मत्ती 9
9
येसुई ल्हो मगुल्नान्न नाह्जा ताह्पा सिमी ताःफाम्पा
(मर्क २:१-१२; लुक ५:१७-२६)
1मन्न छाम्म येसु दोङाः चपचप योह्न धिक्याँ जेँ छ्युङ्पान सहरग होलहोल स्वाबो। 2सिमिवजै खातग दिमदिम आःपा ल्हो मगुल्नान सिमिदी नुन स्याह् सप्पो। येसुई ख्युन बिस्वास रङरङ ल्हो मगुल्नान सिमी र्वाबो, “ङोह्जो, हिम्मत ख्या। नान तीपा माफ रह्पा।” 3कानुन लन्नान्न सिमिवन बर्ग हातिपाई राह्ङराङ्साः र्वाबो, “अन ता परमेस्वरन ल्हुई झाँ।” 4येसुई ख्युन समन ल्होई हाकोको र्वाबो, “ङेन तैङ जेँन समग नावा अलः खेनान? 5तैङर्वाङिन तै र्वाचे छुम्म ङ्याह्, ‘नान तीपा माफ रह्बो’ र्वाचे कि ‘च्याँ रे ल्हेना’ र्वाचे? 6जेङ्नै सिमिन ङोह्जोः पिर्थीबी तीपा माफ खेचेन आङ ङ्याह् र्वार्वा ङेनजै क्युई रा तयाःयो।” तब नुई मन ल्हो मगुल्नान्न नाह्जा ताह्पा सिमी र्वाबो, “च्याँ, नान खात हुरा, रे यिम वया।” 7आलै नु च्याङ्बो, रे जेँन यिम होई। 8जब सिमिवन मोह्ङजै अन रङ्बो, तब ख्यु ङिह्म्बो, रे सिमिकाङ्मोः झामन सक्ति बिन्नान परमेस्वरन प्रसङ्सा खेबो।
मत्ती स्वा र्वापा
(मर्क २:१३-१७; लुक ५:२७-३२)
9येसु स्याह्लै वैतौ मत्ती र्वानान्न सिमिदी कर तुईनान्न यिम छ्युङ्पा रङ्बो, रे नू र्वाबो, “ङन ङिक जाः।” आलै नु च्याङ्बो रे नुन ङिक जाःबो।
10“येसु मत्तीन यिम झाम छ्युङ्तौ, लैः कर तुईनानव रे पापीव स्वास्वा नु रे नुन चेलावन ङ्याबो झाम छ्युङ्बो।” 11जब फरिसीवजै मन रङ्बो, तब नुन चेलाकाङ्मोः र्वाबो, “तैङ ङेनकोन गुरु कर तुईनानव रे पापीवन ङ्याबो झाँ?”
12अन ताह्ताह् येसुई र्वाबो, “नाह्जा मीपा सिमिकाङ्मोः अम्जी मत्वानान, जेङ्नै नाह्प्पुवाकाङ्मोः त्वानान। 13जेङ्नै वैवै अन्न अर्थ तै जेङ्पा ङेन लह्ना ‘ङा बलिदान नङ्पा, दया चाई खेनान।’ तैङर्वाङिन ङा धर्मी नङ्पा, जेङ्नै पापीकाङ्मोः स्वा र्वामः स्वापा।”#मत्ती १२:७; होसे ६:६
बर्तन भारेः प्रस्न
(मर्क २:१८-२२; लुक ५:३३-३९)
14तब यूहन्नान चेलाव येसुन स्याह् स्वाबो, रे नू लोप्पो, “ङि रे फरिसीव बर्त छ्युङ्नान, जेङ्नै नान चेलाव तैङ बर्त मछ्यूँ?” 15येसुई ख्युकाङ्मोः झब बिम्बो, “जबथाल भत्यारग माःपा लार्क्यावन ङ्याबो छ्यूँ, तै ख्यु बैराग खेनान तै? जेङ्नै मन्न ल्हाः स्वानान ङ्याह् जब माःपा ख्युन स्याह्लै वन्नान ङ्याह्। तब ख्यु बर्त छ्युङ्नान ङ्याह्।
16“सुई घोलाङ घ्वापाः लाम्मा सार्बा मताम्नान। तैङर्वाङिन लाम्मा सार्बाई घोलाङ छ्योन्नान, रे घोलाङ झन ह्याल्म ज्योन्नान। 17सुई फोन्न खुन्चा घ्वापाः अङ्गुरन खु सार्बा मनान्नान, तेमन्ता खुन्चा दिल्ङ, रे अङ्गुरन खु हाल्नान, रे खुन्चा मीपा राह्नान। जेङ्नै अङ्गुरन खु सार्बा फोन्न खुन्चा सार्बागै नान्नान। रे ङ्योरुम जोग्गी राह्नान।”
याईरसन सिह्पान चमेः रे खङ्नान्न चिमिचा ताःपा
(मर्क ५:२१-४३; लुक ८:४०-५६)
