Matiós 20
20
Nsab ya belibuóli uguá mesíge má fínyi
1«Ndénu, Niguili niá gumɔn nínyɛ anda mpónyé na mɔndɔ wa mesíge umaáhám na guɔ́m ugubál, gá gɔ́lɔn belibuóli uguég guá mesíge má fínyi. 2Abáhám ugelu hana úgaánamanaá bɔ́ ŋŋúme imoómi gá buɔ́sɛ, uwadɔ́m bɔ́ gɔg uguég guá mesíge má fínyi. 3Umaámáhám uguá bisigɛl biánímanyɛ nomue biá giamádá, uwendegégie bándɔ gindényé agá bálɛ́g kanda buand buá guala. 4Uwɔyidɛn bɔ́ áneé: “Idánánɔ súsɔ́n uguámɛ guá mesíge má fínyi, ŋŋaánúhuá ubúnigimanaá.” 5Abɛ́d guɔ́. Umaámándahám na ɔdɛ́m huá buɔ́sɛ, naá uguá bisigɛl bídádɔ biá ginɛ́ŋ, uwandugual nɔ́ bilɔŋ bímomi. 6Umaámándahám uguá bisigɛl bítánɔ biá ginɛ́ŋ, uwendegégie bódodi hɔ́ gindényé, úmuanyɛ gɔ́b áneé: “Gá giagɛ núnya agányɛ buɔ́sɛ bum kandaguala buóli?” 7Obóndinye yɔ́ áneé: “Gá giagiá ta mɔndɔ usɔsɔ́dígɔ́l gá buóli.” Uwɔyidɛn bɔ́ áneé: “Idánánɔ, banuá súsɔ́n, uguámɛ guá mesíge má fínyi.” 8Buɔ́sɛ búmaámáman, mɔndɔ wa mesíge uwɔyidɛn eféli weg áneé: “Dɔ́ŋɛ́ɛn, belibuóli ond anaman sig mɔndɔ, agunsɛn gá bá nsúgie eneyib gá bá busió.” 9Belibuóli bá bisigɛl bítánɔ biá ginɛ́ŋ oból gɔg, obónd abáhagɔn sig mɔndɔ ŋŋúme imoómi. 10Bá busió, bómoógólón gá huɔ́b udényi, ebégedenye áneé bágábɔ́d gudɔ́mb bá nsúgie, gɔgaá abábia, bámuanyɛ súsɔ́n, sig mɔndɔ ŋŋúme imoómi. 11Bámaágáhaguna yɛ, bóŋuinyoŋuinyin mɔndɔ wa mesíge. 12Bɔ́ya áneé: “Belibuóli bá nsúgie, bámál pɛ́ŋ gisigɛl gímomi gá buóli, omónd amándánaman bɔ́ hana basuá disébue, dimɔ́bɛ́ɛg na gidɔga na giandá giá ɔhɛ́nyɛ.” 13Gɔgaá, uwondinye omodi áneé: “Ogúl wamɛ, mmásúgugual buand buá gilɔg, disasáhám ugelu áneé yásuanɛn anagányɛ a? 14Gɔ́l ubúnya buáhɔ ond adɔ́mb. Yɔɔ́guɔya guéŋin wa nsúgie bilɔŋ bímomi hana aŋuá. 15Kásɛ ndigódi bugaga buá gual ubuɔ́ yɔ́yɔnɔ́ na ŋŋúme yamɛ a? Ugúnya ana áŋala yaág gámɛ gá ginɔ́g giá ɔdɛ́m a?” 16Anagányɛ gɔg búánábánɔ, bá gélém bónónd bá busió, bá busió bónd bá gélém.»
Yésuse umóndódogie nigué na hám guég uguá gibɛ́l gá uŋand huá gádádɔ
(Mál 10.32-34; Lúk 18.31-34)
17Yésuse umaágiídan Yelusalɛ́m, uwɔdɔ́ŋɛ́ɛn bebinene bég bá báad na báandɛ agá buáyɛ, uwɛɛ́d wɔyɔn bɔ́ uguá ŋŋil áneé: 18«Básua ɔb gɔg diídanaá Yelusalɛ́m, gúu bágásílíga Muɔ́n wa mɔndɔ uguá imbɔ́g siá bagɔ́n bá bedúmbinusámb bá Uhaluá naá siá boóŋi. Bégélenye yɔ́, básɔ́mb gisan giég áneé bɔ́n yɔ́. 19Bónd gɔg bédídíginin bindiádába yɔ́ gá gueleé bɔ́hɔna yɔ́, bénúbe yɔ́, bɔ́ndɔ́n yɔ́ uguá nuag. Buɔ́sɛ buá gádádɔ uhám uguá gibɛ́l.»
