Mavanga 8
8
1Sawuli wusingisa bu ba honda Tyeni.
Sawuli wuna fyetikisa dibundu
Tuka kilumbu bekyokyo, dibundu di mbanza yi Yelusalemi difyetokoso bubwingi. Bamvimba bamana mwangana mu bizunga bi Yuda na Samaliya, zintumwa kwandi zi saala. 2Babakala bedi vuminanga Nzambi, bazika Tyeni mpe bamudila bubwingi.
3Kansi Sawuli, yandi wusosa mu honda dibundu. Wedi kwe kotingi mu kadi nzo mu bwila bakento na babakala. Ni kedi batubanga mu boloko.
Filipi wusamuna Musamu Wumbote ku Samaliya
4Yobobo ba bamwangisa bedi kwe yendi mu ndambu ka ndambu mu kwe samuni Musamu Wumbote. 5Filipi wuyenda ku mbanza yi Samaliya, wusamuna Klisto koko. 6Mpumbu yi bantu yiba yikwikama mu misamu myedi zonza Filipi, bu yiyuwa na bu yiyena bimangu bibingi bi kedi sa. 7Mpeve zimbi zedi duuka mu zimbevo zizingi buna zina kwe bulani. Mpe bantu babingi baba na binama bifwa (mbolokoto) na baba na byeta banyaka. 8Kyese kifuluka ha kati di mbanza beyoyo.
9Tuka ntama, ha kati di mbanza beyoyo, kuba na bakala dimosi nkumbu andi Simoni, bunganga kedi sadilanga na wedi sanga ti bisi-Samaliya bayituku, mpe wedi kilonkanga ti muntu wumfunu kadi. 10Bamvimba, kutonina ku mwana wufyoti natee ku muntu wukula, bedi toma muyuwilanga na bedi tanga ti: «Bakala bedidi, ni lulendo lu Nzambi, lo luba kwe tumisinanga ti: “Lulendo lulunene.”» 11Bedi toma muyuwilanga mu dyambu ti tuka ntangu zizingi kedi sanga ti bayituku mu nsalulu andi yi bunganga. 12Kansi bu bayiza kwikila Musamu Wumbote wedi samunanga Filipi, myo mitadidi kimfumu ki Nzambi na nkumbu yi Yesu-Klisto, bakento na babakala batambula mbotokolo. 13Simoni, yandi mpe wukwikila, wutambula mbotokolo na kabika ko mu kwe landi Filipi. Mpe wuyituku mu bidimbu na bimangu byedi hilama.
14Zintumwa zi ba ku mbanza yi Yelusalemi, bu ziyuwa ti bisi-Samaliya batambudi Mambu ma Nzambi, ni babatambikila Petelo na Yoane. 15Bu batuula, babasambidila mwanki batambula Mpeve Yilongo. 16Mu dyambu ti, Mpeve Yilongo buna yakulumukini ku kani wumosi mu yawu ko. Mbotokolo kaka batambula mu nkumbu yi Mfumu Yesu. 17Petelo na Yoane babatentika moko na batambula Mpeve Yilongo. 18Simoni bu kayena ti bantu batambula Mpeve Yilongo mu ntentokolo yi moko ma zintumwa, wusosa mu bahaana mbongo, 19na wubateela ti: «Mpaaneeno meno mpe lulendo belulu, mwanki ku yondowo wu naatentika moko, katambula Mpeve Yilongo.» 20Kansi Petelo wumuteela ti: «Bika ti mbongo zaku zihombila ha kimosi naku, mu dyambu ti ngeye benzi ti mu mbongo lendi sumbila munkayulu wu Nzambi. 21Ngeye wuu nakani kikunku mpe nakani ndambu difwa ko mu misamu mina hyoka ehaha, mu dyambu ti mutima aku wuu wudedama ha ntadisi yi Nzambi ko. 22Vilula madyela mu mabanza maku mambi na sambila Mfumu, mwanki, kampe nanga, Nzambi lenda kulemvokila makani mambi ma mutima aku. 23Mu dyambu ti nyeni ti wufuluka wudi mu musoki na wuu wukangama mu kinkole ki masumu.» 24Simoni wuvutula ti: «Sambileno yeno bende Mfumu mu dyambu dyani, mwanki na lembolo bwilulu musamu mu myo mi luteedi.» 25Bu bamana ta kimbangi mu Yesu-Klisto mpe mu samuna Mambu ma Mfumu, Petelo na Yoane bavutuka ku Yelusalemi. Bu bedi kwe vutuki, bedi kwe samuni Musamu Wumbote mu mabwala mamingi ma kizunga ki Samaliya.
