Matiós 12
12
Dubab háhúnáháhúná
(Mál 2.23-28; Lúk 6.1-5)
1Uguá ginɛŋ igigányɛ, uguá buɔ́sɛ buá giíndía giá bayúdɛn, Yésuse umadúmbánɛ́n uguá mesíge má bunimɛ́d ubuɔ́ bɔ́dɔ́ŋɔnaá áneé beleé. Nsan iyanúmɛ́ɛd bebinene bég, abɛ́d gá gása dubab bányánan. 2Bafalisiɛ́ŋ bámaámáan anagányɛ abɛ́d gá guɔyɔn yɔ́ áneé: «Án buand ubuɔ́ bebinene báhɔ bálanɔ́, búnyɛ gigodi buɔ́sɛ buá giíndía giá bayúdɛn.» 3Yésuse uwondinye bɔ́ áneé: «Numasúguanuna buand ubuɔ́ Dafíde úmal uguá ginɛŋ igiɛ́ nsan ímanúmɛ́ɛd yɔ́ na begúl bég a? 4Umebíŋín uguá giansɛ giá Uhaluá, neéneg na biendinyi biég abánya bilɛ́d biá nusámb ibiɛ́ ta úmuanyɛ ta biendinyi biég bímasádinigimanan na nyá, gɔgaá esíe bedúmbinusámb! 5Ugúnya ana numasúguanuna uguá yubu hiá bigodi áneé, uguá idúl, buɔ́sɛ buá giíndía giá bayúdɛn, bedúmbinusámb báyalanɛn gigodi giá giíndía giá bayúdɛn kandabá uguá gigua a? 6Gɔgaá, yɔɔ́núɔyɔn buɔ́, aga, mɔndɔ unyɛ hɔ́ udúmbanaá idúl. 7Mmába numɔɔ́b buand ubuɔ́ Ŋŋɔ́ŋɛ síɔ́yɔnɔ́: “búdibá nusámb yɔ́yɔnɔ́, búnyɛ bulɔ́b.” Késíe numasásɔ́mb gisan giá bandɔ abádiabá uguá gigua. 8Gá giagiá, Muɔ́n wa mɔndɔ unyɛ ɔgúnɔ́gɔ́n wa giíndía giá bayúdɛn.»
Mɔndɔ wa ɔmbɔ́g kádádá
(Mál 3.1-6; Lúk 6.6-11)
9Yésuse uwoólígie agányɛ gá guɛ́d uguá gigúl, uwebíŋín guɔ́. 10Henyé uguá gigúl uguɔ́g, mɔndɔ umabá guɔ́ ɔmbɔ́g kádádá. Bafalisiɛ́ŋ obóhún yɔ́ ŋŋóhúnín áneé: «Kásɛ, gigodi gíáhuánɛn bugaga búóguóndúgie mɔndɔ buɔ́sɛ buá giíndía giá bayúdɛn a?» Búmabá gá gueleé béfudie yɔ́. 11Yésuse uwondinye bɔ́ gɔg áneé: «Uguánɔ guá ɔlɔŋ, mɔndɔ úmabianan gidúmbúa giég gímomi, gímónobiómbín uguá ɔmbɛ́l uguá buɔ́sɛ buá giíndía giá bayúdɛn ulɔb kendenehémíe giɛ́ a? 12Mɔndɔ waádúmban gɔg gidúmbúa! Digódi gɔg bugaga buá gual mɔndɔ buand buá beseé buɔ́sɛ buá giíndía giá bayúdɛn.» 13Uwɔyidɛn mɔndɔ ugányɛ gɔg áneé: «Ganɔ́n ɔmbɔ́g.» Uwaganɔn huɔ́ uhúɔ́ndɔ́ɔg, uhúónd beseé hana huá húmomi. 14Bafalisiɛ́ŋ bámaánahám, ebédúmbie gubígúsɛ́d gá guamba dudádɛ duá guɔ́n Yésuse.
Yésuse, edúmébi wa Uhaluá
15Yésuse umɔɔ́mɔ́b áneé bágúdan yɔ́ idɔg, uwoólígie hɔ́. Giod giá bandɔ igíébinidin yɔ́, uwoóndúgonye bɔ́ gidigid. 16Uwabídínɛn bɔ́ na bilúndulúnd áneé bɔ́diɔyídɛ́n ta mɔndɔ bumɔndɔ ubuɔ́ únya. 17Búmabá gá gueleé ubuɔ́ ebunebúné Esayí úmɔyɛ́d búbíhónye:
18Edúmébi wámɛ uyɔɔ́ mméyid uyeényé,
mbanda yamɛ ya muɔ́n iyɛɛ́ búmaŋal beseé áneé yeyid,
yanág Gileénde giámɛ uguég, wenésesenyinye maán gubá gindényé.
