomfuka kumesho, bondoba, akale beti, “Polofeta!” Nabalindi bakonshangamija nempama.
Pita unolamba Jesu
(Mateo 26:69-75; Luka 22:56-62; Joni 18:15-18,25-27)
66Feno Pita wakabeli mudako, mulukaya, umwe wabalandakaji bontebuji unkulwana wakezha, 67paakabona Pita ekota moto, wakondinga akati, “Iwi wabeli naJesu wokuNazaleta.”
68Koga wakanyenyeja akati, “Anditozwiziba akale anditozwiwhisisa zwaumuleba.” Wakabhuda mugumbi pakalepo igukulume likakokolika. 69Undandakaji wakombona kabili, akale akabuja bakabeli mile pafupi akati, “Yoyu umwe wabo.” 70Koga iye wakanyenyeja akale.
Munshaji umfupi bakabeli mile pelyo naPita bakati kwaali, “Chokomende iwi umwe wabo; nokuti iwi uli wokuGalili.”
71Pakalepo wakatanga kutukana nokukowha, “Anditonziba yoyu unhu wamumulebeleka nezwizwe!”
72Pakalepo igukulume lyakakokoleka kwechibili. Pita wakakumbulukwa mawhi aJesu okuti kwaali, “Igukulume lisanu lyakokoleka kabili, unobandilamba katatu.” Wakazwiyeya yezwi akalila.
Iliyochaguliwa sasa
Mako 14: LTP
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
The word for The World International
