मत्ती 11
11
येसु रे बप्तिस्मा-बिन्नान्न यूहन्ना
(लुक ७:१८-३५)
1जेँन चेला च्योङेपाकाङ्मोः अन ल्होई र्वातामी येसु स्याह्लै ख्युन सहरवग लह्म्मः रे ल्होन् लः ताह्फेच्चेन भिह्तु होई। 2बप्तिस्मा बिन्नान्न यूहन्नाई झ्यालखानाः रातौ येसु मसिहजै खेपान धोनवन भारेः ताह्बो, आलै नुई जेँन कान चेलाकाङ्मोः येसुन स्याह् अन ल्होई लोम्म फेप्पो, 3रे ख्युई येसुन स्याह् स्वास्वा झाम लोप्पो, “स्वानान चन नाई जेङ्पा, कि ङि घङ सुई कूचे?” 4येसुई ख्युकाङ्मोः र्वाबो “ङेनजै ताह्पा रे रङ्पान ल्होईव यूहन्नाः र्वा, 5कानाव रङ्तैनान्न सिमि राँ, रे लुल्याव ल्हेङ्ङ। कोरन नाह्जा ताह्पान सिमिव छाङ्म रायङ ङ्याह्। नाम्ज्योवा मताह्नान्न सिमिव ताह्तैनान रह्पा ङ्याह्। सिह्पाव सम्पु राह्राह् च्याङ्पा ङ्याह्, रे बिखारिकाङ्मोः ल्होन् लः ताह्फेप्पाई ङ्याह्।#यसै ३५:५-६; ६१:१ 6ङन भारेः सङ्का मखेनान्न सिमि तेम्माई धन्न जेङ्पा।”
7आलै यूहन्नान चेलाव वैयङ खेतौ येसुई सिमिकाङ्मोः यूहन्नान भारेः र्वामः जाःबो, “ङेन सुनसान ठाउँग तै सेह्म्मः वैपा? तै लनजै कुल्पान मिन ल्हा? 8मराह्ङिन ङेन तै सेह्म्म वैपा? तै घोलाङ लः लः गोप्पान सिमी? घोलाङ लः लः गोन्नान्न सिमिव ता झलीवन यिम छ्यूँ। 9तेम्माई र्वा लो ङेन तै सेह्म्म वैपा? तै कान अगमवक्ताग? हो, तेम्माई र्वाचे र्वाङिन ङेनजै भबिस्यबक्ता खेरै किम तीपाः सेह्म्म वैपा। 10तैङर्वाङिन पबित्रसास्त्रग परमेस्वरजै यूहन्नानै भारेः र्वापा ङ्याह्, ‘सेह्ना, नान ङू ङा ङन दुतग फेच्चे, आलै नुई नान लम तयार खेनान ङ्याह्।’ 11तेम्माई, ङा ङेनकाङ्मोः र्वाचे, चिमिचालम केह्पावन बर्ग बप्तिस्मा बिन्नान्न यूहन्ना खेरे किम घङ सुई रह्पा मह्या। जेङ्नै स्वर्गन राज्यग सु पुरून खेरे छ्युम ङ्याह्, नु यूहन्ना खेरै किम जेङ्पा। 12बप्तिस्मा बिन्नान्न यूहन्नाई ताह्फेत्तौलै चोँनबेर स्वर्गन राज्य तोप खेखे ङू वैपाई ङ्याह्। आलै सक्तिसाली सिमिव हलजफत खेखे अनग जुङ्ङ।#लुक १६:१६ 13तैङर्वाङिन बप्तिस्मा बिन्नान्न यूहन्नान पालिन बेर मोसान कानुन रे भबिस्यबक्ता पुरूवजै परमेस्वरन राज्यनै भारेः भबिस्यबानी र्वापा ङ्याह्। 14ङेन स्वीकार खेमः ङ्याङ्ङिन, स्वात्वानान्न एलिया अनै जेङ्पा।”#मला ४:५; मत्ती १७:१०-१३; मर्क ९:११-१३ 15सुन ङ्यान्नान्न नाम्ज्योवा ङ्याह्, नुई ङ्यानाःयो। 16“अन पुस्ताग ङा तैन ङ्याबो तुलना खेचे? ख्यु ता बजारग छ्युङछ्युङ जेँन फुरीवन ङ्याबो झामखेखे ल्होई र्वानान्न वैचाव लैम ङ्याह्। 17‘ङी ङेन भिह्तु ल्यू बुप्पा, जेङ्नै ङेन मछ्याम्बो। ङी बैराःन धेन धेपा, जेङ्नै ङेनजै बैराग मखेबो।’ 