18येसुई ख्युकाङ्मोः अन ल्होई र्वातौर्वातौ यहूदी जोम्पुन हाकिमदी स्वाबो, रे नू ध्वाः खेखे र्वाबो, “ङन चमेः घोमाः सिह्बो, जेङ्नै ना स्वास्वा नू ज्यार्ङिन नु सम्पु ग्युर्नान ङ्याह्।” 19येसु च्याङ्बो रे जेँन चेलावन ङ्याबो मन सासकन ङिक जाःबो। 20मन्नै भेला च्योङे परालै कह वैनान्न नाह्जा रह्पा चिमिचादीजै ङिक्याँलै स्वास्वा येसुन घोलाङ्न नाः ज्यार्बो।#मत्ती १४:३६ 21तैङर्वाङिन नुई समसमग सोचि खेपा ङ्याह्, “ङै नुन घोलाङ मात्र ज्यार्ङिनै ङा ताःनान ङ्युँ।” 22ङिक होलहोल सेन्तौ येसुई मन चिमिचाः रङ्बो, रे र्वाबो, “चमेः, हिम्मत ख्या, नान बिस्वासजै नाः ताःफाम्पा ङ्याह्।” मन चिमिचा मन्नै भेला ताःबो। 23आलै जब येसु हाकिमन यिम स्वा ताप्पो, नुई ल्यू बुन्नानव रे मोह्ङजै फाईराकुईरा खेपाई छ्युङ्पा रङ्बो। 24नुई ख्युकाङ्मोः र्वाबो, खोलोः वया, तैङर्वाङिन चमेः सिह्पा मह्या, जेङ्नै आःपा ङ्याह्। ख्युई नुन माबी पप्पो। 25सिमिकाङ्मोः खोलोः छ्यूमी नु झिङ जाःबो, रे मन चमेःन लाह् जुङ्बो, आलै मन चमेः च्याङ्बो। 26मन्न छाम्म देसभरी अन ल्होईन भारेः चर्चा फेल्बो।
येसुई काना सिमि ङेह्पाः ताःफाम्पा
27येसु स्याह्लै वैतौ ङेह् काना सिमिव “हे दाऊदन ङोह्जो, ङी दया ख्या” र्वार्वा फाईरा खेईखेई नुन ङिह्ङिह् जाःबो। 28येसु यिम स्वामी मन ङेह् काना सिमिव रे स्याह्ई ताप्पो। येसुई ख्युकाङ्मोः लोप्पो, “तै ङै ङेनकाङ्मोः ताःफान तैनान र्वार्वा ङेनकाङ्मोः बिस्वास ङिह्पौ?” ख्युई र्वाबो, “अँ ङिह्पा, प्रभु।” 29तब येसुई ख्युन मी ज्यारज्यार र्वाबो, “ङेनकोन बिस्वास अन्सार ङेनकाङ्मोः राःयो।” 30आलै ख्युन मी पोङ्बो। येसुई झाःम र्वार्वा ख्युकाङ्मोः करा चेतावनी बिम्बो, “अन ल्होई सुई क्युई नराःयो।” 31जेङ्नै ख्यु होई, रे मन देसभरि नुन मिह्नकै फेल्बो।
येसुई सिमि वाम्पाः ताःफाम्पा
32जब ख्यु गेग्गे वैयङ खेपा ङ्याह्, तब मु ताह्ताह् वाम्पा सिमिदी येसुन स्याह् सप्पो। 33मु छ्यूमी मन वाम्पाई ल्होई र्वाबो। आलै “इस्राएलग हातौयै झाम मरङ्बो” र्वाईर्वाई सिमिवन मोह्ङजै हालाईबो। 34जेङ्नै फरिसीव र्वामः जाःबो, “मुवन मालिकलम नुई मु छ्यूँ।”
येसुई सिमिकाङ्मोः दया खेपा
35येसु पुरू सहरव रे नामवक्याँ ख्युन यहूदीवन आराधनालयवग लह्नैलह्नै, राज्यन ल्होन् लः ताह्फेरैफेरै रे सिमिवन नाह्जा पुरु रे कमिकमजोरीव ताःफानैफानै होई।#मत्ती ४:२३; मर्क १:३९; लुक ४:४४ 36जेङ्नै सिमिन मोह्ङकाङ्मोः रङरङ नुई ख्युकाङ्मोः यामयाम दिसाबो। तैङर्वाङिन ख्यु ग्वाल्या मीपान लूपावलैम तूरि देप्पा रे फुरी मदेप्पा ङ्याह्।#गन्ती २७:१७; १ झली २२:१७; २ इति १८:१६; इज ३४:५; मर्क ६:३४ 37तब नुई जेँन चेलाकाङ्मोः र्वाबो, “भालि हाति र्वार्वा ङ्याह्, जेङ्नै खेः धोन खेनान्न सिमिव ङाईदि ङ्याह्। 38अन्नकारन भालिन ताःपोग सोअताबा, रे नुई जेँन बालि गम्नान्न खेः धोन खेनान्न सिमिव फेरा र्वार्वा छ्याःफुला।”
Iliyochaguliwa sasa
मत्ती 9: NTKST25
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
The New Testament Books in Kaike Language © The Word for the World International and Kaike Translation Project, Nepal, 2025
