Matewu 27
27
Yesu Unoyendesewa kuna Pilatu
(Mako 15.1; Luka 23.1,2; Johane 18.28-32)
1Mangwanana ngwanana, bose baphirisiti bakulu nebawhola, bakalangana kuti Yesu abulawe. 2Bakawunsunga bakayenda naye kuna Pilatu, mbhati wentunhu.
Zwisungilila kwaJudasi
(Mihingo 1.18,19)
3Judasi, ntengesi, paakaziba kuti Yesu wawanikwa nlandu, wakazwisola, akabgwiliza makumi matatu ezwipivu zwesiliva kubaphirisiti bakulu nebawhola, 4eti, “Ndatjinya netengesa lopa lisina nlandu.”
Ibo bakawun'handula beti, “Tineni nako iswi? Ndekuko whoko.”
5Judasi wakalahila pasi zwipivu zwesiliva muthempeli, akabva ipapo, akayenda akanozwisungilila.
6Koga baphirisiti bakulu bakatola zwipivu zwesiliva, bakati “Akuta munlayo kuti mari iyeyi tiyibige mukwama tjemari ngobe imari yelopa.” 7Ndizo bakalangana, bakatenga minda yembumbi wehali, kuti kube ipo pabanobiganyila bahhi. 8Ndizo nanasi minda iyeyo inodan'wa kuyi Minda yeLopa.
9Ipapo kwakahhadzisika tjakalebgwa nenlebesambeli Jeremiya, eti, “Bakatola zwipivu zwili makumi matatu zwesiliva, unoba uli ntengo uwe wakawalebgwa nebamwe bakololo ba Isirayeli, 10bakatenga nawo minda yembumbi wehali, sekwandakalayiwa naHe.”
Pilatu Unobhuzwanya Yesu
(Mako 15.2-5; Luka 23.3-5; Johane 18.33-38)
11Yesu wakama mbeli kwembhati wentunhu; mbhati wentunhu akawumbhuzwa eti, “Ndiwe Mambo wemaJuta?”
Yesu wakahandula eti, “Wajalo.” 12Koga paakatilikiwa nlandu nebaphirisiti bakulu nebawhola akuna tjaakahandula.
13Pilatu wakati kuwunli, “Kati awutowha kuti minjinji tjini milandu yabanokutilika?”
14Koga iye azotongohandula, kene iwo nlandu un'ompela; kwakayeta kuti mbhati wentunhu atjename kwazo.
Yesu Unotongegwa Bulawa
(Mako 15.6-15; Luka 23.13-25; Johane 18.39-19.16)
15Panzano mbhati wentunhu waka ana nlenje wesunungula nsungwa un'ompela waka ekumbigwa nebanhu. 16Mulubaka igogo kwaka kuna nsungwa waka eli tjihwarahwara kwazo, waka eyi Bharabhasi#27.16 Bharabhasi dzimwe whalo whulukugwi dzoti Yesu Bharabhasi. 17Bakati bakubungana panhu pan'ompela Pilatu akati kubali, “Mohaka kuti ndimusunungulile yani? Bharabhasi#27.17 Bharabhasi dzimwe whalo whulukugwi dzoti Yesu Bharabhasi kene Yesu unodan'wa eyi Khirisitu?” 18Ngobe waka eziba kuti bawunsungisa ngentha yendandala.
19Pilatu wakati etjigele patjigalo tjetonga milandu, mfumakadzi uwe akawuntumila whi, eti, “Kusibe netjimwe tjinhu tjawunothama pehhugwi kwenlume iwhoya wakalulama, ngobe nasi ndadziyidzika kwazo nekukwe muwoloto.”
20Baphirisiti bakulu nebawhola bakatetedza banhu kuti bakumbile sununguligwa Bharabhasi, Yesu abulawe. 21Mbhati wentunhu wakapamha kakale akati kubali, “Pabubili gwabo ndiwupi wamunohaka kuti ndisunungule?”
Bakahandula beti, “Bharabhasi.”
