मत्ती 26
26
येसुलाई सै:ने योजना
मर्कुस १४:१-२; लुका २२:१-2२; युहन्ना ११:४५-५३
1येसुये आव स्यान्टै रो: हैओवारो मान्त्रा उसिसरंलाई हैओडोवर, 2“जेलाई ठाले, आकाम नेला:का निस्तार#26:2 इस्राएलीराई मिस्र डेस यारा:व डिनलाई पर्ब मानिरंये पर्ब राये, होकाम मानवालो ओज़ा क्रुसटं टाङ्गिसिनेलो लागिटं क्योसिने ले।#बाने १२:१-२७” 3होकाम कैयाफा उमिन लेव मुख्या सेवा डोने मीलो ओडरबारलो ओठारालं मुख्या सेवा डोने मीरं सोनो जनताराई याअगंवारं याडुप्सिव। 4होकाम नोराई येसुलाई कैजैडे छल डाडे क्यो:डे सै:ने वार्डे सल्ला याडोव। 5होकाम नोराई हैयावारो, “पर्ब बेलाकं माङ्क मानिके मीराई यारिसैये भ्या हल्ला डोरंके।”
बेठानियालं येसु अभिसेक
मर्कुस १४:३-९; लुका १२:१-८
6येसु बेठानियालं सिमोन याडोज़्याव कु:रिलो उज़ी:म्ल उलिज़्याकं, 7टोबो मेमाये सिङ्गमरमरलो टोबो जालं मोङ्गो चाव ङ:रने ठी रैडे येसु लेवकं ओराव होकाम ज़्याव ज़्योने चुङडे उलिज़्याव बेलाकं हो मेमाये नो ओङै:टं ठर्डे ओयोव। 8आव र:ङडे उसिसरं यारिसिव होकाम नोराई हैयाडोव, “आढङ ठी कडाने नास नझैज़्याव? 9कडालेकं आव बस्त भ्या पैसालं येडे हो पैसा गरिबरंलाई यानेरं याटा हो।” 10होकाम येसुये आव रो: ठा सन्डे नोरंलाई हैओडोवरं, “जे आव मेमालाई कडाने डुखं जेयाज़्याव? नोयेके ङालागिटं टोबो चाव ये:न डोडे नोयो। 11कडालेकं गरिबरंके एकसप्ड्या जेसंज़ लेरंये, ङा के एकसप्ड्या ङाम्टा। 12नोये आव चाव बसैने बस्त ङाक्याङटं ठर्डे ङालाई गाडिने तयार झैडे नैसोङो। 13ङा जेलाई डस्साज़ हैङाडाच्योज़्या, सङसारलं जोङ आव चाव सोर सठैनासी, आव मेमाये जो ओडोव नोलो ओबयान नोलो ओसम्झना डानेलेसि।”
यहुडाये येसुलाई क्यो:ने ओभनो
मर्कुस १४:१०-११; लुका २२:३-६
14होकाम बारं जनालाम टोबो यहुडा इस्करियोत वार्ने मुख्या सेवा डोनेरं लेवङं ओनाव, 15होकाम हैओडोवरं, “ङा नोलाई जिकुइटं सोक्योडे ङायाच्योखे भने ङालाई कडि जेयाङ?” होराई नोलाई तीस गोटा चान्डिलो सिक्का गनिडे यायोव।#जकरिया ११:१२ 16हो बेलाकामज़ यहुडाये येसुलाई सोक्यो:ने मौका उखिमरिव।
आखिरला भोज
मर्कुस १४:१२-२६; लुका २२:७-२३; युहन्ना १३:२१-३०
17खमिर मालेव बरे ज़्योने पर्बलो सुरुका छ्याम येसुलो उसिसरं ओल लेवकं राडे हैयाडोव, “नलागिटं निस्तार पर्बटा भोज ज़्याने पो काङ गेझैड्यानके?” 18येसुये हैओडोवरं, “सहरलं टोबो मी लेवकं नाच्यो, होकाम हो मीलाई ऐ डाच्यो, ‘गुरबाये हैवार्ज़्या, बेला नजिकं राडेले। ङा ङासिसरासं नज़ी:मकं निस्तार पर्ब मानिने ङाले’।” 19होकाम येसुये हैओवारो अनसार उसिसराई निस्तार पर्बटा भोज तयार याझोयो। 20रि:मडे येसु बारंजना उसिसरासं ज़्याव ज़्योने उचुङो। 21येसुराई ज़्याव याज़्योज़्याकं येसुये हैओवारो, “ङा जेलाई डस्साज़ हैङाडाच्योज़्या, जेलाम टोबोये ङालाई सोक्यो:नेले।” 22होकाम नोरं बनै डुखि टाडे स्यान्टैराई येसुलाई यापजोयो “प्रभु होकाम हो मी ङा रो?” 