Matthew 21
21
Jesus e uru ma te maaroo ki Jerusalem
(Mak 11.1–11; Luk 19.28–40; Jon 12.12–19)
1Ta i te vasia ko Jesus ma na kau fanonga ku piri piri mai ki Jerusalem, koratou ne oomai ki te noforanga ko Bethphage, i te Maunga i Olive. I ngangea ko Jesus ne fakkau e toka rua i na kau fanonga ke mua oro ma ana taranga, 2“Oro ki te noforanga e tuu mai i mua e oro korua kiei naa, ma i mo vakanga ka koru maua te ʻdonkeyʼ e noa i ngangea ma tana tamai manu tangata. Vevete ki tua, aumai rei kia kuou. 3Kae pe koai e muna atu pe nia, faka ari atu kiei, ‘Te Ariki e fifia kiei,’ tera koia ka tuku atu i vakanga.”
4Te ngangea nei ne faka sasa ke fakatonu pe nia ma te ʻprophetʼ ne munaki e au tonu maori rei:
5“Faka ari ki te noforanga lasi o Zion,
Pula, totou Tii e au kia kotou!
Koia e tuku raro maso koia,
e nofo i te tua o te ʻdonkeyʼ ma te tamai manu ʻdonkeyʼ.”
6Tera na kau fanonga ne oro i mua, ma ne fai tautari pe nia ma Jesus ne faka ari atu kia raua ke fai. 7Ko raua ne aumai te ʻdonkeyʼ ma te tamai manu tangata, ne fora ko aratou suru ki rau tua, ma ne faka sopo ko Jesus ke nofo kiei. 8E tokarava rei te kano fenua ne forasi ko aratou suru i te riu ara, kae rake taangata ne sepe koa tauru rongo rongo, o fora ea ratou ki te riu ara. 9Te kano fenua e oro ia mua o Jesus, ma e oomai fokia i ana tua, ku fakatafito o foorua:
“Rausapai ki te Tama a David,
Tupua ke nai fakatapu ria
koia e au i te ingoa o te Ariki Tapu!
Rausapai ki Tupua!”
10Ta i vasia ko Jesus ne poi i roto i Jerusalem, te noforanga lasi kaatoa rei ku fepoikaki ma e foorua kae feesiri, “Koai koia naa?”
11Tongoi atu rei te kano fenua, “Teinei te ʻprophetʼ Jesus, mai Nazareth i Galilee.”
Jesus e poi ki te Paito Tapu
(Mak 11.15–19; Luk 19.45–48; Jon 2.13–22)
12Jesus ne poi ki rota Paito Tapu, ma ne nai fueina ki tua koratou kaatoa e fai tauvi ma e tauvi i kuraa. Koia ne nai furisia koa tepolo o faoa sisiaki mane, ma a noforanga o faoa e fai tauvi ia rupe. 13Ta kae muna atu kia ratou, “E tusia ria i te Pepa Tapu:
‘Ko Tupua ne muna,
Toku paito ka ati te paito rotu.’
“Kae kotou ne furi saki ea kotou ma faka leku otou kaiaa ranga!”
14Faoa mata sengi ma faoa sape ne oomai kia Jesus i te Paito Tapu, faka maroro rei ea koia koratou. 15Nga ariki fai kava ma nga fakaako oa Fono, ku teke i vasia koratou ne ono kia matuaa nea laoi e fai ea koia, ma nga tamariki e foorua i rota Paito Tapu, “Rausapai ki te Tama a David!” 16Ta feesiri atu rei koratou kia Jesus, “Ko kee e fakarongo pe nia ma ratou e mmuna kiei?”
Tongoi atu rei ko Jesus, “Kuou e fakarongo. Ea, kotou si se ne tau ko ngangea nei i te Pepa Tapu?
‘Koia ne akonaki nga tamariki
ma nga memea
ke sori te matuaa rausapai.’ ”
17Jesus ne tuku koratou, ma ne poi ki tua ma te noforanga lasi ki Bethany, i te ngangea koia ne nofo i te poo katoa iei.
