Luka 8
8
Bakadzimayi baka beyenda naYesu
1Hule kwayikoku wakayenda kumizi-mikulu nekumizi, esumikila ndebo mbuya yebumambo gweNdzimu. Ibabaya baligumi nebabili bakaba banaye, 2nebamwe bafumakadzi, bakabatjidziwa mumeyambi nenghwele, Mariya, waka eli wekuMagadala, waka adusiwa meyambi dzili kutondeka, 3naJowana mfumakadzi waTjuza, n'hingi waHherodi, naSusana, nebamwe banjinji, bakabe bewun'hingila bewahha nefumwa yabaka banayo.
Tjifananidzo tjeNdzwali
(Matewu 13.1-9; Mako 4.1-9)
4Banhu banjinji bakati bakubungana kuwunli bebva mumizi yakasiyana siyana, akalebeleka nabo netjifananidzo. 5“Ndzwali wakayenda enodzwala mbewu iye, wakati edzwala imwe mbewu ikawila muzila, ikatshambiwa, nenyunyi dzemumhepo dzikabuya dzikayidla. 6Imwe yakawila pana mahalabgwana, payakamela, yakaswaba ngobe yakahaya bunyolo. 7Imwe yakawila mumimhiwa; mimhiwa ikakula nayo ikayizwiya. 8Imwe yakawila mumavu akanaka ikamela ikakombola ikazwala zwidlo zwinjinji, zwakapamhiwa kagulu.” Wakati aleba ikoku wakadanilila eti, “Unazebe dzewha, ngaawhe.”
N'hingo weZwifananidzo
9Badiyiwa bakati bawumbhuzwa kuti tjifananidzo itjetji tjobvani, 10akati kubali, “Imwi makapiwa luzibo gwezwakasumbikika zwebumambo gweNdzimu; koga kubamwe ndoleba nezwifananidzo, kuyetila kuti nekene bebona basibone, nekene bewha basiwhisise.”
Yesu Unotjenesa Tjifananidzo tjeNdzwali
(Matewu 13.18-23; Mako 4.13-20)
11“Tjifananidzo tjoleba whoku. Mbewu idama leNdzimu, 12Yakawila muzila ndi ibabaya bakawha dama; Satane ekotjibuya ehha edusa dama mumimoyo yabo, kuti basitongo galamoyo bakatjidziwa. 13Yakawila pana mahalabgwana ndi ibabaya banoti bawha dama bakaliwamutjila nekuhanha; koga abana midzi, bano galamoyo kwelubakanyana, mulubaka gwelikwa banowa. 14Yakawila mumimhiwa, ndi ibabaya banowha dama, koga bekoti pakuyenda kwabo bekosilingiwa neda zwinhu, nefumwa, nezipa kwebutjilo, bekosaba nemitjelo yakakombola. 15Koga yakawila mumavu akanaka ndi ibabaya banoti bawha dama bakalilondolodza mumoyo wakanaka unalebeswa, bekotjiba nemitjelo ina moyonlefu.”
Tjedza kusi kwetjidla
(Matewu 13.10-17; Mako 4.10-12)
16“Akuna nhu unobesedzela tjivoneko ekotjifumika netundu. Kene ekosa tjivoneko kusi kwembheta, koga unotjisa patjigadziko patjena eyetila kuti unongina mun'umba angine kuna tjedza.
17“Akuna tjakasumbikala tjisingawhoba patjena, kene tjakasumbikala tjisingowhozibgwa tjikaba patjedza.
18“Mutjenjelele kuti mowha tjini; ngobe unako unowhopiwa kunjinji, koga usina unowhotolegwa nayikoko kwaanokumbula kuti unako.”
Mayi baYesu nebanun'una babe
(Matewu 12.46-50; Mako 3.31-35)
19Kwakakobuya meyabe nebanun'una babe, koga bakakon'wa swika kuwunli ngentha yebunji gwebanhu. 20Wakabudziwa kuyi, “Meyabo nebanun'una babo bakuhhe banohaka kubona.”
21Koga wakahandula eti, “Mme bangu nebanun'una bangu ndi ibaba banowha dama leNdzimu bekolithama.”
Yesu Unodzikamisa Dutu
(Matewu 8.23-27; Mako 4.35-41)
22Limwe hhuba wakangina mukepe nebadiyiwa babe akati kubali, “Ayitjulukileni seli yeya yegungwa.” Bakatangisa yendesa kepe, 23batjimugwendo iye wakabhakhwa newhope akayezela, kukabuya dutu mukati kwegungwa, kepe tjakatjehhala vula, beba mumboli. 24Bakayenda bakanowumusa, bedanilila beti, “He, He, tapalala!”
Ipapo wakamuka akatjemela mhepo, nemiduka kwevula. Kose kwakama kukabe nekunyalala. 25Akakoti kubali, “Galamoyo kwenyu kuponi?”
Ibo behla bakatjenama bakati umwe kuwumwe, “Ndiyani ngono iwhoyu, unotjemela mhepo kene gungwa kukawuwhilila?”
