Mavanga 7
7
Kinzonzi ki Tyeni
1Mfumu Nganga-Nzambi wumufuula ti: «Misamu mii bana ta mu ngeye, mi kedika midi e?» 2Tyeni wuvutula ti: «Yeno mpangi zani na matata mani, yuweeno! Nzambi yi nkembo wuyenikina nkaka eto Abalahami buna wakidi ku kizunga ki Mezopotami, tekila kenda ka zakala ku mbanza yi Haalani. 3Wumuteela ti: “Sisa nsi aku na kanda dyaku na yenda ku nsi yi naakulonka”. 4Abalahami wusisa nsi yi bisi-Kaladeya na wuyenda zakala ku mbanza yi Haalani. Ku manima ma lufwa lu tata andi, Nzambi wumutwala ku nsi beyiyi yi luzakadi bwabu. 5Ku nsi beyoyo, Nzambi kamuhaana kani fwa dimosi ko, na kani huma he tedimina ko. Kansi wumusila nsilulu mu vwa byo na ku nkuna andi, ku manima ma lufwa lwandi, mpeleko Abalahami kabuta mwana ko. 6Nzambi wumuteela ti: Nkuna aku ku nsi yinzenza ya kwenda zakala, mbo babakitula mindongo na mbo babanyokona mvula nkama ya. 7Kansi meno bende naafundisa nsi beyoyo yi baaba mindongo. Ku manima, baasisa yo na mbo bakwiza sambila ha kibuka bekiki. 8Nzambi wutunga luwawanu na Abalahami mu kidimbu kinzengosolo yi bubakala. Ni hahoho Abalahami kazengila mwana andi Isaaki bubakala mu kilumbu kinana ku manima ma mbutukulu andi. Isaaki wusadila bobo mu Yakobi, mpe Yakobi mu bifumba kumi na byole.»
9«Kimpala ki zinkaka zeto kisa ti bayadika Yosefi mwanki ba munata bonso mundongo ku nsi yi Ngipiti. Kansi Nzambi wuba nandi kintwadi, 10wumuvuukisa mu mpasi zandi zimvimba. Nzambi wumuhaana ndwenga na wu sa ti ka ba muntu wumbote ha meso ma Falao, ntinu yi Ngipiti. Mpe wumutuula munyadi wu nsi yi Ngipiti na wu nzo andi yimvimba. 11Malema makota mu nsi yimvimba yi Ngipiti na mu nsi yi Kana. Mpasi zihyoka kitezo na zinkaka zeto zibaka dyaka kima kye dya ko. 12Bu bayuwa ti ku Ngipiti bindya bii koko, Yakobi wutambika nkumbu yintete zinkaka zeto kuuna. 13Nkumbu yinzole, Yosefi wukizabikisa ku zimpangi zandi, mpe kanda dyandi dizabakana ku Falao. 14Buna Yosefi wutambika bantu benda babonga tata andi Yakobi na kanda dyandi dimvimba. Baba makuminsambwadi na tanu ma bantu. 15Yakobi wukulumuka ku nsi yi Ngipiti. Ni kokoko kafwila na zinkaka zeto mpe. 16Banata nitu zawu ku Sikemi na babatuula mu kati di ndyamu yi sumba Abalahami mu mbongo ku baala ba Hamoli, tata di Sikemi.»