19Udianámba nsáŋ, udianánsan,
bɔ́diɔnɔ́bɔn ugelu huég uguá biɔ́mb.
20Udianágand nubalɔ unudáyídánɔ,
udienéhué nuhóhé nuá yoógi unúmanyaá gá dugude,
gueneg hana gindényé gíánányína.
21Uguég guá ɔhɛ́n maán mánáganaá nubídágídɛ́n nuɔ́b.
Na Yésuse na Bɛlsebúl
(Mál 3.22-30; Lúk 11.14-23; 12.10)
22Obólín gɔg Yésuse na mɔndɔ umaábá uguá gigimbine giá gilɔg giá gileénde, umabá gimuké úmuanyɛ súsɔ́n na mehegu. Yésuse uwoóndúgie yɔ́, uwɛɛ́d gá gálgal, waánan. 23Ubúénímie bandɔ abámabá hɔ́ meéne, abɛ́d gá guɔya áneé: «Búdibá Muɔ́n wa Dafíde yɔ́ egéné a?» 24Bafalisiɛ́ŋ bɔ́mɔɔ́mɔ́b buɔ́, ɔbɔ́yɛd áneé: «Ugányɛ, waáguŋa bilɔg biá bileénde pɛ́ŋ uguá ɔhɛ́n huá Bɛlsebúl, ofuŋ huá bilɔg biá bileénde.» 25Yésuse umaámáan melélíe mɔ́b uwɔyidɛn bɔ́ áneé: «Bandɔ bá Niguili bámánuanan bámuanyɛ na bámuanyɛ, Niguili inigányɛ níáguádígan. Ta bandɔ bá tísɔna, ta bandɔ bá giansɛ, bámánuanan bámuanyɛ na bámuanyɛ, tísɔna ugányɛ ta giansɛ igigányɛ múhúlɔ́g.» 26Sátan úmágúŋa gɔg Sátan, tábɔ́ áneé waábídándúna úmuanyɛ muɛ́d: naánanyá Niguili niég nínya níabá gindényé? 27Mmába búnyɛ uguá ɔhɛ́n huá Bɛlsebúl ŋŋúŋanɔ́ bilɔg biá bileénde, bebinene bánɔ uguá ɔhɛ́n huányɛ bágúŋanɔ́ biɛ́? Bámuanyɛ gɔg bɔ́ bénénúgélenyeé. 28Gɔgaá, mmába uguá Gileénde giá Uhaluá ŋŋúŋanɔ́ bilɔg biá bileénde, tábɔ́ gɔg áneé Niguili niá Uhaluá nímésinúegin. 29Súsɔ́n naánanyá mɔndɔ únya wa bíŋín uguá giansɛ giá gigaga giá mɔndɔ ugɔ́lɔn muand muég kandabá áneé umágagugɔ́d yɔ́? Agányɛ gɔg ubádasaga yɔ́. 30Udiábá naánamɛ weénunsenye, udiédídé naánamɛ weésélémendenye.
31«Buand buáguɔ́, nnúɔyɔnaá áneé: bánáyibinɛn bandɔ gɔ́b gá bilɔga gidigid naá gɔ́b gá dufén gidigid gɔgaá, núméfénínfenin Gileénde nudianábia giyibinina. 32Mɔndɔ úmásúŋɛ́n Muɔ́n wa mɔndɔ buónyi, bánáyibinɛn yɔ́ gɔgaá, úmágálgalɛn Gileénde giá Budányɛ, bádianáyibinɛn yɔ́ ta uguísi uguɔ ta uguóloneé.»
Na sig budɛ́ na bibɔg biég
(Mat 7.16-17; Lúk 6.44-45)
33«Ánaá núgedie áneé budɛ́ búnyɛ huényihuényi, gibɔg giég gíánábá beseé, ánaá núgedie áneé budɛ́ búmánúma, gibɔg giég gíánánúma: búnyɛ uguá gibɔg bálinsaninaá budɛ́. 34Baán bá mpɛ́nyɛ, naánanyá núnya nua guɔya binɔ́g biá muand, henyé nunyɛ bilɔg? Gá giagiá, ubuɔ́ niíd níɔ́yɔnɔ́ búóguólonin agá ɔdɛ́m. 35Mɔndɔ wa ginɔ́g giá ɔdɛ́m weéhémenye binɔ́g biá muand uguég guá ginɔ́g giá nukólókóŋ, mɔndɔ wa gilɔg giá ɔdɛ́m weéhémenye bilɔg biá muand uguég guá gilɔg giá nukólókóŋ. 36Yɔɔ́núɔyɔn buɔ́: bénégélenye sig mɔndɔ uguég guá biegubiegue biá dugálɔ ibiɛ́ úmabá uhémenye. 37Gá giagiá, uguáhɔ guá dugálɔ ánábianɔ́ gisódie, ugúnya ana nigué.»
