Luke 5
5
Jesus e nai karanga tia ko ana mataki kau fanonga
(Mat 4.18–22; Mak 1.16–20)
1 #
Mat 13.1,2; Mak 3.9,10; 4.1. Take aso Jesus e tuu i te vae roto i Gennesaret, mo vasia te kano fenua e rofi mai kia koia ke fakarongo kia taranga a Tupua. 2Koia ne ono kia vaka e rua e tosi ki ngauta. A taangata fai ika ku tuku a rau vaka, kae e furu ko a rau kupenga. 3Jesus ne sopo ki te vaka o Simon, ma ne kaisi atu kiei ke vero ifo ki te roto vai. Tera koia ne nofo ki raro, fakatafito raa o fakaako ko te kano fenua mai i fonga vaka.
4Vasia koia ku faka oti tana fakaako ranga, koia ne muna atu kia Simon, “Vero ifo te vaka ki tua ki te roto anga, ko kee mo ou soavaka tuku otou kupenga ki raro ke fakatau ni ika.”
5 #
Jon 21.3. Tongoi atu rei ko Simon, “Te Ariki ee, ko matou ne fai ika i te poo roroa nei, siei rei pe sea ne tau, kae natafito ko kee ku muna, tera kuou ka tuku ki raro a kupenga nei.” 6#Jon 21.6.Tera tuku rei ea raua a kupenga ki raro, tauia maatea rei e nga ika, te kupenga ku piri piri ke ma sae sae. 7Tera taaro koraua kia rau kau soavaka i take vaka ke oomai o sosoa kia raua. Koratou ne oomai, utufaki koa vaka e rua nei ku pipi i te ika, koratou ku piri piri ke ngoto. 8Vasia o Simon Peter ne ono mata, koia ne tokoturi ia mua o Jesus, kae muna atu arei kiei, “Te Ariki ee, poi kese ma kuou, kuou te tangata titisara!” 9Natafito koia ma ana kau soavaka ku mmate ko aratou tino ki te angaa ika ne faka tau. 10Fakapera rei kia kau soavaka o Simon, ko James ma John, a tama a Zebedee.
Tera ko Jesus ne muna atu kia Simon, “Kau see mataku! I vasia nei, ko kee ka fai faangota ki nga taangata.” 11Tera koratou ne tosi ki ngauta a ratou vaka, tuku koa nea kaatoa, kae tautari rei kia Jesus.
Jesus e ikirave ki te tangata tino para
(Mat 8.1–4; Mak 1.40–45)
12Mo vasia o Jesus ku nofo i te taoni, te ngangea te tangata ana tino e aofia e te tino para. Vasia koia ne nai ravea ina ko Jesus, koia ne tokoturi ki ana mua, o kaisi atu kiei, “Maurunga ee, pe ko kee e fifia rei, ko kee ka ma fai rei kuou ke maa.”
13Jesus ropa atu rei na rima, o poo atu kia koia, kae muna atu rei, “Kuou e fifia ko kee ke maa.” I mo vakanga te tangata ana tino e para ku maa. 14Jesus ne muna atu kiei, “Kau see faka ari pe kiai, kae poi fuarei ki te pure fai kava, o faka ari kiei ke maataki atu ko kee. Tera sori raa ke kavaaki tau sori pea Moses ne muna, ke fakatonu sia ki faoa kaatoa ko kee ku furuna ku maroro mai tou ngae ngae.”
15Kae te rongo o Jesus ku kavea saere katoa rei, ma faoa o te fenua ne oomai ke fakarongo kiei, ma ke faka maroro ria mai aratou fakarongo neaisu. 16Kae koia ne poi kese ki ngangea e tuu amunoa ke rotu iei.
Jesus e faka maroro te tangata tino mate
(Mat 9.1–8; Mak 2.1–12)
17Take aso, vasia o Jesus noko fakaako iei, rake Pharisee ma nga fakaako oa Fono e farenaki i ngangea, koratou e oomai mai nga taoni kaatoa i Galilee, ma i Judea, ma i Jerusalem. A manuu o te Ariki ku naa ia Jesus ke faka maroro ea koia koa fakarongo neaisu. 18I te ngangea, a taangata e amo mai te tangata tino mate, e mee i na meeranga. Koratou e fai rei ke kave ki te rota paito ke tuku kia tafa o Jesus. 19Kae te paito ku pii i fenua, koratou ku se ma oro ke oko kia Jesus, tera koratou ne amo ko tangata ki fongo paito, o sara te taufufu o sori ifo ki raro ko tangata i na meeranga i rottonu o te kano fenua kae ia mua rei o Jesus. 20Vasia ko Jesus ne nai ravea ratou fai fakatonu e fai, muna atu rei ki tangataa, “Soavaka ee, au sara ku faka ngaromia.”