Ko Jesus e nai tautukuna te raakau e ati te ʻfigʼ
(Mak 11.12–14; 11.20–24)
18I na vasia koia e foki ki te noforanga lasi i mo pongi pongi o take aso, ko Jesus ku fiakai. 19Koia ne nai ravea te raakau e ati te ʻfigʼ i te vae riu ara, ta poi rei kiei, kae siei rei pe se foi fua ne nai maua iei, kae a rau raakau fuarei. Ta muna atu rei koia ki te raakau, “Ko kee ka si see fai rei fokia ko ni fua raakau!” Tera i mo vakanga te raakau ku maroo arei.
20Te kau fanonga ne ono kiei ma ne mate ko aratou tino ma ne feesiri, “Ne ma fai faka fefea te ʻfigʼ naa ke maroo arei i mo vakanga?”
21 #
Mat 17.20; 1 Cor 13.2. Tongoi atu rei ko Jesus, “Kuou e faka ari atu kia kotou te maori: Kae kotou pe e fakatonu kae si see faka tuka tuka, ko kotou ka ma fai fuarei ke fai pe nia ma aku ne fai ki te raakau te ʻfigʼ nei; kae siei fuarei teinei, kotou ka ma fai fuarei ke muna atu ki te maunga nei ke tokai ake maso koia o poi maso koia ki roto moana, ka ma fai fuarei. 22Kae kotou pe e fakatonu, ka sau pe nia motou e kaaisi kiei i te rotu.”
Te fesiri anga ki te tonu o Jesus
(Mak 11.27–33; Luk 20.1–8)
23Jesus ne foki mai ki te Paito Tapu, ta i vasia koia e ako iei, nga ariki fai kava ma nga matapure ne oomai kia koia, o feesiri atu kiei, “Koai ne faka patino ia kee, ke fai koa nea nei? Koai ne nai faka tonu sia ko kee ke fai koa nea nei?”
24Ta tongoi atu rei ko Jesus kia ratou, “Kuou ka fesiri atu kia kotou te fesiri sokotasi fuarei, pe kotou e sori mai na tongoi, tera kuou ka faka ari atu kia kotou koai ne nai faka tonu sia kuou ke fai koa nea nei. 25Mai fea te tonu a John ke fai te faka uku: Mai Tupua o pe mai nga taangata?”
Koratou ku fakatafito o taua taranga maso koratou, “Ko tatou ka mmuna faka fefea kiei? Kae pe tatou ke tongoi, ‘Mai Tupua,’ koia ka muna mai kia tatou, ‘Sea rei natafito, kotou si se ne fakatonu kia John?’ 26Kae pe kotatou ke mmuna, ‘Mai nga taangata,’ tatou e maattaku ki pe nia ma te kano fenua ka fai mai; natafito ku ratou iroa ina kaatoa rei ko John te ʻprophetʼ.” 27Ta tongoi rei koratou kia Jesus, “See matou iroa ina.”
Ta muna atu rei koia kia ratou, “Tera kuou fokia ka see faka ari atu kia kotou pe koai ne nai faka tonu sia kuou ke fai koa nea nei.
Te araara fanga faka tautau kia tama e toka rua
28“Kotou e maanatu faka fefea? Nai take vasia te tangata ana tama e fai e toka rua, koia ne poi ki te uru matua o muna atu kiei, ‘Taku tama ee, poi o fai fekau i te roto tofi i te aso nei.’ 29Kae tongoi atu rei koia, ‘Kuou si see fifia ke kau poi,’ kae faka molakea koia ne siaki ko na atamai, ta koia ne poi ki te tofi. 30Tera te mana ne poi ki take tana tama, o fai atu koa taranga kia nea sokotasi. Ta tongoi atu rei koia, ‘Faka maori atu rei, ioo,’ kae koia si se ne poi. 31Koai rei ia raua nei ne tautari ki te fifia o rau mana?”
Tongoi atu rei koratou, “Te uru matua.”