Gilɛns giá Yonás
(Mat 16.1-4; Mál 8.11-12; Lúk 11.16, 29-32)
38Gúu gidám giá boóŋi na bafalisiɛ́ŋ bémedígínyé nugálɔ ɔbɔ́yɛd áneé: «Ehuínyihuínyi, diáguamba áneé edídíye gilɛns.» 39Yésuse uwondinye bɔ́ áneé: «Gilɔg giá nunam igídiabá gilád, igíóhóneé gilɛns! Mmába hana gá buá gilɛns, bédienéndedíye nuɔ́ gilɛns búmábúdibá gilɛns giá ebunebúné Yonás. 40Gá giagiá, hana Yonás úmal mɔɔ́sɛ mádádɔ na medúg mádádɔ uguá nimuɛnd niá giandá giá yɔb, nɔ́ Muɔ́n wa mɔndɔ wánálanɔ́ mɔɔ́sɛ mádádɔ na medúg mádádɔ uguá gibɛ́l. 41Uguá buɔ́sɛ buá nugélényi, bandɔ bá gidɔŋ giá Niníf bánádigɛn naánanɔ nunam unuɔ bónd básɔ́mb gisan giánɔ gá giagiá, bémenúgíe bilɔŋ haná bɔ́mɔɔ́b Ginɔ́g giá Nsɔ́m igiɛ́ Yonás úmesesenye, aga gɔg unyaá hɔ́ waádúmban Yonás. 42Buɔ́sɛ buá nugélényi, aŋúndága wa gibéyi giá guísi giá Adág wanádigɛn na nunam unuɔ wond usúmb gisan giá nuɔ́ gá giagiá, umanádígɛ́n hadɛ́ gá guólɔsibídɔ́lígɔ́nɔ́n nugedie nuá Salɔmɔ́ŋ, aga gɔg unyaá hɔ́ waádúmban Salɔmɔ́ŋ.
Guonond guá gilɔg giá gileénde
(Lúk 11.24-26)
43Uguá ginɛŋ igiɛ́ gilɔg giá gileénde gísáhám uguá nuɔ́l nuá mɔndɔ, gíáguɛ́d gídamdam uguá bibéyi biá guísi biá gɔ́dɔgɔ́dɔ gá guamba nihoge gɔgaá, gídián niɛ. 44Gíbígálídɛn áneé: “Ŋŋoóguond uguámɛ guá giansɛ igiɛ́ yaánáhámɛ́n.” Gímónond, gígégie giɛ́ gudɔɔ́, húláhúlá, muand giságísá. 45Gíónd gɔg gíɔ́nɔgɔ́l bilɔg biá bileénde bitíndádɔ nomue ibínya bilɔg gudɔ́mb gímuanyɛ, bíbíŋín guɔ́ bíond bídugumin. Gubá guá mɔndɔ ugányɛ guándabá manyanyɛ gudɔ́mb guá busió. Nɔ́ búánábánɔ gá gilɔg giá nunam igigányɛ.»
Mbanda ya niíd niá giansɛ niá Yésuse
(Mál 3.31-35; Lúk 8.19-21)
46Hana Yésuse umabá umanyɛ gá gálgal na giíŋ, hɔ́nɔhɔ́ na noódíe na beliméen bámabá agá nígadá bámba guɔyɛd mayɔ neéneg. 47[Mɔndɔ omodi uwɔyidɛn yɔ́ áneé: «Ndé noódíe wahɔ unó agá nígadá na beliméen báhɔ bámbanɔ́ guɔyɛd mayɔ naánahɔ.»]
48Yésuse uwondinye mɔndɔ ugányɛ áneé: «Ányá unyaá noódíe wamɛ? Baányá abánya beliméen bámɛ?» 49Yésuse uwaganɔn ɔmbɔ́g, uwedíye bebinene bég, úmuanyɛ áneé: «Ndénu noódíe wamɛ uyɔ na beliméen bámɛ. 50Mɔndɔ uwalanɔ́ guɔyɛd guá Síe wámɛ unyaá ugumɔn, únyaá ndiméen wamɛ, noódíe wamɛ.»
Iliyochaguliwa sasa
Matiós 12: EKM
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
