Mateyo 26
26
Bapinga ukwipaya Yesu
(Mako14.1-2; Luka22.1-2; Yowane11.45-53)
1Pa kupwisha ukusambilisha ifi fyonse, Yesu alyebele abasambi bakwe ati,
2“kwashalako fye nshiku shibili ninshi twaingila mu mutebeto we pasaka elo no Mwana wa Muntu ali no kwi katwa no kwisa kutanikwa.”
3Elo banshimapepo bakindami na bakilolo balikolongene pamo kung'anda yakwa nshimapepo mukulu, Kefasi. 4Eko bali kupingana pa fyo bangekata Yesu mu bumfisolo no kumwipaya 5Balyebele ati, “Teti tukite fyo pa nshita ya mutebeto epali abantu baimye kimfulunganya.”
Yesu ba musuba amafuta ku Betani
(Mako14.3-9; Yowane12.1-8)
6Ulo Yesu aile ku Betani alingile mung'anda yakwa Simoni wa fibashi, 7elo mwaishilepo mwanakashi umo ne botolo lya mafuta ya ku nunkila kwa bune kabili ayamutengo sana, apo ninshi Yesu akolya. Epakwitulwila ayo mafuta pa mutwi wakwa Yesu. 8Abasambi pa kubone fyo kyalibashikitile, epakwebati, “Nindo bako onawila ya mafuta?” 9“Pantu aya mafuta nga kuyakushitisha kuti twakwatapo indalama ishakufula no kupeelako abalanda.”
10Nomba Yesu alishibile fyo bali kulanda, alibebele ati, “Nindo mukokyushisha umwanakashi uyu? Tapalipo mulandu akita pali nebo. 11Abalanda mwalekuba nabo lonse nomba tamwakabepo na nebo lonse. 12Ifi aitulwila mafuta pali nebo kumpekanya kwa kushikwa kwangi. 13Mukine nkomyebati, konse fye uko Imbila Yabune ikayakubilwa, ikyo mwanakashi akita pano kikashimbulwapo nge kibukisho kyakwe.”
Yuda asumina ukwalukila Yesu
(Mako14.10-11; Luka22.3-6)
14Elo umo pa basambi ikumi limo na babili uwe shina lya Yuda Iskalioti, aile kuli banshimapepo bakindami, 15mukubepushati, “Nindo mukampeela nga nkamiletele Yesu?” Nabo epakumupendela indalama sha silfele amakumi yatatu. 16Pekapo, Yuda ali kufwailisha fye nshita ilingilile ukumwikatilapo.
Yesu na basambi bakwe balila pamo Ipasaka
(Mako14.12-21; Luka22.7-13, 21-23; Yowane13.21-30)
17Pa bushiku bwa ku tampilapo ubwa kulilamo imikate itatutumuka, abasambi baishile kuli Yesu ne kipusho ati, “Bushe nipi ukofwaya tuye kupekanisha webo Ipasaka?”
18Yesu alibasukile ati, “Kabuyeni mukosanga umwalalume umo mu musumba,” muye kumwebati, “Kafundisha aebati, Inshita yangi ilipalamine, nkoisa kuliila Ipasaka kobe ku ng'anda pamo na basambi bangi.”
19Abasambi baile kupekanya Ipasaka nge fyo abebele.
20Pakyungulo, Yesu na basambi bakwe ikumi limo na babili ba lyandalele ku kulya. 21Ulo bali bakolya, Yesu alibebele ati, “Nkomyeba mukine ati, umo pali mwebo akongalukila.”
22Abasambi balisakamikilwe, kabili balitampile ukulekumwipusha umo umo ati, “Bushe ni nebo Shikulu?”
23Yesu alibasukile ati, “Uukoshimpikila umukate mu nsani pamo na nebo ninshi eweko yo. 24Umwana wa Muntu ali no kufwa nga filya kyalembwa, nomba kalanda kuli uyo akomwalukila. Nga kyaliwemepo uyo muntu nga ta fyelwe!”
25Elo Yuda uwa mwalukile alipwishe ati, “Bushe ni nebo Shikulu?”
Yesu alimwasukile ati, “Ulilandile ati ni webo wine.”