23होकाम येसुये हैओवारो, “जोये ङासंज़ टाठीलं बरे छोइडेनोयो, होयेज़ ङालाई सक्यो:नेले।#भजनरं ४१:९ 24मानवालो ओज़ाके ओबारेलं चोखो सास्त्रटं सर्सिव अनसार नानेज़ले। हैजैडे बनै छे-छे ङप्सिव डुखं टानेले नो मीलाईके, जोलो ओकारंनये मानवालो ओज़ा क्योसिनेले। नो मी के ओमजर्मिखिनज़ नोलो ओलागिटं चाव याटा हो।” 25होकाम येसुलाई सोक्यो:ने यहुडाये ओपजोयो, “गुरबा हो मी ङा रो?” येसुये नोलाई हैओडोव, “नङज़ हैनवार्खे।”
प्रभु भोज
मर्कुस १४:२२-२६; लुका २२:१४-२०; १कोरन्ठी ११:२३-२५
26नोराई ज़्याव याज़्योज़्याकं येसुये बरे रैडे ढन्याबाड ओयोव मान्त्रा येसुये बरे ओके:व होकाम उसिसरंलाई याडे हैओडोवरं, “हाँ गोज़्योच्योके, आव ङा ङाक्याङ ची।” 27होकाम कचौरा पनि रैडे ढन्याबाड याडे, येसुये नोरंलाई ऐ वार्डे ओयोवरं, “जे स्यान्टैराई आलाम गोओँच्योके। 28कडालेकं आव सा:रौ न्यामटा बाचा डोसिव ङा ङाझी ची, आव भ्या मीराई यापाप छेमालो लागिटं बगैसिये।#बाने २४:८; यर्मिया ३१:३१-३४ 29हैनि पनि ङा जेलाई हैङाडाच्यो, ङा ङाबाबुलो ओराज्यला सा:रौ अङ्गुरलो उरी: जेसं ङामओँया समं ङा आव अङ्गुरलो उरी: फरि ओँनेङाम्ले।” 30टोबो भजन यागयोपाना येसुरं जैतुन डान्डाडे पुलुडे यानाव।
पत्रुसलो ओपाङ पुरा माटाने बारेलं भबिस्यबानी
मर्कुस 14:26-39; लुका 22:31-34; युहन्ना 13:36-38
31होकाम येसुये नोरंलाई हैओडोवरं, “आछिम रिलं ङाडोव गरिभन्डाये जे जेबिस्वासटाम जेझिन्डे वोल्नेजेले। कडालेकं ऐटाव सर्सिवले, ‘ङा ग्वालालाई सै:नेङाले होकाम बगालला भेडारं चित्राङ नि पुत्राङ टानेलेरं।#जकरिया १३:७’ 32हैजैडे ङा सिडे ज्युङडा ङाटाव पान्त्रा जे भन्डा ङा:डे गालीललं नाने ङाले।” 33पत्रुसये येसुलाई हैओडोव, “नडोव गरिभन्डाये स्यान्टैरं बिस्वासटाम याछिन्डे यावोल्नी पनि ङा खर्कज़ ङाछिन्डे वोल्नेङाम्ले।” 34येसुये नोलाई हैओडोव, “ङा डस्साज़ नङलाई हैङाडानज़्या आछिम रिलं भाले कोँने भन्डा ङा:डे नङ ङालाई सोङ्खेप ङामसरेसंन वार्ने नले।” 35पत्रुसये येसुलाई हैओडोव, “ङा नङसं सिने ओटानि पनि नङलाई रा:ने ङाम्ले।” उरु स्यान्टै उसिसराई पनि हैज़ यावारो।
गेतसमनीलं येसुलो ओप्रार्ठना
मर्कुस 14:32-42; लुका 22:39-46
36होकाम येसु गेतसमनी वार्ने बगैचालं उसिसरासं ओनाव होकाम नोरंलाई हैओडोवरं, “जे आकंज़ चुङसिच्यो, ङा जामा होसै नाडे प्रार्ठना ङाडो।” 37होकाम ओल्स पत्रुस सोनो जब्डियालो नेबऱ्याङ ओज़ानिलाई डाडे ओसोगो हाइडे उयुङलं बनै डुखि ओटाव। 38होकाम येसुये नोरंलाई हैओडोवर, “ङायुङ डुखंये भड्किडे पाने स्याव टाज़्या। जे आकंज़ ङासं माङ:ल्डे लेच्यो।” 39होकाम येसु जामा होसै नाडे नामलं फुलुप्सिडे प्रार्ठना ओडोव, “ए ङाबाबु ओटाखिन आव डुखंला कचौरा ङालेवकाम टाडा ओटाकं। हैनि पनि ङा इछ्या ङाडोव स्याव माङ्क नइच्छ्या स्याव ओटाकं।” 