Matewu 9
9
Yesu Unolapa Nlume Wakalobgwa Negulukadzi
(Mako 2.1-12; Luka 5.17-26)
1Wakangina mukepe, akatjulukila seli, akayenda kunzi-nkulu wakanyi kukwe. 2Banhu bakahhisa kuwunli nghwele wakalobgwa negulukadzi, alilele panhobo; Yesu wakati ebona galamoyo kwabo eba eti ku nghwele, “Sima nkololo wangu; watjiyetigwa mazwibhatigwa matjinyo awo.”
3Koga bamwe bakwali mumikumbulo yabo bakati, “Iwhoyu nlume unotuka Ndzimu!”
4Koga Yesu eziba mikumbulo yabo, wakati, “Kungentha yeni mu alakana zwibi mumimoyo yenyu? 5Ndikupi kulelu. Leba uti, ‘Wayetigwa mazwibhatigwa matjinyo awo,’ kene leba uti, ‘Milika uyende’? 6Koga ke ndohaka kuti muzibe kuti Nkololo wenhu una masimba muhango, eyetila mazwibhatigwa matjinyo.” Wakati kunlume wakalobgwa negulukadzi, “Milika, tola nhobo iyo uyende kanyi kuko.”
7Wakamilika akayenda kanyi kukwe. 8Banhu bekubona ikoku, bakahhigwa nekuhla, bakakudza Ndzimu, iye wakapa banhu masimba akajali.
Yesu Unodana Matewu
(Mako 2.13-17; Luka 5.27-32)
9Yesu wakati eyenda ebva ipapo, akabona nlume unoyi Matewu aligele pan'umba inoketisigwa; wakati kuwunli, “Unditobele.”
Wakamilika akawuntobela.
10Yesu wakati atjibagele pathebuli mun'umba, baketisi nebatjinyi banjinji bakahha bewhodla naYesu nebadiyiwa babe. 11BaFarisi bakati bekubona ikoku, bakati kubadiyiwa babe, “Kungentha yeni ndhiyi wenyu edla nebaketisi nebatjinyi?”
12Koga wakati ebawha, akati, “Bapenyu abatohaka nlapi, koga unohakiwa ngebanogwala. 13Yendani munodiyika kuti ikoku kobvani, ‘Ndoyemula mawhilangoni, kusi tjibhayilo.’ Ngobe andizohhila kuti ndiwhodana bakalulama, koga batjinyi.”
Mbhuzo Nekweyila Zodliwa
(Mako 2.18-22; Luka 5.33-39)
14Nayigogo lubaka, badiyiwa baJohane bakahha kuwunli beti, “Kungentha yeni iswi nebaFarisi tiyila zodliwa, koga badiyiwa benyu besingayile zodliwa?”
15Yesu wakati kubali, “Bezi bebukwe bangalila iye nkwaha atjinabo mun'umba yebukwe? Anowhoswika mahhuba, nkwaha paanowhodusiwa mubali, ndipo pabanowhoyila zodliwa.”
16“Akuna nhu unopfumila tjigamba tjitshwa patjiyambalo tjikulukugwi, ngobe tjigamba tjomwawula tjiyambalo, tjiyambalo tjikapaluka tjipindilila. 17Kene wayini ndzwa ayitosiwa mumikabo mikulukugwi; hapa isiwa muyili, mikabo inopatuka; wayini itebuka, mikabo ipwapwatika; koga wayini ndzwa inosiwa mumikabo mitshwa, nayiyeyo zila kose kolondolodzeka.”
Nkololokadzi weNtungamili, neMfumakadzi Wakabhata Jila laYesu
(Mako 5.21-43; Luka 8.40-56)
18Etjalebeleka, kwakaswika ntungamili akapfigama mbeli kukwe eti, “Nkololokadzi wangu utjambotjinyika; koga ke buyani muwumbige maboko, unowhomuka.”
19Yesu wakamilika akawuntobela, nebadiyiwa babe.
20Kwakahha mfumakadzi waka atjiba nemakole aligumi nemabili egwala bugwele gwebhihha malopa, hule kukwe, akabhata mpeto wetjiyambalo tjitje; 21eti mumoyo uwe, “Hapa ndingabhata tjiyambalo tjitje koga, ndowhonaya.”
22Yesu wakatjebuka, ewumbona akati, “Sima, nkololokadzi; galamoyo kuko kwathama ukanaya.” Tjinyolotjo nkadzimayi wakabva anaya.
23Yesu paakaswika kun'umba yentungamili, ebona balidzi benyele, nembunga webanhu uthama hhoba, 24wakati, “Ibvani; ngobe nsikana haazofa koga ulele.” Bakawunseka. 25Kwakati banhu batjibhudila kuhhe, akangina akawumilidza neluboko, nsikana akamuka. 26Kwakalebgwa nekwako muntunhu iwhoyo wose.
Yesu Unolapa Mapofu Mabili
27Yesu wakapindilambeli ebva ipapo, mapofu mabili akawuntobela, emimila eti, “Nkololo waDavida, mutiwhile ngoni.”
28Wakati engina mun'umba, mapofu akahha kuwunli; Yesu akababhuzwa eti, “Mogalamoyo kuti ndotubula kuthama ikoku?”
Bakahandula beti, “Ee, He.”
29Wakabhata meho abo, eti, “Segalamoyo kwenyu, ngakuyetikale kumuli.” 30Meho abo akabva apofunuka. Yesu akabakowhomesedza eti, “Mube nelebeswa kuti akuna nhu unoziba nekwako.”
31Koga bakayenda bakanobudza banhu muntunhu wose iwhoya.
Yesu Unolapa Mbebebe
32Bakati boyenda, kwakahhisiwa kuwunli mbebebe igegwe nemeyambi. 33Meyambi yatakwa, mbebebe yakalebeleka; banhu bakatjenama, beti, “Akuna tjinhu tjakajali tjakatongoboneka mu Isirayeli.”
34Koga Bafarisi bakati, “Unotata meyambi ehingisa he wemeyambi.”
Yesu Unowhila Banhu Ngoni
35Yesu wakayenda mumizi-mikulu yose nemumizi yose, ediya mumasinagogu abo kakale esumikila ndebo mbuya yebumambo, elapa dzose nghwele negwala kose. 36Wakati ebona mabunga ebanhu, akabawhila ngoni, ngobe baka bakadziyidzika basitjina tjabanotubula, semhwizi dzisina nlisi. 37Wakati kubadiyiwa babe, “Gowo linjinji, koga bahingi ndibo bahomanana; 38ndizo tembezelani mukumbile He mweni wegowho kuti atumile bahingi kugowho lile.”
Iliyochaguliwa sasa
Matewu 9: KTP
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
The Word For The World International
