Matthew 27
27
Jesus e kavena kia Pilate
(Mak 15.1; Luk 23.1–2; Jon 18.28–32)
1Tera i mo pongi pongi, nga ariki fai kava ma nga matapure kaatoa ne fai aratou atamai rei kia Jesus ke tuku koia ki te mate. 2Ku ratou rii tia koia kia seni, tera ratou kavea raa koia o soria ki te makeke o Pilate, te gavana o nga Roman.
Judas ne tamate maso koia
(Act 1.18–19)
3 #
Act 1.18,19. Tera te vasia o Judas, koia ne sori ia Jesus, ne nai iroa ina ko Jesus ka tukuna ki te mate, koia ne siaki ko na atamai, tera ne poi o fokisaki koa foi mane e fua toru ki nga ariki fai kava ma nga matapure, 4muna atu rei kiei, “Kuou ku sara rei ne kau soria pouri ko te tangata tonu ki te mate!”
Tongoi atu rei koratou, “Komatou si see rau pe ki sea neenaa i tou kee faasi!”
5Tera rakuna arei a foi mane e Judas ki raro i rota Paito Tapu, kae poi arei o noa ua maso koia.
6Tera sau rei e nga ariki fai kava koa foi mane, kae mumuna, “E sara ia tatou fono ke tuku koa mane nei ki te ngangea tuku mane o te Paito Tapu, natafito a mane nei o te toto.” 7Tera ia tua ku faka tonu ea ratou ku oti, ta tauvi rei ea ratou koa mo kere e pena koa longi ma faangongo e fai, ke fai te kere tamate o faoa e oomai mai rake fenua. 8Tera teinei arei e ati “Te Kere o te Toto” oko rei ki te aso nei.
9Tera pe nia ma te ʻprophetʼ Jeremiah ne muna kiei, ku au tonu maori rei:
“Koratou ne sau te fua toru
oa mane,
te fakataunga a te kano fenua
o Israel ne fifia ke tauvi kiei.
10Ta sau rei koa mane o tauvi
koa mo kere noko pena
koa faangongo ma longi iei,
pe te Ariki ne muna mai kia kuou.”
A fesiri siri anga a Pilate kia Jesus
(Mak 15.2–5; Luk 23.3–5; Jon 18.33–38)
11Tera ko Jesus ne faka tuu rei ia mua o te gavana o nga Roman, kae fesiri siri atu rei koia kiei, “Ko kee te tii o nga Jew?”
Tera tongoi atu rei ko Jesus, “Teenaa rei ko kee e muna iei naa.” 12Kae koia si se ne muna rei pe nia ma nga ariki fai kava ma nga matapure e faka marauraua taranga kiei.
13Tera ko Pilate muna atu rei kiei, “Ko kee si see fakarongo kia nea kaatoa e ratou tukuakina kia kee nei?” 14Kae ko Jesus si see fifia ke tongoi ko se foi taranga, tera Pilate ku maatea rei na faka rere mauri.
Jesus ku tukuna ke tamatea
(Mak 15.6–15; Luk 23.13–25; Jon 18.39—19.16)
15I nga tau katoa i vasia te Kai kai o te Faka sara anga, te gavana o nga Roman e fai tana tonu ke tuku ki tua se tangata fakkiro sokotasi e kaaisi te kanoa fenua kiei. 16I te vasiaa, te tangata fakkiro e iroa ina, na ingoa ko Barabbas. 17Tera i te vasia te kano fenua ku taanaki mai iei, fesiri atu rei ko Pilate kia ratou, “Koai te tangata kotou e fifia ke sara atu ki tua? Ko Barabbas pe ko Jesus e ati ko Christ?” 18Koia ku nai iroa laoi rei ko nga Jew ne faka makeke o sori ko Jesus kia koia natafito koratou e makkau kiei.
19I mo vasia o Pilate ku nofo ki na noforanga i te paito o te faka tautara, na nofine ne sori mai foi taranga kiei, “Kau see fai pe nia ki te tangata tonu naa, natafito i taku mee naa poo kuou e maatea rei toku fakarongo neaisu iei.”
20Tera ko nga ariki fai kava ma nga matapure ne faka oso ko te kano fenua ke kaaisi kia Pilate ke tuku ko Barabbas ki tua, kae ke tuku rei ko Jesus ki te mate. 21Kae ko Pilate fesiri rei ki te kano fenua, “Koai ia koraua nei, kotou e fifia kiei ke sara atu kia kotou?”
