Matiós 9
9
Gióndúgie giá giŋándúnyá
(Mál 2.1-12; Lúk 5.17-25)
1Yésuse uwayumɛn gɔg uguá ŋŋumba gá guond egég gá tísɔna. 2Obónoólín yɔ́ na giŋándúnyá bidimina uguég guá giláŋa, Yésuse umaámáan guágɔdɛ́m guɔ́b, uwɔyidɛn yɔ́ áneé: «Muɔ́n wámɛ mán ɔdɛ́m bifal biáhɔ bímólígíe.» 3Belinsibígodi abábígálídɛn uguɔ́b guá idɛ́m áneé: «Mɔndɔ uyɔ weéfénínfenin Uhaluá.» 4Haná Yésuse úmalinsán ubuɔ́ bémegedényé, uwɔyɛd áneé: «Gá giagɛ núgódionu bilɔg biá dugedie uguánɔ guá idɛ́m?» 5Giagɛ igínya meyú gá guɔyɛd «Bámáyibínɛ́n bilɔga biáhɔ ugúnya ana adígɛ́n andá?» 6Ɛɛ́ɛ, búnyɛ gá díye áneé Muɔ́n wa mɔndɔ ugódi buŋaŋa buá yibinanɛn bilɔga eguísi aga. Yésuse uwɔyidɛn giŋándúnyá gɔg igigányɛ áneé: «Adígɛ́n gɔ́l giláŋa giáhɔ idá agáhɔ gá nihiá.» 7Mɔndɔ uwadigɛn uwɛɛ́d egég gá nihiá. 8Giíŋ igímabá hɔ́ gímaámáan buand ubúmabídúmbán, bugádɔ ubúégimbin giɛ́, igíɛ́d gá búlúgenye Uhaluá umeéŋín bandɔ giandá giá buŋaŋa.
Ɔdɔ́ŋína huá Matiós
(Mál 2.13-17; Lúk 5.27-32)
9Yésuse umaágádúmbán, uwaán mɔndɔ ɔhɛ́n áneé Matiós eduísilampɔ́, dugumine egég gá niís niá buóli, uwɔyidɛn yɔ́ áneé: «Mbinídín!» Mɔndɔ ugányɛ uwadigɛn uwebinidin yɔ́. 10Henyé, bámaágányánán uguá giansɛ giá Matiós, giod giá beduísilampɔ́ na bɔlɔga ebébíŋen, ebédugumen agá buáyɛ buá Yésuse na bebinene bég. 11Bafalisiɛ́ŋ bámaámáan anagányɛ obóhún bebinene bég áneé: «Gá giagɛ ehuínyihuínyi wánɔ únyánanaá na beduísilampɔ́ na bɔlɔga?» 12Hana Yésuse umɔɔ́b dugálɔ udugányɛ, uwɔyidɛn bɔ́ áneé: «Búdibá bandɔ bá huényihuényi bɔ́ bámbanɔ́ olondi gɔgaá, banúmanuma. 13Ánaá núlɛns gɔg áneé Uhaluá wɔɔ́guɔya áneé: “Bulɔ́b buɔ́ yambanɔ́ búdibá nusámb.” Gá giagiá mmosúguól gá dɔ́ŋɔn bandɔ bá gindényé, gɔgaá gá bɔlɔga.»
Ŋŋóhúnín gá busió buá gibíénye
(Mál 2.18-22; Lúk 5.33-39)
14Bebinene bá Sáŋa abákilɛn Yésuse obóhún yɔ́ áneé: «Gá giagɛ naánasɔ na bafalisiɛ́ŋ diálanɔ́ gɔg gibíénye, bebinene báhɔ bádiala?» 15Yésuse uwɔyidɛn bɔ́ áneé: «Bɔdɔ́ŋína gá budɔ́mb buá nuɔ́ndɔ́n bányɛ bábá uguá mesígíl uguá ginɛŋ igiɛ́ mɔndɔ usɔ́dɔ́ŋɔ́n bɔ́ úmanyaá hɔ́ a? Gɔgaá, mɔɔ́sɛ mányɛ hɔ́ ɔmɔɔ́ bónólínyenu bɔ́ mɔndɔ umaádán budɔ́mb buá nuɔ́ndɔ́n, uguá ginɛŋ igigányɛ bánágunsanɔ́ gibíénye.»
16«Mɔndɔ udibá wa gíde gilun giá gisɔn na gisɔn igigɔ́sɛ gá giagiá gibéyi giá gisɔn igigɔ́sɛ gígɔɔ́gɔ́ga gilun giá gisɔn, gilehu gíónduguól giandá gudɔ́mb. 17Bádiáguágan giŋɔ́nsa giá magɛ́b uguá gilun giá isɔmb gá gueleé, gídiád gilun giá isɔmb magɛ́b módug, aáyɛ́n múmuanyɛ mum, gɔgaá báguágan giŋɔ́nsa giá magɛ́b uguá musɔmb umugɔ́sɛ agányɛ, múmuanyɛ mum múgimbenin.»