Yesu Unotjidza Nhu Unameyambi
(Matewu 8.28-34; Mako 5.1-20)
26Bakaswika kuhango yebaGerasini, yaka ili seli kweGalile. 27Ebhuda etshamba pasi, wakahanganidziwa nenlume waka ebva munzi-nkulu waka aligegwe nemeyambi; kwatjiba lubaka asingambale zwiyambalo, kakale asingagale mun'umba koga egala mumakuwhu aka ali zwikumbu. 28Paakabona Yesu wakamimila akawila pasi mbeli kukwe, newhi lipehhugwi eti, “Muneni nami, imwi Yesu, Nkololo weNdzimu Upehhugwihhugwi? Ndomukumbila musindidziyidze.” 29Ngobe waka alaya meyambi kuti ibhude munlume iwhoyo. (Ngobe lubaka gunjinji yaka iwundziyidza; baka begala bakawunsunga nemiketane nemitjili koga ethubula kose kwakawunsunga, kakale meyambi yaka iwuntakulila kutjilambanyika.) 30Yesu wakawumbhuzwa eti, “Zina lilo loyi yani?”
Iye wakati, “Ligiyoni,” nentha yekuti meyambi njinji dzakadzangina muwunli. 31Dzakawunkumbila kuti asidzitatile kugomba lisina bupelo.
32Kwaka kuna ngubi yengulube dzaka dzifula muwhunde yedombo; dzikawunkumbilisisa kuti adziletjedze dzingine zwadzo mungulube, ndizo akadzibvumila. 33Meyambi dzakakotjibhuda munlume iwhoyo dzikanongina mungulube, ngulube dzakavondomoka dzikatihha dzijitila nepakakungulukila dzikanowila mugungwa dzikafa.
34Balisi bakati bebona tjayetika bakatihha bakanoleba munzi-nkulu nemuhangwanyana yose. 35Banhu bakayenda kuti banobona tjakatjayetika, bakaswika kuna Yesu, bakawana nlume waka adusiwa meyambi aligele mbeli kwaYesu, akambala nenkumbulo uwe wakatambunuka; bakahla. 36Bakabakubona bakababudza kuti nlume waka aligegwe nemeyambi watjidziwa tjini. 37Ipapo bose banhu bentunhu webaGerasini bakawunkumbila kuti abve pabali; ngobe bakabhakhwa nehla kukulu; ndizo wakangina mukepe akabgwilila hule. 38Nlume waka adusiwa meyambi, wakawunkumbila kuti ayende bo naye.
Koga Yesu wakawundzibisa, eti, 39“Bgwilila kanyi kuko unobalakidza bukulu gwezwinhu zwawayetigwa neNdzimu.”
Wakayenda, eleba munzi-nkulu wose bukulu gwezwinhu zwaayekatigwa naYesu.
Nkololokadzi waJayirosi neMfumakadzi Wakabhata Jila laYesu
40Kwakayetika kuti Yesu ahanduka, banhu bakawuwamutjila nehana kukulu ngobe bose baka bakawumilila. 41Kwakabuya nlume waka eyi Jayirosi waka ali ntungamili wesinagogu; akawila pamakumbo aYesu akawunkumbilisisa kuti ayende naye kun'umba iye, 42waka ana nkololokadzi un'ompela, unamakole angaba gumi nemabili, waka egwalilofa.
Wakati oyenda banhu bakawunsundanyidza. 43Kukati nkadzimayi waka anabugwele gwebhihha malopa kwemakole ali gumi nemabili, kusina nlapi unotubula wunlapa, 44akabuya hule kukwe, akabhata mpeto wetjiyambalo tjitje; tjinyolotjo bhuda malopa kukama. 45Yesu wakati, “Ndiyani wandibhata?”
Banhu bose bakalandula, Phethiro nebamwe bakabelipo bakati, “He, mbunga unomuzwiya umusundanyidza imwi mukoti ndiyani wandibhata!”
46Yesu wakati, “Kunanhu wandibhata ngobe ndawha kuti masimba abhuda mundili.” 47Nkadzimayi ebona kuti haangazwisumbike, wakasedzela etetema, akawila mbeli kukwe akaleba mbeli kukwe nebanhu bose kuti wawumbhatilani, kakale kuti tjinyolotjo wabva apola. 48Yesu wakati kuwunli, “Nkololokadzi, galamoyo kuko kwathama ukanaya; yenda nekunyalala.”
49Etjalebeleka kwakaswika umwe nlume ebva kun'umba yentungamili wesinagogu, akati, “Nkololokadzi wenyu watjinyika; musitjadziyidze Ndhiyi.”
50Koga Yesu wakati akuwha akawun'handula eti, “Usihle; galamoyo koga, iye unowhonaya.”
51Wakati aswika kun'umba akadzibisa nhu wose ngina mun'umba, kuhhe kwaPhethiro naJakobe naJohane, natatayi namayi bemwana. 52Banhu bose baka bekuwa belilila mwana; koga wakati, “Musilile; haazofa koga ulele.”
53Koga bakawunseka bulengwe beziba kuti wafa. 54Wakabhata nsikana neluboko akadanilila, eti, “Mwana, muka.” 55Meya iye ikahanduka, tjinyolotjo akamuka; akabalaya kuti bawumpe zodliwa adle. 56Bazwadzi babe bakatjenama kwazo; iye akabakowhomesedza kuti basibudze nhu tjayetika.
Iliyochaguliwa sasa
Luka 8: KTP
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
The Word For The World International