22Pilatu wakababhuzwa eti, “Ngono ndikotjithamani naYesu, iye unodan'wa eyi Khirisitu?”
Bose bakati, “Ngaakowhomegwe.”
23Iye wakati, “Nentha yeni, wayetani tjakayipa?”
Koga bakamimilila pehhugwi beti, “Ngaakowhomegwe.”
24Pilatu paakabona kuti akuna tjakunobhatsha, kakale kwemuka hhoba wakatola vula akangula maboko mbeli kwebunga lebanhu eti, “Imi andina nlandu nekwelopa lenlume iwhoyu; mukuthame imwi.”
25Banhu bose bakahandula, beti, “Lopa lile ngalibe pehhugwi kwedu nebana bedu!”
26Wakabasunungulila Bharabhasi, kukati atjiwunloba Yesu, akabaswiswa iye kuti banowukowhomela.
Bagwi Bengwa Banokuwelela Yesu.
(Mako 15.16-20; Johane 19.2,3)
27Bagwi bengwa bembhati wentunhu bakakotjitola Yesu, bakangina naye mun'umba yembhati wentunhu, bakakubunganya bagwi bose mbeli kukwe. 28Bakawumbula zwiyambalo zwizwe bakawumbadza ngubo yembala welubende. 29Bakaluka tjiyala tjemimhiwa bakawumbadza mun'holo, bakawumbhatisa luhanga muluboko gugwe gweludli. Bakatanga pfigama mbeli kukwe bewunseka beti, “Ngaakudziwe, Mambo wemaJuta.” 30Bakawumpfila mate, bakawuntolela luhanga bakawunloba nago mun'holo. 31Bakati bapedza wunkuwelela, bakawumbula ngubo bakawumbadza zwiyambalo zwizwe bakawuntola bakayenda naye kuti banowunkowhomela.
Yesu Unokowhomegwa paTjileyanyo
(Mako 15.21-32; Luka 23.26-43; Johane 19.17-27)
32Bakati bebhuda bakahangana nenlume wekuKhureni, zina lile eyi Simoni; nlume iwhoyu bakawumbhata nemasimba kuti awunsengele tjileyanyo tjitje. 33Bakati baswika pabugalo gunoyi Goligotha (kunobva kuti bugalo gwepepe tjen'holo), 34bakawumpa wayini yakahanganyiwa nendulu kuti an'we; koga wakati ayilabila akalamba yin'wa. 35Bakati batjiwunkowhomela patjileyanyo, bakakobana zwiyambalo zwizwe ngekandila malipa; 36bakagala ipapo bakawunlinda. 37Pehhugwi kwen'holo uwe bakakwala nlandu uwe, kwakakwagwa kuti, “Iwhoyu ndiYesu, Mambo wemaJuta.” 38Bakakowhomela mbava mbili ntome kukwe, imwe kuludli gugwe imwe kulumehwe gugwe.
39Banhu baka bepinda ipapo baka bedzungudza miholo bewuntuka, 40beti, “Iwe unokolomola thempeli ukolibaka mumahhuba matatu, uzwitjidze! Hapa uli Nkololo weNdzimu, jita patjileyanyo.”
41Nebaphirisiti bakulu, bena bakwali nebawhola, baka bewunseka, beti, 42“Wakatjidza bamwe koga iye atotubula zwitjidza. NdiMambo weIsirayeli, ngaatjijita patjileyanyo, ndiko kwatinowhogalamoyo muwunli. 43Unogalabgwe kuNdzimu; Ndzimu ngaawuwangulile ke ngwenuwali, hapa ewundha; ngobe waka eti, ‘NdiNkololo weNdzimu.’ ”
44Nembava bo dzakakowhomegwa naye dzakawugongobola bo nezila iyo zwayo.
