Mateyo UBULONDOLOSHI
UBULONDOLOSHI
Iki e kitabo kimo pa fitabo fine ifyo bakuuta ati, “Imbila Yabune.” Kila kitabo kyalilondolola pa bumi bwakwa Klistu. Fyalilembelwe na Mateyo, Mako, Luka na Yowane.
Bakasambilila ba kyebo tabaishibapo ulo ikitabo kyakwa Mateyo kyalembelwe, nomba batunganya fye ati kwena limbi ni mu mwaka wa 60 AD. Kabili inkende uko kyalembelwe nako takwaishibikwapo nomba nakyo kitunganishiwa fye ati, ni mu Palestine nangula mu Yelusalemu.
Kalemba ali ni Mateyo uwali ni kasonkesha wa musonko libe Yesu talati kumukuuta ukwisa kuba umusambi wakwe. Ishina lyakwe limbi ainikilwe ati Lebi. Ali umo pa basambi ikumi limo na babili, elo kabili alembeele Abayuda no kulanda sana pa malembo ya Mukipingano kya Kale ukukisha na pa makumi mutanda (60). Alimbikile pa kulangilila ati Yesu e Klistu kapususha uwasalilwe na Lesa uo bakasesema basobelepo. Kabili Mateyo alilembelepo sana pa Bufumu bwa mwiulu. Abayuda bali kusubila ati Yesu akesa kuteeka nge mfumu ya pa kyalo. Ekyo Mateyo alibikisheko sana mano no ku bakinkisha pa kulondolola Ubufumu bwakwa Lesa ubwa ku Mupashi.
Ikitabo kyakwa Mateyo kyabune sana pantu ukutampila fye kwa Kipingano Kipya mwalilembwamo amalembo ayengi ayo bafumya mu Kipingano kya kale. Ekyo Ikitabo kyakwa Mateyo kyalilundinkanya ifipingano fyonse fibili, ikya kale ne kipya. Bakasambilila ba kyebo baleeba ati limbi Mateyo ali kupalakanya ifitabo ifyakuba e fitabo fasano ifyakwa Mose mu Kipingano kya Kale: Imbila yakwa Yesu pa lupili (Mateyo kyapita 5 ukufika na mu kyapita 7) kuti twaipalakanya kuli lulya Lesa apeele Mose amafunde (Amafunde 19.3–23.33).
Ubutantiko bwa milandu
1. Mateyo atampilapo kulanda pa kufyalwa kwakwa Yesu ne ntampilo ya bupyungishi bwakwe.
2. Akonkeshapo no kulondolola pa masambilisho ayengi (ukutampila mu kyapita 5 ukufika na mu kyapita 25).
3. Pa kupelekeshako, alanda pa milimo yakwa Yesu mu kufwa no kushikuka kwakwe (ukutampila mu kyapita 26 ukufika na mu kyapita 28).
Iliyochaguliwa sasa
Mateyo UBULONDOLOSHI: ABT
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
The Word For The World International