oLuka 2
2
Omoma ko Oyesu
(oMatiyu 1.18-25)
1Ipu kishi oni Okesa Ogostu yuwa tono mo ana yase ni bokpagye ko Oroma ni yika. 2Omani wokoka kikyikyo ni gbodagye ishini Okiriniyu woteyi ko Osiriya ni. 3Kweyi ananoho kwikye gogya nu shini ana yoka.
4Isu sho Onazareti kipu ko Ogalili bita go Obetalami kipu ko Ojudiya ikweyi koni obwole ko Odawuda. 5Oga kpo Omeremu ni ayoko ni shini anayuwa ka, kweyi Omeremu bipu 6Ni atayayo bipu ko Obetalami ni, ishi koma nu gye, 7kweyi omoyi nu kikyikyo nongo. Oyakyi kanu ikpiye, oyo tagye ipu ko okpa, ikweyi koni agboda kokya lo ni.
Awogbeho ko bize kpa Ayoleho
8Agbabo kokpagye ni awogbeho ko obize bese otu ba yiyi kwobize wa. 9Oyoleho ka Adole bose dawa, kweyi oyoyu kigyashi ka Adole yu bwiso, oshi yuwa kwu. 10Oyoleho ke wa kadawa mo, <<Ala kayoshi lo. Nbyo oshu neshi ko otunehe neneshi wa dala ni yawa kase kpiri ni.>> 11Ikyeni ogya ko Odawuda ami Inongmese dala, anu pini wo Okristi Adole la. 12Omani ya woyi dala: Ala baga moyi ayakyi kanu, gwutagye ikweyi ko okpa.>>
13Ebebeni ogbayi ka ayoleho neneshi kiso ba shawa kweyi ba sho Owuso iye mo,
14<<Igyashi wa ko Owuso ipu ki iso!
Ipu kese otumene yo kpawase ni oya shotunehe kpawa ni.>>
15Ishini ayoleho kwikye gawa giso ni, awogbeho ko obize ka diyiwa mo, <<Ahan go Obetalami ga moza ni gbodagye, byoni Adole ka daha ni.>>
16Bwebe ni, ayiso papa gato Omeremu kpo Isu kweyi oyi gwutagye ipu ko okpa. 17Ishini awogbeho kobize ga mo ni, akoshu koza ni aka dawa ikweyi koyi mani, 18kweyi kpiri kase ni pwela ni awogbeho ko bize kani, igbashi yuwa kwu. 19Omeremu ke yela mani kpiri kpo shotu nu kweyi ya ka ipu kotu nu. 20Awogbeho ko bize kwikye kpotunehe kweyi ba sho Owuso iye ikweyi koza ni apwo aki ma, olema byoni aka dawa ni.
Ato Oyesu Iye
21Eno komahata, ashofu, kweyi atiye mo Oyesu, iye ni oyoleho danu ome abipu nu ni.
22Ishini ataba kweyi byoni ono ko Omusa kani, Omeremu kpi Isu, byo go Ojerusele ko oyo da Adole. 23Byoni ono ka Adole ka ni, <<Oyi kikyikyo nongo aba yo nabo da Adole.>> 24Kweyi ana ga peshi byoni ono ka Adole ka ni mo, <<Aba byikoho kwe ayi ko otitiribi epa.>>
25Kweyi ipu ko Ojerusele, ongo oye iyenu wo Osimo, owaseneshi, oki ya geyagye do Owuso. Kweyi oyagye ya gbeyi kase ni wa ngma ayi ki Izrayila koni Omaku ko Owuso yo kpa anu ni. 26Omaku ko Owuso shiyanu mo oya gekwu lo so mowowa ko Okristi ni Adole shokoyi ni. 27Omaku ko Owuso yo nyiso gole ko Owuso. Kweyi ene kpa ada ko Oyesu byo gole ko Owuso, shini ana yoza ni ono ko Omusa ka ni. 28Osimo kwoyi kweyi sho Owuso iye mo:
29<<Adole byoni oshokoyi ni,
yoshe wo na minyo ipu kotu mene.
30Koni iyi hin mase ni otoleho ko wa ngmaha,
31ni okyanutu obutu kase kese mani kpiri,
32oya woyoyu dase ni wo Ase ko Oyahuda lo ni, kweyi oki ya wigyashi dase wo ki Izrayila.>>
33Kweyi igbashi yada kpene koyi yikwu, ikweyi ko oza ni aka ikweyi nu ni. 34Ebeni Osimo suwa aboneshi kweyi ka do Omeremu inanu mo: <<Oyi mani asho ko wowe kigbo kpo onyiso kase lewa okpagye ki Izrayila, kweyi oki ya woyi ni ase ba tela nu ni, 35shini ela ni yipu kotu kase kpiri na tese. Kweyi ela mani ya lema byo okpa pini ayitotu la.>>
36Inobane oye nonya, iyenu wo Ohanatu oyi ko Ofanuwe wose ka Asha. Oyagye kpo obunu ashayi ahapa ome obunu gekwu, osawukye kotata, 37kweyi owonyokwu ashayi awahata ayene, osho ole ko Owuso bita lo, oyebeni keno kotu ya geyagye do Owuso ya kwokwunu kpinarigwu. 38Ishi oni gyogye, oshotunehe do Owuso kweyi okela ikweyi koyi mani dawase ni kpiyi shagye ba gbeyi kishi ni Owuso ya ngmo Ojerusele ni.
39Ishini Isu kpo Omeremu yoza kpiri ni ono ka Adole ka ni, akwikye gogya wa ko Onazareti agye ko Ogalili. 40Oyi mani gye kweyi loshu, kweyi oki ziyi, kweyi oneshi ko Owuso yo kpanu.
Oyesu ipu ko Ole ko Owuso
41Ipu kishayi kpiri, ene kpada nu ba go Ojerusele ebe ki Imya ko Sheyi. 42Ishini Oyesu gyishayi igwepa ni, agi Imya byoni owodu wa ni. 43Ni Imya kweyi ni, akwikye gole wa, Oyesu tayayo yo Ojerusele, inanu kpada nu gyelo. 44Amamo oyipu kikpo kawase ni ayawu kpawa bwo otukpokyi gonose, ni amo lo ni, akwotu ko tikpo nu ipu kayene wa kpase kiyi gyogye. 45Ishini amo lo ni, akwikye go Ojerusele ga tikpo nu. 46Itikpi keneta, awa yo pye ipu kole ko Owuso, yagye kpa awofoza, oya pwela wa, oki ya duwo oka kela. 47Kpiri kase ni pwela nu, igbashi yuwa kwu kpela ni oya nyuwagbo ni. 48Ishini inanu kpa ada nu yiyi shoni, igbashi yuwa kwu. Ebeni inanu kadanu mo, <<Oyi, ojiya ni oyaha mani? Ami kpa ada wo ba tikpo wo gbishi ni otu kaha bya.>> 49Oduwo oka mo, <<Ojiya ni ala ba tikpo hin? Ala gye mo nshu ko yole kada hin lo?>> 50Awa ke gyoza ni oya ka ni lo.
51Ebeni ogbosuwa go Onazareti, oya geyagye dawa. Inanu ke kpela mani kpiri yi kposhotu nu. 52Kweyi Oyesu gye ipu kikpiye kpoziyi, kweyi Owuso kpa asuse yimu nu.
Iliyochaguliwa sasa
oLuka 2: ALA
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
THE WORD FOR THE WORLD INTERNATIONAL, THE WORD FOR THE WORLD NIGERIA
