Mateo 2
2
Bachenjevu Bokubuvezhuba
1Wakati azwalwa Jesu kuBhetelehema, munyika yeJudiya, mumazhuba aShe Helodi, bachenjevu bokubuvezhuba bakaswika kuJelusalema beva kubuvezhuba, 2bakati, “Ani ukokupi she wabaJuda wazwalwa? Nokuti tabona inyenyeji yiye kubuvezhuba, ngweno isu tezha koonamata.”
3Paakawha yezwi she Helodi zwakonyaja naibo bose muJelusalema. 4Wakashoba bose batebuji bakulwana nabakwali bomulawo babanhu, akababhuza kuti, “Kristo unozwalilwa kupi?”
5Bakati kuna iye, “MuBhetelehema imomuJudiya, somwazwilokwalwa nompolofeti kuwhi:
6“Iwi Bhetelehema, munyika yaJuda,
Autoba untukutuku kasa kubatongi baJuda,
nokuti munawi munoobhuda untongi
uchootungamilila banhu bangu Izilayeli sondyisi.”
7Ndipo Helodi wakabashobela musiswa bachenjevu, akababhuzisisa nezwonshaji wakatanga kuboneka inyenyeji. 8Wakabatuma kuBhetelehema, akati kwabali, “Indani munobhuzisisa zwomwana yoyo, kana mungongwana, muzhe mondizibisabo, kuti namibo ndinde kunoonamata.”
9Pabakati bawha zwilebo zwabashe bakanyamuka bakenda, akale lingani ndipo inyenyeji ibakababona kubuvezhuba yakabatungamilila kuswikila yama pakale pakabeli nomwana. 10Pabakati babona inyenyeji, bakashantilwa zwikulugulu. 11Pabakangwina mungumba bakabona mwana naMariya amai babe, bakatibhama bakoonamata, bakabhisa zwipo zwabo zwendalama, indunda yefhungaijo, nobunde bwemula.
12Nokuti bakaba banyeulilwa mumaloto abo kuti besibwilile nokuna Helodi. Bakabwilila kunyika yabo neimwe inzila.
Kutizhila KuIjipiti
13Pabakati benda, iNgilozi yaTezi yakazwibonesa kuna Josefa mumaloto iti, “Nyamuka utole mwana namai babe mutizhile kuIjipiti, munogala kwakale kuswikila ndamubuja, nokuti Helodi unoopyanga mwana kuti oombulaye.”
14Iye wakava anyamuka nobusiku akatola mwana na amai babe, akenda nabo kuIjipiti. 15Wakagala kwakale kuswikila lufu lwaHelodi. Zutilwa kuzhajikija zwakalebwa naTezi nomumpolofeti, eti, “Ndakonshoba mwananhulumyana wangu kuti ebhude muIjipiti.”
Kubulayiwa Kwabana Banhulumyana
16Helodi paakabona kuti wachengwa nabachenjevu bokubuvezhuba, wakalutila kasa, akatuma balwi kuti benobulaya bana banhulumyana bose muBhetelehema nabo mudunhu yelyo lyose, bakabeli namakole mabili kana pasi, zwikwendelana nooyo unshaji waakababhuza kubachenjevu bokubuvezhuba.
17Akale zwakazhajikijwa zwakalebwa nompolofeti Jelemiya, kuti,
18“Iwhi lyakawhika muRama,
lilila zwikulwana kasa zwinakulwaja,
Rasheli elilila bana babe,
wakaba esichinoda kunyalajwa.
nokuti bakaba besichipo.”
Kubuya beva kuIjipiti
19Paakati afa Helodi, Josefa wakabona ingilozi yaTezi muloto echi kuIjipiti 20iti, “Nyamuka, utole mwana namai babe mubwilile kunyika yeIzilayeli, nokuti yabaya bakajoda bupenyu bwomwana bakafa.” 21Wakanyamuka, akatola mwana namai babe, bakabwilila kunyika yeIzilayeli.
22Koga paakawha kuti Akelasi ndiye umutonga kuJudiya pechigalo chatate babe Helodi, wakatya kunda kwakale. Wakati abujwa naMwali muloto, ndipo paakenda kunyika yeGalili. 23Wakenda akanogala muguta linowhi Nazaleta, kuli kuzhajikija yezwiya zwakalebwa nabapolofeti, kuti, “Unooshobwa ewhi uNazaleta.”
Iliyochaguliwa sasa
Mateo 2: LTP
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
The word for The World International