17«Ntangu ye lungisa nsilulu yisila Nzambi ku Abalahami bu yiba bela-bela mu fwana, mukangu eto wukula na wubutana ku nsi yi Ngipiti, 18natee bu yiza yaala ntinu yihiika, yi lembolo zaba Yosefi. 19Ntinu beyoyo yihuna mukangu eto na wufyetikisa zinkaka zeto na yisa ti banyafuna baala bawu bansombe mwanki ba fwa. 20Mose wubutuka mu ntangu beyoyo. Wuba wubweya ha ntadisi yi Nzambi. Bamuyundula ngonda zitatu mu nzo yi tata andi. 21Mu ntangu yi bamulosa, mwana wundumba wu Falao wumutota na wumuyundula bonso mwana andi wubakala. 22Mose wusansu mu ndwenga zimvimba zi bisi-Ngipiti na wuyiza ba muntu wululendo mu mpova na mu nsadulu zandi. 23Mose bu kalungisa mvula makumaya wubaka lukanu mu kwe yenikina ba-Isaeli, zimpangi zandi. 24Wuyena mwisi-Ngipiti wumosi wedi yenisa mpasi wumosi mu zimpangi zandi. Wumunwanina na wuhonda mwisi-Ngipiti. 25Yandi kedi banzila ti mpangi zandi mbo zibakula ti mu moko mandi Nzambi kabakuudila. Kansi babakuula wo ko. 26Kilumbu kilanda, Mose wuyiza hambula ba-Isaeli bole bedi nwana na wusosa mu vutula kiyenge ha kati dyawu. Wubateela ti: “Yeno, mpangi na mpangi ludi! Mu dyambu di nki luna kiyenisina yeno na yeno mpasi e?” 27Kansi yondowo wedi yenisa wuhiika mpasi, wununguna Mose na wuta: “Nani wukutudidi mu ba mfumu na mumfundisi e? 28Tiidi mu mponda bonso buwuhondidi mazono mwisi-Ngipiti e?” 29Mu mpova bezozo, Mose wuwoka na wuyenda zakala ku nsi yi Madyani. Baala bole kabuta koko.»
30«Mvula makumaya zihyoka, ku nsi yinkatu bela-bela na mulandu wu Sinayi, mbazi yi Mfumu yimuyenikina mu milaka mi tiya myedi lemanga ha vunda di mwa muti. 31Mose wuyituku bu kayena mbweno beyoyo. Kansi bu kedi finama mu toma tala, ndinga yi Mfumu yiyuwakana ti: 32“Meno nidi Nzambi yi Zinkaka zaku, Nzambi yi Abalahami, yi Isaaki na yi Yakobi.” Mose wedi tekita mu bunkuta na kedi bwesa lenda mu tala ko. 33Mfumu wumuteela ti: “Katula nsampatu zaku mu malu, mu dyambu ti kibuka ki wudi kidi kilongo. 34Meno nyeni mpasi zi mukangu ani wuu ku nsi yi Ngipiti na nyudi biyahula byawu mpe nkulumukini mu bavuukisa. Yenda bwabu, nina kutambika ku nsi yi Ngipiti.”»
35«Ni Mose bewowo wu banyafuna ku ba-Isaeli bu bata ti: “Naani wukutudidi mu ba mfumu na mumfundisi eto e?” Nzambi yandi katambikidi bonso mfumu na kivuukisi mu nzila yi mbazi yi Nzambi yi muyenikina ha vunda di miti dyedi lemanga. 36Yandi wuduukisa ba-Isaeli ku nsi yi Ngipiti bu kahidika bidimbu na bimangu bingitukulu mu nsi beyoyo, ku mubu wumbwaki na ku nsi yinkatu mu mvula makumaya. 37Mose kwandi dyaka mpe wuta ku ba-Isaeli ti: “Nzambi waaduukisa ha kati dyeno mumbikudi wumosi mu zimpangi zeno, waaba bonso meno.” 38Mu ntangu yi bakutakana ku nsi yinkatu, ni yandi wuba na mbazi yi Nzambi yedi mu zonzila ha yulu mulandu wu Sinayi mpe ha kimosi na zinkaka zeto. Yandi wutambula Mambu ma luzingu mu tuzabikisa mo. 39Kansi zinkaka zeto zitya ko mu mutumimina. Bamubisa, mpe mu mayindu mawu, nganunu bavutuka kwawu ku Ngipiti. 40Ni hahoho, bateela ku Aloni ti: “Tuhidikila zi nzambi za kwe dyati ku mutwala eto. Mu dyambu ti Mose bewowo wu tuduukisi ku nsi yi Ngipiti, tuzebi ko nkye misamu mi mubwididi.” 41Mu bilumbu bebyobyo, bahidika mwana ngombe wumosi. Bahaana minkayulu ku kiteki bekyokyo, na bakembila mu kyese kisalu ki moko mawu. 42Kansi Nzambi wubateka manima na wubabiika basambila mbwetete (binwani bi) zi mazulu bonso bu wusonama mu buuku di mimbikudi ti:
“Kanda di Isaeli, nganunu ku meno
luhaana minkayulu mi bibulu na mi mihiika
mu makumaya ma mvula ku nsi yinkatu e?