40होकाम येसु उसिसरं लेवकं वोल्डे ओराकं नोरंलाई ङ:ल्डे यालिज़्याव ओडैरिवरं, होकाम पत्रुसलाई हैओडोव, “होकाम जे ङासं टघन्टा पनि माङ:ल्डे जेम्चुसिडु? 41जागा लेच्यो प्रार्ठना डोच्यो होकाम परिछ्यालं टापरिच्यो। डस्साज़ आत्माके तयार लिज़्या, हैनि पनि क्याङ कम्जोर लिज़्या।” 42होकाम येसुये फरि पनि छुटो खेप प्रार्ठना ओडोनाव, “ङाबाबु, ङा आव ङामओँया माटानेटावसं नइछ्या पुरा ओटाकं।” 43येसु फरि ओराकं उसिसरं ङ:ल्डे यालिज़्याव ओडैरिवरं, कडालेकं नोराई यामिलङ यामिरंये रोलाटा टाडेउलिज़्याव। 44हैजैडे येसुये नोरंलाई ओरा:वरं, होकाम फरि सोङ्खेपका नाडे हो रो:ज़ डोहोरैडे प्रार्ठना ओडोनाव। 45होकाम येसु उसिसरं लेवकं राडे हैओडोवरं, “जे अजं पनि ऐस्याडे जिलिज़्याव, आराम जेडोज़्याव? डे! बेला नजिकं केरिडेले। मानवालो ओज़ा पापीराई याकुइटं क्योसिरिज़्या। 46गोसोच्योके बा, सोक्यो:ने मी नजिककंज़ केरिडेले।”
येसुलाई याक्योव
मर्कुस 14:43-50; लुका 22:46-53; युहन्ना 18:3-12
47येसु ओपाङज़्याकज़ बारं जनालाम टोबो, यहुडा वार्ने उसिस ओराव। होसं मुख्या सेवा डोने मीरं सोनो रैतिराई याअगवाराई यापरि:ङो माहुले मीरं तरवालरं सोनो गाबनारं डाडे याराव। 48येसुलाई सोक्यो:नेये हो मीरंलाई टोबो चिन्न योडेओनैज़्यावरं, “जो मीलाई म्वाइ ङाडो, होज़, होलाईज़ क्योच्यो।” 49होपानाज़ येसु लेवकं राडे नोये हैओवारो, “जड गुरबा!” होकाम नोये येसुलाई म्वाइ ओडोव। 50येसुये नोलाई हैओडोव, “ए ङानै नङ जो डोने नराव हो चानो गोडोके।” होकाम होरं राडे येसुलाई क्योडे यालाङो। 51येसुलो ओतराफडेङा टोबो मीये तरवाल हाइडे मुख्या सेवा डोने मीलो ओकमारालाई ओनाज़ च्वाट्ट पल्डेओयोव। 52होकाम येसुये नोलाई हैओडोव, “नतरवाल उसिपलं नै। कडालेकं तरवाल रैनेरं स्यान्टै तरवालयेज़ नास टानेलेरं। 53नङ कडि नसुन्चिसङज़्याव, ङा ङाबाबुलाई हैङाम्डोडुडोरो, होकाम मानि बाबुये हो मान्त्राज़ बारं पल्टन भन्डा भ्या स्वर्गटा कटंवालरं मापरि:ङड्याङो डोरो? 54हैजैडे नै याटाखे भने के आव रो:टं ऐझैडेज़ टावपरी वार्डे सास्त्रटं सर्सिव रो: कैजैडे पुराटा?” 55हो बेलाकज़ येसुये होला लेव मीरंलाई हैओडोवरं, “डाङ्कुलाई क्यो:ने जेराव मान्टि ङालाई क्यो:ने तरवाल सोनो डेङ्नारं डाडे कडाने जेराज़्याव? ङा प्रार्ठना डोने ज़ी:मयालं डिनकाज़ ङापैरिरंयेसानी, होकंके जे ङालाई जेमक्योसङ्ये। 56हैनि पनि अगमबक्ताराई यासास्त्र पुरा ओटाकं वार्डे आव स्यान्टै ओटाव ची।” होकाम स्यान्टै उसिसरं येसुलाई रा:डे याढोङो।#जकरिया १३:७
घ्योव कचरिलं येसु
मर्कुस 14:53-65; लुका 22:54-55; युहन्ना 18:13-14
