Mateo 23
23
Jesu Umuchenjeja nezwaBakwali boMulawo nabaFalisi
(Mako 12:38,39; Luka 11:43,46; 20:45,46)
1Pakalepo Jesu wakalebeleka kubunga lyabanhu nokubalayijwa babe, eti, 2“Bakwali bomulawo nabaFalisi ndijo imhizha chomulawo waMozesi, 3nokudalo itani nokulondota zwose zwabanomubuja, koga musite zwabanota, nokuti zwabanopupula abatozwita. 4Banotola mitolo inolema beibiga pamapi abanhu, asi ibo besinoda kubabhancha kana nopatukutuku. 5Banota mishingo yabo yose kuti bebonwe nabanhu, bekubusa tubhokesi tunamilawo tunombalwa pehuma nokulebhesa mayewula pezwimbalo zwabo. 6Banoda kugala pezwigalo zwopezhuluzhulu kana beli kumabhiko nokugala pezwigalo zwinokujwa mumasinagogo, 7nokumuswa nolukujo pamusika, nokushobwa nabanhu bewhi, ‘ndayiji.” 8Asi imwi musishobwe kuwhi, ‘ndayiji’ nokuti muna undayiji umwempela chete, akale imwi mose mubanakwaina. 9Musishobe umwe muti, ‘tate’ pasi yopano nokuti munaTate umwempela chete ukokudenga. 10Akale musishobwe kuwhi, ‘ntungamili’ nokuti untungamili wenu umwempela chete, Kristo. 11Yoyo unkulwana pakati penu ngeebe unshingi wenu. 12Yoyo unozwikuja unooninipiswa, koga yoyo unozwininipisa ndiye uchookujwa.”
Jesu Unolasha Buchengeji bwabo
(Mako 12:40; Luka 11:39-42,44,52; 20:47)
13Lutaka kunamwi bakwali bomulawo nabaFalisi, bachengeji! Nokuti munokonyela banhu bushe bwedenga, imwi musinongwina nokwenu, akale musinovumila bamukweja kungwina kuti bengwine. 14Lutaka, kunamwi bakwali nabaFalisi, bachengeji! Nokuti munotola ifuma yenchilikaji, muchengeja neminamato milefu, nezwo munoopiwa chilango chikulugulu.#23:14 Jimwe Iwhalo JechiGiliki jantolo ajina iwhalo yeyi
15“Lutaka kunamwi bakwali nabaFalisi, bachengeji! Nokuti munokwenda mugungwa nomunyika kuti mushandule umwempela wabokuzhe kuti kana aba alo, muunte ebe mwana wegehena zwilopamwa kabili kupinda imwi.”
16“Lutaka kunamwi, batungamili mapofu, banoti ‘Kana unhu ekowha netempeli, azwineni, koga angokowha nendalama yomutempeli unosungwa nekowhe iye.’ 17Imwi mapofu malema! Chikulwana ngechipi, indalama kana itempeli linochenesa indalama? 18Munoti, ‘Kana unhu ekowha nedebulilo azwineni, asi kana ekowha nontebulo wipo pedebulilo unosungwa nekowhe iye.’ 19Imwi mapofu! Chikulwana chipo ngechipi untebulo kana idebulilo linochenesa untebulo? 20Nokudalo yoyo unokowha nedebulilo ukumukowha nalyo nezwose zwipo pezhulu palyo, 21nooyo unokowha neTempeli wakowha nalyo, naMwali unogala mukati. 22Nooyo unokowha nedenga, unokowha nechibhula chobushe bwaMwali, naMwali unogala pachili.”
23“Lutaka kunamwi bakwali bomulawo nabaFalisi, bachengeji! Nokuti munobhisa chegumi chobutwilo bwamazhani bweminti, nedili nekumini, musiya zwinhu zwikulwana zwomulawo sendulamo, ishe nokubimbika, yezwi mulokwelela kuzwita musinosiyija zwimwe zwinokosha. 24Imwi batungamili mapofu, munosefa tupuka tutukutuku tunangenhunzi koga muminya imhuka ihulwana sekamela.”
25“Lutaka kunamwi bakwali bomulawo nabaFalisi, bachengeji! Nokuti munokusha pazhe ponkombe nendyilo koga mukati mulizhele bupambi nobupazwi. 26Iwi Mfalisi bhofu! Kusha tangwa mukati mwonkombe nendyilo kuti pazhe pechenebo!
27“Lutaka kunamwi bakwali bomulawo nabaFalisi, imwi bachengeji! Nokuti munanga samakumbu machena anoboneka eli mabhodo kuzhe, koga mukati elizhele namafupa abanhu bakafa, nobuhungu. 28Ndizwo zwamuli imwi pazhe munobonekwa sabanhu bakalulama koga mukati mwenu muzhele buchengeji nobubi.”
Jesu Unolebambeli nokuLangwa Kwabo
(Luka 11:47-51)
29“Lutaka kunamwi bakwali bomulawo nabaFalisi, bachengeji! Nokuti munobaka makumbu abapolofeti nokunakisa makumbu abakalulama, 30muti, ‘Ngana takabelipo unshaji yoyo wamatategulu edu, ngana tisakabhanchana nabo mukukutula ilopa lyabapolofeti.’ 31Nokudalo, seni munozwisumikijila nokwenu kuti ndimwi bana baabo bakabulaya bapolofeti. 32Nezwo zhajikijani zwakasiyiwa namatategulu enu! 33Imwi inyoka, inzwalo yemvumbi, mungatizha chini kuti mupiwe untongo wokuposelwa mugehena? 34Nokudalo ndinomutumila bapolofeti, bachenjeli nabakwali bomulawo, bamwe babo munoobabulaya bamwe munoobakahamila panchinjikwa, bamwe munoobaloba mumasinagogo enu nokubashetesa mumakuta namakuta, 35kutila kuti mutabukilwe nelopa lyose lyaabo bakalulama lyakakutukila penyika, kuvila kulopa lyaAbhelo ulolulama kuswikila kulopa lyaZakaliya mwana waBhalakiya, umwakabulayila pakati peTempeli nedebulilo. 36Chokomende ndinoti kwamuli, zwose zwinhu yezwi zwichezha pezhulu pechizekululu yechi.”
Jesu Unolwajilwa nezweJelusalema
(Luka 13:34,35)
37“Lutaka, Jelusalema, Jelusalema iwi unobulaya bapolofeti, nokupubula yabo banotumwa kunawi! Tungana ndidisisa kubunganisa bana babo sehuku inofukatila bana bayo pasi pamapapilo ayo, koga wakalamba! 38Linga iTempeli lilyo lyasiyiwa akale lyabedongo. 39Nokuti ndinoti kwauli, auchinondibona kabili ujine uti, ‘Ulokombolelwa yoyu unozha muzina lyaTezi.’ ”
Iliyochaguliwa sasa
Mateo 23: LTP
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
The word for The World International
