Matewu 5
5
Zwidiyo zwekuDombo
1Yesu ebona mabunga ebanhu, wakatanha padombo, atjigala pasi badiyiwa babe bakahha kuwunli. 2Wakahhula nlomo uwe akabadiya.
Kombolegwa
(Luka 6.20-23)
3Eti, “Bakakombolegwa bahayi mumeya,
ngobe tjabo bumambo gwekudzimu.
4Bakakombolegwa banolila,
ngobe banowhonyaladziwa.
5Bakakombolegwa banamimoyo minyolo,
ngobe banowhogala nhaka yehango.
6Bakakombolegwa banahhala nenyota yendulamo.
Ngobe banowhogutshiwa.
7Bakakombolegwa bana mawhilangoni,
ngobe banowhowamutjila mawhilangoni.
8Bakakombolegwa bana moyo ntjena,
ngobe banowhobona Ndzimu.
9Bakakombolegwa bawanguli.
Ngobe banowhodan'wa beyi bakololo beNdzimu.
10Bakakombolegwa ibabo banodziyidziwa nentha yendulamo,
ngobe tjabo bumambo gwekudzimu.”
11“Makakombolegwa hapa banhu bemutuka, bemudziyidza, beleba kose kwakayipa nekwenyu, benyepa, nentha yangu. 12Hanhani mupululudze, ngobe mbhayilo wenyu unkulunkulu kudzimu, ngobe nayeyi zila banhu bakadziyidza balebesambeli bakahha kumutangila.”
Mumunyu Netjedza
(Mako 9.50; Luka 14.34,35)
13“Mumunyu wehango; koga hapa munyu usingatjawhakale bumunyu, bumunyu gwawo gungamusidzigwa tjini wali? Awutjina n'hingo, wenolahigwa kuhhe koga ukatshambiwa zwawo nebanhu.”
14“Mutjedza tjehango. Nzi-nkulu wakabakiwa pehhugwi kwedombo awutosumbikika. 15Kakale awungabesedzele tjivoneko, ukotjifumika netundu, koga notjibiga pehhugwi patjena; kudze tjivonekele bose bamun'umba. 16Netjedza tjenyu ngatjipenye kubanhu, kuyetila kuti babone mihingo yenyu yakanaka kakale bape Tate benyu bakudzimu gudzo.”
Diya nekweNlayo
17“Musikumbule kuti ndakahhila whokolomola nlayo kene balebesambeli; andizohhila whopaladza, koga kuti ndiwhokuhhadzisa. 18Ngobe lebeswa, ndoti kumuli, kuswikila kudzimu nehango kupinda, akuna kene don'we kene bala dukununu lakakwagwa muNlayo linowhodzima, kudzina kose kuhingikala. 19Yani nayani unowhonyebesa umwe wayeyi milayo mitukununu, kakale ewhodiya banhu kujalo, unowhoba ntukunu mubumambo gwekudzimu; koga yani nayani unowhoyitobela kakale eyidiya, unowhoba nkulu mubumambo gwekudzimu. 20Ndoti kumuli, kuhhe kwekuti lulama kwenyu kupinda lulama kwebakwali nebaFarisi, amutowhongina mubumambo gwekudzimu.”
Diya Nekwebuhongola
21“Makawha kuti kubanhu bantolo kwakayi, ‘Usibulaye; kene yani unobulaya unowhotongewa.’ 22Koga ndoti kumuli wose nhu wagwadziligwa gamu lile unowhotongewa; unotuka gamu lile unowhoyendisiwa kulubahhe; unowhoti kugamu lile, ‘Tjilengwe,’ unowhoposegwa mumoto wegehena. 23Hapa kuli kuti nohhisa tjipo patjibeso, ukotjikumbula kuti kuna gamu lilo lisingawililane nawe, 24siya tjipo tjitjo ntome kwetjibeso, uyende unolebelesana negamu lilo kutanga, ukotjihanduka uwhopa tjipo tjitjo.”