Umulalilo wakwa Shikulu Yesu
(Mako14.22-26; Luka22.14-20; 1 Kolinto11.23-25)
26Ulo bali bakolya Yesu alibulile umukate, atashishe no kupesaula elo apeele na ku basambi bakwe ati, “Buleni mulye, uyu e mubili wangi.”
27Elo kabili alibulile ulukombo, atashishe Lesa no kubapeela ati, “Nwenimo mwense. 28Uyu e mulopa wa kipingano kyangi uukoitulukila pa mulandu wa bantu abakuti ubwingi pa kwelelwa kwa membu shabo. 29Nkomyebati ntakanwepo libili ifisabo fya ku mwangashi mpaka fye bulya bushiku ulo tukesa kunwa pamo fwense umwangashi upya mu Bufumu bwakwa Tata.”
30Pa kupwisha fye ukwimba ulwimbo, epakuya ku lupili lwa Miolife.
Yesu asobela uku kaanwa kuli Petelo
(Mako14.27-31; Luka22.31-34; Yowane13.36-38)
31Elo Yesu aebele abasambi ati, “Buno bwine bushiku mwense mu kombutuka pantu kyalilembwati, ‘Nkoma umukemi ne mbelele shikapalangana.’ 32Nomba pa numa ya ku shikuka kwangi, nkamitangilila ku Galile.”
33Petelo epakulanda ati, “Nebo ntakamishe nangula aba bonse bangamisha.”
34Yesu alimwasukile ati, “Buno bweko bushiku, ulo mukolwe talati kulila, ukonkaana imiku itatu.”
35Petelo alimwasukile ati, “Nangu ningafwa na mwebo, nebo teti mikaane.”
Na basambi bambi nabo balilandile kimo kine.
Yesu apepa mu Getisemani
(Mako14.32-42; Luka22.39-46)
36Elo Yesu atwele abasambi bakwe ku nkende ya Getisemani epakubebati, “Ngale ikaleni pano ulo nkoya palya mu kupepa.” 37Ali na Petelo na bamwana Sebede babili. Abonekele uwa bulanda kabili uwa kusakamikwa sana. 38Epakubeba ati, “Ndiketwe ubulanda sana ku mutima pepi fye ne mfwa.”
39Kabili aendeleleko pa ntanshi panini, aipoosa panshi no ku pepa ati, “Mwe Tata, ngakingakitwa, lekeni ulu lukombo lupite pali nebo. Nomba tekufwaya kwangi, kano ukufwaya kwenu.”
40Ulo abwekelemo kubasambi bakwe alisangile balilele, epakweba Petelo ati, “Nindo mwebo mwafililwa ukulola pamo na nebo nangula fye pa nsa imo? 41Loleni no kupepa epali mwaponena mu matunko. Umupashi ukofwaya lelo mubili ulinakile.”
42Na kabili Yesu alibwekelemo mukupepa ati, “Mwe Tata, ulu lukombo nga talungapita kano fye nwinemo, ukufwaya kwenu ku kitwe.” 43Kabili alibwekele ukwali abasambi bakwe no kusanga balilele, bali kufilwa ukulola.
44Kabili Yesu alishiile abasambi no kuya kupepa pa muku wa kitatu akolanda mashiwi yamo yene. 45Ulo abwekelemo ku basambi alibebele ati, “Bushe mukili mulilele no kulekutuusha? Boneni inshita ilipalamine ulo Mwana wa Muntu akapooswa mu minwe ya mbifi. 46Alamukeni, boneni aisa uwakungalukila.”
Yesu ba mwikata
(Mako14.43-50; Luka22.47-53; Yowane18.3-12)
47Yesu ulo ali kulanda, elo Yuda, umo pa basambi afika pamo ne bumba ilikulu ukufuma kuli banshimapepo bakindami na bakilolo, balikwete na mapanga, ne misumbo. 48Uwamwalukile alibebele ati, “Ikyakwishibilako mukobona uyo nkotomona, ninshi eweko yo, kumwikata.” 49Yuda naye epakulungama fye apabelele Yesu no kumwebati, “Umutende kuli webo kasambilisha!” Elo amutomwene.
50Yesu alimwasukile ati, “Kibusa, kita ikyo konkele kuno.”