21Ko nga Pharisee ma nga fakaako oa Fono ne fakatafito o mumuna maso koratou, “Koai te tangata nei e muna faka puaka faka peinei ki Tupua? Siei se tangata ke nai faka ngaromia koa sara, Tupua fuarei e ma fai!”
22Jesus ku nai iroa ina aratou maanatu, tera muna atu rei kia ratou, “Sea na atamai ko kotou e maanatu faka peenaa? 23Ea, e ma faingaofia ke kau muna, ‘Au sara ku faka ngaromia,’ o pe e faingaofia ke kau muna, ‘Tuu ki runga o saere’? 24Kuou ka faka ari atu kia kotou ke kotou iroa ina te Tama a Tangata e fai na manuu ia taangata nei ke nai faka ngaromia koa sara.” Tera koia ne muna atu ki te tangata tino mate, “Kuou e muna atu kia kee: Tokai ki runga, sau ou meeranga o poi ki tou paito!”
25I mo vakanga tangata tokai ake arei ki runga i aratou mata kaatoa rei, o sau na meenga noko mee kiei, poi arei ki na paito, ma te rausapai ki Tupua. 26Faoa kaatoa ku fea vare ko aratou tino, ma ne rausapai ki Tupua, ma ku maatea rei aratou maattaku, ma e mmuna, “Tatou ku ono mata rei kia nea taurekareka i te aso nei!”
Jesus e nai karanga tia ko Levi
(Mat 9.9–13; Mak 2.13–17)
27Ia tua nei, Jesus ne poi ki tua, nai ravea ina rei te tangata tari takisi na ingoa ko Levi, e nofo i na ofisi. Muna atu rei ko Jesus, “Tautari mai kia kuou.” 28Levi ne tokai ake ki runga, tuku koa ana kope kopenga kaatoa rei, kae tautari arei kiei.
29Tera ko Levi fai rei ko te kai kai lasi i na paito mo Jesus, e rotoi ki faoa ne kafi ea koia nga faoa tari taakisi e tokarava rei ma rake faoa. 30#Luk 15.1,2.A rake Pharisee ma rake fakaako oa Fono e kau fokia ia ratou, ne fai fai ngutu ki te kau fanonga o Jesus, kae feesiri rei, “Sea na atamai ko kotou e kau kai ma faoa tari takisi ma rake faoa pariki?”
31Tongoi atu rei ko Jesus kia ratou, “Te faoa maroro si see ratou raua ko se ʻdoctorʼ, kae faoa fuarei e ngae ngae. 32Kuou si se ne au ke karanga ki te faoa e tonu, kae ki te faoa titisara ke siaki ko aratou ora.”
Te fesiri ki te faka naa mangumangu
(Mat 9.14–17; Mak 2.18–22)
33Rake faoa ne muna atu kia Jesus, “Te kau fanonga o John e faka naa mangumangu nga vasia katoa ma e rotu rei, ma a kau fanonga o nga Pharisee e faka peeraa rei fokia, kae tou kau fanonga e kkai ma e inu.”
34Tongoi atu rei e Jesus, “Ea, ko kotou e maanatu, kotou e ma fai ko te kanoa paito o te kai kai o te avanga ke faka naa mangumangu i vasia o te tangata avanga e nofo ma koratou? Siki siei arei! 35Kae te vasia ka au, vasia o tangata avanga ka sau kese mai ia koratou, teeraa ko te vasia koratou ka faka naa mangumangu iei.”
36Jesus ne araara faki fokia ko te araara fanga faka tautau nei kia ratou: “Siei pe koai ke sae ko te pakaa suru foou o sina ki te suru tuei. Kae koia ke fai, koia ka nai saea ko te suru foou, te pakaa suru foou ka si see ma piki ki pakaa suru tuei.
37“Siei pe koai fokia ke ringi koa waeni foou kia raukiri waeni tuei. Ka fai, te waeni foou ka ma poka poka ana raukiri, tera te waeni ka maringi, ma te raukiri ka fai pariki tia. 38Kae tonu ia, a waeni foou e ringi kia raukiri foou! 39Tera siei pe koai ke nai inu mia koa waeni foou ia tua ku nai inu mia koa waeni ku naa roa, natafito koia ka muna, ‘Waeni ku naa roa e laoi sapa.’ ”
Iliyochaguliwa sasa
Luke 5: TKP
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2025 Wycliffe Bible Translators, Inc.