25“Tjimbidza upedze sawililana newunokutilika nlandu, mutjimuzila muyenda kulubahhe, ngobe wakusungisa akakuyendisa kuntongi, ntongi angakuyendisa kugombgwa, ukaposegwa mujele. 26Lebeswa ndoti kukuli, awutowhobhuda udza ulipa peni yebupelo.”
Diya nekweBupombgwe
27“Matjiwha kuti kwakayi, ‘Usite bupombgwe.’ 28Koga ndoti kumuli wose nhu unolinga mfumakadzi ewuntjiba wata bupombgwe kale naye mumoyo uwe. 29Ndizo hapa hhiho lilo leludli likuta kuti utjinye, ulikopole, ulilahe. Kuhine kuti ulahikigwe nendungululo yembili in'ompela pana kuti mbili wose uposegwe mugehena. 30Hapa luboko gugo gweludli gukuthama kuti utjinye, uguthubule, ugulahe. Kuhine kuti ulahikigwe nendungululo yembili in'ompela pana kuti mbili wose uposegwe mugehena.”
Diya Nekwelambana
(Matewu 19.9; Mako 10.11,12; Luka 16.18)
31“Kwakalebgwa kakale kuti, ‘Kene yani unolambana nenkadzi uwe, ngawumpe lukwalo gwelambana.’ 32Koga ndoti kumuli, wose unolambana nenkadzi uwe, kuhhe kwekuti ata bupombgwe, unowunta mhombgwe; kakale kene yani unotola nkadzi wakatatiwa unota bupombgwe.”
Diya Nekwetuna
33“Kakale makawha kuti kwakayi kubanhu bantolo, ‘Usikon'we hhadzisa tuna kuko, koga uhhadzise kuna He kose tuna kuko.’ 34Koga ndoti kumuli, musitongogala matuna, musitune nekudzimu, ngobe itjigalo tjeNdzimu, 35kene nehango, ngobe ndepanonyalulukila makumbo awe, kene neJerusalema, ngobe unzi-nkulu waMambo nkulu. 36Kakale usitune nen'holo uwo, ngobe awungake ukata vudzi likaba jena kene likaba dema. 37Tjawunoleba ngatjibe ‘Ee’ hapa ubva ‘Ee’ kene tjibe ‘Aa’ hapa ubva ‘Aa’; kumwe kunopinda ikoku ndekunobva mububi.”
Diya Nekwebgwilizila
(Luka 6.29,30)
38“Makawha kuti kwakayi, ‘Hhiho ngalilipiwe ngehhiho, hhino ngehhino.’ 39Koga ndoti kumuli, musinyanyayidzane nenhu mbi. Koga unokuloba paluhaya gweludli uwumpe kakale luhaya gwelumehwe. 40Kakale hapa umwe nhu ekutilika nlandu ekulipisa ekutolela tjiyambalo, uwunletje atole nebhatji lilo. 41Hapa umwe nhu ekubhata nemasimba kuti uwumpeleke gwendo gwakalizana khilomitha, yenda naye makhilomitha mabili. 42Ipa kene yani unokumbila kukuli, kakale usiwunlambile unohaka adzima kukuli, uwumpe.”
Da Zwita
(Luka 6.27,28,32-36)
43“Makawha kuti kwakayi, ‘Ida mbakidzani uwo, uheme tjita tjitjo.’ 44Koga ndoti kumuli, idani zwita zwenyu, kakale mutembezelele banomudziyidza, 45kuyetila kuti mube bakololo baTate benyu bakudzimu. Ngobe banothama hhuba likabhuda kubanhu banota zwibi nekubanhu babuya, kakale banonisila vula bakalulama nebasakalulama. 46Ngobe hapa muda ibabo banomuda, ndiwupi mbhayilo wamunowhowana? Baketisi abatokuthama bo ikoku? 47Kakale hapa mulezwa makamu enyu koga, ini tjamunothama kupinda bamwe? Bataya abatothama bo bejalo? 48Ndizo ke pelelani, saTate benyu bakudzimu bakapelela.”
Iliyochaguliwa sasa
Matewu 5: KTP
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
The Word For The World International
