Matayo 2
2
Vagalho kuli bwa kaaze ho keli
1Yesu eeakhoike he muang'a wa Betilehemu, idi la Yudea, ka madamo Herode nee dilao, areakhoka bi, veiliishishe nhondwe kuli bwa kaaze ho keli vekahe Yerusalemu, 2vekalhasu, “Eahale ka Dilao wa Vayahudi eakhoke? Kwaite twaiakho nhondwe kuu irealianya are bwa ho kaaze kelianya, tukalita tumuaresi.” 3Dilao Herode hawe na vahe vakhabuna va Yerusalemu vareako ka mburi, vekahiri he swaho kini. 4Herode ekavase vagiru va muaresi, vahinya va miku yakwe Musa, ekavalhasu ite “Kiristo eneakhoka le?” 5Niho vekamba, “Kiristo eneakhoka he muang'a wa Betilehemu he idi la Yudea. Kwaite nicho chigondiwe ni mroto wa Kiumbi ite.
6Ari muang'a wa Betilehemu idi la Yudea,
Ari tumgitutu neri he miang'a iiliikishe ya Yudea,
Kwaite he ari heneli mgiru
Enevakaeti vahe gho Israeli.”
7Niho iji Herode ekavase kakera hu vahe veiliishe nh'ondwe, ekudumu kuila ite ni madamo mina veiakhoye ka nhondwe ikulijanya. 8Niho ekavaba, “Soni Betilehemu mzelhasuisha mburi ja muinyi, naho mkunemuakho, mnibaye kalo na ani niso nire muaresi.” 9Dilao Herode areafiriti kuvaajia hu vapitu va nhondwe, ka vapitu va nhondwe vekahali ata vekaso. Ilai veaha kwalhi, watooto vekaiakho kahali hu nhondwe wahuuhu veeiakhoe bwa hodi kaaze keliia, naho ka ndondwe ikavakaeti sari to hodi hu muinyi ho eeaha ikauma. 10Ka nhondwe ikavakaeti sari hodi eaha hu muinyi ikarauma ana. 11Niho vekabuu minda, vekamuakho hu muinyi hawe ne Maria alhii kuu, vekama mamuro na kududukhu ilai vekumuaresi. Niho vekamuo vitumulilo vya zahabu na lubani na mkha mkulho wa vaing'i usewa marihamu. 12Kiumbi ekavalhiija hemakhala ite vasikirii hakwe Herode, kwato vekagale kwa kwalhi hali.
Yesu ne Abaghe ne alhii kuu vetagugulu kuso Misiri
13Hu vagalho vareagale, mzasughawe waare ana he Kiumbi ekamlianyija Josefu he makhala, ekamba, “Hali ii, mdori muinyi hawe na alhii, mugugulu kuso idi la Misiri. Fufuni arai sari nikunemubaiya, kwaite Herode emdaija ka muinyi kalo amgaa.” 14Niho Josefu ekaka, ekamdori muinyi hawe na alhii muinyi vekahali naama wahuuhu, vekaso idi la Misiri, 15veefufue are sari Herode ekaga. Ya mburi yeeboike kalo chilijanye hu kiome cheeyoiwe ni Dilao Kiumbi kutakhoya mroto wa Kiumbi ite,
“Neemsee muinyi gho kuli idi la Misiri.”
Vainyi vagitutu va kiagiru vetagaawe
16Herode areaila ite hu veilie nhondwe kuli bwa wa kaaze ho keliya vaamta, ekasanuishishwa. Ekavaji vaaku kuu varevagaa vainyi vagitutu vakhabuna va kiagiru velo miko minu kukirii di he muang'a wa Betilehemu na miang'a iaha sina. Eeboie to kuagha na madamo emurue kuila kuli hehu veilishe nhondwe. 17Niho chikafuru hu kiome chiyowe ni Yeremia mroto wa Kiumbi ite, 18“Kizoi chikakoika are Rama,
Kizoi cha vuhuye vukumure.
Raheli etavazoiya vainyi kuu,
Neri tedumu kutaaijwa,
Kwaite vakhabuna vaaga.”
Yesu ne Abaghe ne alhii kuu vetakirii kuli Misiri
19Herode areaga, mzasughawe waare ana he Kiumbi ekamlianyija Josefu he makhala are Misiri, 20ekamba, “Ka, umdori muinyi hawe na alhii kuu, ukirii he idi la Iziraeli, kwaite hu veedumue kumgaa ka muinyi vaaga.” 21Niho Josefu ekaka, ekamdori muinyi hawe na alhii muinyi vekakirii he idi la Iziraeli. 22Mira Josefu areako ite Arikelao, muinyi wakwe Herode niu dilao wa idi la Yudea hodi ha abaghe, ekabughenu kuso are. Nau arealhiijwa he makhala, ekaso bwa ja idi la Galilaya, 23ekaso kurafufu he muang'a usewe Nazareti. Kwato chikafuru hu kiome chiyoiwe ni varoto va Kiumbi chiba,
“Enesewe Mnazareti.”
Iliyochaguliwa sasa
Matayo 2: NTMBL2025
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
The New Testament in Mbugu @The Word for The World International and Mbugu Language translation, 2025. All rights reserved.
