Matiós 5
5
Isɔ́ma agá ɔŋuɛnyɛ
(Mál 3.13; Lúk 6.12-13, 20)
1Yésuse umaámáan giíŋ gíbinen yɔ́, uwamágáad uguá ɔŋuɛnyɛ, uwedugumin, bebinene bég ebégéŋélidie yɔ́. 2Uwɔgɔ́l nugálɔ, uwebul guhuínyihuinye bɔ́ wɔyɔn bɔ́ áneé:
Ŋŋil ya bia beseé
(Lúk 6.20-23)
3«Beseé na bandɔ obógódionu biegu biá idɛ́m, gá giagiá Niguili niá gumɔn nínyɛ niɔ́b.
4Beseé na bandɔ abábaŋanɔ́, gá giagiá bónódóndonye bɔ́.
5Beseé na besúnsún, gá giagiá bánádáŋáab guísi guá ndán.
6Beseé na Bandɔ abánúmanɔ́ na nsan na niída gá busió buá gindényé, gá giagiá bánábíhálan.
7Beseé súsɔ́n na bandɔ abánaninaá bulɔ́b, gá giagiá bánáan bɔ́ súsɔ́n bulɔ́b.
8Beseé na bandɔ abánya na idɛ́m budányɛ, gá giagiá bánáan Uhaluá.
9Beseé na bandɔ abágúnanɔ́ bumbénu, gá giagiá bɔ́nɔ́dɔ́ŋɛ́ɛn bɔ́ áneé baán bá Uhaluá.
10Beseé na bandɔ ɔbɔ́bígɔnaá gá busió buá gindényé, gá giagiá Niguili niá gumɔn nínyɛ niɔ́b.
11Nuanábá beseé bámánúsiga, bénúsésenye, bánúsúŋanɛn bimal biá moónyi gámɛ gá busió.
12Ánaá núfunde gilé, nubalaga, gá giagiá binam biánɔ bíánábá giandá ugumɔn. Nɔ́ bámala súsɔ́n na bebunebúné ebémebué gánɔ.»
Nunyɛ nigɔ́b na gise
13Nunyɛ nigɔ́b niá guísi, nigɔ́b gɔg nímásɔl bányɛ bóguonduguondinye niɛ́ gusam guá niɛ́ a? Nídibánd buand, bɔ́nɔh niɛ́ agá nígadá bandɔ bɛ́d gá mánígan niɛ́.
14«Nunyɛ gise giá guísi. Tísɔna unyaá ahágánɔ agá ɔŋuɛnyɛ udiábínamban. 15Bédiédímbígen ilámba bánamb hiɛ́ uguá mbílígís gɔgaá, báguadigan hiɛ́ gá gueleé híbunya bandɔ gidigid abánya uguá giansɛ. 16Bilɔŋ bímomi haná ilámba híbunyanɔ́, ánaá bandɔ bánaán gubunya guánɔ, gá gueleé bandɔ bágánaán binɔ́g biánɔ biá melélíe bégúmenye Síe wánɔ unyaá ugumɔn.»
Nuhuínyihuínyi nuá Yésuse gá busió buá gigodi
17Yésuse uwɔyɔn bandɔ áneé: «Nudigedényé áneé mmoól gá guólie gigodi ta dugálɔ duá bebunebúné. Mmosúguól gá guólie, gɔgaá mmoól gá hónye. 18Hómohómue yɔɔ́núɔyɔn áneé, gá gueleé na guísi na gumɔn múásidɔ́mb, ta ɔdɔ́n huá maná ŋŋɔbɔliá húdionólígie kandabá áneé buand gidigid búmábíal. 19Buand buáguɔ́, mɔndɔ uwanáyalanɔ́ ta maná gigodi wond uhuínyihuinye bɔsɔ́gá guala hana úmuanyɛ, ugányɛ úwanábánɔ́ mɔndɔ wa bugídígíd uguá Niguili niá gumɔn. Mɔndɔ uwenégimbenú gigodi wond uhuínyihuinye bɔsɔ́gá, wanábá giandá uguá Niguili niá gumɔn. 20Yɔɔ́núɔyɔn buɔ́ gɔg áneé, melélíe mánɔ mámámádibá gindényé gudɔ́mb má boóŋi na bafalisiɛ́ŋ, ɛ́ɛɛ́, nudiénébíŋín uguá Niguili niá gumɔn.»