Ŋŋɔŋina ya noódíe baán bá Sebedé
(Mál 10.35-45; Lúk 22.25-27)
20Gúu, noódíe baán bá Sebedé umakilɛn Yésuse na baán bég, uwɔbɔmbiginɛn yɔ́ nudúg gá guɔŋɛn yɔ́ buand. 21Yésuse gég áneé: «Aábaŋa giagɛ?» Noódíe baán uwondinye yɔ́ áneé: «Dóŋínyé bugaga áneé uguáhɔ guá Niguili, baán bámɛ ɔbɔ báandɛ, bédugumin uyɔ ɔmbɔ́g huáhɔ uhunɛ́m unó ɔmbɔ́g huáhɔ uhudádɛ.» 22Yésuse uwondinye yɔ́ áneé: «Nudiényi buand ubuɔ́ núóhoneé. Nunyɛ nuá bíhuá gibólé giá giɔ́bíga igiɛ́ ŋŋábíhuánɔ́ a?» Obóndinye yɔ́ áneé: «Dinyɛ diabíhuá.» 23Uwondinye bɔ́ áneé: «Nugabíhuá gibólé giámɛ, gá ubúnya gɔg buá dugumin uyɔ ɔmbɔ́g uhunɛ́m unó ɔmbɔ́g uhudádɛ, búdibá yaŋuá nnyaá wa guɔyɛd buɔ́, bénéŋin ɔbɔɔ́ Síe wamɛ úmaŋánɛ́n.» 24Bá báad ɔbɔ́mɔ́b ebéliŋin bisɔ́ndɛ ibigányɛ. 25Gɔgaá, Yésuse uwɔdɔ́ŋɛ́ɛn bɔ́ úmuanyɛ gɔ́b áneé: «Nuálinsan buɔ́, ifuŋ siá maán síégimbe bɔ́ uguɔ́b guá buŋaŋa, bagɔ́n uguá gimánígina. 26Búdigódi gɔg áneé búbá anagányɛ uguánɔ guá ɔlɔŋ. Búnyɛ áneé mɔndɔ úmamba gubá ɔgɔ́n uguánɔ guá ɔlɔŋ ánaá ubá edúmébi wanɔ. 27Súsɔ́n, mɔndɔ úmamba gubá wa busió uguánɔ guá ɔlɔŋ, ánaá ubá giɔ́lɛ giánɔ. 28Anagányɛ, Muɔ́n wa mɔndɔ umosúguól áneé bádúmába yɔ́, gɔgaá umoól gá dúmába bandɔ, wond usílɛ́ɛg nusɔ́da nuég gá busió buá giod giá bandɔ.»
Beheguhégu báandɛ bá Yelikó
(Mál 10.46-52; Lúk 18.35-43)
29Yésuse na bebinene bég bámaágáháman Yelikó, giandá giá giíŋ igíébinidin yɔ́. 30Beheguhégu báandɛ dugumine agá buáyɛ buá ŋŋil, bɔ́mɔɔ́mɔ́b áneé búnyɛ Yésuse údúmbanaá, abɛ́d gá héhenye bɔ́ya áneé: «Ɔgúná, Muɔ́n wa Dáfide díán bulɔ́b!» 31Giíŋ igíɛ́d gɔg gá hédenye bɔ́, gɔgaá, bámuanyɛ béhéhenye guhéhenye bɔ́ya pɛ́ŋ áneé: «Ɔgúná, Muɔ́n wa Dáfide dián bulɔ́b!» 32Yésuse uwedélímin, uwɔdɔ́ŋɛ́ɛn bɔ́ uwond uwoóhún bɔ́ áneé: «Giagɛ igiɛ́ núámbanɔ́ áneé yal gánɔ gá busió?» 33Ɔbɔ́yidɛn yɔ́ áneé: «Ɔgúná, ánaá eŋís yasɔ yébíbun.» 34Yésuse uwaán bɔ́ bulɔ́b, uwɔbígɔ́dɔn bɔ́ uguá eŋís. Hɔ́nɔhɔ́ abɛ́d gá guánan. Obónd ebébinidin yɔ́.
Iliyochaguliwa sasa
Matiós 20: EKM
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
