मत्ती 16
16
फरिसीराई सोनो सडुकीराई चिन्न यानि:व
मर्कुस ८:११-१३; लुका १२:४५-४६
1फरिसी सोनो सडुकीरं याराव, होकाम येसुलाई जान्चिनेलो लागिटं स्वर्गटाम टोबो चिन्न सटन्ने वार्डे येसुलाई हैयाडोव। 2होकाम येसुये हैओडोवरं, “रि:मडे ओटाव पान्त्रा जे हैजेवार्ये, ‘पराटि चाव टानेले कडालेकं नम घ्यामो लिज़्या।’ 3छकाल्ने हैजेवार्ये, ‘नम घ्यामो बाडलये कप्सिव लिज़्या, आछिम घुइका राने ची ओलेव।’ जे नम र:ङडे डिन खैटाव टा वार्डे जेबेक्टैडुये, होकाम समयला चिन्नलो ओमाने कडा जेम्खुलिडु? 4आव जुगुला माचाव सोनो ब्यभिचारी पुस्ताये चिन्न खिमोये, हैनि पनि नोलाई योनालो उचिन्नकाम छुटं चिन्न मायासि।” होकाम होरंलाई रा:डे येसु ओनाव।
फरिसीरं सोनो सडुकीराई याखमिर
मर्कुस ८:१४-२१
5उसिसरं डह होपंटं याकेकं होराई बरे रैने यामे:व ची ओलेव। 6येसुये उसिसरंलाई हैओडोवरं, “होस्यार लेच्यो, फरिसीरं सोनो सडुकीराई याखमिरटाम जोगैसिडे लेच्यो।” 7उसिसरं याबाठङ यायाज़ यापाङो, “गे बरे गेमरैये, हैजैडे येसुये हैओडासिज़्याव टाके।” 8येसुये उसिसरं यापाङो ठैडे हैओडोवरं, “ए जिबिस्वास ठोको लेवरं! जेसं बरे माले वार्डे कडाने जेपाङज़्याव? 9जे अजं पनि जेम्बुझिये? पाँस हजार मीराई यालागिटं पाँस गोटा बरेलो रो: जे जेम्चेटैये? जे खाडंङ फुङ्गा जिडुपो? 10होकाम चार हजाररंलाई सात गोटा बरेटाम कैजैडे ङासंयावरं, होकाम खाफुङ्गा जिडुपो? 11ङा जेलाई हैङाडाच्योव बरेलो ओबारेलं माङ्क वार्डे कडा जेम्बुझि? फरिसी सोनो सडुकीराई याखमिरटाम जोगैसिच्यो।” 12होकाम होराई याबुझिव, येसुये बरेलं झाने खमिर टाम माङ्क बुरु फरिसीरं सोनो सडुकीराई यापैज़्याव रो:टाम जोगैसिच्यो वार्डे हैओवार्ज़्याव वार्डे।
पत्रुसये हैओवारो येसुज़ मसिह ची
मर्कुस ८:२७-३०; लुका ९:१८-२१
13येसु कैसरिया फिलिप्पीलो ओछेत्रलं ओराव पाना, येसुये उसिसरंलाई ओपजोयोरं, “मीराई मानवालो ओज़ालाई काङ्का हैडोज़्यारं?” 14उसिसराई हैयाडोव, “कोइराई बप्तिस्मा झैने युहन्ना, कोइये एलिया, कोइये यर्मिया अगमबक्तारंलाम टोबो हैवाररं।” 15येसुये उसिसरंलाई ओपंजोयोरं, “जे कै जेवार खेने, ङा काङ्का?” 16सिमोन पत्रुसये हैओडोव, “नङ ख्रीस्टज़, ज्युङडा परमेस्वरलो ओज़ा।” 17येसुये पत्रुसलाई हैओडोव, “योनालो ओज़ा सिमोन, नङके भाग्यमानि ची। कडावार्क नङलाई यास्या सोनो याझी लेव मीराई यापैसोनो माङ्कची, स्वर्गटा लिज़्याव परमेस्वर बाबुये नङलाई हैओडानो ची। 18ङा नङलाई हैङाडान, नङ पत्रुस ची। ङामन्डली आव पहरटं सच्यान्ने ङाले, होकाम कालये पनि नङलाई हारैने माले। 19ङा नङलाई स्वर्ग राज्याला सान्चारं यानेङाले। जो जे प्रिठीबीलं किनेजेले, हो स्वर्गटं किसिनेले, जो जे सङसारलं जेपंला, हो स्वर्गटं पलासिनेले।” 20ङा ख्रीस्ट वार्डे काङ्कालाईज़ हैटाडाच्यो वार्डे येसुये उसिसरंलाई हैओडोवरं।
येसुये उसिने सोनो डुखं ओडैने बारेलं भबिस्यबानी
मर्कुस ८:३१; ९:१; लुका ९:२२-२७
21येसु कैजैडे यरुसलेमलं नाव परिये, होकाम अगंवारं सोनो मुख्या सेवा डोने मीरं सोनो न्याम पैनेराई भ्या डुखं यानेलेरं, सै:नेलेरं होकाम सोङलाका ज्युङडा टाडे सोनेले वार्डे येसुये हो बेलाकामज़ उसिसरंलाई हैओडोवरं। 22पत्रुसये येसुलाई टङकं लाङडे ओहप्कोयो, “परमेस्वरये ऐटाव टाझोयोकं, प्रभु नङलाई नेटाव खर्कज़ टाने माले।” 23होकाम येसुये वोल्डे पत्रुसलाई हैओडोव, “ए सैतान, ङाङा:काम होडे नान, नङ ङालाई ये:न डोने नवोङरिसङज़्यावची। कडालेकं नङ परमेस्वरलो ओरो:टं माङ्क, मीराई यारो:टं नयुङ ले।” 24होकाम येसुये उसिसरंलाई हैओडोवरं, “कोइ मीरं ङाछिन्ट राने यायुङ यालेखे भने, उज्युलो ख्याल माडाडे उक्रुस छेन्डे ङाछिन्ट ओराकं। 25कडालेकं जोये उज्यु जोगैने पानो, होये नो गोमैनेले, जोये उज्यु ङालागिटं गोमोयो होये नो डैनेले। 26स्यान्टै सङसार डैडे उज्यु यागोमोयोखे भने, हो मीलाई कडि फाईडा? मीये उज्युलो ओपोलं कडि योव ढुवडं? 27कडालेकं मानवालो ओज़ा ओबाबु परमेस्वरलो ओमहिमालं स्वर्गटा कटंवालरासं रानेले, होकाम होबेलाकं होये स्यान्टै मीरंलाई याये:न अनसारला याइनाम यानेले। 28डस्साज़, ङा जेलाई हैङाडाच्यो, आका च्याङसिवरंलाम खाडङये मानवालो ओज़ालाई ओराज्यलं ओराज़्याव यामर:ङया समं सिने मालेरं।”
Iliyochaguliwa sasa
मत्ती 16: NTWMK25
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
The New Testament Books in Wale Magar Kham Language © The Word for the World International and Wale Magar Kham Translation Project, Nepal, 2025
