Mateyo 9
9
Yesu aposha uwabulebe
(Mako2.1-12; Luka5.17-26)
1Kabili Yesu pa kupatama mu bwange pa kubwekelamo, aile bushilya bwa bemba, mu musumba mwakwe. 2Eko bamuleteele umuntu walwele ubulebe ninshi alilele pamalo. Pa kubona ifyo bamuteketele, Yesu alyebele uwabulebe ati, “We mwana, sansamuka apo imembu shobe shaelelwa.”
3Pali kyo, bakafundisha bamafunde balikuisosha ati, “Uyu muntu akopontela Lesa.”
4Na Yesu pa kwishiba amatontonkanyo yabo alibebele ati, “Nindo mukotontonkanisha ifya bubi mu mitima yenu? 5Ikyakwanguka apa kindo? Ukwebati, ‘Imembu shobe shaelelwa’ nangula ukwebati, ‘Alamuka wende.’ 6Epakwebati mwishibe ati Umwana wa Muntu alikwete amaka pesonde ayakwelela imembu.” Epakweba uwabulebe ati, “Alamuka, senda malo yobe, kabuye kobe kung'anda.”
7Naye epakuya kwakwe kung'anda. 8Ulo ibumba lyabwene fi, balipapile sana no kule kulumba Lesa awapeela maka ku bantu.
Yesu akuuta Mateyo
(Mako2.13-17; Luka5.27-32)
9Ulo Yesu afuminepo, epakubona umwalalume uweshina lya Mateyo, alikele mung'anda ya musonko. Epakumweba ati, “Nkonka.” Naye epakwima no kumukonka.
10Ulo Yesu bali kulya mung'anda mwaishilepo bakasonkesha na babembu balikele panshi pamo na basambi bakwe. 11Abafalise pa kubone fi balyebele abasambi bakwe ati, “Nindo kafundisha wenu alila pamo na bakasonkesha na babembu?”
12Yesu pa kumfwe fyo alibebele ati, “Abatuntulu tabakabila kondapa kano fye abakulwala. 13Nomba kabuyeni no kusambilila umo iki kyapilibwila, ‘Nkabila uluse temalambo,’ ntaishile mu ku kuuta abololoke, kano ababembu.”
Ikipusho palwa mafungo
(Mako2.18-22; Luka5.33-39)
14Abasambi bakwa Yowane pa kwisa kuli Yesu balimwipwishe ati, “Nindo fwebo na Bafalise tufungila ilingi nomba abasambi bobe nindo batafungila?”
15Yesu alibasukile ati, “Bushe nshindikishi shakwa nshibwinga shibe no bulanda ulo shili pamo na nshibwinga? Nomba inshita ikesa elo nshibwinga akasendwa, ulo lwena kulekufunga.
16“Tapangaba nangu umo angabika ikikamba ikipya pa nsalu yakifuusha, epali ikikamba kipya kyaisakulepula insalu ne kipunda kyakulilako. 17Ekyo tekuti babike umwangashi uutabila munsupa ishakukota, epali shalepuka no mwangashi waitika, waonaikila pamo ne nsupa. Nomba balongesha umwangashi uutabila munsupa ishipya, epakupususha fyonse fibili.”
Yesu abuusha kisotwe kubakufwa kabili aposha umwanakashi wa bulwele bwa mukunko
(Mako5.21-43; Luka8.40-56)
18Ulo Yesu ali kulanda ifyo, palishilepo intungulushi ya Bayuda imo, ya mufukamina, yalimwebele ati, “Umwana wangi kisotwe afwa, nomba wise ngale umutambikepo ukuboko, epakwebati abe umutuntulu.”
19Naye Yesu na basambi bakwe epakumukonka.
20Elo umwanakashi uwali kulwala umukunko pa myaka ikumi limo naibili naye alikonkele mu numa, no kwisa kwikata ku lusempe lwa nsalu yakwa Yesu. 21Pantu mu mutima alyebele ati, “Nga nkumyeko fye ku nsalu yakwe, nkopola.”
22Yesu pa kupilibuka, amubona, amweba ati, We mwana wangi, koseleshiwa apo ikiteketelo kyobe kilikuposeshe. Pekapo umwanakashi alipolele.
23Yesu pa kwingila mung'anda ya ntungulushi alisangilemo bakalisha bakipolilo na bali kuloosha. 24Yesu epakubeba ati, “Fumineni panse, uyu kisotwe tafwile, alilele fye mutulo.” Elo balamuseka. 25Ulo abantu bafumine panse, elo aingilemo no kwikata kisotwe pa kuboko, naye epakwalamuka. 26Ne lyashi lya kya kitikile lya sabankanine mu kyalo kyonse.
Yesu aposha impofu shibili
27Yesu pakufumapo, abalalume babili abali ni mpofu balimukonkele bakopunda ati, “Yesu mwana David, utulangulukileko!”
28Ulo Yesu aingile mukati, impofu shilya shibili shalimukonkele, naye epakushipusha ati, “Bushe mukoteketela ati nebo kuti namiposha?” Nasho shalimwasukile ati, “Ee mukwai!”
29Epakushikata pa menso, Yesu alishebele ati, “Nakibe ngefyo muteketele!” 30Pekapo amenso yabo yalisukile no kwamba ukubona. Yesu epakubebekesha ati, “Mwiebako muntu nangu umo ikyakitwa pano.”
31Nomba bena pakufumapo, balisabankenye ilyashi pali Yesu kubekashi bonse aba mukiputulwa kya kilya kyalo.
Yesu aposha kibuulu
32Ulo bali kufuma, abantu bambi baliletele kuli Yesu umuntu uutali kulanda pantu ali ne kibanda. 33Panuma atamfyamo ikibanda, pekapo umuntu epakwambako ukulanda. Bonse balipapile bakoebati, “Tatwabonapo ikyakubefi mu Islaeli!”
34Nomba Abafalise bena balyebele ati, “Ni ku maka ya kibanda kikulu eko atamfisha ifibanda.”
Yesu aumfwe nkumbu pa bantu
35Ulo Yesu ali kutandalila bantu mu misumba na mu mishi. Alikufunda mu ma Sinagoge no kulekubila Imbila Yabune iya Bufumu, no kulekuposha amalwele ya kupusana pusana no ku konswa konse. 36Ulo abwene abantu abakuti ubwingi, alibakwatile inkumbu, pantu bali abatakaniwa, abapelelwa kubati ni mbelele shakubulwa kakema. 37Elo aebele abasambi bakwe ati, “Ubusomboshi buli kulile, nomba ababomfi bali kepele. 38Ekyo pepeni kuli Shikulu umwine wa busomboshi, pakwebati engatumako ababomfi mwibala lya busomboshi bwakwe.”
Iliyochaguliwa sasa
Mateyo 9: ABT
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
The Word For The World International