Luke 5
5
Jesus e nai karanga tia ko ana mataki kau fanonga
(Mat 4.18–22; Mak 1.16–20)
1 #
Mat 13.1,2; Mak 3.9,10; 4.1. Take aso Jesus e tuu i te vae roto i Gennesaret, mo vasia te kano fenua e rofi mai kia koia ke fakarongo kia taranga a Tupua. 2Koia ne ono kia vaka e rua e tosi ki ngauta. A taangata fai ika ku tuku a rau vaka, kae e furu ko a rau kupenga. 3Jesus ne sopo ki te vaka o Simon, ma ne kaisi atu kiei ke vero ifo ki te roto vai. Tera koia ne nofo ki raro, fakatafito raa o fakaako ko te kano fenua mai i fonga vaka.
4Vasia koia ku faka oti tana fakaako ranga, koia ne muna atu kia Simon, “Vero ifo te vaka ki tua ki te roto anga, ko kee mo ou soavaka tuku otou kupenga ki raro ke fakatau ni ika.”
5 #
Jon 21.3. Tongoi atu rei ko Simon, “Te Ariki ee, ko matou ne fai ika i te poo roroa nei, siei rei pe sea ne tau, kae natafito ko kee ku muna, tera kuou ka tuku ki raro a kupenga nei.” 6#Jon 21.6.Tera tuku rei ea raua a kupenga ki raro, tauia maatea rei e nga ika, te kupenga ku piri piri ke ma sae sae. 7Tera taaro koraua kia rau kau soavaka i take vaka ke oomai o sosoa kia raua. Koratou ne oomai, utufaki koa vaka e rua nei ku pipi i te ika, koratou ku piri piri ke ngoto. 8Vasia o Simon Peter ne ono mata, koia ne tokoturi ia mua o Jesus, kae muna atu arei kiei, “Te Ariki ee, poi kese ma kuou, kuou te tangata titisara!” 9Natafito koia ma ana kau soavaka ku mmate ko aratou tino ki te angaa ika ne faka tau. 10Fakapera rei kia kau soavaka o Simon, ko James ma John, a tama a Zebedee.
Tera ko Jesus ne muna atu kia Simon, “Kau see mataku! I vasia nei, ko kee ka fai faangota ki nga taangata.” 11Tera koratou ne tosi ki ngauta a ratou vaka, tuku koa nea kaatoa, kae tautari rei kia Jesus.
Jesus e ikirave ki te tangata tino para
(Mat 8.1–4; Mak 1.40–45)
12Mo vasia o Jesus ku nofo i te taoni, te ngangea te tangata ana tino e aofia e te tino para. Vasia koia ne nai ravea ina ko Jesus, koia ne tokoturi ki ana mua, o kaisi atu kiei, “Maurunga ee, pe ko kee e fifia rei, ko kee ka ma fai rei kuou ke maa.”
13Jesus ropa atu rei na rima, o poo atu kia koia, kae muna atu rei, “Kuou e fifia ko kee ke maa.” I mo vakanga te tangata ana tino e para ku maa. 14Jesus ne muna atu kiei, “Kau see faka ari pe kiai, kae poi fuarei ki te pure fai kava, o faka ari kiei ke maataki atu ko kee. Tera sori raa ke kavaaki tau sori pea Moses ne muna, ke fakatonu sia ki faoa kaatoa ko kee ku furuna ku maroro mai tou ngae ngae.”
15Kae te rongo o Jesus ku kavea saere katoa rei, ma faoa o te fenua ne oomai ke fakarongo kiei, ma ke faka maroro ria mai aratou fakarongo neaisu. 16Kae koia ne poi kese ki ngangea e tuu amunoa ke rotu iei.
Jesus e faka maroro te tangata tino mate
(Mat 9.1–8; Mak 2.1–12)
17Take aso, vasia o Jesus noko fakaako iei, rake Pharisee ma nga fakaako oa Fono e farenaki i ngangea, koratou e oomai mai nga taoni kaatoa i Galilee, ma i Judea, ma i Jerusalem. A manuu o te Ariki ku naa ia Jesus ke faka maroro ea koia koa fakarongo neaisu. 18I te ngangea, a taangata e amo mai te tangata tino mate, e mee i na meeranga. Koratou e fai rei ke kave ki te rota paito ke tuku kia tafa o Jesus. 19Kae te paito ku pii i fenua, koratou ku se ma oro ke oko kia Jesus, tera koratou ne amo ko tangata ki fongo paito, o sara te taufufu o sori ifo ki raro ko tangata i na meeranga i rottonu o te kano fenua kae ia mua rei o Jesus. 20Vasia ko Jesus ne nai ravea ratou fai fakatonu e fai, muna atu rei ki tangataa, “Soavaka ee, au sara ku faka ngaromia.”
