Mateo 11
11
Inhumwa JaJoni Umbhabhatizi
(Luka 7:18-35)
1Jesu paakati apeja kupa indayijo kubalayijwa babe bali gumi nababili, wakenda kunolayija nokubhaunula mumakuta abo.
2Joni paakawha nozwemishingo yaKristo eli muntolongo, wakatumila balayijwa babe, 3akati kwaali, “Ndiwi na yoyo wakawhi unoozha, kana kuti tilingilile umwe”
4Jesu wakabashandula akati, “Indani munoombuja Joni zwamuwhile nezwamumubona, kuti, 5mapofu akumutubula kubona, namakosha akumukwenda, banabulwaji bwamapelembuji bakumucheneswa, nabamachinzebe bakumuwha, nabakafa bakumumuswa, nabasheti bakumubujwa iNdebo iMbuya. 6Ulokombolelwa yoyo usinokahajika nokuda kwangu.”
7Pabakati benda, Jesu wakatanga kulebeleka nezwaJoni kubunga, eti, “Mwakenda kugwegulu kunobonani? Idete limuteketeswa nebhepo na” 8Ani mwakenda kunobona ani? Unhu ulombala zwimbalo zwibuyanana na? Bonani, yabo banombala zwimbalo zwibuyanana ndibo banogala mujingumba jamashe 9Ani mwakabendilani? Kunobona umpolofeti na? Eya ndinomubuja, unopinda umpolofeti. 10Yoyu ndiye ulokwalwa nezwizwe kuwhi, “Bonani ndinootuma untumwa wangu pambeli papo uchoolulamisa inzila yiyo.” 11Chokomende ndinoti kwamuli, mukati mwaabo bakazwalwa nonhukaji apana unkulwana kupinda Joni umBhabhatizi, koga yoyo untukutuku mubushe bwedenga ndiye unkulwana kuna iye. 12Kuva mumazhuba aJoni umBhabhatizi kuswikila ngweno, bushe bwedenga bwayangata nolunya, akale banhu banalunya bamubutola nesimba. 13Nokuti bapolofeti bose nomulawo bakapolofita kuswikila panaJoni. 14Kana muzwitambula, iye ndiye Elija wakapolofitwa kuwhi unoozha. 15Unenzebe ngewhe!
16“Koga, ndochikwelanisa neni, chizekululu yechi?” Chinanga sabana bagele pamusika banoshobelela kunabamwe babo beti, 17“Takamulijila inyele koga amujakazana, takamulilila koga amujakafwikula, 18Nokuti Joni wakezha esinolya, esinonwa bakati, ‘unedimoni.’ 19Mwananhulumyana woNhu wakezha elya, enwa ibo bakati, ‘ilingani unhu ibhazwi nechinwi, unkwaina wabatelesi nabachinyi!’ Koga buchenjeli bunoboneka nezwito zwazwo.”
Makuta abasakabakadimbwa
(Luka 10:13-15)
20Jesu wakakalalila makuta mwaakata zwichenamiso zwikulwana, nokuti ajakashanduka. 21Wakati, “Mayee kunamwi Kolazini! Mayee kunamwi Bhetisaida! Ngana zwishamiso zwakatiwa munamwi, zwili zwakabatilwa muTile nomuSidoni, ngana bakashanduka kale, bekambala masaka nokuguba ilota. 22Koga ndinomubuja kuti kunooba kubhodo nezhuba lyokutonga kuTile neSidoni kupinda imwi. 23Ani iwi Kapenaume, unoonyamulilwa kudenga na? Mane, unoosengwa pasi kuHadesi bugalo bwabakafa, nokuti zwishamiso zwakatiwa mwauli ngana zwakabatilwa muSodoma, ngana nasi ilipo. 24Koga ndinoti kwamuli, nezhuba lyokutongwa kunooba kubhodo kunyika yeSodoma kupinda kwauli.”
Izhani kunami muwane kunyetutuka
(Luka 10:21,22)
25Nonshaji yoyo Jesu wakati, “Ndinomuboka Tate Tezi wedenga nenyika, nokuti mwakasisa yezwi kunayabo banabuchenjevu nabana luzibo, asi mukazwibhisa pachena kunaabo bananga sabana batukutuku. 26Eya, Tate, yoku kwakabeli kuda kwenu kwaShe.”
27Zwinhu zwose zwakabigwa kwandili naTate bangu, akuna unoziba Mwananhulumyana asi Tate chete, akale akuna unoziba Tate, kuzhe koMwananhulumyana chete, naabo banobashalwa noMwananhulumyana kuti oontondeje.
28“Izhani kwandili imwi mulonyala nokusenga mitolo milemu, ndoomupa lunyetutuko. 29Nyamulani ijogwe lyangu, mulayijwe kuva kwandili, nokuti ndinyolonyolo akale ndinamwoyo umbuyanana, munoowana kunyetutuka kwemipepo yenu. 30Nokuti ijogwe lyangu ilelu, nontolo wangu undelu.”
Iliyochaguliwa sasa
Mateo 11: LTP
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
The word for The World International