Tongoi atu rei koratou, “Ko Barabbas!”
22Tera ko Pilate fesiri atu rei fokia kia koratou, “Faka pena, a nia rei ma aku ka fai kia Jesus e ati ko Christ?”
Tera koratou kaatoa tongoi rei, “Tukia ria koia naa!”
23Kae fesiri rei ko Pilate, “Sea rei ia tana sara ne fai?”
Tera koratou ne fakatafito o foorua rei ki runga ia ratou fonga reo, “Tukia ria!”
24I te vasia o Pilate ne ono koia ka se ma fai rei pe ki fea, kae ku fai ke tafito te featunga, koia ne sau koa vai, fufuru ko ana rima ia mata o te kano fenua, kae muna atu, “Kuou e aatea i te mate o te tangata nei! Kae na mate nei ia kotou ia!”
25Tera tongoi atu rei te kano fenua kaatoa, “Tuku ko na mate ke naa i matou faasi, ma matou tamariki!”
26Tera faka masara rei e Pilate ko Barabbas kia ratou; tera kae muna atu rei ko Pilate ki nga faoa tau ke sasa ko Jesus iei, kae sori rei ea koia ke tukia ki te raakau.
Faoa reo o nga Roman ne fai faka kata kia Jesus
(Mak 15.16–20; Jon 19.2–3)
27Tera a faoa reo o Pilate ne kave ko Jesus ki rota paito o te gavana o nga Roman, kae taanaki kaatoa rei o riikofi kiei. 28Ne ratou tara ria ko ana suru, kae ratou faka faa uru rei ko Jesus ki te suru roa e fero. 29Tera koratou ne fai te fau tara taramoa o faka fau ki na poko uru, kae sori te potu raakau ki na rima matau; kae tokoturi ki raro i ana mua, o fai faka kata kia Jesus, o kaaranga, “Nofo roa te Tii o nga Jew!” 30Tera kae ratou anu sia ria koia, ma kae sau te potu raakau o ratou saia ria ko na poko uru kiei. 31Tera i te vasia koratou ku faka oti ratou fai faka kata kiei, tara kese rei ea ratou ko te suru fero ki tua, ma ne faa uru ko ana kee suru ia. Tera kave raa ea ratou ke tukia ki te raakau.
Jesus e tukia ki te raakau
(Mak 15.21–32; Luk 23.26–43; Jon 19.17–27)
32Tera te vasia koratou e oro ki tua iei, ne fekitei ki te tangata mai Cyrene na ingoa ko Simon. Tera a faoa reo ne ratou faka oso fia koia ke amo ko te raakau o Jesus. 33Tera koratou ne oomai ki te ngangea e ati ko Golgotha, na atamai, “Te Ngangea e ati te Pokouru”. 34Tera te ngangea ne ratou soria koa waeni ne faka ravea kia nea e kona; tera ko Jesus ne nai maatakina, kae koia se ne inu kiei.
35Tera ratou tukia ria koia, ma kae vaevae i ana suru, o fai taakaro kiei. 36Ia tua koratou ne fare ki raro i ngangea, koratou ne reo saki ko Jesus. 37I ana arunga i na pokouru, ne tusi ea ratou koa mo taranga faka piki rei kiei, ne ratou faka tautara sia koia iei: “Teinei ko Jesus, te Tii o nga Jew”. 38Tera ne ratou tukia koa taangata fai fai sara e toka rua ma Jesus, e taki tasi i ana faasi, na faasi matau ma na faasi sema.
39Te kano fenua e oro faka sara i ngangea, e ruu ko aratou pane o faka ngutu ngutu kia Jesus, 40#Mat 26.61; Jon 2.19.“Tera ko kee te tangata ka ofa aki ki raro te Paito Tapu, o kee taia ria ia foi aso e toru fuarei! Kae ko kee te Tama rei a Tupua, faka sao maso kee mai fongo o te raakau naa!”
41Ia fai atamai sokotasi, nga ariki fai kava ma nga fakaako oa Fono ma nga matapure ne fai fakkata kiei pe rake faoa: 42“Koia ne nai faka saofia ria ko rake taangata, kae se ma fai ke nai faka saofia maso koia! Siki koia te Tii o nga Israel? Kae pe koia ke faka sao ifo maso koia mai te raakau naa, tera kotatou ka fakatonu kiei! 43Koia e fakatonu ki Tupua, ta kae faka piri koia te Tama a Tupua. E laoi, tera, tatou ono mua ko Tupua ka fifia ke nai faka saofia koia i vakanga nei!”