Filipi na mwisi-Etyopi
26Mbazi yi Nzambi yiteela Filipi ti: «Telama na yendisa ku ndambusu yi sude mu nzila yikwe kulumuka kutonina mbanza yi Yelusalemi natee ku mbanza yi Ngaza. Nzila beyoyo yikwe lembolo hyokilanga dyaka bantu.» 27Filipi wutumbu telama na wuyenda. Mu nzila, wuyena bakala dimosi di ba kitula kisita, mwisi-Etyopi, mfumu yiyinene yi Kandase, ntinu yi mukento yi nsi yi Etyopi, mpe yandi kwe kebanga bimvwama byandi, wuyiza ku mbanza yi Yelusalemi mu sambila. 28Bu kedi kwe vutuki ku nsi andi, wuba wuzakala ha yulu kaalu, buna wuna kwe tangi buuku di mumbikudi Yesaya. 29Mpeve wuteela Filipi ti: «Yenda mpe finama ha kaalu bedyodyo.» 30Filipi wuyenda mu ntiinu na wuyuwa mwisi-Etyopi wedi tanga buuku di mumbikudi Yesaya. Wumufuula ti: «Nga wuna bakula myo mi wuna tanga e?» 31Wuvutula ti: «Bwedi ndendi bakudila myo tala ti ku nani muntu wa mbangudila myo e?» Ni kalomba ku Filipi kaalu na kazakala ha ndambusu andi. 32Kibuku ki Mambu ma Nzambi ki kedi tanga kita ebu:
«Wuba bonso dimeme di bana nata mu kwe honda,
bonso Mwana Dimeme, wuna lembolo lokana ha ntadisi yi yondowo wuna mukatula mika,
kazibula munwa ko.
33Bamufwisa nsoni na babisa mu munungisa,
nani lenda zonzila mu nkuna andi e?
Mu dyambu ti bilumbu byandi ha luse lu butoto byabazengidi.»
34Mwisi-Etyopi wufuula Filipi ti: «Mulemvo aku, nteeleti, mumbikudi nani kana zonzila bobo e? Mu yandi bende hoti mu muntu wuhiika e?» 35Filipi wuzibula munwa na wutona mu musamunina Musamu Wumbote wu Yesu mu bibuku bi Mambu ma Nzambi bemomo. 36Bu batatamana nzila awu, batuula ha kizinga ki mamba. Mwisi-Etyopi ni kata ti: «Mamba ema. Nki bina nkakidila mu botoko e?» [37Filipi wuta ti: «Tala ti kwikidi mu mutima aku wumvimba, lenda botoko.» Mwisi-Etyopi wuvutula ti: «Nkwikidi ti Yesu-Klisto wuu Mwana Nzambi.»] 38Wuhaana lutumu mwanki kaalu dyandi di sikama. Filipi na mwisi-Etyopi bakulumuka ya babole mu mamba, mboki Filipi wubotika mwisi-Etyopi. 39Bu batomboka mu mamba, Mpeve yi Nzambi yinata Filipi na mwisi-Etyopi kedi bwesa muyena ko. Ni katatamana nzila andi mu kyese. 40Filipi wuvutuka ku mbanza yi Azoti, mboki wuyenda natee ku mbanza yi Sezale buna wuna kwe samuni Musamu Wumbote mu kadi mbanza zi kedi kwe hyokidi.
Iliyochaguliwa sasa
Mavanga 8: dde Ddo
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© (Active) Wycliffe Bible Translators, Inc. All rights reserved.