Gióndúgie giá ugándɔ na gihunya giá ŋŋɔndɛ
(Mál 5.21-43; Lúk 8.40-56)
18Yésuse umabá umanyɛ gá gálgal anagányɛ ɔdɔgɔdɔ́g omódi uwakilɛn yɔ́, uwɔbɔmbiginɛn yɔ́ nudúg úmuanyɛ gég áneé: «Ŋŋɔndɛ yamɛ imanyɛ gugué na gué, ógún gɔg ɔdɔ́bígɛn yɛ́ imbɔ́g gá gueleé yond gá sɔ́dɔn.» 19Yésuse uwadigɛn na bebinene bég gá binidin yɔ́. 20Henyé ugándɔ omodi umabá uguá ɔlɔŋ uguɔ́g, uhémenye manɔ́ŋ. Umabá umámánúgual duɔŋ dúad na dúandɛ na manúma, uwakilɛn Yésuse uguélém uwɔbígɔ́dɛn odú huég huá gisɔn. 21Ubígálgalɛn áneé: «Mmába nnyɛ wa bígɔ́dɛn pɛ́ŋ gisɔn giég, ŋŋɔɔ́guɔ́ndɔ́ɔg.» 22Yésuse uwabígagalɛd gɔg uwaán yɔ́, úmuanyɛ gég áneé: «Ŋŋɔndɛ yamɛ bíág makányá, guágɔdɛ́m guáhɔ gúmédúgún.» Hɔ́nɔhɔ́, ugándɔ ugányɛ, uwɔɔ́ndɔ́ɔg. 23Yésuse umeégéneg agá nihiá niá ɔdɔgɔdɔ́g ugányɛ, uwaán bodóŋi dúlimbia na giíŋ igímabá gíágan ogund uwɔyidɛn bɔ́ áneé: 24«Bígɔ́gídɔ́nɔ́n, ŋŋɔndɛ ya ugándɔ iseségué gɔgaá yaábídíman.» Abɛ́d gá hɔna yɔ́. 25Ebéhémie giíŋ. Yésuse uwebíŋín, uwegimbin muúŋayɔ uguá ɔmbɔ́g, muúŋayɔ ugándɔ uwahunyɛg. 26Buónyi ubugányɛ ubúésegidinye uguá gibéyi giá guísi igigányɛ gidigid.
Gióndúgie giá beheguhégu báandɛ
27Yésuse umaágádúmbán, beheguhégu báandɛ ebébinidin yɔ́ bɔ́ya áneé: «Éyi, dián bulɔ́b uhaŋ wa Dáfide.» 28Umeémébíŋín uguá giansɛ beheguhégu abákilɛn yɔ́. Yésuse uwɔyidɛn bɔ́ áneé: «Núáguágan ɔdɛ́m áneé nnyɛ wa gual buɔ́ a?» Obóndinye yɔ́ áneé: «Ɛɛ́ɛ, Ɔgúná.» 29Uwɔbígɔ́dɛn eŋís yɔ́b uwɔyidɛn bɔ́ áneé: «Ánaá búbíal gá guágɔdɛ́m guánɔ.» 30Eŋís yɔ́b eyébíbun. Egélém, Yésuse uwegíndídin bɔ́ na ihiligine áneé: «Nubídédínye áneé ta mɔndɔ udilɛns buɔ́.» 31Bámuanyɛ gɔg bámaánahám, abɛ́d bégúményé ɔhɛ́n huá Yésuse uguá gibéyi giá guísi igigányɛ gidigid.
Gióndúgie giá gindigálída
(Lúk 11.14-15)
32Bámaágáhámán obónoólín Yésuse na gindigálída. 33Umeéméhémie gindigálída gilɔg giá gileénde, igíɛ́d gá gálgal, giíŋ igíáyíka gíɔya áneé: «Dimanyɛ didián gisíme ana Íslayɛ́l.» 34Gɔgaá, bafalisiɛ́ŋ ɔbɔ́yɛd áneé: «Búnyɛ na ofuŋ huá bilɔg biá bileénde úgúŋanɔ́ bilɔg biá bileénde.»
Yésuse umán giíŋ bulɔ́b
(Mál 6.6b, 34; Lúk 10.2)
35Yésuse uwegéndémidie bɔtísɔna na bidɔŋ gidigid, wɛɛ́d uhuínyihuínyé uguɔ́b guá bigúl, wɔya Ginɔ́g giá Nsɔ́m giá Niguili wond woóndúgonye bunyɛ mɔgɔn na bunyɛ buóŋi gidigid. 36Umaámáan giíŋ, ubúal yɔ́ bulɔ́b gá giagiá bémesulúgígíe imbɔ́g na gidɔga, súsɔ́n hana gimbi giá bidúmbúa igídiábianán egíg. 37Uwɔyidɛn gɔg bebinene bég áneé: «Guog gúnyɛ giod gúu gɔg belibuóli bádiábá giod. 38Bísógólónyónón gɔg mɔndɔ wa mesíge áneé udɔ́m belibuóli gég gá guog.»
Iliyochaguliwa sasa
Matiós 9: EKM
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
