Matayo 8
8
Yesu etamuuti muhe elo lukoma
Mariko 1:40-45; Luka 5:12-16
1Yesu areadimi kuli he lubwa, maifyo makumure ya vahe vekamliaha. 2Niho ekalita mhe muwe eru urukhao wa lukoma, ekammaiya Yesu mamuro ekamba, “Dilao ukudumu umuru kuniuti” 3Yesu ekakhuuru muheregha kuu, ekamdoa naho ekamba, “Nidumu, uu.” Wato oto hu muhe ekau urukao wa lukoma. 4Niho Yesu ekamba, “Uwesie usirembaya muhe, mira so urekuaija hehu mgiru wa kirurumo naho uregu kivulu chiyoiwe he miku yakwe Kiumbi emuoe Musa kalo kuaija ite ari waau urukhao.”
Yesu etamuuti mnyamalo wa muaku wa Kirumi
Luka 7:1-10
5Yesu areabuu he muang'a wa Kapernaumu, muaku muwe ekamliaha na kumgogo amlhaari 6ekumba, “Dilao, mnyamalo gho ebodie are ang'a eholoje naho eruisha.” 7Niho Yesu ekamba “Nnelita nimuuti.” 8Ka muaku ekamba, “Dilao, techiye ari ulite he minda gho. Mira yo bi kiome na mnyamalo gho eneu. 9Kwaite naani nireaha di ya vadilao vahali naho nilo vaaku gho vahali. Nikumba muwe, ‘So’ Nau etaso, na muhali, ‘Lita’ Nau etalita, naho nikumba mnyamalo gho, ‘Boi kigi ya’ Nau etaboi.” 10Yesu areako ka viome ekamaka, ekavaba vahe veekumliaha, “Kweri nimubaya, neri sinaraakho muhe ii Izraeli edarisha saya muhe. 11Iji namubao, vahe vakumure venelita kuli ho kaaze keliiya naho kefilia, navo venezokhodi he elha hawe ne Iburahamu ne Isaka ne Yakobo he Udilao waare ana he Kiumbi. 12Mira vainyi vaka udilao venebibiwe gahana he kidughu, are venezo na kung'e maiki.” 13Niho Yesu ekamba ka muaku wa Kirumi, “So ang'a naho chikhwa sacho udarishe.” Nahu mnyamalo wa muaku wa Kirumi ekau madamo wahuuhu.
Yesu etavauti vahe vakumure
Mariko 1:29-34; Luka 4:38-41
14Yesu areahe ang'a hakwe Petro, ekamhelha lage mkora wakwe Petro ebodie he muhasi naho eelo ihoma. 15Yesu ekamdoa muheregha ka mlage, naka mlage ekau ekauma, ekamanhuiya viaghu Yesu. 16Hareakhokwa, vekamgeria vahe vakumure velo mapepo nau ekavagu mapepo kwa kiome kuu naho ekavauti vahe vakhabuna varukhao. 17Eboie to kalo hu yeeyowe ni Isaya mroto wa Kiumbi yafuru, yeba, “U salaghe aatuuti marukhao kanu naho aatuboi tukhwa vazime.”
Veye kumliaha Yesu
Luka 9:57-62
18Muaze muwe Yesu areakho vahe vakumure vemjuguluke, ekavaba vahina kuu vatakho mlha wa kanu wa iziwa. 19Mhinya muwe wa miku yakwe Kiumbi emoe Musa ekamliaha Yesu ekamba, “Mhinya ani ninekuliaha kira hodi uneso.” 20Yesu ekamba, “Mhelele jidi he mhanga, na mahimeno yelo mashasha kini, mira Muinyi wa Muhe telo hodi ha kufufu na kubodi.” 21Niho mhina mhali hehu vahina kuu ekamba, “Mgiru, ronganiro ini niso niremke aba he mbira.” 22Mira Yesu ekamba, “Niliaha, varo vegae vakeane he mbira salaghini.”
Yesu etaitaaija nkunkunho giru
Mariko 4:35-41; Luka 8:22-25
23Yesu eebuiye he mashua, vahina kuu vekamliaha. 24Wato oto hekakhwa na nkunkunho girusha ata heiziwa, niho hu mashua ikatahe sina kufili za hemai, mira Yesu eekhwae eie luireno. 25Vahina vekamsusughuia kuramkaa vekumba, “Dilao tulhaari!” “Tuata sina kuga” 26Yesu ekavaba, “Kune mulo kudaraisha kugitutu, ‘Kwaakhoni mubugheno?’ Niho ekaka ekaiba huu nkunkunho ya mai taa nakawe, vikhabuna vikataa.” 27Hu vahe vekamaka, vekuba, “Ni muhe wa mbari mina ya? Sari nkunkunho ya mai na iziwa vimko.”
Yesu etavauti vahe vanu velo mapepo
Mariko 5:1-20; Luka 8:26-39
28Yesu ereahe chauju ya iziwa he idi la Vagerasi, ekasahe na vahe vanu velo mapepo velie hodi hakukeia vahe vegae. Ka vahe nee vakilalu kweri naho tehelo mhe emurue kutakho heka kwalhi. 29Hu vahe vekalholhoshi kuma gimbe vekuba, “Ulo kiakhoni na nne ari Muinyi wa Kiumbi? Hile utelita kutunyamarisha madamo yedumuwa yesinahe?” 30Sina to heelo ifyo igiru la gua jeekuzeuwa. 31Niho ka mapepo yekamgogo Yesu yekuba, “Kai unetugu ii, uturo tujibuie hu gua.” 32Yesu ekayaba, “Haya soni.” Hu mapepo yekali hehu vahe nakabuu he gua. Hu gua khabuna jikadimi he lubwa, jikafili he iziwa jikaga kwa mburi ya mai. 33Niho hu vazemo veekuzeu ka gua vekagugulu, vekaso he muang'a, naho are vekavabaia vahe mburi khabuna jivaheye hu vahe veebuiwe ni mapepo. 34Niho vahe vakhabuna hehu mwang'a vekali nakumliaha Yesu, varemuakho vekamgogo ahali he muang'a kini.
Iliyochaguliwa sasa
Matayo 8: NTMBL2025
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
The New Testament in Mbugu @The Word for The World International and Mbugu Language translation, 2025. All rights reserved.
