Matewu 23
23
Yesu Unoleba NekwebaFarisi Nebakwali
(Mako 12.38,39; Luka 11.43,46; 20.45,46)
1Yesu wakakotjiti kubadiyiwa babe nekumabunga, 2“Bakwali nebaFarisi banogala patjigalo tjaMozisi; 3ndizo yetani kakale mulondolodze kene ini tjabanomubudza, koga kusi tjabanoyeta; ngobe abatoyeta tjabanosumikila. 4Banosunga mitolo inolema, isingasengeke, beyikhiga pamapfudzi ebanhu; ibo tjekwabo besingade yimilidza kene nelunyala gwabo. 5Banoyeta zwiyeto zwabo zose kuti babon'we nebanhu; banothama mamwandabula anokwagwa mavesi abanombala pamhahha nepaluboko, akaba mapabipabi, nezwitjakala zwezwiyambalo zwikaba zwilefulefu. 6Banoda bugalo gwebanhu banagudzo panobe pedliwa kakale banoda piwa zwigalo zwakanaka mumasinagogu. 7Banohanhila lezwewa nezila inolemekedza munhanga dzetengesela, kakale banoda dan'wa beyi ndhiyi. 8Koga imwi musidan'we muyi ndhiyi, ngobe ndhiyi wenyu un'ompela, imwi mumakamu mose. 9Musidane nhu muti tate muhango ino, ngobe munaTate ban'ompela, bakudzimu. 10Kakale musidan'we muyi he, ngobe he wenyu un'ompela, ndiKhirisitu. 11Unkulu pakati kwenyu unowhoba n'hingi wenyu. 12Kene yani unozwimilidza unowhotebamisiwa, unozwitebamisa unowhomilidziwa.”
Butjengeli Gwabo
(Mako 12.40; Luka 11.39-42,44,52; 20.47)
13“Koga kwakamubangalalila imwi bakwali nebaFarisi, batjengeli! Ngobe mohhalilila banhu bumambo gwekudzimu; ngobe imwi tjekwenyu amutongina kakale amutobvumila bangangina kuti bangine.” 14#23.14 Dzimwe whalo dzosa matama amuna Mak 12.40 na Luk 20.47Kwakamubangalalila imwi bakwali nebaFarisi, batjengeli! Ngobe motolela njhilikadzi fumwa, moyeta mitembezelo milefulefu muzwitisa. Mowhowan'wa nlandu nkulunkulu.
15“Kwakamubangalalila imwi bakwali nebaFarisi, batjengeli! mokalabula makungwa nehango kuti muhandule un'ompela abe ndhiyiwa welunamato gweTjiJuta, eti hapa ahanduka mukowunthama kuti abe nkololo wegehena kwakapamhiwa kabili kupinda kwamuli iko.”
16“Kwakamubangalalila imwi mapofu ebatungamili, moti, ‘Hapa nhu etuna nethempeli akutoleba tjimwe; koga hapa nhu etuna nezeezi lethempeli, watjisungwa netuna kukwe.’ 17Imwi zwilengwe zwemapofu! Ndikupi kukulu, zeezi kene thempeli lakayengemadza zeezi? 18Moti, ‘Hapa nhu etuna netjibeso tjepisila zwibhayilo akuta tjimwe; koga hapa nhu etuna netjipo tjipatjibeso tjepisila zwibhayilo watjisungwa netuna kukwe.’ 19Imwi mapofu! Ndikupi kukulu, tjipo kene tjibeso tjepisila zwibhayilo tjinoyengemadza tjipo? 20Ndizo unotuna netjibeso tjepisila zwibhayilo, unotuna natjo nayiko kose kupehhugwi kwatjo; 21newunotuna nethempeli, unotuna nalo nawhoyo unogala mulili; 22newunotuna nekudzimu, unotuna netjigalo tjeNdzimu kose nawhoyo unogala patjili.”
23“Kwakamubangalalila imwi bakwali nebaFarisi, batjengeli! ngobe mopa tjegumi tjeminti, nedili nekumini, matjisiya zwinhu zwenlayo zwinatjilemela. Kusumikilisa#23.23 kusumikilisa ndulamo nemawhilangoni nebugalimoyo; kose ikoku moba makakuthama, musingasiye kumwe. 24Imwi mapofu ebatungamili, mowungunula nhuzi kuti musin'we hambgwa, koga mumidza kamela!”
25“Kwakamubangalalila imwi bakwali nebaFarisi, batjengeli! ngobe mosuka kuhhe kwenkombe, nakuhhe kwendilo, koga mukati kuli hhele bubava nepupa. 26Iwe bhofu leMfarisi! suka mukati kwenkombe namukati kwendilo kutanga, kuyetila kuti nakuhhe kutjene bo.”
27“Kwakamubangalalila imwi bakwali nebaFarisi, batjengeli! ngobe makafanana nezwikumbu zwitjenatjena zwakadzulugwa kuhhe nekalaga, kuhhe zolingika zwakanaka kwazo koga mukati zwihhele mafupa ebanhu bakafa nehambgwa yose. 28Ndizo namwi bo kuhhe molingika makalulama kubanhu, koga mukati muhhele butjengeli, nebubi.”
Yesu Unolebesambeli Nekwelobgwa Kwabo
(Luka 11.47-51)
29“Kwakamubangalalila imwi, bakwali nebaFarisi, batjengeli! ngobe mobakila zwikumbu zwebalebesambeli, munakisa zwikumbu zwebakalulama, 30muti, ‘Tiloba takatitjila mumahhuba abobatategulu bedu toba tisakabvumilana nabo mukutebula malopa ebalebesambeli.’ 31Mukujalo mopa busupi, kuti mubakololo bayibabo bakabulaya balebesambeli. 32Tjiyendilani mbeli ke, mupedzise tjakatangisiwa nabobatategulu benyu. 33Imwi nyoka, bana bezwipakupaku, mungadzeta tjini sumikilisiwa kunomuyendesa kugehena? 34Ndizo ke ndomutumila balebesambeli, nebatjenjebvu nebakwali, bamwe babo mowhobabulaya mukabakowhomela patjileyanyo, bamwe mowhobaloba mumasinagogu enyu mukabavima muwumwe newumwe nzi, 35kuyetila kuti malopa ebakalulama bose akatebugwa muhango abe pehhugwi kwenyu, kubvisila kumalopa a Abheli nlume waka asina nlandu kunoswika kumalopa aZakhariya nkololo waBharakhiya, wamakabulayila pakati kwebugalo gwakayengemala netjibeso tjepisila zwibhayilo. 36Ndolebesa, ndoti kumuli, kose ikoku kowhohha pehhugwi kwetjizekugwana itjetji.”
Da Jerusalema KwaYesu
(Luka 1.34,35)
37“Jerusalema, Jerusalema, unobulaya balebesambeli kakale nokhikitidza nemabgwe bawunotumigwa! Kukangana ndihaka kubunganya bana babo sesetje inokuzwa zwikukwana zwayo kusi kwemaphaphiro ayo, koga iwe usingahake! 38Tjilinga, n'umba iyo yatjifupatigwa, yabedongo. 39Ndokubudza, awutjondibona kakale, udza uti, ‘Wakakombolegwa iye unohha muzina laHe.’ ”
Iliyochaguliwa sasa
Matewu 23: KTP
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
The Word For The World International