Lufu gwaYesu
(Mako 15.33-41; Luka 23.44-49; Johane 19.28-30)
45Ne awa yebutanhatu kubvisila bhuda kwehhuba kwakaba nehhalima hango yose kukadza kukanoswika awa yebuhhanalume kubvisila bhuda kwehhuba. 46Ne awa yebuhhanalume kubvisila bhuda kwehhuba, Yesu wakadanilila newhi lipehhugwi, eti, “Eloyi, Eloyi lama sabakathani?” kunobva kuti, “Ndzimu wangu, Ndzimu wangu, mandisiyilani?”
47Bamwe banhu baka balimile ipapo bakati bekuwha ikoku bakati, “Nlume iwhoyu unodana Elija.” 48Umwe wabo wakalabuka akatola lungudze, akagubvubika muwayini inohababa, akagubhayila paluhanga, akawunswiswa kuti an'we.
49Koga bamwe bakati, “Tongoma, letja tibone kuti Elija unowhobuya kene ewhowuntjidza.”
50Yesu wakalila kakale newhi lipehhugwi akafema kwebupelo, meya iye ikabhuda.
51Jila letjisitilo tjethempeli lakapaluka likaba kabili, kutangisila pehhugwi kudza kunoti pasi. Hango yakazunguzika, hongwe dzikapatuka pakati, 52zwikumbu zwakahhulika, nemibili yebayengemali bakabafa yakamusiwa bakaba bapenyu. 53Bakabhuda muzwikumbu, hule kwemuka kukwe, bakangina munzi-nkulu wakayengemala bakabon'wa nebanji.
54Nlawuli webagwi bengwa bali gulu nebaaka anabo, bakalinda Yesu, bakati bebona tengenyeka kwehango, nekose kwakayetikala, bakahla kwazo, bakati, “Lebeswa iwhoyu wayeli Nkololo weNdzimu!”
55Kwaka kuna bafumakadzi banjinji ipapo, bakalingilila bali tjakulenyana, baka batebela Yesu kubva kuGalile, bewumbhatsha muzwimwe zwinhu. 56Pakati kwabo kwaka kuna Mariya wekuMagadala, naMariya mayi baJakobe naJosefa, namayi bebakololo baZebhedi.
Biganyiwa kwaYesu
(Mako 15.42-47; Luka 23.50-56; Johane 19.38-42)
57Kwakati kwatjitewuka, kukaswika nlume waka akafuma weku Arimathiya, zina lile eyi Josefa, waka ali ndhiyiwa waYesu bo. 58Nlume iwhoyu wakayenda kuna Pilatu akanokumbila mbili waYesu. Pilatu wakalaya kuti awumpiwe. 59Josefa wakatola mbili, akawumpombela nejila lelineni buyanana, 60akawumbiganya mukumbu tjitje tjitshwa, tjaaka atsha muhongwe; wakakunguludzila hongwe whuluwhulu pankoba wekumbu, akamilika akayenda. 61Mariya wekuMagadala newumwe Mariya bakabelipo bo, beligele bakalingisana nekumbu.
Balindi Bakalinda Kumbu
62Hhuba linotobela, kuleba kuti, kwapinda hhuba leBaakanyila, baphirisiti bakulu nebaFarisi bakakubungana kuna Pilatu, 63bakati, “He, titjakumbula kuti ntjebeli iwhoya wakatini, atjimpenyu, wakati, ‘Hule kwemahhuba matatu ndowhomuka kakale.’ 64Ndizo ke layani kuti kumbu tjitje tjilindiwe zwakasima kudza kunoti hhuba lebutatu, kuyetila kuti badiyiwa babe basihhe bewhowunkwiba, bekobudza banhu, beti ‘Wamuka kubafi,’ ngobe butjebeli gwekupedzisila gowhoyipa kupinda gwekutanga.”
65Pilatu wakati kubali, “Tolani bagwi bengwa banolinda, muyende munotjilinda sekwamungatubula.”
66Ndizo bakayenda bakanodzibilila kumbu ngebuwila hongwe yakatjihhalila nelonga balindi kuti batjilinde.
Iliyochaguliwa sasa
Matewu 27: KTP
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
The Word For The World International