44Ma a taangata e toka rua foki ne tukia ma koia, koraua e mmuna faka ngutu ngutu kiei ia fai atamai.
Te mate o Jesus
(Mak 15.33–41; Luk 23.44–49; Jon 19.28–30)
45I te raa e fuanga furu ma rua i te avatea, oko rei ki te raa e toru, te fenua ne purou ria ki te kau pouri ngiti rei. 46Ta i te vasia te raa ku piri ke toru, ko Jesus ne tangi forua rei ki runga, “Eloi, eloi, lama, sabatani!” na atamai, “Toku Tupua, toku Tupua, sea na atamai ne kee tiakina kuou?”
47Vasia rake faoa e turaki i te ngangea ne fakarongo kiei, tera mmuna rei koratou, “Koia e karanga kia Elijah!” 48Tera te tangata i ratou ne rere o sau te ʻsponsiʼ ke faka suu kia waeni kona, tuku ki te mata o te foi raakau, toro faki rei kia Jesus ke inu kiei.
49Kae rake taangata ne muna atu, “Tuku mua ke tatou ono na pe ko Elijah e au ke faka saofia koia!”
50Tera ko Jesus ne tangi foorua fokia, kae seke ma tana maanava.
51Tera te suru e sisi i mataa Paito Tapu ne masae rua ifo mai runga oko rei ki raro. Te kere ne ngaruru, ma a mato ne ma poka poka ki tua. 52A kere tamate ku ma poka ma te kano fenua o Tupua ne mate ku faka masike ake ki te ora. 53Koratou e tuku ko aratou tano, ma ia tua o Jesus ku masike mai i te mate, koratou ne oro ki te Noforanga Tapu, i kuraa e tokkapi rei ko te kano fenua ne ono kia ratou.
54Tera te vasia te tangata lasi o te kano tau ma ana faoa reosaki ko Jesus, ne ono ki te ngaruru ma a nea kaatoa ne faka sasa nei, koratou ku maatea rei ratou maattaku, kae muna, “E tonu rei, koia nei te Tama a Tupua!”
55 #
Luk 8.2,3. Tokarava ko nga maatua faafine i ngangea, e pula mmao mai rei, koratou ne tautari mai kia Jesus i Galilee ma ne sosoa kiei. 56Ia ratou nei, ko Mary Magdalene, ko Mary te nana o James ma Joseph, ma te nofine o Zebedee.
Te tanu anga o Jesus
(Mak 15.42–47; Luk 23.50–56; Jon 19.38–42)
57Tera i te vasia i te afi afi, te tangata taufenua mai Arimathea, na ingoa ko Joseph, koia fokia te kau fanonga o Jesus. 58Tera poi rei koia kia Pilate, o kaisi ki te tino o Jesus. Tera ko Pilate ne sori tana taranga ki ana faoa reo ke tuku kiei te tino. 59Tera sau e Joseph te tino, ruru rei kia kafu foou. 60Tera tuku ki na rua foou, ne songoi keri ko te rua i te mato. Tera faka rika rei ko te fatu lasi o mono kiei kae poi arei. 61Ko Mary Magdalene ma take Mary ku fare i ngangea e angai ki te tano.
Te reosaki anga o te tano
62Kae te aso ka maarama ake te Aso e tapu o nga Jew, ta ko nga ariki fai kava ma nga Pharisee ne taanaki kia Pilate. 63#Mat 16.21; 17.23; 20.19; Mak 8.31; 9.31; 10.33,34; Luk 9.22; 18.31–33.Koratou ne muna atu, “Maurunga ee, matou e maanatu te vasia o te tangata tataangutu e koi ora iei, koia ne faka ari koia ka faka masike ake ki te ora ia tua oa aso e toru. 64Sori ko au taranga, tera, ke reosaki faka matakite ko te tano, oko rei kia aso e toru, tera na kau fanonga ka se ma fai o oro o kaiaa ko na tino, kae faka ari ki te kano fenua ko Jesus ku faka masike ria mai i te mate. Te tataangutu nei ka sapa kese rei ma tana mataki tataangutu anga.”
65Tera ko Pilate ne faka ari atu kia ratou, “Sau ko faoa reo ke oro o faka poto o reosaki ko te tano.”
66Tera koratou ne oro, ma ne taufau ko te fatu mono o te tano, ma ne tuku ko ana faoa reosaki ke fare.
Iliyochaguliwa sasa
Matthew 27: TKP
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2025 Wycliffe Bible Translators, Inc.
