2 Tasalonikayi 2
2
Shɔlanɛ
1Dɔddɔrim n shɔbiiyi n gakɔɔtɔ sãnɛ ayuu Uɓeyelapa Yesɔ Kirisi anɛ au nyatolinɛ nyazɔ aru u kpaazɔ awuni, 2ɓanɛ ɔ sisɨn u ɓutitɔ wese tɛ̃ɛ̃ti ko ɔ sisɨn u lɛsi a vigbete shɔ shanɛ Uɓeyelapa lee sɔɔnɛ atɛ gboti. wɔɔɓa shɔwɔ shatɛ nankɔ a nya shanɛ suru, ko a Ɗaruubii nwanɛ, ko nɛu bee au sẽkoo. 3Mɔkaa yaa shɔwɔnɛ u ɗakarɛ ko-pi nyaba shɔpiya. Leeu yɛ a ɓa aruviya Uɓeyelapa Yesɔ bɛɛ anɛ setɛ shɔzɛ waanɛ i risi Ɗalapa kntitɛ, shɔlanɛm yɛ shɛrɛ, yɛ yɛkɛ wɛrɛ yaa. 4Shɔlanɛm yɛ ɔ̃ nɔpɔ̃ a ko-pi jaɗalapa shɔpiyani, ko vigbete shɔ bassiyɛni piti kpai yɛ bassiu yuu ai ɗekn, yɛ yɛrɛ u ɔ̃ a wɛrɛ Ɗa u tasiu yuu nɛnkɔ ɔ̃rɛ Ɗalapa.
5Ɔ ji kpaa sisɨn ɓayɛ? Aɗagbete n si ɔkɔɔni n gelɔɔ vimtɔ kpai. 6Dɔddɔrim a zɛ vigbete zãri vimiyi pɛlinɛtɛ, yɛ shɛ aɗagbete Ɗalapa kasiyɛ. 7Lanɛ ɓusinɛm u aɗɔgbete pɔ̃ shɔ, shɔ ɓɛ̃ɛ̃ Ɗalapa nya-ãsinɛ kalikali, ama shɔgbete shiri shɔ nɛ shɔ masinya ɓa a Ɗalapani ɓa, yɛ yɛ ɗekn a pɛlinɛni, setɛ Ɗalapa tuutɛ a nyabani. 8Kɛɗɔn shɔlanɛm yɛ shɛkɛkn, ama naa Uɓeyelapa Yesɔ kaanɛ, yɛ nyouvɔrɔtɔ au ɔ̃kinɛ gbete shɛ au nyani, u lɛsiurɛ au kɔlinɛ gbete au dɔbiiyɛni. 9Shɔlanɛm yɛ apɛ a japɛ̃pɛ̃ɛ̃ kaka, u pɛlivishonɛ zɔng vibiizaanɛ nyayeelinɛyi a vinɔlusinɛyini kpai. 10Yɛ pɛlivishonɛ a nyaba tottot u ɗaki shɔgbeteyi Ɗalapa yɛ lɛsiyɛ. I yɛ lɛsitɔ aruviya i bɛ̃ɛ̃ tɔ̃vɨng ɔrinɛtɔ, nɔgbeteyi isi kpaa raanɛyɛ. 11Aruukɔ Ɗalapa sho nyaba niinɛ pɛ̃niba u pɛlivishonɛ ai tette nɔgbete i ãsisɨn a ruu nyayeenɛ. 12Aru nankɔ shɔgbeteyi ji ãsisɨn ɓa Ɗalapa biini ɓa ama ai ɔri ba ruuvini, i yɛ lɛsiyitɔ.
Lɔwɔtɛ ɔ kpaa raanɛ
13N shɔbiiyi ɔ̃tɛ kaka jazɨng akɔrɔ u dɔ̃ri Ɗalapatɔ kopiɗaviya awɔ yuuni, ɔ shɔgbete Uɓeyelapa ɔriyɛ. Aruviya Ɗalapa gaa ɔkɔɔ lɔɔnɛ a nyaba Ɗa suru aru ɔ kpaa raanɛ a pɔ̃wɔrɛ ɔ ɔ̃ u shɔbii wɔsɔ-wɔsɔyi, ama awɔ nyaba sisɨn ãnɛ a vitɔ̃vɨng. 14Ɗalapa ɓawɔ nya a nyaba ruu tɔ̃vɨng gbete u nwarɔɔyɛ; ɓawɔ nya nɛ ɔ kpaa bassinɛ gbete Uɓeyelapa Yesɔ Kirisi ãwɔyɛ. 15Aruumkɔ n shɔbiiyi ɔ shiɗɔkaziti ayuu vitɔvɨng gbete u matɔɔyɛ, au nya gbete u nwarɔɔyɛ ko a sẽkoo au beeyɛ.
16Mɛnɛ Uɓeyelapa Yesɔ Kirisi au yuu a Ɗalapa u Ɓeye, shɔgbete ɔriu a ɔrinɛ gbete yisinya ɓayɛ au ɓusɨng tɔ̃vɨng shonɛ u ãu sisɨn lakinɛ, a sisɨn pɔ̃nɛni, 17u masɔɔbii u ãwɔ kaka kopiɗaviya ɔ pɛli vitɔ̃vɨng ɔ sha vitɔ̃vɨng.
Iliyochaguliwa sasa
2 Tasalonikayi 2: Laa
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
The Word for the World International and The Word for the World Nigeria