Elo baishile kwikata Yesu. 51Elo umo pali balya bali pamo na Yesu abulile ulupanga no kutempulako ukutwi kwa musha wakwa nshimapepo mukulu. 52Yesu alimwebele ati, “Bwekesha ulupanga mu kikwama kya luko pantu uwanga no lupanga akafwa kulupanga. 53Bushe tawishibile ati, nga natemwa kuti naeba Tata atuma kinkupiti wa bamalaika ukukila pa mabumba amakumi yabili? 54Nomba tali kano fye ikyalembwa kya fikilishiwa ati kilingile kyabe fyo?”
55Elo Yesu alandile ku mabumba ya bantu pali ilya nshita ati, “Nindo mwaishila kuli nebo na mapanga ne misumbo kubati ndikapondo? Nali kuba nenu mwi Tempele ukwakubulapo kunjikata. 56Nomba fyonse fikokitika pa kufikilisha ifyo bakasesema balandile.”
Elo abasambi bonse balifulumukile no kumusha fye eka.
Yesu mu kilye kya Bayunda
(Mako14.53-65; Luka22.54-55; 63-71; Yowane18.13-14; 19-24)
57Bamutwele ku ng'anda yakwa kefasi, nshimapepo mukulu ukwakolongene bakafundisha bamafunde na bakilolo. 58Petelo naye alikonkele pa numa akatalamukila no lubansa lwa ng'anda yakwa nshimapepo mukulu epakwikala na balinshi pakubona ifyo kili no kuba. 59Banshimapepo bakindami na banshikilye bonse bali kufwailisha bukambone bwa bufi pakwebati Yesu bamwipaye, 60nomba balifililwe, nangu abengi bapeele ubunte bwabufi baikyushishe fye. Kulipelwepelwe abalalume babili balimakene 61ati, “Uyu muntu ali kulandati, ‘Ndikwetepo amaka ya kubongolole Tempele no kulikuula pa nshiku shitatu.’”
62Nshimapepo mukulu alimakene no kweba Yesu ati, “Bushe webo taukwetepo ikyasuko pali ubu bunte aba bantu bakokutunganya?” 63Nomba Yesu alifye kelele. Kabili nshimapepo mukulu alimwebele ati, “Mwishina lyakwa Lesa wa mweo, lapa fye nga ni webo Klistu, Mwana Lesa.”
64Naye Yesu alyasukile ati, “Ulilandile ati ni nebo wine. Nomba nkomyeba mwense ati, ukufuma pali nomba, mukabona Umwana wa Muntu alikele ku kwa mulyo kwa wa Maka Yonse no kwisa kufuma mu makumbi ya mwiulu.”
65Palikyo nshimapepo mukulu alilepawile ikyakufwala no kulandati, “Mwense muliyumfwilile ifyo akoponta. 66Mukotipo shani?” Nabo balyasukile ati, “Wa milandu yo alingile fye ukufwa.”
67Epakumushipila amate pa kinso, ukumupumaula, na bali kumupama amapi, 68balimwebele ati, “Klistu, Sesema kuli fwebo! Nani wakuuma?”
Petelo akaana Yesu
(Mako14.66-72; Luka22.56-62; Yowane18.15-18,25-27)
69Pekapo ninshi Petelo alikele panse ulo umo kisotwe pa basha bakwa nshimapepo mukulu alilandile ati, “Na webo wine wali kuba nakwe Yesu umwina Galile.”
70Nomba naye alikene pa kinso kya balipo bonse ati, “Nteshibile ikyo ukolandapo webo.” 71Elo aile lwapa mwenshi wa lubansa, umwanakashi umbi naye umusha pa kumubona alyebele abalalume bali palya ati, “Uyu naye alipamo na Yesu umwina Nasaleti.”
72Nalo Petelo alikene ati, “Nkolapa nebo ntamwishibapo uyo muntu.”
73Kangu kangu fye palishilepo abalalume baimanine peka pali Petelo bamwebati, “Kyakine wali pamo naye pantu fye no musango ukolandilamo ukolanga.”
74Petelo alimwasukile ati, “Nkolapa mu kine ntamwishibapo uyo muntu.”
Pekapo na mukolwe alila. 75Elo Petelo aibwishe fyo Yesu amwebele ati, “Ulo mukolwe talati kulila, ukonkaana imiku itatu ati tawangishiba.” Epakufumina panse no kuyakulila sana.
Iliyochaguliwa sasa
Mateyo 26: ABT
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
The Word For The World International