18जेङ्नै यूहन्ना झाईझाई रे थुङैथुङै मस्वाबो, रे ख्युई नू मुई सेम्पा सिमि र्वाबो। 19सिमिन ङोह्जो झाईझाई रे थुङैथुङै स्वाबो, रे ख्युई र्वाङ, ‘सेह्ना, झाचे मदेप्पा, थुङ्चे मदेप्पा, कर तुईनान रे पापीवन फुरी’ र्वार्वा दोस खेँ। परमेस्वरन छोएग नुन धोनजै र्वार्वा तेम्मा ठहर्याई खेँ।”
बिस्वास मखेनान्न सहरव
(लुक १०:१३-१५)
20कन-कन सहरग येसुई खेपान ताईलुवान धोनव लैः ङ्याह्, नुई मन सहरवग धिक्कार रा र्वामः जाःबो, कारन ख्युई घ्योप्पा मखेबो। 21“धिक्कार नाः, ए खोराजीन! धिक्कार नाः, ए बेथसेदा! तैङर्वाङिन ङेन स्याह् खेपान सक्तिसाली धोनव दुङाल देप्पान तुरोस रे सीदोनग खेपा जेङ्न ख्युई लैःलै सोला छिनछिन रे माला छिनछिन घ्योप्पा खेतपा राह्नान ङ्याह्।#यसै २३:१-१८; इज २६:१-२१; योए ३:४-८; आमो १:९-१०; जक ९:२-४ 22जेङ्नै ङा ङेनकाङ्मोः र्वाचे, न्यायन दिनग ङेन खेरे ता तुरोस रे सीदोन्न हालत ह्याल्म कुतैनान राह्नान ङ्याह्। 23ए कफर्नहुम, तै ना पान्नाङ थालै थीनान ङ्याह् तै? ना पातालथाल घ्या फान्नान ङ्याह्। तैङर्वाङिन नान स्याह् खेपान ताईलुवान धोनव सदोमग रह्पा जेङ्न अन त्यान लाह्न बेर लुईपा ङिम्तौ।#यसै १४:१३-१५; उत १९:२४-२८ 24जेङ्नै ङा ङेनकाङ्मोः र्वाचे, फैसलान ल्हाः नान धसा खेरे ता सदोम सहरन दसा ह्याल्म कुतैनान राह्नान ङ्याह्।”#मत्ती १०:१५; लुक १०:१२
ङन ङिक स्वा रे नाह्ः
(लुक १०:२१-२२)
25मन्न भेला येसुई र्वाबो, “हे पा, स्वर्ग रे पिर्थीबिन प्रभु, ङा ना मया रह्बो र्वाचे, तैङर्वाङिन नाई अन ल्होई बुद्धिमानी रे हाकोनान्न सिमिवलम फाक नाह्म्बो, आलै वैचाकाङ्मोः मन थम्बो। 26जेङ्पा, पा, तैङर्वाङिन नाः अनै लः छुबो।” 27“ङन पाई तैस्याङ पुरू ङाः थोप्पा ङिह्पा। पा नङ्म ङोह्जोः सुई मस्योःङ, रे ङोह्जो नङ्म पाः सुई मस्योःङ, आलै ख्युई र्वार्वा स्योःङ सू ङोह्जोई पा थनसुम खेँ।”#यूह ३:३५; १:१८; १०:१५ 28“हे पुरू गोप्पा रे तूरि देप्पा हो, ङन स्यीह् स्वा, ङा ङेनकाङ्मोः नाह्ःफान्नान ङ्युँ। 29ङन सिङ्कुल जेँन लाह्ः होरा, रे ङन लम लह्ना, तैङर्वाङिन ङा समग दिसानान रे बिनम्र ङिह्पा, आलै ङेनजै जेँन आत्माग नाःचे देन्नान ङ्याह्। 30तैङर्वाङिन ङन सिङ्कुल छुम्म ङिह्पा, रे ङन हुर भोङ्म ङिह्पा।”
Iliyochaguliwa sasa
मत्ती 11: NTKST25
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
The New Testament Books in Kaike Language © The Word for the World International and Kaike Translation Project, Nepal, 2025