Gubílad
(Mál 11.25; Lúk 12.57-59)
21«Núálinsan áneé bémehuínyihuínyé ndíndíl siánɔ áneé: “Ɔdiɔ́n mɔndɔ. Usɔ́guɔ́n mɔndɔ bɛ́d neéneg agá esúmbibisan.” 22Yaŋuá yɔɔ́núɔyɔn áneé usɔ́guɔ́bɛ́n ndiméen gusugɛn, bénégélénye yɔ́ agá esúmbibisan, uwanásígídaá ndiméen weg, bánɛ́d neéneg agá idɔg ihigɔ́n, uwanásígídaá ndiméen áneé ɔduɔ́duá, bɔ́nɔ́nɔh yɔ́ agá yoógi hiá ságásagá. 23Gáhɔ gɔg, ágɛɛ́d gá dóŋinye nusámb nuáhɔ agá ahɔd ya nsíb, émébídúmdenye áneé ogódi gidúdúlényé na ndiméen wahɔ, 24nihɛ́n nusámb nuáhɔ agányɛ, aágaguanabíaŋán neéneg obódosidóŋínyé nusámb nuáhɔ. 25Bílád uguá ŋŋil gunsáns na mɔndɔ uwiídanaá naánahɔ gá fudie, gá gueleé udienég náanahɔ agá esúmbibisan, esúmbibisan ugudɔ́m agá nsénsi gá gueleé igunɔh uguá giansɛ giá mbíne. 26Hómohómue, yɔ́guɔyɔn áneé adianáhám uguá giansɛ giá mbíne kandabá áneé eméyélígínyé gusua ŋŋúme igányɛ gidigid.»
Gidáŋa
(Mat 18.8-9; Mál 9.43, 47-48)
27«Nuálinsan áneé bɔ́mɔnúɔyídɛ́n áneé: “Adial gidáŋa.” 28Gɔgaá, yɔɔ́núɔyɔn áneé mɔndɔ umábíyɛg ugándɔ na eŋís ya bísáma, usamanugual gidáŋa na ugándɔ ugányɛ guonoólín egég gá ɔdɛ́m. 29Mmába niís niáhɔ niá ɔmbɔ́g uhunɛ́m nínídúmanaá áneé ala bilɔga, bál niɛ́ omb niɛ́ hádɛ naánahɔ, gá giagiá búnyɛ beseé gáhɔ áneé enímie buláŋ buáhɔ búmomi, gudɔ́mb áneé nuɔ́l nuáhɔ gidigid nuɛ́d agá yoógi ihídiéhuén. 30Mmába ɔmbɔ́g huáhɔ uhunɛ́m húhúgusenyeé, sɔ́mb huɔ́ omb huɔ́ hádɛ naánahɔ, gá giagiá búnyɛ beseé gáhɔ áneé enímie buláŋ buáhɔ búmomi gudɔ́mb áneé nuɔ́l nuáhɔ gidigid nuɛ́d agá yoógi ihídiéhuén.»
Gihémie giá ugándɔ
(Mat 19.7-9; Mál 10.4-5, 10-12; Lúk 16.18)
31Bɔ́mɔnúɔyídɛ́n súsɔ́n áneé: «Mɔndɔ úméhémie ugányɛ weg, wegeguéŋin yɔ́ mbɔba ya gihémie. 32Yaŋuá yɔɔ́núɔyɔn áneé: mɔndɔ úméhémie ugányɛ weg áneé udibánd gilád giég, waádúman yɔ́ gá guala gidáŋa, bilɔŋ biáguɔ́, usɔ́gɔ́l ugándɔ uyɔɔ́ bésehémie gá nuɔ́ndɔ́n, ugányɛ mɔndɔ waáguala gidáŋa.»