Tera muna atu rei ko Jesus kia ratou, “Kuou e faka ari atu kia kotou te maori: Ko nga faoa tari takisi, ma nga faoa oro vare e oro ki roto i te Kainanga o Tupua e mua ia kotou. 32#Luk 3.12; 7.29,30.John te Faka uku ne au kia kotou, ke faka ari ari kia kotou te riu ara ke taka ki te tonu, kae kotou ku see fifia ke fakatonu kiei; kae nga faoa tari takisi ma nga faoa oro vare ne fakatonu kiei. Moa rei vasia kotou ne ono nei, kia muri kotou si se ne siaki otou atamai o fakatonu kiei.
Te araara fanga faka tautau kia faoa e oono i te tofi waeni
(Mak 12.1–12; Luk 20.9–19)
33“Fakarongo ki take araara fanga faka tautau: Nai take vasia te tangata ona koa kere, koia ne too ko na tofi fufuei raakau waeni. Koia ne taa ko na saisai vakai iei, keri ma ana rua o faka tuu iei ma ana ngangea kumi oa waeni, ma ne taa ana paito reo. Ta tuku rei ea koia ko na tofi ki faoa ke reo iei, kae poi rei ki take potu fenua e mmao. 34Ta te vasia ku oko ke faki koa ʻgrapeʼ iei, koia ne fakkau ko ana fai fekau ke oro o sau ko na vaenga i faoa e oono iei. 35Kae faoa reo ne ratou pukea ko ana fai fekau ma ne ratou saia ria take fai fekau, kae ratou tamatea ko take tangata, kae ratou tau fatu ria rei take tangata. 36Tera fokia te tangata ne fakkau ea koia ko rake ana fai fekau kia ratou, e tokarava ma mataki vasia; kae a fainga sokotasi ne faia kia ratou e faoa reo. 37Faka muri rei, koia ne fakkau kia ratou ko tana kee tama maori. Koia e muna maso koia, ‘Matea koratou ka ratou faka epa ria ko taku tama nei.’ 38Kae vasia o te faoa reo ne ono ki te tama, muna rei maso koratou, ‘Teinei te tama maori a tangata ona te tofi; oomai ke tatou tamatea ria koia, ta sau raa ea tatou ko na tofi!’ 39Tera ne ratou pukea koia, ne ratou peia koia ki tua ma na tofi, ta ratou tamatea rei.”
40Fesiri atu rei ko Jesus, “Ta i vasia o tangata ona ko te tofi ku au, ta a nia rei ma ana ka fai ki faoa reo i na tofi?”
41Tongoi atu rei koratou, “Koia ka nai tamatea ria koa taangata pariki naa, kae tuku rei ea koia ko na tofi ki rake faoa, koratou ka sori kia koia ko na vaenga i te tofi i na vasia ka faki rei iei.”
42Ta muna atu rei ko Jesus kia ratou, “Ea, kotou si se ne kotou taua i te Pepa Tapu e muna?
‘Te fatu rei ne tiakina e faoa taa paito,
ku siaki te matuaa fatu rei o te paito!
Neinei ne fai e te Ariki,
ma e faka maseke ia tatou mata!’ ”
43Ta muna ake foki ko Jesus, “Ta kuou e faka ari atu kia kotou, ko te Kainanga o Tupua ka sau kesea maia kotou, o sori ki te kano fenua ka ratou faka fua laoi koa fua raakau maori rei. 44[Pe koai ma e feettoki ki te fatu nei ka sepe sepea riki rei. Ka te fatu nei e too pe kiai, ka kumia pala pala rei.”]
45Ta i vasia nga ariki fai kava ma nga Pharisee ne fakarongo kia Jesus, ki aana araara fanga faka tautau, ku ratou iroa ina koia e muna kia ratou. 46Ta koratou e fai ke puke ko Jesus, kae ratou e maattaku i te kano fenua, natafito te kano fenua e ratou iroa ina ko Jesus te ʻprophetʼ.
Iliyochaguliwa sasa
Matthew 21: TKP
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2025 Wycliffe Bible Translators, Inc.