43Kaani, kansi lunata nzo yi kikapu yi nzambi Moloki,
na lubwetete lu nzambi eno Lefani,
nzambi yi biteki bebyobyo bi luhidika mwanki lufukimina byo.
Ni hahoho, naalunatina ku nsi yiyila kuhyoka nsi yi Babiloni.”»
44«Ku nsi yinkatu, zinkaka zeto ziba na nzo yi kikapu yedi lonkanga ti Nzambi wuba nawu. Yondowo wuzonza ku Mose, wumutuma kahidika yo bonso bu kayenina kifwani. 45Nzo yi kikapu beyoyo, basisa yo mu moko ma zinkaka zeto, na mu lutwadusu lu Yoswa, banata yo ku nsi zi bazika ku makanda ma bantu bemomo ma kuma Nzambi ha ntadisi awu. Nzo yi kikapu beyoyo yiba koko natee mu ntangu yi Davidi. 46Davidi wuyangidika Nzambi na wulomba luve mu tungila Nzambi yi Yakobi nzo. 47Kansi ni Solomo wumutungila nzo. 48Mpeleko Nzambi Yihyokidi ku Zangama kazakalanga mu zinzo zitungu ku bantu ko. Bonso busamuna wo mumbikudi:
49“Yulu ni kyandu kyani ki bumfumu,
na butoto ni kifulu kinkwe tentikanga bitambi byani.
Nkye mpila nzo lutiidi mu ntungila e? Mfumu kateedi,
ha nkye kibuka nalendi humina e?
50Ka moko mani ko mahidika bima bebibi bimvimba e?”»
51«Yeno bantu bamutu ngolo, mitima na makutu meno maa makangama, luu bonso zinkaka zeno, lukwe tingunanga kadi ntangu Mpeve Yilongo. 52Nkye mumbikudi zinkaka zeno balembolo kwamisa e? Bahonda yobobo basamuna nyizulu yi Muntu wu lunungu. Yandowo bwabu yeno wu luyekola na wu luhonda. 53Yeno lutambula Misiku mu nzila yi zimbazi zi Nzambi, kansi luvumina myo ko.»
Lufwa lu Tyeni
54Bu bayuwa mpova bezozo, mitima myawu minwa menga na batona mu mukwetisila meeno. 55Kansi, Tyeni wufuluka mu Mpeve Yilongo, wusendola meso ku yulu na wuyena nkembo yi Nzambi mpe Yesu wutelama ku kooko ku lubakala lu Nzambi. 56Wuta ti: «Nina yena mazulu dizibuka na Mwana Muntu wutelama ku kooko ku lubakala lu Nzambi.» 57Buna babulana mu ngolo mpe bakanga makutu. Ku manima, bamvimba bamubukumukina, 58bamunata ku mbazi yi mbanza na batona mu muwinda matadi. Zimbangi zituula binkutu byawu ha malu ma toko dimosi nkumbu andi Sawuli. 59Bu bedi muwinda matadi, Tyeni wusambila ti: «Mfumu Yesu, tambula mwela ani.» 60Mboki, wufukama na wulooka mu ngolo ti: «Mfumu, balemvokila disumu bedidi.» Bu kamana zonza bobo, ni kafwa.
Iliyochaguliwa sasa
Mavanga 7: dde Ddo
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© (Active) Wycliffe Bible Translators, Inc. All rights reserved.