Gubílianan
33«Nuálinsan súsɔ́n áneé bɔ́mɔyídɛ́n ndíndíl siánɔ áneé: “Adibíliá, gɔgaá ubuɔ́ ɔ́sɔ́guɔyɛd agá eŋís ya Ɔgúná alá buɔ́.” 34Gɔgaá, Yaŋuá yɔɔ́núɔyɔn áneé nudibíliánán búmbúm, ta na gumɔn, gá giagiá gumɔn gúgúnya igɔ́y hiá Uhaluá. 35Nudibíliánán ta na guísi, gá giagiá uguísi guɔ́ Ɔgúná údɔ́bígɔnaá dugɔ́nd. Nudibíliánán ta na Yelusalɛ́m, gá giagiá unyɛ tísɔna wa giandá giá ofuŋ. 36Adibíliánán ta uguáhɔ guá ɔduá, gá giagiá adibá wa guondie ta ŋŋíde imoómi fuúm ugúnya ana bunéŋ. 37Uguá ginɛŋ igiɛ́ núgálgalaá, ánaá núondinye áneé: “ɛɛ́ɛ” ugúnya ana “ɛ́ɛɛ́” ubúólbuóndeé, búóguólónin uguá mamb.»
Gibióndie
(Lúk 6.29-30)
38Bémenúhuínyihuínyé, bɔ́núɔyɔn áneé: «Mɔndɔ úmáguád niís ád yɔ́ niég súsɔ́n, mɔndɔ úmábáŋ niínyi báŋ yɔ́ niég súsɔ́n. 39Yaŋuá yɔɔ́núɔyɔn áneé: Bíníhínɛ́n ahánd. Mɔndɔ úmágɔ́b ɔmbɛ́l uguá nidám inidádɛ, díyé yɔ́ niá nímomi. 40Mɔndɔ úmɔ́ya guɛ́d naánahɔ agá esúmbibisan gá giagiá waáguamba guhɔg gisɔn giáhɔ, éŋín yɔ́ súsɔ́n gihuya giáhɔ. 41Mɔndɔ úmágɔ́d áneé anda na dugɔ́nd guenég maban nuɔns, andá maban duɔns dúandɛ. 42Mɔndɔ úmɔ́guɔŋɛn buand éŋín yɔ́ buɔ́, uwambanɔ́ áneé obólie yɔ́ buand edidúm yɔ́ gélém.»
Ginɔ́nɛ́n na abɛlɛ́bɛl
(Lúk 6.27-28, 32-36)
43«Bémenúhuínyihuínyé áneé: “Ɔyá sɔ́gá mɔndɔ abina abɛlɛ́bɛl.” 44Yaŋuá gɔg yɔɔ́núɔyɔn áneé, ánaá núɔya babɛlɛ́bɛl bánɔ, nubísógólonye gá ebénúgényigenyeé. 45Uhaluá weéhémenye ɔhɛ́nyɛ huég naá gá bandɔ bá gilɔg naá gá bandɔ bá beseé, nubɔ́l nuég nuánuanan gá bandɔ abánya gindényé naá gá abánya mbágía. Ánaá núbá gɔg baán bá hómohómue bá Síe wánɔ unyaá ugumɔn. 46Númɔya ɔbɔ́núɔyɔnɔ́, giagɛ igiɛ́ núnya nua bia hana bisuɛ́n? Gá giagiá, ta beduísilampɔ́ báguala nɔ́. 47Númébígélígelie pɛ́ŋ beliméen bánɔ, giagɛ igigɔ́sɛ igiɛ́ nuálanɔ́? Ta bindiádába bídiáguala nɔ́ a? 48Banuá gɔg, ánaá núbá níŋíláníŋílá hana Síe wánɔ unyaá ugumɔn únyá níŋíláníŋílá.»
Iliyochaguliwa sasa
Matiós 5: EKM
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
