Mateyo 19
19
Ukulekana mu fyupo
(Mako10.1-12)
1Yesu pa kupwisha ukulanda ayo mashiwi, alifumine mu Galile no kufika ku kyalo kya Yudea bushilya bwa nika ya Yodani. 2Abantu abakuti ubwingi balimukonkele. Naye kulya kwine epakubaposha ku malwele.
3Abafalise bambi balishile pa kumwesha ne kipusho ati, “Bushe amafunde yesu yalipeela insambu ku mwalalume ukuleka umukashi pa mulandu uli fye onse?”
4Yesu alibasukile ati, “Bushe tamwabelengapo ikyebo kyaebati pakutampa, kabumba alengele umwalalume no mwanakashi? 5Elo Lesa aebele ati, ‘Nipalikyo umwalalume ashiila wishi na nyina no kulundinkana no mukashi wakwe, nabo babili baba umubili umo.’ 6Tabalipo babili nomba, bali fye umubili umo. Ikyo Lesa alundinkanya, umuntu nangu umo ekilekanya.”
7Abafalise nabo epakumwipusha ati, “Nindo Mose atupeelele ifunde lyakwebati, umwalalume ulo afwaya ukuleko mukashi wakwe ali no kulemba kalata wa kumulekelapo no kumutamfya?”
8Yesu alibasukile ati, “Ikyo Mose amipeelele insambu shakulekana ni kyo imitima yenu yakutalama. Nomba pa kwamba tefyo kyali. 9Nomba nebo nkomyeba ati, onse uwaleka umukashi wakwe, apakubula umulandu wa bukende, no kuyakupapo umwanakashi umbi, ninshi akita ubukende.”
10Abasambi bakwe balimwebele Yesu ati, “Ifinga efyo kyaba pa mulume no mukashi ninshi kuti kyabapo bwino ku muntu nga topile.”
11Yesu alibasukile ati, “Tekuli bonse ilisambilisho lingabomfiwa, kano fye kubo kyapeelwa. 12Pantu kwaliba imilandu iya ku pusana pusana iilenga bantu kutoopa. Bambi efyo bafyelwe. Bambi balitungulwa fye ku bantu, elo bambi nabo nipa mulandu wa Bufumu bwa mwiulu. Uwingapokelela ikisambilisho iki, ngakipokelele fye.”
Yesu apaala abaike
(Mako10.13-16; Luka18.15-17)
13Abantu bambi baletele abaike kuli Yesu pakwebati atambalikipo amaboko yakwe pa kubapepelako. Nomba abasambi balitampile ukukalipila balya bantu. 14Yesu alibebele ati, “Lekeni abaike bese kuli nebo, mwibalesha pantu ebene ba Bufumu bwa mwiulu bakuba nga baike.”
15Alitambalikilepo amaboko yakwe pa baike, elo no kufumapo.
Umulumendo wa kunonka
(Mako10.17-31; Luka18.18-30)
16Kuli Yesu kwaishilepo umuntu umo ne kipusho ati, “Kindo ikyabune ningakita pakwebati nkwatepo mweo wa muyayaya?”
17Naye Yesu ati nindo uko ngipushisha pa kyabune? Tapabapo Uwabune nangu umo, kano fye Lesa eka. Ulekukonka fye ifipope elo ukaba no mweo.
18Naulya muntu alimwipwishe ati, “Fipope ndo?” Yesu naye alimwasukile ati,
“Wilekwipaya, wilekukita bukende, wilekwiba, wilekubepesha bambi ifya bufi, 19ulekukindika wiso na noko no kutemwa umunobe nga we mwine.”
20Umulumendo alimwasukile ati, “Ifyo fyonse nebo ndafikonka, bushe palipo fimbi ni ngakita?”
21Yesu alimwebele ati, “Nga ukofwaya ukubapo uwakupwililika, ngale kabuye ushitishe ifyuma fyobe fyonse, upeele ne indalama ku balanda, lwena uka kwata ifyuma mwiulu. Elo nomba wise kunkonka.”
22Pa kumfwefyo, umulumendo afuminepo uwa bulanda ikyo alikwatishe fyuma.
23Yesu aebele abasambi bakwe ati, “Nkomyebe kine kine ati, kyakwafya kuwa fyuma pa kwingila mu Bufumu bwa mwiulu. 24Nkobwekeshapo na kambi ati, kyakwangukapo ingamali ukupita mulinso lya nshindano ukukila umukankala ukwingila mu Bufumu bwakwa Lesa.”
25Abasambi pa kumfwa ifyo, kyalibapapwishe sana epakwipusha ati, “Nga ni nani angapusuka?”
26Yesu naye pakubalolesha ali basukile ati, “Ku bantu kintu kya yafya, nomba kuli Lesa fyonse kuti fyakitwa.”
27Petelo naye epakwipusha ati, “Nga fwebo tukasangamo indo, apo twalisha fyonse no kule kumikonka?”
28Yesu alimwasukile ati, Nkomyeba mukine ati, mu kyalo kipya ulo Mwana wa Muntu akesa kwikala pa kipuma mu bukindami bwakwe, na mwebo mukesa kwikala pa fipuna ikumi limo na fibili ukulekuteeka no kupingule milandu ya mikowa ikumi limo na ibili iya Islaeli. 29Uyo onse uwasha mayanda, bawabo, inkashi, wishi nangula nyina, abana na mabala pa mulandu wangi, akapeelwa imiku umwanda umo no mweo wa muyayaya peka. 30Nomba bengi abatangile bakesa kuba abakulekelela, na bengi abalekelele bakesa kutangila.
Iliyochaguliwa sasa
Mateyo 19: ABT
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
The Word For The World International