57येसुलाई क्यो:नेराई येसुलाई कैयाफा याडोज़्याव मुख्या सेवा डोने मी लेवकं यालाङो। होलं न्याम पैनेरं सोनो बुडा-पुरानो मीरं डुप्सिव लेवरं। 58होकाम पत्रुस टाडाङामज़ येसुलो उझिन-उझिन मुख्या सेवा डोने मीलो ओठारा समं ओनाव, होकाम छिन्डे कैटाने वार्डे पालेरासंज़ उचुङो। 59होकाम मुख्या सेवा डोने मीरं सोनो यहुडीरं याडुप्सिने ज़ी:मला स्यान्टैराईज़ येसुलाई सै:ने वार्डे उबिरोडलं झुठा गोहाई याखिमो। 60झुठा गोहाई याने मीरं भ्या याराव, होकाम नोराई कडि प्रमानज़ माडैरंये। आखिरलं नेबऱ्याङनि ङा:ङ नेराव। 61होकाम होनि हैनेवारो, “आव मीये ‘ङा परमेस्वरलो प्रार्ठना डोने उज़ी:मलाई टै:डे सोङलाका फरि होलाई तयार ङाझैडु’ ओवारो।” 62होकाम मुख्या सेवा डोने मीये च्याङसिडे येसुलाई ओपजोयो, “होकाम नङ कडि जबाफज़ नमयोरं? आव मीराई नबिरोडलं यायोव गोहाई कडि?” 63हैनि पनि येसु कडिज़ मापाङये। मुख्या सेवा डोने मीये येसुलाई हैओडोव, “ज्युङडा परमेस्वरलो उकिऱ्या झाडे हैङाडानज़्या, गेलाई हैगडासिके होकाम नङ परमेस्वरलो ओज़ा ख्रीस्ट रो?” 64येसुये नोलाई हैओडोव, “नङज़ हैनवार्ज़्या। हैनि पनि ङा जेलाई हैङाडाच्यो, आबोकाम जे मानवालो ओज़ालाई स्यान्टैराई भन्डा ओसक्ति लेवलो वो:र्डेङा उकुइ लेवडे चुङसिडे उलिज़्याव सोनो नम्टा बाडंलटं ओराज़्याव र:ङनेजेले।” 65मुख्या सेवा डोने मीये ओक्वा चिडे हैओवारो आवये के परमेस्वरलो उबिरोडलं ची पाङज़्या। गेलाई आबो उरु कडि साची ओचाहिव ड? आवये परमेस्वरलो उबिरोडलं ओपाङज़्याव के जेठैखेहो सानि। 66जेसल्ला कडि लिज़्या? होला लेवराई हैयावारो, “आवलाईके सै:ने डन्ड यानेकाज़ लिज़्या।” 67होकाम नोराई येसुलाई ओङा:टं ट्युलड्याडे, घुस्सा-घुस्साये यापो:व, होकाम कोइ-कोइराई ऐ वार्डे लपंटाये यापो:व, 68“ए ख्रीस्ट डे अगमबानी गपाङ्ङनके! नङलाई पो:ने काङ्का?”
पत्रुसये येसुलाई ङाम्सरे ओवारो
मर्कुस 14:66-72; लुका 22:56-62; युहन्ना 18:15-18,25-27
69पत्रुस पाखाकं ठारालं च्याङसिडे उलिज़्याव बेलाकं टोबो नौकर्नीये पत्रुस लेवकं राडे हैओवारो, “नङ पनि गालीलला लेने येसुसं नलेव मा?” 70होकाम पत्रुसये होला लेव स्यानटैराई याङा:कंज़ हैओवारो, “आव नङ कै नवारज़्याव ङा ङाम्सन।” 71पत्रुस पाखाकं झला येमकं उपुलुकं छुटं मेमाये नोलाई ओरो:ङो होकाम होला मीरंलाई हैओडोवरं, “आव मी पनि नासरतला येसुसं लेवसा।” 72पत्रुसये फरि किऱ्या झाडे हैओवारो, “ङा नो मीलाई ङाम्सरे।” 73टढेस्का होला लेव मीरं पनि पत्रुसलो ओछ्योकं राडे हैयाडोव, “डस्साज़ नङ पनि नोरंलाम टोबो माङ्क डोरो? कडालेकं नपाङ हैटावज़ लिज़्या।” 74होकाम पत्रुसये ओलज़ सरापिसिडे किऱ्या ओझाव, “ङा नो मीलाई स:रेवज़ ङाम्सरे।” होकाम होपानाज़ भाले ओकोव। 75होकाम पत्रुसलाई येसुये हैओडोव रो: ओचेटोयो, “भाले कोँने भन्डा ङा:डे नङ ङालाई सोङ्खेप ङाम्सरेसंन वार्ने नले।” होकाम पत्रुस पाखाङ पुलुडे ढर-ढर ओघोरो।
Iliyochaguliwa sasa
मत्ती 26: NTWMK25
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
The New Testament Books in Wale Magar Kham Language © The Word for the World International and Wale Magar Kham Translation Project, Nepal, 2025