21Ko nga Pharisee ma nga fakaako oa Fono ne fakatafito o mumuna maso koratou, “Koai te tangata nei e muna faka puaka faka peinei ki Tupua? Siei se tangata ke nai faka ngaromia koa sara, Tupua fuarei e ma fai!”
22Jesus ku nai iroa ina aratou maanatu, tera muna atu rei kia ratou, “Sea na atamai ko kotou e maanatu faka peenaa? 23Ea, e ma faingaofia ke kau muna, ‘Au sara ku faka ngaromia,’ o pe e faingaofia ke kau muna, ‘Tuu ki runga o saere’? 24Kuou ka faka ari atu kia kotou ke kotou iroa ina te Tama a Tangata e fai na manuu ia taangata nei ke nai faka ngaromia koa sara.” Tera koia ne muna atu ki te tangata tino mate, “Kuou e muna atu kia kee: Tokai ki runga, sau ou meeranga o poi ki tou paito!”
25I mo vakanga tangata tokai ake arei ki runga i aratou mata kaatoa rei, o sau na meenga noko mee kiei, poi arei ki na paito, ma te rausapai ki Tupua. 26Faoa kaatoa ku fea vare ko aratou tino, ma ne rausapai ki Tupua, ma ku maatea rei aratou maattaku, ma e mmuna, “Tatou ku ono mata rei kia nea taurekareka i te aso nei!”
Jesus e nai karanga tia ko Levi
(Mat 9.9–13; Mak 2.13–17)
27Ia tua nei, Jesus ne poi ki tua, nai ravea ina rei te tangata tari takisi na ingoa ko Levi, e nofo i na ofisi. Muna atu rei ko Jesus, “Tautari mai kia kuou.” 28Levi ne tokai ake ki runga, tuku koa ana kope kopenga kaatoa rei, kae tautari arei kiei.
29Tera ko Levi fai rei ko te kai kai lasi i na paito mo Jesus, e rotoi ki faoa ne kafi ea koia nga faoa tari taakisi e tokarava rei ma rake faoa. 30#Luk 15.1,2.A rake Pharisee ma rake fakaako oa Fono e kau fokia ia ratou, ne fai fai ngutu ki te kau fanonga o Jesus, kae feesiri rei, “Sea na atamai ko kotou e kau kai ma faoa tari takisi ma rake faoa pariki?”
31Tongoi atu rei ko Jesus kia ratou, “Te faoa maroro si see ratou raua ko se ʻdoctorʼ, kae faoa fuarei e ngae ngae. 32Kuou si se ne au ke karanga ki te faoa e tonu, kae ki te faoa titisara ke siaki ko aratou ora.”
Te fesiri ki te faka naa mangumangu
(Mat 9.14–17; Mak 2.18–22)
33Rake faoa ne muna atu kia Jesus, “Te kau fanonga o John e faka naa mangumangu nga vasia katoa ma e rotu rei, ma a kau fanonga o nga Pharisee e faka peeraa rei fokia, kae tou kau fanonga e kkai ma e inu.”
34Tongoi atu rei e Jesus, “Ea, ko kotou e maanatu, kotou e ma fai ko te kanoa paito o te kai kai o te avanga ke faka naa mangumangu i vasia o te tangata avanga e nofo ma koratou? Siki siei arei! 35Kae te vasia ka au, vasia o tangata avanga ka sau kese mai ia koratou, teeraa ko te vasia koratou ka faka naa mangumangu iei.”
36Jesus ne araara faki fokia ko te araara fanga faka tautau nei kia ratou: “Siei pe koai ke sae ko te pakaa suru foou o sina ki te suru tuei. Kae koia ke fai, koia ka nai saea ko te suru foou, te pakaa suru foou ka si see ma piki ki pakaa suru tuei.
37“Siei pe koai fokia ke ringi koa waeni foou kia raukiri waeni tuei. Ka fai, te waeni foou ka ma poka poka ana raukiri, tera te waeni ka maringi, ma te raukiri ka fai pariki tia. 38Kae tonu ia, a waeni foou e ringi kia raukiri foou! 39Tera siei pe koai ke nai inu mia koa waeni foou ia tua ku nai inu mia koa waeni ku naa roa, natafito koia ka muna, ‘Waeni ku naa roa e laoi sapa.’ ”
Iliyochaguliwa sasa
:
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2025 Wycliffe Bible Translators, Inc.